Danié 3:1 - Tupanaarü Ore

¹ Rü nüma ga ãẽ̱xgacü ga Nabucudonochó rü norü duü̃xü̃güxü̃ namu nax naxügüã̱xü̃ca̱x ga wüxi ga naxchicüna̱xã ga úirunaxca̱x. Rü yema naxchicüna̱xã rü nüxü̃́ nayexma ga 30 metru ga norü máchane, rü norü taxü̃ne rü 3 metru nixĩ. Rü ñu̱xũchi nüma ga ãẽ̱xgacü rü norü duü̃xü̃güxü̃ namu nax metachinüxü̃ ga Dúragu ãégaxü̃gu nachixẽẽgüãxü̃ca̱x ga Babiróniaanewa.

Danié 3:1 Iomraidhean Croise

Nüxíraxü̃xü̃ ga popera ga ãẽ̱xgacügüchiga 12:28

Rü norü ucu̱xẽruü̃güna naca ga yemachiga. Rü yemawena ga nüma ga ãẽ̱xgacü ga Yeruboáü̃ rü taxre ga wocaxacü ga úirunaxca̱x naxüxẽxẽ rü duü̃xü̃güxü̃ ñanagürü: —Pemax, Pa Iraéanecüã̱xgüx, rü wüxi i taxü̃ i guxchaxü̃ nixĩ nax Yerucharéü̃wa pexĩĩxü̃ nax ngéma Tupanapata ya taxü̃newa nüxü̃ peyarücua̱xüü̃güxü̃ca̱x. Rü dücax, ñaa wocaxacüchicüna̱xãgü nixĩ i perü tupanagü ga Equítuanewa pexü̃ ígaxü̃xü̃ —ñanagürü.

Ester 1:1

Rü nüma ga Achuéru rü ãẽ̱xgacü nixĩ ga Médiaanewa rü Pérchiaanewa. Rü yema norü naane rü 127 gu nixüye. Rü Índiaanewa inaxügü rü ñu̱xmata Etiopíaanewa nangu ga norü ta.

Wiyaegü 135:15

Rü ngẽma tama yaxõgüxü̃arü tupananetagü rü úirunaxca̱xgümare rü diẽrumünaxca̱xgümare nixĩ. Rü naxchicüna̱xãgü i duü̃xü̃gü naxme̱xmaxã ümarexü̃ nixĩgü.

Ínachoxü̃xü̃chiga 20:23

Rü tama name nax ta̱xacürü naxchicüna̱xã i úirunaxca̱x rüe̱xna diẽrumünaxca̱x pegüca̱x pexüxü̃ nax nüxü̃ picua̱xüü̃güxü̃ca̱x ñoma choxü̃ picua̱xüü̃güxü̃rüxü̃.

Ínachoxü̃xü̃chiga 32:31

Rü yemaca̱x ga Moiché rü wena dauxü̃ naxĩ nawa ga guma ma̱xpǘne ga Tupana nawa yexmane. Rü Tupanaxü̃ ñanagürü: —Aixcümaxü̃chi i ngẽma duü̃xü̃gü rü poraãcüxüchi chixexü̃ naxügü erü nügüca̱x nanaxügü i wüxi i naxchicüna̱xã i úirunaxca̱x nax namaxã natupanaã̱xgüxü̃ca̱x.

Ichaía 2:20

Rü ngẽma ngunexü̃gu rü duü̃xü̃gü rü tá ü̃cagüna rü chü̱xürigüna nanawoxochitanü i norü tupananetachicüna̱xãgü i úirunaxca̱x rü diẽrumünaxca̱x i nümatama ínaxüxüxü̃ nax nüxü̃ yacua̱xüü̃güxü̃ca̱x.

Ichaía 30:22

Rü ñoma wüxi i ãũãchixü̃rüxü̃ tá nüxü̃ cuxo i ngẽma curü naxchicüna̱xãgü i diẽrumünaxca̱x rü ngẽma curü tupananetachicüna̱xãgü i úirumaxã ichagüétüxü̃. Rü ñoma ta̱xacü i ãũãchixü̃rüxü̃ tá nüxü̃ cuxo rü cuxca̱x rü guxchirerüxü̃ tá nixĩ.

Ichaía 46:6

Rü nangẽxma i duü̃xü̃gü i nanutaque̱xexü̃ i taxü̃ i úiru rü diẽru nax naxca̱x nadauxü̃ca̱x i wüxi i naxchicüna̱xãarü üruxü̃. Rü nüxü̃́ nanaxütanü nax nüxü̃́ naxüaxü̃ca̱x i wüxi i naxchicüna̱xã nax ngẽmamaxã natupanaã́xü̃ca̱x, rü nüxü̃ yacua̱xüü̃xü̃ca̱x rü nape̱xegu nacaxã́pü̱xüxü̃ca̱x.

Yeremía 10:9

Rü ngẽma naxchicüna̱xãgü rü Tárchixwa ne naxü̃ i diẽrumünaxca̱x nixĩgü, rü Ufáwa ne naxü̃ i úirunaxca̱x nixĩgü. Rü yatügü i naxchicüna̱xãarü üxü̃ cuáxü̃ rü yatügü i úiruwa rü diẽrumüwa puracüxü̃ nixĩ i naxügüxü̃. Rü ñu̱xũchi nayaxüxchiru namaxã i naxchiru i dauxracharaxü̃ rü daucharaxü̃. Rü guxü̃ma i ngẽma naxchicüna̱xãgü rü yatügü i norü üxü̃ icua̱xüchixü̃ nixĩ i ínaxüxü̃xü̃.

Yeremía 16:20

“¿Rü namexü̃ ya yatü nax nümatama naxüaxü̃ i norü tupanagü? ¡Rü ngẽma tupananetachicüna̱xãgü rü tama aixcüma Tupana nixĩgü!” —ñanagürü ga Yeremía.

Danié 2:48

Rü ñu̱xũchi ga nüma ga ãẽ̱xgacü ga Nabucudonochó rü Daniéxü̃ tacü ga ãẽ̱xgacüxü̃ ningucuchixẽxẽ. Rü muxü̃ma ga mexẽchixü̃ ga ãmare nüxna naxã. Rü naétü nüxü̃ naxuneta nax ĩane ga Babiróniaarü probínchiaarü üyearü ãẽ̱xgacü yixĩxü̃ca̱x rü naeru yixĩxü̃ca̱x ga guxü̃ma ga yema ãẽ̱xgacüarü ucu̱xẽruü̃gü ga yema nachixü̃anewa yexmagüxü̃.

Danié 2:49

Rü nüma ga Danié rü ãẽ̱xgacüna naca nax nüxü̃ naxunetaxü̃ca̱x ga namücügü ga Chadrá rü Mechá rü Abex-negó nax yemagü norü ngü̃xẽẽruü̃gü yixĩgüxü̃ca̱x ga Babiróniaanewa. Rü nüma ga Danié rü ãẽ̱xgacüpatawatama nayexma nax yéma nüxü̃ nangü̃xẽẽxü̃ca̱x.

Danié 3:14

—¿Aixcüma yixĩxü̃ i pemax i tama nüxü̃ picua̱xüxü̃güxü̃ i ngẽma chorü tupanachicüna̱xãgü rü woo i ngẽma naxchicüna̱xã i máchanexü̃ i choma duü̃xü̃güxü̃ chaxüxẽxẽxü̃?

Danié 3:30

Rü yemawena ga nüma ga ãẽ̱xgacü rü yexera rümemaexü̃ ga puracü yema tomaepü̱x ga ngextü̱xüxü̃güna naxã ga Babiróniaanewa.

Danié 5:23

Dücax, Pa Ãẽ̱xgacüx, cuma rü Cori ya Tupana ya dauxü̃wa ngẽxmacügu quidauxcüraxü̃. Erü curü duü̃xü̃güxü̃ cuyanuxü̃xẽxẽ i ngẽma naxpáü̃gü ga Tupanapata ya taxü̃nearü ixĩxü̃. Rü ngẽma nüxna cuxuxü̃maxã wüxigu ngẽma naxpáü̃güwa peyaxaxü ga bínu, rü nüxü̃ picua̱xüü̃gü i ngẽma perü tupanachicüna̱xãgü i úirunaxca̱x, rü diẽrumünaxca̱x, rü bróũchenaxca̱x, rü fierunaxca̱x, rü nainaxca̱x rü nutanaxca̱x i ngearü maxü̃ã́xü̃, rü tama tüxü̃ dauxü̃, rü tama tüxü̃ ĩnüxü̃ rü taxuxü̃ma cuáxü̃. Natürü tama nüxü̃ quicua̱xüxü̃ ya yimá Tupana ya naxme̱xwa nangẽxmacü i curü maxü̃ rü namaxã icuácü i guxü̃ma i ta̱xacü icuxüxü̃.

Danié 5:4

Rü guxü̃ma ga yema yéma yexmagüxü̃ rü bínu nixaxgü rü nüxü̃ nicua̱xüü̃gü ga norü tupananetachicüna̱xãgü ga úirunaxca̱x, rü diẽrumünaxca̱x, rü bróũchenaxca̱x, rü fierunaxca̱x, rü nainaxca̱x rü nutanaxca̱x ixĩgüxü̃.

Ochéa 2:8

Natürü nümagü i ngẽma Iraétanüxü̃ rü ngẽma ngeruxü̃ nixĩgü nax tama nüxü̃ nacua̱xgüégaxü̃ nax choma yixĩxü̃ ga nüxna chanaxãxü̃ i trigu rü bínu rü chíxü̃ rü diẽru rü úiru. Natürü nümagü rü yema diẽrumaxã rü úirumaxã nanaxügü ga norü tupananetagü ga Baáchicüna̱xãgü.

Ochéa 8:4

Rü ngẽma duü̃xü̃gü rü ngẽxguma nachixü̃anearü ãẽ̱xgacügüxü̃ naxunetagügu rü tama choxna nacagü. Rü ngẽxguma nüxü̃ naxunetagügu i ngẽma tá namaxã icua̱xgüxü̃, rü tama chorü ucu̱xẽca̱x ínacagü. Rü nügüca̱x nanaxügü i naxchicüna̱xãgü i úirunaxca̱x rü diẽrumünaxca̱x. Rü ngẽmamaxã nügütama nachixexẽẽgü.

Abacú 2:19

Rü wüxi i ngechaü̃ nixĩ i tümaca̱x ya yíxema norü üruxü̃ erü ñatagürü nüxü̃: ¡Naba̱i̱xãchi! ñatagürü, rü wüxi ya nuta ya tama idexacüxü̃ tamu rü ñatagürü: ¡Inachi! ñatagürü. ¿Rü duü̃xü̃gümaxã yadexagüxü̃ yixĩxü̃ i ngẽma naxchicüna̱xãgü? Tama nidexagü erü ningearü maxü̃ã̱x woo nax úirumaxã rü diẽrumümaxã yaxãxü̃nexü̃.

Ngechuchuarü ngúexü̃gü ga yamugüxü̃arü puracüchiga 17:29

Rü ñu̱xma nax Tupanaxacügü ixĩgüxü̃, rü tama name i nagu tarüxĩnüe rü Tupana rü wüxi i naxchicüna̱xã i úirumüwa rü ẽ̱xna diẽrumüwa rü ẽ̱xna nutawa ixüxü̃rüxü̃ nixĩ. Erü guxü̃ma i ngẽma naxchicüna̱xãgü rü nümatama i duü̃xü̃gü nagu naxĩnüexü̃ãcüma nanaxügü.

Ngechuchuarü ngúexü̃gü ga yamugüxü̃arü puracüchiga 19:26

Rü marü nüxü̃ pedaugü rü nüxü̃ pexĩnüe nax ngẽma Pauru yaxucu̱xẽgüxü̃ i duü̃xü̃gü, rü namaxã nüxü̃ yaxuxü̃ nax tama aixcüma tupanagü yixĩxü̃ i ngẽma tupanagü i yixema ixügüxü̃. Rü ngẽmaãcü muxü̃ma i duü̃xü̃güxü̃ nüxü̃ narüxoexẽxẽ nax tama tórü tupanagüaxü̃́ yaxõgüãxü̃ca̱x. Rü tama núma Epéchiuwaxicatama ngexü̃ nawagü natürü wixguxüchi guxü̃ i Áchiaanewa ngẽmaãcü chixri nayaxucu̱xẽgü i duü̃xü̃gü.

Wenaxarü naxümatü ga Tupanaarü mugü 7:25

Pemax rü tá ípenagu i ngẽma norü tupananetachicüna̱xãgü, natürü taxũtáma pegüaxü̃́ penade i ngẽma úiru rü diẽrumü i namaxã yatüxünexü̃. Erü ngẽxguma pegüaxü̃́ penadexgu rü wüxi i taxü̃ i chixexü̃ tá pexü i Cori ya Tupanape̱xewa.

Yema Cuáü̃ nüxü̃ dauxü̃ i yixcüra tá ngupetüxü̃chiga 9:20

Natürü ga yema togü ga duü̃xü̃gü ga tama yema poxcuruü̃gümaxã yuexü̃, rü tama nüxü̃ narüxoe ga yema chixexü̃gü ga naxügüxü̃. Rü tama nüxü̃ narüxoe nax nüxü̃ yacua̱xüü̃güxü̃ ga ngo̱xogü rü yema tupananetachicüna̱xãgü ga úirunaxca̱x rü diẽrumünaxca̱x rü cobrenaxca̱x rü nutagünaxca̱x rü nainaxca̱x. Rü yemaacü nüxü̃ nicua̱xüü̃güama ga yema norü tupananetachicüna̱xãgü ga ngearü maxü̃ã́xü̃ rü tama nüxü̃ daugüxü̃ rü tama nüxü̃ ĩnüexü̃ rü tama ixĩxü̃.