Danié 2:4 - Tupanaarü Ore

⁴ Rü nüma ga yema iyuüxü̃ ga nüxü̃ icua̱xüchigüxü̃ rü ãẽ̱xgacüxü̃ nangãxü̃gü rü ñanagürügü: —¡Guxü̃guma namaxü̃, Pa Ãẽ̱xgacüx! ¡Rü tomaxã nüxü̃ ixu i cunegü! Rü toma nax curü ngü̃xẽẽruü̃gü tixĩgüxü̃ rü tá cumaxã nüxü̃ tixu nax ta̱xacüchiga yixĩxü̃ —ñanagürügü.

Danié 2:4 Iomraidhean Croise

Naanearü ügüchiga 31:47

Rü yexguma nüma ga Labáü̃ rü Araméutanüxü̃gawa nanaxüéga ga yema nachica, rü Yegá-chadutá, ñaxü̃gu nanaxüéga. Rü yexgumarüxü̃ ta nüma ga Acóbu rü Ebréugügawa nanaxüéga ga yema nachica, rü Garaáx, ñaxü̃gu nanaxüéga.

Naanearü ügüchiga 41:8

Rü moxü̃ãcü ga pa̱xmama rü poraãcü naxoegaãxẽ naxca̱x ga yema nanegü. Rü naxca̱x nangema ga guxü̃ma ga yema iyuüxü̃ rü duü̃xü̃gü ga nüxü̃ cua̱xüchigüxü̃ ga Equítuanecüã̱x. Rü nüma ga Faraóü̃ rü namaxã nüxü̃ nixu ga nanegü. Natürü taxuxü̃ma ga yema yuüexü̃ nüxü̃ nacua̱x nax ta̱xacüchiga yixĩxü̃ ga yema nanegü.

Nüxíraxü̃xü̃ ga popera ga ãẽ̱xgacügüchiga 1:25

Erü ñu̱xma rü ínapetae nax ãẽ̱xgacüxü̃ yangucuchixü̃ rü nanadai i wocagü rü wocaxacügü rü muxü̃ma i carnérugü rü ñu̱xũchi cunegüna naxu, Pa Ãẽ̱xgacüx, rü nüxna naxu i ngẽma churaragüerugü rü ñu̱xũchi Abiatá ya chacherdóte ixĩcü. Rü ñu̱xma i nümagü rü ngéma nangẽxmagü rü Adoníamaxã nachibüe rü naxaxegü, rü tagaãcü aita naxüe rü ñanagürügü: “¡Namaxü̃ ya ãẽ̱xgacü ya Adonía!” ñanagürügü.

Nüxíraxü̃xü̃ ga popera ga ãẽ̱xgacügüchiga 1:31

Rü ngĩma ga Bechabé rü ãẽ̱xgacüpe̱xegu inangücuchi ñu̱xmata ĩxmachiü̃wa yaxũcatü, rü tagaãcü ngĩgürügü: —¡Guxü̃guma namaxü̃ ya chorü cori ya ãẽ̱xgacü ya Dabí! —ngĩgürügü.

Norü taxre ga popera ga ãẽ̱xgacügüchiga 18:26

Rü Eriaquíü̃ ga Irichía nane rü Chéna rü Yoá nanangãxü̃gü ga yema Achíriaanearü churaragüeru rü nüxü̃ ñanagürügü: —Tanaxwa̱xe i Araméutanüxü̃gawa tomaxã quidexa i cumax, erü toma rü nüxü̃ tacua̱x i ngẽma Araméutanüxü̃ga. ¡Rü taxṹ i Ebréugügawa tomaxã quidexaxü̃ i cumax! Erü guxü̃ma i ngẽma duü̃xü̃gü i ĩanearü poxeguxü̃tápü̱xétüwa rüdaunüxü̃ rü nüxü̃ naxĩnüe —ñanagürügü.

Édra 4:7

Rü gumá taunecü ga Artayére ãẽ̱xgacü ixĩxgu ga Pérchiaanewa rü Biráü̃, rü Miridáte rü Tabeé rü naétü togü ga namücügümaxã ãẽ̱xgacü ga Artayéreca̱x nanaxümatügü ga wüxi ga popera. Rü yema popera ga chixri Yudáanecüã̱xgüchiga rü Yerucharéü̃cüã̱xgüchiga idexaxü̃ rü Araméugawa nanaxümatügü rü ñu̱xũchi yema naga ga ãẽ̱xgacü ga Artayére nawa idexaxü̃wa nanaxümatügü.

Neemía 2:3

Rü ãẽ̱xgacüxü̃ changãxü̃ rü ñachagürü: —Pa Ãẽ̱xgacüx ¡Guxü̃guma namaxü̃! ¿Ñuxãcü chi i tama changechaü̃xü̃? Erü yima ĩane ya chaunatügü nagu ta̱xgüne rü nachicaxicatama nixĩ, rü naxtapü̱xarü ĩã̱xgü rü ínanagu —ñachagürü.

Ichaía 36:11

Rü Echequíaarü ngü̃xẽẽruü̃gü ga Eriaquíü̃, rü Chéna, rü Yoá rü yema Achíriaanearü churaragüeruxü̃ nangãxü̃gagü rü nüxü̃ ñanagürügü: —Cuxna naxca̱x taca nax Araméutanüxü̃gawa tomaxã quidexaxü̃, erü ngẽma nixĩ i nüxü̃ tacuáxü̃. ¡Rü taxṹ i Ebréugawa tomaxã quidexaxü̃ i cumax! Erü guxü̃ma i ngẽma duü̃xü̃gü i ĩanearü poxeguxü̃arü dauxü̃wa irüdaunüxü̃ rü nüxü̃ naxĩnüe —ñanagürügü.

Ichaía 44:25

Rü ngẽma orearü uruü̃güneta rü ngẽxguma nüxü̃ yaxugüegu nax ta̱xacü tá ngupetüxü̃, rü choma rü nüxü̃́ ichayanaxoxẽxẽ nax tama yanguxü̃ca̱x i ngẽma nüxü̃ yaxugüexü̃. Rü ngẽma ẽxü̃guxü̃xü̃ cua̱xgüxü̃ rü choma nixĩ ichanatoõẽmarexü̃ nax tama nüxü̃ nacua̱xgüxü̃ca̱x i ta̱xacüchiga yixĩxü̃ i ngẽma nüxü̃ yaxugüexü̃. Rü ngẽma duü̃xü̃gü i cua̱x nüxü̃́ ngẽxmagüxü̃ rü choma nixĩ i nügümaxãtama chanaxutagagüxẽẽxü̃ nax ngẽma norü cua̱x rü taxuwama namexü̃.

Danié 1:4

Rü yema ngextü̱xüxü̃gü ga yadexechixü̃ rü nimechametü rü naxü̃newa taxuwama nichixe, rü meama naãẽxü̃ nicua̱x, rü meama poperaxü̃ icuáxü̃ nixĩgü nax yemaacü guxü̃wama yamexü̃ nax ãẽ̱xgacüpatawaarü ngü̃xẽẽruxü̃ yixĩgüxü̃ca̱x. Rü ñu̱xũchi nüma ga Apená rü yema ngextü̱xüxü̃güxü̃ nangúexẽxẽ ga naga ga Babiróniacüã̱x rü nacümagü ga poperagu ümatüxü̃.

Danié 2:7

Rü nüma ga yema yatügü ga cua̱x nüxü̃́ yexmagüxü̃ rü wena nanangãxü̃ga rü ñanagürügü: —Pa Ãẽ̱xgacüx ¡tomaxã nüxü̃ ixu i ngẽma cunegü! Rü toma rü tá cumaxã nüxü̃ tixu nax ta̱xacüchiga yixĩxü̃ —ñanagürügü.

Danié 3:9

—¡Guxü̃guma cumaxü̱̃x, Pa tórü Ãẽ̱xgacü, rü ngẽma cuéga rü guxü̃guma nüxna nacua̱xãchie!

Danié 4:19

Rü yexguma ga nüma ga Danié ga Betachámaxã naxugüãcü rü paxaãchi yexma narüchiane yerü poraãcü namuü̃ naxca̱x ga yema ĩnü ga naãẽwa nguxü̃. Natürü chomax i ãẽ̱xgacü rü ñachagürü nüxü̃: “Pa Betacháx ¡taxṹ i cuxoegaãẽxü̃ naxca̱x i ngẽma chaunegü rü ta̱xacüchiga yixĩxü̃!” ñachagürü. Rü nüma ga Betachá rü nanangãxü̃ rü ñanagürü choxü̃: “Pa Ãẽ̱xgacüx, chierüx guxü̃ma ga yema cunegüwa nüxü̃ cudauxü̃, rü curü uanügüca̱x yixĩxgux.

Danié 4:7

Rü guxü̃ma ga yema yuüxü̃gü rü yema ẽxü̃guxü̃ cua̱xgüxü̃ rü yema nüxü̃ icua̱xüchixü̃ rü yema woramacuriwa ngúexü̃ ga Babiróniaanecüã̱x rü chauxü̃tawa naxĩ. Rü choma rü namaxã nüxü̃ chixu ga yema nagu chaxãnegüxü̃, natürü tama nüxü̃ nacua̱xgü nax ta̱xacüchiga yixĩxü̃ ga yema nagu chaxãnegüxü̃.

Danié 4:9

“Pa Betachá i Guxü̃ i Chorü Ucu̱xẽruü̃güerux, rü choma nüxü̃ chacua̱x rü yimá Tupana ya Üünecüãxẽ cumaxã inacua̱x rü ngẽmaca̱x nüxü̃ cucua̱x i guxü̃ma i ẽxü̃guxü̃. Rü chanaxwa̱xe i ícurüxĩnü i ngẽma cumaxã tá nüxü̃ chixuxü̃ i chaunegüwa nüxü̃ chadauxü̃ rü ñu̱xũchi chanaxwa̱xe i chomaxã nüxü̃ quixu nax ta̱xacüchiga yixĩxü̃.

Danié 5:10

Natürü ga naé rü yéma iña, yerü nüxü̃ ixĩnü ga aita nax naxüxü̃ ga guma ngĩne rü yema ãẽ̱xgacügü ga namaxã yexmagüxü̃. Rü yemaca̱x yéma ixũ rü ngĩgürügü nüxü̃ ga ngĩne ga Berchachá: —¡Guxü̃guma namaxü̃, Pa Ãẽ̱xgacüx! ¡Rü taxṹ i cuxoegaãẽxü̃ rü taxṹ i cubaixãchixü̃!

Danié 5:8

Rü guxü̃ma ga yema norü ucu̱xẽruü̃gü ga nüxü̃ icua̱xüchixü̃ ga yéma yexmagüxü̃ rü nichocu nawa ga yema ucapu. Natürü taxuxü̃ma ga yema yatügü ga nüxü̃ cua̱xüchigüxü̃ rü nüxü̃ nacua̱xgü nax ãẽ̱xgacümaxã nüxü̃ yaxugüxü̃ nax ta̱xacüchiga yixĩxü̃ ga yema yexma ümatüxü̃.

Danié 6:21

Rü nüma ga Danié nanangãxü̃ rü ñanagürü: —¡Guxü̃guma namaxü̃, Pa Ãẽ̱xgacüx!

Danié 6:6

Rü yemaacü ga yema 120 ga ãẽ̱xgacügü rü naétü ga yema taxre ga Daniémücügü rü nügümaxã inaxügagü ga ãẽ̱xgacü ga Daríumaxã nax yanadexagüxü̃ca̱x. Rü yexguma marü nape̱xewa nangugügu rü ñanagürügü nüxü̃: —¡Guxü̃guma namaxü̃, Pa Ãẽ̱xgacüx!

Danié 6:7

Rü guxü̃ma i toma i ãẽ̱xgacügü i cutüü̃wa namaxã icua̱xgüe i ñaa nachixü̃ane rü tangutaque̱xegü. Rü ngẽma ngutaque̱xewa nagu tarüxĩnüe nax cumax, Pa Ãẽ̱xgacüx, rü cunaxunagüxü̃ i wüxi i mu nax ngẽmaãcü 30 i ngunexü̃gu nachu̱xuxü̃ nax texé ta̱xacürü tupanana rüe̱xna yatüna ngü̃xẽẽca̱x taca̱xaxü̃, rü cuxnaxicatama name nax taca̱xaxü̃. Rü texé ya tama naga ĩnüxe i ngẽma mu rü tá leóü̃tanügu tita̱xcuchi.

Ore i mexü̃ ga Matéu ümatüxü̃ 21:9

Rü yema duü̃xü̃gü ga nape̱xegu ĩxü̃, rü yema wixweama ãgüxü̃, rü tagaãcü ñanagürügü: —¡Namaxü̃ ya daa Dabítaxa! ¡Rü namecümaxüchi ya daa Tupanaégagu núma ũcü! ¡Rü pema rü ta, Pa Dauxü̃cüã̱x, rü nüxü̃ picua̱xüü̃gü ya Tupana! —ñanagürügü.

1 Chamué 10:24

Rü nüma ga Chamué rü guxãna naca rü ñanagürü: —¿Marü nüxü̃ pedauxü̃ ya yimá Cori ya Tupana nüxü̃ unetacü nax perü ãẽ̱xgacü i réi yixĩxü̃ca̱x? Rü nataxuma i wüxi i Iraéanecüã̱x i namaxã wüxiguxü̃ —ñanagürü. Rü nüma ga duü̃xü̃gü rü: —¡Namaxü̃x ya tórü ãẽ̱xgacü ya réi! —ñaxü̃maxã nanangãxü̃gü.