Danié 7:9 - Tupanaarü Ore

^9-10 Rü chaunegüwa nüxü̃ chadawenü rü nüxü̃ chadau ga ñuxre ga tochicaxü̃ yexma nuxü̃ rü ñu̱xũchi nüma ya Ãẽ̱xgacü ya Tupana nawa nayarüto. Yema naxchiru rü ñoma gáuxü̃te̱xe i cómüxü̃chixü̃rüxü̃ nixĩ. Rü yema nayae rü nachoxochi ñoma carnérua̱xmü i cho̱xochixü̃rüxü̃. Rü yema toruxü̃ rü nachicugü rü niyauratanücüxü. Rü wüxi ga üxüema ga taxü̃ ga iya̱u̱xraxü̃ nape̱xewa ínaxũxũ. Rü muxü̃ma nixĩ ga yema nüxü̃́ puracuexü̃. Rü muxũchixü̃ma nixĩ ga yema nape̱xegu chigüxü̃. Rü yema poperagü rü nayange̱xgü.

Danié 7:9 Iomraidhean Croise

Nüxíraxü̃xü̃ ga popera ga ãẽ̱xgacügüchiga 22:19

Rü nüma ga Micaía rü nanangãxü̃ rü ñanagürü: —Chanaxwa̱xe i icurüxĩnü i ñaa to i norü ore ya Tupana. Rü nüxü̃ chadau ga Tupana ya norü tochicaxü̃wa rütocü, rü guxü̃ma i daxũcüã̱x i orearü ngeruxü̃ i naxü̃tagu chigüxü̃ ga norü tügünecüwawa rü norü to̱xwecüwawa.

Norü taxre ga to ga popera ga ãẽ̱xgacügüchiga ümatüxü̃ 18:18

Rü yexguma ga nüma ga Micaía rü ñanagürü: —¡Nüxü̃ pexĩnüe i Tupanaarü ore! Choma rü nüxü̃ chadau ya Cori ya Tupana ya norü tochicaxü̃wa rütocü, rü nüxü̃ chadau i guxü̃ma i daxũcüã̱x i orearü ngeruü̃gü i norü tügünecüwagu rü norü to̱xwecüwagu chigüxü̃.

Wiyaegü 45:8

Rü guxü̃ma i cuxchirugü rü pumara i paacaxü̃ i míra rü aroé rü canelamaxã napaacaematanü. Rü paxetaruü̃gü i ãtü̱xüxü̃maxã cuxü̃ nataãẽxẽẽgü nawa ya cupata ya marfíxmaxã nga̱xãẽne.

Wiyaegü 90:2

Rü nũxcümaxü̃chima naxü̃pa nax cunaxüxü̃ ga ñoma ga naane rü norü ma̱xpǘnegü rü woetama marü Tupana quixĩ. Rü cuma rü guxü̃gutáma cungexmaecha.

Wiyaegü 93:2

Rü nũxcümacürüwa, Pa Corix, rü ãẽ̱xgacü quixĩ rü guxü̃guma woetama cuyexmaecha.

Ichaía 6:1

Rü gumá taunecü ga ãẽ̱xgacü ga Uchía nagu yucü rü nüxü̃ chadau ga Cori ya Tupana ga wüxi ga tochicaxü̃ ga dauxü̃wa yexmaxü̃wa nax natoxü̃. Rü yema naxpechinüchiru rü nanatüétü ga guma napata ga taxü̃ne.

Ichaía 9:6

Erü tatanügu nabu i wüxi i õxchana. Rü nüma ya Tupana rü tüxna nanamu ya yimá nane. Rü yimána nixĩ i naxããxü̃ i pora nax tamaxã inacuáxü̃ca̱x. Rü ñaagü tá nixĩ i naégagü i namaxã naxugüãxü̃: “Mexẽchicü ya Ucu̱xẽruxü̃”, rü “Tupana ya Poraxüchicü”, rü “Tanatü ya Taguma Yucü, rü Tupana Nane ya Ngüxmüxẽẽruxü̃ ixĩcü”. Rü ngẽma tá nixĩ i naégagü.

Yeremía 49:38

Rü Eráü̃anegu tá chanaxǘ i chorü toruxü̃ rü tá chanayuexẽxẽ i norü ãẽ̱xgacü rü norü ngü̃xẽẽruü̃gü. Rü choma ya Cori ya Tupana nixĩ i ngẽma ñachaxü̃.

Echequié 1:26

Rü yema naanetüweétüwa nüxü̃ chadau ga wüxi ga ta̱xacü ga natochicaxü̃raü̃xü̃ ga nuta ga chafírunaxca̱x ixĩxü̃. Rü yema tochicaxü̃wa narüto ga wüxi ga naduü̃xü̃raxü̃xü̃.

Danié 7:13

Choma rü yexguma chütacü chingo̱xetüchigü rü nüxü̃ chadau ga wüxi ga naduü̃xü̃raxü̃xü̃ ga caixanexü̃wa ne ũxü̃ rü Ãẽ̱xgacü ya Guxü̃guma Maxü̃cü íyexmaxü̃waama ũxü̃. Rü ñu̱xũchi guma Ãẽ̱xgacüxü̃tawa nanagagü.

Danié 7:22

Rü yexguma yéma nangu ga guma Ãẽ̱xgacü ya Guxü̃guma Maxü̃cü rü Guxãétüwa Ngẽxmacü nax norü duü̃xü̃güxü̃ iyapoxü̃xü̃ca̱x. Yerü marü nawa nangu ga ngunexü̃ nax norü duü̃xü̃gü yapugüãxü̃ca̱x ga norü naane.

Miquéa 5:2

Rü cumax, Pa Beréü̃ i Efráta, rü woo wüxi ya ĩane ya íxrane quixĩ natanüwa ya guxü̃nema ya Yudáanecüã̱x ya ĩanegü, natürü cugu tá nixĩ i nabuxü̃ ya yimá Iraéanecüã̱xgüarü ãẽ̱xgacü ya woetama marü ngẽxmaechacü.

Abacú 1:12

Dücax, Pa Corix, Pa Chorü Tupanax ¿tama ẽ̱xna i cuma i guxü̃guma cungexmaechaxü̃? Erü cuma rü üünecü rü taguma yucü quixĩ. Pa Corix, Pa Chorü Poxü̃ruxü̃x, cuma nixĩ i pora nüxna cuxãxü̃ i ngẽma Cadéugü nax nawa cuyanguxẽẽxü̃ca̱x i ngẽma poxcu i tomaxã cuxueguxü̃.

Ore i mexü̃ ga Matéu ümatüxü̃ 17:2

Rü yéma yema ngúexü̃güpe̱xewa rü toraxü̃ãcü nango̱x ga Ngechuchu. Rü üa̱xcürüxü̃ niyauracüxü ga nachiwe. Rü naxchiru rü nacómüxü̃chi, rü ñoma ngóonexü̃rüxü̃ nixĩ.

Ore i mexü̃ ga Matéu ümatüxü̃ 28:3

Rü yema orearü ngeruxü̃ rü wüxi ga ba̱i̱xbeanexü̃rüxü̃ niyauracüxü. Rü nacómüxü̃chi ga naxchiru.

Ore i mexü̃ ga Márcu ümatüxü̃ 9:3

Rü niyauracüxü ga naxchiru rü nacómüxü̃chi. Rü nataxuma i yauxchiruxü̃ i ñoma i naanewa i nüxü̃ cuáxü̃ nax ngẽmaãcü nacómüxẽẽãxü̃.

Ngechuchuarü ngúexü̃gü ga yamugüxü̃arü puracüchiga 2:30

Natürü nüma ga Dabí rü wüxi ga Tupanaarü orearü uruxü̃ nixĩ. Rü yemaca̱x nüxü̃ nacua̱x rü wüxi ga nataxa tá nixĩ i ãẽ̱xgacü ya Cristuxü̃ ingucuchicü, yerü ga Tupana rü yemaacü namaxã inaxuneta.

Ngechuchuarü ngúexü̃gü ga yamugüxü̃arü puracüchiga 2:33

Rü Tupana rü daxũguxü̃ ga naanewa nanaga nax norü tügünecüwawa yanatoxü̃ca̱x. Rü Tanatü ya Tupana rü marü nüxna nanamu ga Naãxẽ ya Üünecü ga nũxcüma nüxü̃ yaxuxü̃ rü tá nua nax namuaxü̃. Rü ñu̱xma ya yimá Ngechuchu rü núma totanüwa nanamu i ngẽma Naãxẽ ya Üünecü. Rü ngẽma Naãxẽ nua üxü̃ nixĩ i ñu̱xma nüxü̃ pedauxü̃ rü nüxü̃ pexĩnüexü̃.

Filipenses 3:9

Rü yema nax Cristuarü duü̃xü̃ chixĩxü̃ca̱x nixĩ i nüxü̃ charüxoxü̃ ga yema Yudíugücümagü ga noxri nagu chixũxü̃. Rü tama ngẽma nax chamecümaxü̃ca̱x rü ẽ̱xna mugü chaxaurexü̃ca̱x nixĩ nax chamexü̃ i nape̱xewa. Rü ñu̱xma rü Tupanape̱xewa chame erü Cristuaxü̃́ chayaxõ. Rü ngẽma nax Cristuaxü̃́ chayaxõxü̃ca̱x nixĩ i nügüca̱x choxü̃ namexẽẽxü̃ ya Tupana.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:16

Rü nüxicatama nixĩ i guxü̃guma namaxechaxü̃. Rü nüma rü poraãcü ínangóonexü̃wa namaxü̃, rü taxucürüwa texé ngẽma ngóonexü̃na tangaicama. Taguma wüxi i duü̃xü̃ nüxü̃ nadau, rü taxuacüma texé nüxü̃ tadau. Rü name nax guxü̃ma nüxü̃ icua̱xüü̃güxü̃, erü nüma rü guxü̃guma Ãẽ̱xgacü nixĩ. Rü ngẽmaãcü yixĩ.

Nüxíraxü̃xü̃ ga popera ga Cuáü̃ ümatüxü̃ 1:5

Rü ñaa nixĩ ga ore ga tomaxã nüxü̃ yaxuxü̃ ga Ngechuchu ya Cristu. Rü pemaxã nüxü̃ tixu nax ngóonexü̃ yixĩxü̃ ya Tupana, rü nawa rü nataxuma i ẽanexü̃, rü bai i íxraxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:14

Rü nayae rü nachoxochi ñoma carnéruta̱xa i cho̱xochixü̃rüxü̃ rü ñoma gáuxü̃te̱xe i cho̱xochixü̃rüxü̃. Rü naxẽtü rü ñoma üxüemarüxü̃ niyauracüxü.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:4

Rü ñu̱xũchi nüxü̃ chadau ga ñuxre ga tochicaxü̃gü. Rü yema tochicaxü̃wa tarütogü ga guxema Tupanaxü̃tawa nayauxgüxe ga pora nax duü̃xü̃güna naca̱xaxü̃ i norü maxü̃chiga. Rü yexgumarüxü̃ ta nüxü̃ chadau ga naãxẽgü ga yema duü̃xü̃gü ga Tupanaarü oreca̱x rü Ngechuchuchigaxü̃ nax yaxugüxü̃ca̱x nadaü̃naagüxü̃. Rü yema nixĩ ga duü̃xü̃gü ga tama yema ngo̱xoxü̃ icua̱xüü̃güxü̃ rü bai ga yema ngo̱xochicüna̱xãxü̃ icua̱xüü̃güxü̃, rü tama nügü ixãgüxü̃ nax nacatüwa rü ẽ̱xna naxme̱xwa yema ngo̱xoégamaxã yaxãégaxü̃. Rü nüxü̃ chadau ga wena nax namaxẽxü̃ ga yema duü̃xü̃gü, rü 1,000 ga taunecü Cristumaxã wüxigu ãẽ̱xgacügü nixĩgü.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:2

Rü yexgumatama ga choma rü Tupanaãxẽ ya Üünecü rü chauãẽmaxã inacua̱x, rü daxũwa nanaga. Rü yéma daxũguxü̃ ga naanewa nüxü̃ chadau ga wüxi ga tochicaxü̃ ga mexẽchixü̃ ga yéma wüxi nawa rütoxü̃.