Amúx 9:1 - Tupanaarü Ore

¹ Nüxü̃ chadau ga Cori ya Tupana. Rü nüma rü ngẽma tupananetagüarü ãmarearü guruü̃xü̃tagu nachi, rü ñanagürü choxü̃: —¡Daa tupananetapataarü caxtagüerugu napogü nax duü̃xü̃güétü nangutaü̃xü̃ca̱x rü ngẽxma nayuexü̃ca̱x! Rü ngẽma maxẽxü̃ rü woo nabuxmügu rü norü uanügü tá taramaxã nanadai. Rü ngẽmaãcü taxuxü̃táma niña.

Amúx 9:1 Iomraidhean Croise

Norü taxre ga to ga popera ga ãẽ̱xgacügüchiga ümatüxü̃ 18:18

Rü yexguma ga nüma ga Micaía rü ñanagürü: —¡Nüxü̃ pexĩnüe i Tupanaarü ore! Choma rü nüxü̃ chadau ya Cori ya Tupana ya norü tochicaxü̃wa rütocü, rü nüxü̃ chadau i guxü̃ma i daxũcüã̱x i orearü ngeruü̃gü i norü tügünecüwagu rü norü to̱xwecüwagu chigüxü̃.

Wiyaegü 68:21

Rü nüma ya Tupana rü tá napúmüerugü rü tá nanapi̱x i nayaecha̱xmü i ngẽma norü uanügü i tama nüxü̃ rüxoechaü̃xü̃ i norü pecadugü.

Wiyaegü 68:22

Rü nüma ya Tupana rü ñanagürü: —Pa Iraétanüxü̃x, choma rü tá Bacháü̃anewa ne chanagagü i perü uanügü, rü mártamawa tá ne chanagagü i ngẽma perü uanügü.

Ichaía 6:1

Rü gumá taunecü ga ãẽ̱xgacü ga Uchía nagu yucü rü nüxü̃ chadau ga Cori ya Tupana ga wüxi ga tochicaxü̃ ga dauxü̃wa yexmaxü̃wa nax natoxü̃. Rü yema naxpechinüchiru rü nanatüétü ga guma napata ga taxü̃ne.

Yeremía 11:11

Rü ngẽmaca̱x tá naxca̱x íchananguxẽxẽ i wüxi i guxchaxü̃ i taxũtáma na̱xcha̱xwa yabuxmüxü̃. Rü woo aita naxüegu rü chorü ngü̃xẽẽca̱x ínacagügu rü taxũtáma nüxü̃ chaxĩnü. Rü chomatama ya Cori ya Tupana nixĩ i nüxü̃ chixuxü̃ i ngẽma ore.

Yeremía 48:44

Rü yíxema cuenetanüxü̃cha̱xwa ñaxe rü tá ãxmaxü̃gu tingucuchi. Rü yíxema ãxmaxü̃wa ixũxũxe rü tá yütagu tangu. Erü choma ya Cori ya Tupana rü tá Moáaneca̱x íchananguxẽxẽ i norü poxcu. Rü choma ya Cori ya Tupana nixĩ i ngẽma ñachaxü̃.

Echequié 1:28

Rü yema norü ya̱u̱xracüü ga caixanexü̃wa nango̱xgu rü ñoma chirapaema i pucügu nüxü̃ idauxü̃rüxü̃ nixĩ. Rü yemaacü nixĩ ga cha̱u̱xca̱x nangóxü̃ ga Cori ya Tupanaarü üüne. Rü yemaxü̃ chada̱u̱xgu rü ñaxtüanegu chanangücuchi.

Echequié 10:4

Rü yexguma ga yema Tupanaarü üüne rü yema querubíü̃güétüwa nayachü̱xüxãchi rü guma Tupanapata ga taxü̃neca̱x íxücuxü̃waama naxũ. Rü yema caixanexü̃maxã nayapa ga guma Tupanapata. Rü yema naa̱xtü ga guma Tupanapata ga taxü̃ne rü Cori ya Tupanaarü üünemaxã nangóone.

Echequié 15:7

Choma rü tá chaugü chixu nax Yerucharéü̃arü uanü chixĩxü̃. Rü norü duü̃xü̃gü rü wüxi ya üxücha̱xwa tá nibuxmü, natürü nai ya üxü tá ínanagu. Rü ngẽxguma chaugü chixuxgu nax perü uanü chixĩxü̃, rü ngẽxguma tá nixĩ i nüxü̃ picua̱xãchitanüxü̃ nax choma chixĩxü̃ i Cori ya Tupana.

Echequié 9:2

Rü ñu̱xũchi nüxü̃ chadau ga 6 ga yatügü ga guma ĩanegu chocuxü̃ nawa ga yema norü ĩã̱x ga dauxchitawaama üxü̃ ga nórtewa. Rü wüxichigü ga yema yatügü rü nayange ga wüxi ga naxne ga ma̱xeruxü̃. Rü yemaarü ngãxü̃tanügu nixũchigü ga wüxi ga yatü ga línuchimaxã ãxchiruxü̃. Rü norü goyexü̃wa nayangaxcuchiweü̃ ga norü ümatüruxü̃. Rü yema yatügü rü Tupanapataa̱xtügu nachocu, rü yema ãmarearü guruxü̃ ga bróũchenaxca̱xü̃tawa nayachaxãchitanü.

Amúx 7:17

Natürü i ñu̱xma rü ñaa nixĩ i ngẽma ore i Cori ya Tupana cumaxã nüxü̃ ixuxü̃, rü ñanagürü: “Cuxma̱x rü daa ĩanewa tátama ngexü̃ i ngeãẽxü̃ tixĩ. Rü ngẽma cunegü i iyatüxü̃ rü ñu̱xũchi yíxema cuxacügü ya ingexe rü taramaxã tá tüxü̃ nadai. Rü ngẽma cuanegü rü ngẽma uanügü rü sortéuãcüma tá nügü nayanu. Rü cuma rü duü̃xü̃gü i tama Tupanaxü̃ cua̱xgüxü̃arü nachixü̃anegu tá cuyayu. Rü norü uanügü i ngẽma Iraétanüxü̃ rü Iraéanearü yáxü̃wa tá nanagagü” —ñanagürü ya Cori ya Tupana.

Amúx 7:9

Rü ngẽma ãmarearü guruü̃gü i nawa Iraétanüxü̃ norü tupananetagüca̱x ãmaregü igugüxü̃ rü tá chayanaxoxẽxẽ. Rü yima Iraétanüxü̃arü tupananetagüpataxü̃gü rü nagu tá chipogügü. Rü taramaxã tá chanadai i ngẽma Yeruboáü̃tanüxü̃ —ñanagürü ga Cori ya Tupana.

Abacú 3:13

Rü cuma rü dauxü̃wa ícuxũxũ nax curü duü̃xü̃güxü̃ ícupoxü̃xü̃ca̱x, rü nüxü̃ nax curüngü̃xẽẽxü̃ca̱x ya yimá ãẽ̱xgacü ya cumatama nüxü̃ cuxunetacü. Rü cuma rü cuyama̱x i ngẽma ãẽ̱xgacü i chixexü̃ üxü̃ rü nagu cupogü i nachixü̃ane ñoma wüxi ya ĩpatagu ipogüxü̃rüxü̃.

Chofonía 1:12

Rü ngẽma ngunexü̃gu rü choma ya Tupana rü omügümaxã guxü̃wama i Yerucharéü̃wa tá mea naxca̱x chadau i ngẽma duü̃xü̃gü i chixexü̃ ügüxü̃. Rü tá chanapoxcue i ngẽma duü̃xü̃gü i ñoma bínu ya marü tama ichicacürüxü̃ ixĩgüxü̃. Rü nümagü rü inarüchomare rü taxuguma narüxĩnüe. Rü nügümaxãtama ñanagürügü: “Nüma ya Cori ya Tupana rü taxuxü̃táma i mexü̃ rüe̱xna chixexü̃ tamaxã naxü”, ñanagürügü.

Chofonía 2:14

Rü ngẽma napatagüarü poxeguxü̃ i mürapewagü rü tá ínanapoxü̃gü. Rü yima ĩpatamachixü̃gu tá nixĩ i nacagüxü̃ i carnérugü rü naguxü̃raü̃xü̃ i naeü̃gü i tama iyapuexü̃. Rü ngẽma ngú rü ngẽma ñaxĩ rü yima ĩpatagüarü caxtape̱xegu tá napegü. Rü ngẽma ngurucugü rü norü beü̃tánagüwa tá narüdoxe.

Ore i mexü̃ ga Cuáü̃ ümatüxü̃ 1:18

Taguma texé ñuxgu nüxü̃ tadau ga Tupana. Natürü Nane ya nügümaxã wüxicacü nixĩ ya tüxü̃ nüxü̃ cua̱xẽẽcü. Rü yimá Nane rü Tupanaxü̃chi nixĩ, rü Nanatümaxã wüxiwa nangẽxmagü.

Ore i mexü̃ ga Cuáü̃ ümatüxü̃ 1:32

Rü ñanagürü ta ga Cuáü̃: —Chomatama nüxü̃ chadau ga Tupanaãxẽ ya Üünecü ga yexguma wüxi ga muxtucurüxü̃ daxũwa ínaxĩ̱xgu rü Ngechuchuétügu yanawa̱xgu.

Ngechuchuarü ngúexü̃gü ga yamugüxü̃arü puracüchiga 26:13

Rü yexguma namagu taxĩyane, Pa Ãẽ̱xgacüx, rü yexguma meama tocuchiwa nanguxgu, rü nüxü̃ chadau ga wüxi ga omü ga daxũwa ibáxixü̃ ga üa̱xcüarü yexera nangóonexẽẽxü̃. Rü choxü̃ nabáxi rü yema chomücügüxü̃ rü ta nabáxi.

Yochué 10:18

Rü nüma ga Yochué rü Iraétanüxü̃na naxãga rü ñanagürü nüxü̃: —¡Nuta ngéma pedixgü rü yimagümaxã penanguta i ngẽma ãxmaxü̃, rü dauruü̃gü ngẽxma pemugü nax ngéma nüxna nadaugüxü̃ca̱x!

Yema Cuáü̃ nüxü̃ dauxü̃ i yixcüra tá ngupetüxü̃chiga 1:17

Rü yexguma nüxü̃ chada̱u̱xgu, rü nape̱xegu chayangu ñoma chayuxü̃rüxü̃. Natürü ga nüma rü norü tügüneme̱xẽmaxã choxü̃ ningõgü, rü ñanagürü choxü̃: “¡Taxṹ i cumuü̃xü̃! Choma nixĩ i chaxíra chayexmaxü̃ rü guxü̃gutáma changexmaechaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 8:3

Rü yemawena ínangu ga wüxi ga to ga Tupanaarü orearü ngeruxü̃ ga daxũcüã̱x. Rü nüma rü yema pumarate̱xearü guruü̃pe̱xegu nachi. Rü yéma nanange ga wüxi ga buetarexacü ga pumarate̱xearü guruxü̃ ga úirunaxca̱x. Rü nüxna nanaxã ga taxü̃ ga pumarate̱xe nax yema tochicaxü̃pe̱xewa yexmaxü̃ ga pumaraarü gute̱xeruü̃wa yaguãxü̃ca̱x, nax yema pumaraema rü wüxigu Tupanaarü duü̃xü̃güarü yumüxẽmaxã Tupanaxü̃tawa nanguxü̃ca̱x.