Danié 6:3 - Tupanaarü Ore

³ Rü nüma ga Danié rü guxü̃ma ga yema togü ga ãẽ̱xgacügüarü yexera nüxü̃ nacua̱xüchi. Rü yemaca̱x ga nüma ga ãẽ̱xgacü rü nagu narüxĩnü nax namücüxü̃ nüxü̃ naxunetaxü̃ nax yema Babiróniaanemaxã inacuáxü̃ca̱x.

Danié 6:3 Iomraidhean Croise

Édra 4:22

Rü tama name nax ngéma nüxü̃ perüdaunümarexü̃ erü taxü̃ i guxchaxü̃ tá cha̱u̱xca̱x ínanguxẽẽgü i ngẽma duü̃xü̃gü ega tama nüxna peda̱u̱xgu —ñanagürü ga norü poperawa.

Neemía 7:2

Rü nüxü̃ chaxuneta ga chauenexẽ ga Ananí nax Yerucharéü̃arü ãẽ̱xgacü yixĩxü̃ca̱x. Rü yexgumarüxü̃ ta nüxü̃ chaxuneta ga Ananía nax ãẽ̱xgacüpatamaxã inacuáxü̃ca̱x yerü nüma nixĩ ga wüxi ga yatü ga mea ta̱xacümaxã icuáxü̃ rü guxü̃ma ga duü̃xü̃güarü yexera Tupanaga naxĩnüxü̃.

Ester 10:3

Rü nüma ga Maduquéu rü ãẽ̱xgacü ga Achuérutüxü̃wa nayexma, rü naeru nixĩ ga guxü̃ma ga yema ãẽ̱xgacüarü ngü̃xẽẽruü̃gü. Rü nüma ga Maduquéu rü guxü̃ma ga Yudíugütanüwa rü ãẽ̱xgacü ga naãẽxü̃ cuácü nixĩ. Rü guxü̃ma ga natanüxü̃ rü nüxü̃ nangechaü̃gü yerü meama namaxã inacua̱x rü guxü̃guma naxca̱x nadau nax ñuxãcü nüxü̃ nangü̃xẽẽxü̃.

Ucu̱xẽgüchiga 17:27

Yíxema cua̱x tüxü̃́ ngẽxmaxe, rü tama tamuarü orexã̱x. Rü yíxema tümaãẽxü̃ cuáxe, rü tama tanuxwa̱xe, rü yáxna taxĩnü.

Ucu̱xẽgüchiga 22:29

Yíxema mea puracüxe, rü ãẽ̱xgacügüaxü̃́ tá tapuracü, rü taxũtáma ngexü̃rüüxü̃ i duü̃xü̃axü̃́ tapuracü.

Ngu̱xẽẽtaeruü̃arü ore 2:13

Rü ñu̱xma rü düxwa nüxü̃ chicua̱xãchi nax ngẽma taãẽxü̃ icuáxü̃ rü nüxü̃ narümemae i ngẽma nax taechitamare imaxü̃xü̃, ngẽxgumarüxü̃ i ngẽma ngóonexü̃ rü ngẽma ẽanexü̃xü̃ nax namemaexü̃.

Danié 5:12

Rü nüma rü Danié nixĩ. Rü nüma ga gumá cunatü rü Betachágu nanaxüéga. Rü ngẽma yatü rü poraãcü cua̱x nüxü̃́ nangẽxma rü nüxü̃́ natauxcha nax nango̱xẽẽãxü̃ i wüxi i nanegü, rü nango̱xẽẽãxü̃ i ta̱xacü i cúxü̃, rü namexẽẽãxü̃ i taxü̃ i guxchaxü̃gü. ¡Rü naxca̱x nangema ya yimá yatü ya Danié! Rü nüma tá nixĩ i cumaxã nüxü̃ yaxuxü̃ nax ta̱xacüchiga yixĩxü̃ i ngẽma ĩxtapü̱xgu ümatüxü̃ —ngĩgürügü.

Danié 5:14

Rü chomaxã nüxü̃ nixugü nax tupanagüãxẽ cuwa ngẽxmaxü̃, rü ngẽmaca̱x nixĩ i cua̱x cuxü̃́ ngẽxmaxü̃ rü nüxü̃ cucua̱xüchixü̃.

Danié 5:7

Rü ñu̱xũchi tagaãcü aita naxü ga ãẽ̱xgacü ga Berchachá, rü naxca̱x nangema ga yema norü ucu̱xẽruü̃gü ga ẽxü̃guxü̃xü̃ cua̱xgüxü̃, rü yema cua̱x nüxü̃́ yexmaxü̃, rü yema Babiróniaanecüã̱x ga woramacuriwa ngúexü̃. Rü ñanagürü nüxü̃: —Yíxema nüxü̃ daumatüxe i ngẽma ngẽxma ümatüxü̃ rü nüxü̃ ixuxe nax ta̱xacüchiga yixĩxü̃, rü naxchiru i dauxracharaxü̃gu tá tüxü̃ chicu̱xẽxẽ, rü úirunaxca̱x ya cadénamaxã tá tüxü̃ chaxüchagü, rü tüma tá tixĩ i choweama i norü tomaepü̱xwa taxüxü̃ nax ãẽ̱xgacü tixĩxü̃ —ñanagürü.

Danié 9:23

Rü yexguma noxritama icunaxügügu nax cuyumüxẽxü̃ rü Tupana rü marü cuxü̃ nangãxü̃. Rü ngẽmaca̱x i chomax rü nua chaxũ nax cumaxã nüxü̃ chayarüxuxü̃ca̱x nax marü cuxü̃ nangãxü̃xü̃, erü nüma ya Tupana rü poraãcü cuxü̃ nangechaü̃. ¡Rü ñu̱xma rü mea irüxĩnü i ngẽma tá cumaxã nüxü̃ chixuxü̃ nachiga ga yema nüxü̃ cudauxü̃ ga yexguma cungo̱xetügu!