Ester 3:8 - Tupanaarü Ore

⁸ Rü nüma ga Amáü̃ rü ãẽ̱xgacü ga Achuéruxü̃tawa naxũ nax namaxã nüxü̃ yanaxuxü̃ca̱x nachiga ga yema. Rü ñanagürü: —Pa Ãẽ̱xgacüx, rü natanüwa i guxü̃ma i ngẽma togü i nachixü̃anecüã̱xgü rü nangẽxma i wüxitücumü i tama togümaxã wüxiguchaü̃xü̃. Erü ngẽma nacümagü rü nanatoraxü̃ rü tama naga naxĩnüe i ngẽma curü mugü, Pa Ãẽ̱xgacüx. Rü ngẽmaca̱x, Pa Ãẽ̱xgacüx, rü tama name nax ñaa naane i namaxã icucuáxü̃wa namaxẽxü̃.

Ester 3:8 Iomraidhean Croise

Édra 4:6

Rü yexguma gumá taunecü ga Achuéru nagu inaxügücü nax ãẽ̱xgacü yixĩxü̃ ga Pérchiaanewa rü yema uanügü rü wüxi ga popera ga chixri Yudáanecüã̱xgüchiga rü Yerucharéü̃cüã̱xgüchiga idexaxü̃ naxümatügü. Rü ñu̱xũchi yema popera rü ãẽ̱xgacü ga Achuéruxü̃tawa nanamugü.

Neemía 1:8

¡Rü nüxna nacua̱xãchi i curü ore i Moichémaxã nüxü̃ quixuxü̃! Erü cuma rü nüxü̃ quixu rü ngẽxguma toma chixexü̃ cupe̱xewa taxü̱xgu rü tá togü i nachixü̃anegügu toxü̃ cuwoonemare, natürü ngẽxguma chi wena cuxca̱x tawoeguxgu rü aixcüma nagu tamaxẽgu i curü mugü, rü woo ñoma i naane íyacuáxü̃gu tawoonegu, rü cuma rü chi tochixü̃aneca̱x toxü̃ cuyagagü, rü ngẽma nachica i üünexü̃ i cumatama nüxü̃ cuxunetaxü̃ nax nawa cungexmaxü̃wa wenaxarü toxü̃ cugagüxü̃ca̱x.

Ester 3:9

Rü ngẽmaca̱x Pa Ãẽ̱xgacüx, ega curü me yixĩxgu i ngẽma nüxü̃ chixuxü̃ ¡rü ẽcü naxunagü i wüxi i mu i nüxü̃ ixuxü̃ nax noxtacüma nada̱i̱xü̃ i ngẽma Yudíugü! Rü choma rü tá 330,000 quíru nagúxü̃ i diẽrumü ichaxã nax ngẽmamaxã naxütanüxü̃ca̱x nüxü̃́ i ngẽma nada̱i̱xü̃ —ñanagürü.

Ester 4:1

Rü yexguma Maduquéu nüxü̃ cua̱xgu ga yema unagüxü̃ rü nügü narügáutechiru yerü poraãcü nangechaü̃. Rü yemaca̱x témüxü̃ ga naxchirugu nicu̱x rü tanimacamaxã nügü nagüeru. Rü guma ĩanegu ínayaxüegu rü tagaãcü aita naxü norü ngechaü̃maxã.

Yeremía 33:24

—¿Tama ẽ̱xna nüxü̃ cuxĩnüxü̃ i ngẽma duü̃xü̃gü nüxü̃ ixuxü̃ nax choma rü marü nüxü̃ chaxoxü̃ i ngẽma Iraéanecüã̱xgü rü Yudáanecüã̱xgü, ñagüxü̃? Rü ngẽmaca̱x chixri chorü duü̃xü̃güxü̃ narüdaunü rü nüxü̃ naxoe, rü nüxü̃ nixugüe nax tama wüxi i nachixü̃ane yixĩxü̃ i ñu̱xma.

Yeremía 50:17

Ngẽma Iraétanüxü̃ rü ñoma wüxi i carnéru i rütaxuxü̃ i leóü̃gü nawe ingẽxü̃tanüxü̃rüxü̃ nixĩgü. Rü noxri rü yema Achíriaanearü ãẽ̱xgacü nanadai. Rü yemawena rü Babiróniaanearü ãẽ̱xgacü ga Nabucudonochó rü nanadai ga yema duü̃xü̃gü ga yéma yaxǘgüxü̃.

Echequié 11:16

Natürü i cumax, Pa Echequiéx, rü tá ngẽma Iraétanüxü̃ i to i nachixü̃anegüwa gagüxü̃maxã nüxü̃ quixu i chorü ore i ñaxü̃: “Woo ngẽma to i nachixü̃anegügu pexü̃ chawoone, natürü taxũtáma guxü̃guca̱x nixĩ. Erü ngẽma nachixü̃anegü i nagu pewoonexü̃wa rü chomatátama nixĩ i pemaxã changexmaxü̃” —ñachagürü.

Echequié 6:8

Rü tá nangẽxma i ñuxre i petanüxü̃ i taxũtáma yuexü̃. Natürü nümagü rü togü i nachixü̃anegügu tá nawoone.

Danié 3:8

Natürü ñuxre ga Cadéuanecüã̱xgü rü ãẽ̱xgacü ga Nabucudonochóxü̃tawa naxĩ nax Yudíugüxü̃ ínaxuaxü̃güxü̃ rü ñanagürügü:

Danié 6:13

Rü yexguma ga nümagü rü ñanagürügü: —Ngẽma Danié i Yudíu ga ãẽ̱xgacü ga Nabucudonochó nua gaxü̃ rü tama cuga naxĩnü, Pa Ãẽ̱xgacüx, rü tama naga naxĩnü i ngẽma mu i cuxunagüxü̃. Rü toma rü marü nüxü̃ tadau nax tomaepü̱xcüna norü Tupanamaxã nayumüxẽxü̃ i wüxichigü i ngunexü̃gu —ñanagürügü.

Danié 6:14

Rü yemaxü̃ naxĩnügu ga ãẽ̱xgacü rü poraãcü nangechaü̃ rü naguxü̃raxü̃ãcü naxca̱x nadau nax ñuxãcü Daniéxü̃ ínanguxuchixẽẽxü̃ rü ñu̱xmata yanaxücumare ga üa̱xcü.

Lebítanüxü̃arü puracüchiga 26:33

Rü pema rü togü i nachixü̃anegu tá pexü̃ chawoone. Rü chorü taramaxã tá pewe chingẽchigü. Rü ngẽma pechixü̃ane rü tá chianexü̃xü̃ chayaxĩxẽxẽ. Rü perü ĩanegü rü nachitaxü̃xica tá ínayaxügü.

Iraétanüxü̃arü muxchiga 23:9

Rü nua daa ma̱xpǘnechitaeruwa rü meama nüxü̃ chadau i ngẽma Iraétanüxü̃. Rü daa ma̱xpǘnetape̱xewa rü meama nüxü̃ chadawenü. Rü chanangugü rü duü̃xü̃gü i nügütanüxü̃xicatama ixãchiü̃güxü̃ nixĩgü. Rü tama togü i duü̃xü̃gümaxã nawüxigu erü tama togü i duü̃xü̃gümaxã nügü narüxücu.

Ore i mexü̃ ga Cuáü̃ ümatüxü̃ 7:35

Rü yexguma ga yema Yudíugüarü ãẽ̱xgacügü rü nügüna nacagüe, rü ñanagürügü: —¿Ngextá tá naxũ ega taxuacütáma nüxü̃ iyarüngaugügu? ¿Ẽ̱xna ngẽma Yudíugü i to i nachixü̃anewa ngẽxmagüxü̃tanüwa tá naxũ nax ngẽma tama Yudíugü ixĩgüxü̃xü̃ yangúexẽẽxü̃ca̱x?

Ngechuchuarü ngúexü̃gü ga yamugüxü̃arü puracüchiga 24:5

Rü marü nüxü̃ tadau nax ñaa yatü rü wüxi i da̱xaweanerüxü̃ nax yixĩxü̃. Erü guxü̃ i naanewa norü ngu̱xẽẽtaemaxã nügü nayatoyexẽxẽ i Yudíugü. Rü nüma rü naeru nixĩ i ngẽma duü̃xü̃gü i nüxü̃́ yaxõgüxü̃ i Ngechuchu i Nacharétucüã̱x.

Ngechuchuarü ngúexü̃gü ga yamugüxü̃arü puracüchiga 28:22

Rü cuxü̃tawa nüxü̃ taxĩnüechaü̃ rü ¿ñuxũ ñacuxü̃ i cumax? Erü nüxü̃ tacua̱xgü rü guxü̃wama i Yudíugü rü chixri nachiga nidexagü i ngẽma ore i ngexwaca̱xü̃xü̃ i Ngechuchuchiga —ñanagürügü.

Wenaxarü naxümatü ga Tupanaarü mugü 32:26

Rü ngẽma nagu charüxĩnüxü̃ nixĩ nax chanawoanemarexü̃ i ngẽma duü̃xü̃gü nax ngẽmaãcü iyanaxoxü̃ca̱x i naéga i ñoma i naanewa.

Wenaxarü naxümatü ga Tupanaarü mugü 4:27

Rü nüma ya Cori ya Tupana rü guxü̃ma i nachixü̃anegügu tá pexü̃ nawoone. Rü noxretátama i pema tá nixĩ i ngẽma nachixü̃anegüwa peyaxüxgüxü̃.

Popera ga Chantiágu ümatüxü̃ 1:1

Pa Chautanüxü̃ i 12 i Iraétücumügü i Ngechuchuaxü̃́ Yaxõgüxü̃ i Guxü̃ i Naanewa Nawogüxü̃x, choma i Chantiágu pexü̃ charümoxẽ. Rü choma nixĩ i Tanatü ya Tupanaaxü̃́ rü tórü Cori ya Ngechuchu ya Cristuaxü̃́ chapuracüxü̃.

Nüxíraxü̃xü̃ ga popera ga Pedru ümatüxü̃ 1:1

Pa Chauenexẽgüx, choma i Pedru ya Ngechuchu ya Cristu choxü̃ muxü̃, rü pexü̃ charümoxẽ i pemax nax perü naanena to i nachixü̃anegügu pewoonexü̃, rü ñu̱xma Póntoanewa rü Gárataanewa rü Capadochíaanewa rü Áchiaanewa rü Bitíniaanewa ngẽxmagüxe.