Ore i mexü̃ ga Cuáü̃ ümatüxü̃ 1:3 - Tupanaarü Ore

³ Rü Tupana rü Nanemaxã nixĩ ga naxüxü̃ ga guxü̃ma. Rü nataxuma i ta̱xacü i ngẽxmaxü̃ i tama namaxã üxü̃.

Ore i mexü̃ ga Cuáü̃ ümatüxü̃ 1:3 Iomraidhean Croise

Naanearü ügüchiga 1:1

Yema Tupana namaxã inaxügüxü̃ nixĩ nax naxüaxü̃ ga guxü̃ma i daxũwa ngẽxmaxü̃ rü ñoma i naane. Natürü ñaa naane ga noxri rü taxũta mea nango̱x yerü dexátüü̃wa nayexma rü naxẽanemare. Rü nüma ga Tupanaãxẽ rü naétügu ínachü̱xüxüxü̃.

Naanearü ügüchiga 1:26

Rü yexguma ga Tupana rü nügümaxã ñanagürü: —¡Ngĩxã yigüraxü̃ãcü tanaxü ya yatü! Rü nüma rü namaxã tá inacua̱x i guxü̃ma i ngẽma dexáwa maxẽxü̃, rü ngẽma ixãxpe̱xatüxü̃, rü ngẽma naxü̃nagü, rü ngẽma naeü̃gü i naixnecüwa maxẽxü̃, rü ngẽma naeü̃gü i waixü̃müanegu nügü itúgüxü̃ —ñanagürü.

Wiyaegü 102:25

Rü noxriarü ügügu rü cuma cunaxü ga ñoma i naane. Rü cumatama nixĩ ga cunaxüxü̃ ga guxü̃ma i ngẽma dauxü̃wa nüxü̃ idauxü̃.

Wiyaegü 33:6

Rü nüma ga Cori ya Tupana rü norü dexamaxã nanaxü ga daxũguxü̃ i naane rü norü cue ñaxü̃maxã nanaxü ga guxü̃ma i ẽxtagü i ngéma ngẽxmagüxü̃.

Ichaía 45:12

Rü choma nixĩ ga chaxüxü̃ ga ñoma i naane rü ngẽma nawa maxẽxü̃. Rü choma nixĩ ga cho̱xme̱xmaxã chanaxüxü̃ ga daxũguxü̃ ga naane, rü chanangóexẽẽxü̃ ga ẽxtagü.

Ichaía 45:18

Rü choma ya Tupana ya naxücü i daxũguxü̃ i naane rü ñoma i naane rü guxü̃ma i nawa ngẽxmagüxü̃ nax tama nangeãcuxü̃ca̱x, rü ñachagürü: —Choma nixĩ ya Tupana chixĩxü̃ rü nataxuma i to.

Ore i mexü̃ ga Cuáü̃ ümatüxü̃ 1:10

Rü nüma ga gumá Nane ga Tupanaarü Oregu ãégacü rü ñoma ga naanewa nayexma. Rü woo Nanatü ya Tupana rü namaxã nanaxü ga ñoma ga naane, natürü ñoma ga naanecüã̱x ga duü̃xü̃gü rü tama nüxü̃ nacua̱xgü nax texé yixĩxü̃.

Ore i mexü̃ ga Cuáü̃ ümatüxü̃ 1:2

Rü naxü̃pa ga guxü̃ma rü nüma ga Tupana Nane rü Tupanaxü̃tawatama nayexma.

Efesios 3:9

Rü nüma ga Tupana ya guxü̃arü üruxü̃ ixĩcü, rü choxü̃ namu nax guxü̃ i duü̃xü̃güxü̃ nüxü̃ chacua̱xẽẽxü̃ca̱x i ngẽma norü ĩnü ga nũxcüma nüxicatama nüxü̃ nacuáxü̃.

Popera ga Yudíugü ga yaxõgüxü̃ca̱x ümatüxü̃ 11:3

Rü ngẽma tórü õgagu nixĩ i nüxü̃ icuáxü̃ nax aixcüma yixĩxü̃ nax Tupana rü norü oremaxãmare nango̱xẽẽãxü̃ ga ñoma ga naane rü üa̱xcü rü tauemacü rü woramacurigü rü ẽxtagü. Rü yemaacü ga Tupana, rü ngürüwa nanango̱xẽẽmare ga guxü̃ma i ngẽma ñu̱xma nüxü̃ idauxü̃.

Nüxíraxü̃xü̃ ga popera ga Cuáü̃ ümatüxü̃ 5:1

Guxü̃ma ya yíxema yaxṍxe nax Cristu yixĩxü̃ ya Ngechuchu, rü Tupana nane tixĩ. Rü guxãma ya yíxema Tanatü ya Tupanaxü̃ ngechaü̃güxe, rü nüxü̃ tangechaü̃ ta i naxacügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:14

Rü yema chomaxã idexaxü̃ rü ñanagürü ta: “Chanaxwa̱xe i Laodichéawa ngẽxmagüxü̃ i yaxõgüxü̃arü ãẽ̱xgacüca̱x cunaxümatü rü ñacurügü tá: ‘Ñaa nixĩ i norü ore ya yimá aixcüma ixĩcü. Rü nüma nixĩ i nüxü̃ yaxuxü̃ i ore i aixcüma ixĩxü̃ rü inaxügüxü̃ ga guxü̃ma ga yema Tupana üxü̃’.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:11

Rü ñanagürügü: “Pa Torü Cori, Pa Torü Tupanax, cuxü̃ nixĩ i namexü̃ nax ticua̱xüü̃güxü̃ rü cuxü̃ tataxẽẽgüxü̃, yerü cuma nixĩ ga cunaxüxü̃ ga guxü̃ma, rü curü ngúchaü̃gagu nixĩ i ñu̱xma nangẽxmagüxü̃ i ngẽma cuxüxü̃”, ñanagürügü.