Danié 9:6 - Tupanaarü Ore

⁶ Rü guma curü orearü uruü̃gü ga nawa quidexacü namaxã ga torü ãẽ̱xgacügü rü torü o̱xigü, rü guxü̃ma i tomax i Iraétanüxü̃, rü toma rü tama naga taxĩnüechaü̃ ga yexguma tomaxã nüxü̃ yaxugüegu ga curü ore.

Danié 9:6 Iomraidhean Croise

Norü taxre ga popera ga ãẽ̱xgacügüchiga 18:12

Rü yema nangupetü yerü yema Iraéanecüã̱xgü rü tama Cori ya norü Tupanaga naxĩnüe rü nüxü̃ naxoe ga yema uneta ga norü o̱xigümaxã nüxü̃ yaxuxü̃. Rü tama naga naxĩnüe ga guxü̃ma ga yema mugü ga Cori ya Tupanaarü duü̃ ga Moiché nüxü̃ ixuxü̃ rü ñu̱xũchi tama yema mugügu namaxẽ.

Norü taxre ga to ga popera ga ãẽ̱xgacügüchiga ümatüxü̃ 33:10

Rü Cori ya Tupana rü Manachémaxã rü norü duü̃xü̃gümaxã nidexa, natürü tama naga naxĩnüe.

Édra 9:7

Rü nũxcümacürüwa ga torü o̱xigü rü chixexü̃gu namaxẽx rü ñomaxü̃cüxü i toma rü ta nagu ítamaxẽ. Rü ngẽma torü chixexü̃gagu rü toma rü torü ãẽ̱xgacügü rü torü chacherdótegü rü naxme̱xgu tayi i ngẽma to i nachixü̃anecüã̱xgüarü ãẽ̱xgacügü i tama cuxü̃́ yaxõgüxü̃. Rü nümagü rü toxü̃ ínayauxü̃ rü toxca̱x nangĩ̱xgü rü duü̃xü̃güpe̱xewa toxü̃ nacugüe. Rü ngẽmatama nixĩ i ñu̱xma toxü̃ ngupetüxü̃.

Neemía 9:30

Rü mucüma ga taunecü rü yáxna namaxã cuxĩnü ga yema torü o̱xigü. Rü Cuãxẽ ya Üünecüwa rü curü orearü uruü̃güwa cuyaxucu̱xẽgüchire̱x, natürü ga nümagü rü tama cuga naxĩnüechaü̃. Rü yemaca̱x nixĩ ga ñoma ga naanewa yexmagüxü̃ ga nachixü̃anegüme̱xẽwa cunayexmagüxẽẽxü̃.

Neemía 9:32

Rü ngẽmaca̱x, ¡Pa Torü Tupanax! cuma nax tacü, rü poracü, rü ãũcümacü nax quixĩxü̃ rü taguma nüxü̃ icuyarüngüma i ngẽma curü uneta rü curü ngechaü̃ toxca̱x. Rü ñu̱xma rü tama tanaxwa̱xe nax cunangupetüxẽẽmarexü̃ ga guxü̃ma ga yema ngúxü̃gü ga yangegüxü̃ ga torü ãẽ̱xgacügü, rü yema ĩanemaxã icua̱xgüxü̃, rü chacherdótegü, rü orearü uruü̃gü, rü torü o̱xigü, rü guxü̃ma ga curü duü̃xü̃gü. Yerü yexguma Achíriaanearü ãẽ̱xgacügüme̱xẽwa tayexmagügucurüwa ngúxü̃ tingegü ñu̱xmata ñaa i ngunexü̃wa nangu.

Neemía 9:34

Rü woo tochixü̃anearü ãẽ̱xgacügü rü togü ga yatügü ga tomaxã icua̱xgüxü̃, rü chacherdótegü, rü woo ga torü o̱xigü rü taguma nayanguxẽẽgü ga curü mugü rü taguma naga naxĩnüe ga curü ucu̱xẽgü ga namaxã nüxü̃ quixuxü̃.

Yeremía 29:19

Rü ngẽmaãcü tá nüxü̃ nangupetü i ngẽma duü̃xü̃gü, erü tama chauga naxĩnüe woo muẽ̱xpü̱xcüna natanüwa chanamugü ga chorü orearü uruü̃gü nax namaxã nüxü̃ yaxugüexü̃ca̱x nax nüxü̃ naxoexü̃ca̱x i norü chixexü̃. Natürü i pema rü ta rü tama nüxü̃́ ipexĩnüe. Rü choma ya Cori ya Tupana nixĩ i nüxü̃ chixuxü̃ i ngẽma’ ”, ñanagürü.

Yeremía 44:16

—Taxũtáma naga taxĩnüe i ngẽma Tupanaarü ore i tomaxã nüxü̃ quixuxü̃.

Yeremía 7:13

Rü woo mue̱xpü̱xcüna pexna chanachu̱xu ga yema pecüma ga chixexü̃, natürü pema rü tama chauga pexĩnüechaü̃, rü bai choxü̃ pengãxü̃güxü̃. Rü chomatama ya Cori ya Tupana nixĩ i nüxü̃ chixuxü̃ i ngẽma.

Yeremía 7:24

Natürü ga nümagü rü tama chauga naxĩnüe, rü bai nax choxü̃́ inaxĩnüexü̃, natürü nanueama rü norü ngúchaü̃gü i chixexü̃güweama narüxĩ. Rü tama cha̱u̱xca̱x nawoegu. Rü choxna naxãgüca̱xweama.

Danié 9:10

Rü tama cuga taxĩnüe rü nüxü̃ tacugüe ga curü mugü ga curü duü̃xü̃gü ga orearü uruü̃güwa tomaxã nüxü̃ quixuxü̃.

Danié 9:9

Natürü i cumax, Pa Torü Tupanax, rü woetama cucüma nixĩ nax cumecümaxü̃ rü toxü̃́ nüxü̃ curüngü̃maxü̃ i torü chixexü̃. Rü ngẽmaca̱x cupe̱xewa tangugü erü toma rü poraãcü chixexü̃ taxü.

Ore i mexü̃ ga Matéu ümatüxü̃ 23:37

Rü ñanagürü ta ga Ngechuchu: —Pa Yerucharéü̃cüã̱x, pema penadai i Tupanaarü orearü uruü̃gü, rü nutamaxã ípenamuxũchigü i ngẽma orearü ngeruü̃gü ya Tupana pexü̃tawa mugüxü̃. Rü ñuxree̱xpü̱xcüna wüxigu chaugüxü̃tagu pexü̃ chanutaque̱xexẽẽchaü̃ ñoma wüxi i ota i naxacüxegü nügütüü̃gu tüxü̃ nutaque̱xexü̃rüxü̃. Natürü pema rü tama penaxwa̱xe.

Ngechuchuarü ngúexü̃gü ga yamugüxü̃arü puracüchiga 13:27

Rü aixcüma yema Yerucharéü̃cüã̱xgü ga duü̃xü̃gü rü yema norü ãẽ̱xgacügü rü tama nüxü̃ nacua̱xgü nax Tupana Nane yixĩxü̃ ga Ngechuchu. Rü tama mea nüxü̃ nacua̱xgü nax ta̱xacüchiga yixĩxü̃ ga yema ore ga nũxcümaü̃güxü̃ ga Tupanaarü orearü uruü̃gü ümatüxü̃ i ñu̱xma perü ngutaque̱xepataü̃wa nüxü̃ pedaumatügüxü̃ i wüxichigü i ngü̃xchigaarü ngunexü̃gu. Rü yema duü̃xü̃gü ga Ngechuchuxü̃ ima̱xgüxü̃ rü nawa ningu ga yema ore ga nũxcüma ümatüxü̃.