Danié 6:7 - Tupanaarü Ore

⁷ Rü guxü̃ma i toma i ãẽ̱xgacügü i cutüü̃wa namaxã icua̱xgüe i ñaa nachixü̃ane rü tangutaque̱xegü. Rü ngẽma ngutaque̱xewa nagu tarüxĩnüe nax cumax, Pa Ãẽ̱xgacüx, rü cunaxunagüxü̃ i wüxi i mu nax ngẽmaãcü 30 i ngunexü̃gu nachu̱xuxü̃ nax texé ta̱xacürü tupanana rüe̱xna yatüna ngü̃xẽẽca̱x taca̱xaxü̃, rü cuxnaxicatama name nax taca̱xaxü̃. Rü texé ya tama naga ĩnüxe i ngẽma mu rü tá leóü̃tanügu tita̱xcuchi.

Danié 6:7 Iomraidhean Croise

Wiyaegü 59:3

Erü nangẽxma i yatügü i máxwa̱xegüxü̃ i naxca̱x daugüxü̃ nax ñuxãcü tá choxü̃ yama̱xgüxü̃. Ngẽma duü̃xü̃gü i tama ngechaxü̃wa̱xegüxü̃ rü nagu narüxĩnüe nax ñuxãcü tá choxü̃ yama̱xgüxü̃ woo taxuxü̃ma i chixexü̃ chaxü̱xgu rü bai i ta̱xacürü pecadu chaxü̱xgu.

Danié 3:27

Rü guxü̃ma ga yema ãẽ̱xgacügü ga yéma yexmagüxü̃ rü naxca̱x naxĩ ga yema tomaepü̱x ga yatügü. Rü nüxü̃ nadaugü ga taxuwama nax yaxaexü̃ ga naxü̃newa, rü woo ga nayae rü naxchiru rü tama nax yaxaxü̃ rü bai ga nax natauacaemagüxü̃.

Danié 3:6

Rü guxãma ya texé ya tama nape̱xegu caxã́püxügüxe, rü nüxü̃ icua̱xüü̃güxe, rü noxtacüma tá ngẽma poxcuchicaxü̃ i íya̱u̱xraxü̃gu tawocu —ñanagürü.

Danié 3:2

Rü yemawena rü naxca̱x nangema ga guxü̃ma ga ãẽ̱xgacügü ga wüxichigü ga naaneétüwa yexmagüxü̃. Rü naxca̱x nangema ta ga norü churaragüerugü, rü wüxichigü ga ĩanearü ãẽ̱xgacügü, rü ãẽ̱xgacügü ga ucu̱xẽruü̃gü, rü ãẽ̱xgacügü ga diẽrumaxã icua̱xgüxü̃, rü ãẽ̱xgacügü ga nachixü̃anearü mugümaxã icua̱xgüxü̃, rü togü ga ãẽ̱xgacügü ga wüxichigü ga ĩanewa yexmagüxü̃. Rü yema ãẽ̱xgacügü nixĩ ga naxca̱x nangemaxü̃ nawa ga norü ãxü̃chichiga ga yema naxchicüna̱xã ga ãẽ̱xgacü norü duü̃xü̃güxü̃ üxẽẽxü̃.

Wiyaegü 62:4

Rü ngẽma duü̃xü̃gü i chixexü̃ rü ngẽma nagu naxĩnüexü̃xicatama nixĩ nax choxü̃ ínata̱xüchigüxü̃. Rü ngẽma namaxã nataãẽgüxü̃ nixĩ i norü dora. Rü naã̱xmaxã choxü̃ nicua̱xüü̃gü, natürü norü ĩnüwa rü chomaxã naguxchigagü.

Ore i mexü̃ ga Cuáü̃ ümatüxü̃ 12:10

Rü yexguma ga chacherdótegüarü ãẽ̱xgacügü rü nügümaxã nanamexẽẽgü ga Lácharoxü̃ rü ta nax yama̱xgüxü̃ca̱x.

Ore i mexü̃ ga Márcu ümatüxü̃ 15:1

Rü yexguma yangunegu, rü nangutaque̱xegü ga yema chacherdótegüarü ãẽ̱xgacügü rü Yudíugüarü ãẽ̱xgacügü rü ngúexẽẽruü̃gü ga mugüwa ngu̱xẽẽtaegüxü̃arü ãẽ̱xgacügü rü guxü̃ma ga yema ãẽ̱xgacütücumü. Rü Ngechuchuxü̃ yana̱i̱xgüchacüüãcüma ãẽ̱xgacü ga Pirátuxü̃tawa nanagagü.

Ore i mexü̃ ga Matéu ümatüxü̃ 26:4

Rü yema ngutaque̱xewa nügümaxã nanamexẽẽgü nax womüxẽẽãcüma Ngechuchuxü̃ yayauxgüxü̃ nax yama̱xgüãxü̃ca̱x.

Ore i mexü̃ ga Matéu ümatüxü̃ 12:14

Rü yexguma yemaxü̃ nadaugügu ga Parichéugü, rü ínachoxü̃ ga yéma. Rü inanaxügüe nax naxca̱x nadaugüxü̃ nax ñuxãcü tá Ngechuchuxü̃ yama̱xgüxü̃.

Wiyaegü 10:9

Rü ñoma leóü̃ i naxmaxü̃wa naeü̃ca̱x idawenüxü̃rüxü̃ nügü nixĩxẽxẽ i ngẽma yatü i chixexü̃. Rü ngéma iyacúxü̃wa tüxü̃ nananguxẽxẽ ya yíxema turaxe nax ngẽmaãcü tüxü̃ yayaxuxü̃ca̱x. Rü ngẽxguma tüxü̃ yayaxu̱xgu rü marü taxucürüwama nüxna tiña.

Naúü̃ 2:12

¿Rü ñu̱xma rü ngexü̃ yixĩxü̃ i ngẽma perü pora ga noxri namaxã perü uanügüxü̃ pedaixü̃, ñoma leóü̃ naeü̃xü̃ imáxü̃rüxü̃? Rü pema rü pegü peyanu ga norü yemaxü̃gü ga yema duü̃xü̃gü ga peda̱i̱xü̃ ñoma leóü̃ naxma̱xmaxã rü naxacügümaxã nügü yanuxü̃rüxü̃ i ngẽma naeü̃machi. Rü pema rü peyapaxẽxẽ ya pepatagü namaxã ga yema yemaxü̃gü ga perü uanügüna pepuxü̃xü̃ ñoma leóü̃ rü ngẽma naeü̃machi i nüxü̃́ íyaxüxü̃maxã naxma̱xü̃ yapaxẽẽxü̃rüxü̃.

Miquéa 6:5

¡Pa Chorü Duü̃xü̃güx, nüxna pecua̱xãchie i ngẽma Baláx ga Moáarü ãẽ̱xgacü nagu rüxĩnüxü̃, rü ñu̱xũchi yema norü ngãxü̃ ga Balaáü̃ ga Beúx nane nüxna ãxü̃! Rü yexguma Chitíü̃wa pengugügu nax Guirigáwaama pexĩxü̃ca̱x, rü choma nixĩ ga pora pexna chaxãxü̃ nax nüxü̃ perüporamaegüxü̃ca̱x ga perü uanügü —ñanagürü ya Tupana.

Wiyaegü 94:20

Rü cumax, Pa Tupanax, tama namaxã cuxãmücü i ngẽma ãẽ̱xgacügü i guxchaxü̃arü mexẽẽruü̃gü i chixri duü̃xü̃gümaxã icua̱xgüxü̃ rü tama mea mugü nüxü̃ ixugüãcüma nanamexẽxẽ i duü̃xü̃güarü guxchaxü̃gü.

Wiyaegü 2:2

Rü ñoma i naanecüã̱x i nachixü̃anegüarü ãẽ̱xgacügü rü Tupanamaxã rü yimá ãẽ̱xgacü ya nüma yangucuchixẽẽcümaxã nanue, rü wüxigu nagu narüxĩnüe nax ñuxãcü yimáxü̃ ínata̱xüchigüxü̃.

Wiyaegü 83:5

Pa Tupanax, cuxca̱x nügümaxã nangutaque̱xegü rü wüxigu nügümaxã inaxügagü nax curü duü̃xü̃güxü̃ nada̱i̱xü̃ca̱x.

Danié 6:16

Rü yexguma ga nüma ga ãẽ̱xgacü rü norü duü̃xü̃güxü̃ namu nax Daniéxü̃ yagagüxü̃ca̱x rü leóü̃tanügu yata̱xcuchigüãxü̃ca̱x. Rü nüma ga ãẽ̱xgacü rü ñanagürü Daniéxü̃: —¡Yimá curü Tupana ya aixcümama naxca̱x cumaxü̃cü cuxü̃ ípoxü̃! —ñanagürü.

Wiyaegü 59:5

Pa Cori ya Guxãétüwa Ngẽxmacü ya Iraétanüxü̃arü Tupana Ixĩcüx, ¡írüda rü paxa napoxcue i guxü̃ma i ngẽma togü i nachixü̃anecüã̱x! ¡Rü taxṹ i cuxü̃́ nangechaü̃tümüxü̃güxü̃ i ngẽma chixexü̃ ügüxü̃ rü taechitawa̱xegüxü̃!

Danié 2:4

Rü nüma ga yema iyuüxü̃ ga nüxü̃ icua̱xüchigüxü̃ rü ãẽ̱xgacüxü̃ nangãxü̃gü rü ñanagürügü: —¡Guxü̃guma namaxü̃, Pa Ãẽ̱xgacüx! ¡Rü tomaxã nüxü̃ ixu i cunegü! Rü toma nax curü ngü̃xẽẽruü̃gü tixĩgüxü̃ rü tá cumaxã nüxü̃ tixu nax ta̱xacüchiga yixĩxü̃ —ñanagürügü.

Danié 6:22

Rü yimá chorü Tupana rü nua nanamu i wüxi i norü orearü ngeruxü̃ i dauxü̃cüã̱x. Rü ngẽma nixĩ i yachotaa̱xgüxü̃ i ñaa leóü̃gü nax tama choxü̃ nangõ̱xgüxü̃ca̱x. Erü nüma ya Tupana rü nüxü̃ nacua̱x nax taxuxü̃ma i chixexü̃ cumaxã chaxüxü̃, Pa Ãẽ̱xgacüx —ñanagürü.