Danié 7:8 - Tupanaarü Ore

⁸ Rü yexguma yema naxchata̱xcurexü̃ chadawenügu, rü nüxü̃ chadau ga natanüwa nax iyanagoxü̃ ga to ga rüxíxramaexü̃ ga naxchata̱xcure. Rü nanapuxü̃gü ga tomaepü̱x ga naxchata̱xcuregü nax yemaacü naxãchicaxü̃ca̱x ga yema nawa iyacuáxü̃ ga iyarügoxü̃ ga naxchata̱xcure. Rü nüxü̃ chadau nax naxãxẽtüxü̃ ga yema naxchata̱xcure rü guma naxetügü rü duü̃xü̃xetürüxü̃ nixĩgü. Rü nüxü̃́ nayexma ta ga wüxi ga naã̱x ga namaxã poraãcü nügü yacua̱xüüxü̃.

Danié 7:8 Iomraidhean Croise

Wiyaegü 12:3

Cori ya Tupana rü tá inayanaxoxẽxẽ i guxü̃ma i ngẽma nügü írümegünetaxü̃ rü ngẽma nügü icua̱xüü̃güxü̃.

Danié 11:36

Rü ngẽma Nórtearü ãẽ̱xgacü rü guxü̃ma i ngẽma nüma nanaxwa̱xexü̃ tá naxümare. Rü tá nügü nicua̱xüxü̃ rü tá nügügu nayaxõ nax guxü̃ma i tupananetagüarü yexera naporamaexü̃. Rü Tupanamaxã tá naguxchiga. Rü guxü̃táma i ngẽma naxüxü̃wa rü mea tá nüxü̃́ ínanguxuchi rü ñu̱xmata Tupana naxca̱x ínanguxẽxẽ i norü poxcu. Erü ngẽma Tupana ueguxü̃ rü tá nayanguxẽxẽ.

Danié 7:19

Choma rü yexeraãcü nüxü̃ chacuáxchaü̃ nachiga ga yema norü ãgümücüwa üxü̃ ga ngo̱xo ga tama yema togü ga ngo̱xogümaxã nawüxigu. Yerü naxãũcümaxü̃chi rü guma napütagü rü fierunaxca̱x nixĩgü, rü napatügü rü bróũchenaxca̱x nixĩgü. Rü guxü̃ma ga yema nangṍxü̃ rü íxraxü̃gu nanawaü̃gü. Rü yema íyaxüxü̃ rü nagu napúgü.

2 Tesalonicenses 2:4

Rü ngẽma Tupanaarü uanü rü tá Tupanamaxã rü guxü̃ma i ngẽma Tupanaarü ixĩgüxü̃maxã narüxuanü. Rü tá naxchi naxai i guxü̃ma i ngẽmaxü̃gü i namaxã Tupanaxü̃ icua̱xüü̃güxü̃. Rü Tupanapata ya taxü̃newa tá nayarüto ñoma Tupana yixĩxü̃rüxü̃. Rü nüma rü tá nügü nixu nax Tupana yixĩxü̃.

Norü taxre ga popera ga Timutéuca̱x naxümatüxü̃ ga Pauru 3:2

Rü duü̃xü̃gü rü tá nügüguxicatama narüxĩnüe, rü norü diẽruguama tá narüxĩnüe. Rü tá nügü nicua̱xüü̃gü, rü chixexü̃gu tá namaxẽ. Rü chixri Tupanachiga tá nidexagü, rü taxũtáma nanatüga rü naéga naxĩnüe. Rü taxũtáma moxẽ inaxã i ngẽxguma Tupana nüxü̃ rüngü̃xẽẽgu, rü ngẽmaãcü tá nüxü̃ naxo i Tupanaarü ore.

Norü taxre ga popera ga Pedru ümatüxü̃ 2:18

Rü ngẽma ngu̱xẽẽruü̃netagü rü nügü yacua̱xüü̃güãcüma ore i taxuwama mexü̃maxã nidexagü. Rü tüxü̃ nixucu̱xẽgü nax tümaxü̃nearü ngúchaü̃gu taxĩxü̃ca̱x ya yíxema ngexwaca nüxü̃ rüxoexe i ngẽma chixexü̃ i nacüma.

Popera ga Yúda ümatüxü̃ 1:16

Rü ngẽma duü̃xü̃gü i norü doramaxã petanügu chocuxü̃ rü ta̱xacüca̱x idexagüwa̱xexüchixü̃ nixĩgü, rü toguã̱xü̃ ixuxwa̱xegüxüchixü̃ nixĩgü. Rü ngẽma duü̃xü̃gü rü noxrütama ngúchaü̃ca̱x daugüxü̃ nixĩgü. Rü nügü icua̱xüü̃güxü̃ nixĩgü. Rü nümaxü̃ mea tümachiga nidexagüneta ya duü̃xẽgü, nax tümaxü̃tawa ta̱xacü nayauxgüxü̃ca̱xmare.

Yema Cuáü̃ nüxü̃ dauxü̃ i yixcüra tá ngupetüxü̃chiga 13:1

Rü nüxü̃ chadau ga wüxi ga ngo̱xo ga taxü̃ ga márwa íxüãchixü̃. Rü nüxü̃́ nayexma ga 7 ga naerugü rü 10 ga naxchata̱xcuregü. Rü wüxichigü ga naxchata̱xcu̱xre rü nüxü̃́ nayexma ga norü nga̱xcueruxü̃. Rü yema 7 ga naerugü rü nixãéga. Rü yema naégagü rü Tupanachiga chixexü̃ nixugü.

Yema Cuáü̃ nüxü̃ dauxü̃ i yixcüra tá ngupetüxü̃chiga 9:7

Rü yema munügü rü ñoma cowarugü i daiwa ĩxü̃rüxü̃ nixĩgü. Rü naeruwa nüxü̃́ nayexma ga ta̱xacü ga ñoma nga̱xcueruxü̃ ga úirunaxca̱xrüxü̃ ixĩgüxü̃. Rü nachiwe rü nanaduü̃xü̃chiwegüraxü̃.

1 Chamué 2:3

Rü tama name i texé tügü ticua̱xüxü̃ i ngẽxguma tidexagu rü tama name i tügü ítarüta, erü Cori ya Tupana ya Guxü̃xü̃ma Cuáxcü rü nanangugü i guxü̃ma i ngẽma naxüxü̃ i wüxichigü i duü̃xü̃.