Amúx 8:11 - Tupanaarü Ore

¹¹ Rü choma ya Cori ya Tupana rü pemaxã nüxü̃ chixu rü ñachagürü: “Rü ñoma i naanewa tá ínangu i ngunexü̃gü i nagu tá taiya íchanguxẽxẽxü̃. Rü taxũtáma nixĩ i paũca̱x nax petaiyaexü̃ rüe̱xna dexáca̱x nax pita̱xawaexü̃, natürü Cori ya Tupanaarü orexü̃ nax pexĩnüexü̃ca̱x tá nixĩ i petaiyaexü̃.

Amúx 8:11 Iomraidhean Croise

Norü taxre ga to ga popera ga ãẽ̱xgacügüchiga ümatüxü̃ 15:3

Rü nũxcüma ga Iraétanüxü̃ rü mucüma ga taunecü nüxna nixĩgachi ya yimá aixcüma Tupana ixĩcü rü tama nüxü̃ nacua̱xgü ga norü ore yerü nataxuma ga chacherdótegü ga nangúexẽẽxü̃.

Wiyaegü 74:9

Rü ñu̱xma rü marü nataxuma ya cupata rü nataxuma i curü orearü uruü̃gü. Rü tama nüxü̃ tacua̱x nax ñuxgu tá nangupetüxü̃ i ñaa guxchaxü̃ i toétüwa ngẽxmaxü̃.

Ucu̱xẽgüchiga 29:18

Wüxi ya ĩane i ngextá duü̃xü̃gü tama Tupanaga ínaxĩnüexü̃wa, rü taxuxü̃ma mea inixũ. Natürü ngextá Tupanaga íxĩnüexü̃wa rü mexü̃gu ínamaxẽ i duü̃xü̃gü.

Ichaía 5:6

Rü ñu̱xũchi tá íchanata̱x i ngẽma úbanecü. Rü taxúetama tayayoatü rü taxúetama tanangĩxcanecü rü ngẽmaãcü tá chuxchuxü̃gü rü chixexü̃ i natüane nanecüwa narüxügü. Rü tá nüxna chaxãga i caixanexü̃ nax tama nanecügu napuxü̃ca̱x —ñanagürü ya Tupana.

Echequié 7:26

Rü nügüwe tá naxãgü i ngẽma guxchaxü̃gü i Yerucharéü̃cüã̱xgüca̱x ínguxü̃. Rü ngẽxgumarüxü̃ ta i ngẽma chixexü̃ i nachigagü rü tá nügüwe naxãgü. Rü tá naxca̱x nadaugü i wüxi i chorü orearü uruxü̃ nax ngẽma namaxã nüxü̃ ixuxü̃ca̱x nax ta̱xacüchiga yixĩxü̃ i ngẽma ngupetüxü̃. Natürü i ngẽma rü tá natüca̱xmamare nixĩ. Rü nataxutama i chacherdótegü i nangúexẽxẽxü̃ rü bai i yaxguã̱xgü i tayaxucu̱xẽgüxü̃.

Ochéa 2:3

Rü ngẽxguma taxũtáma nüxü̃ naxoegu i ngẽma tupananetachicüna̱xãgü rü tá nüxna chanayaxu i guxü̃ma i nüxü̃́ ngẽxmagüxü̃. Rü ngẽma nachixü̃ane rü noxri nango̱xgurüxü̃ tá chayaxĩxẽxẽ nax taxuxü̃ma nüxü̃́ ngẽxmaxü̃. Rü ñoma naxnücüane i ngearü dexáã́xü̃rüxü̃ tá chayaxĩxẽxẽ nax ngẽmaãcü ta̱xawamaxã nayuexü̃ca̱x i ngẽma choxna ixĩgachixü̃.

Miquéa 3:6

Rü pemax i orearü uruü̃güneta rü chütacü rü marü taxũtáma pengo̱xetügü. Rü ngẽxguma rü marü taxũtáma nüxü̃ pecua̱x i ngẽma Tupana nagu rüxĩnüxü̃. Rü ñoma üa̱xcü rütaxuxü̃rüxü̃ tá inarütaxu nax pengo̱xetüxü̃ rü taxũtáma Tupana pexü̃ nüxü̃ nacua̱xẽxẽ i ngẽma tá ngupetüxü̃.

Ore i mexü̃ ga Matéu ümatüxü̃ 9:36

Rü yexguma Ngechuchu nüxü̃ da̱u̱xgu ga yema muxü̃ma ga duü̃xü̃gü ga naxü̃tawa ngugüxü̃, rü nüxü̃́ nangechaü̃tümüü̃gü. Yerü carnérugü ga ngearü dauruü̃ã́xü̃rüxü̃ nanaxĩ̱xãchiãẽgü, rü tama nataãẽgü.

1 Chamué 28:15

Rü yexguma ga Chamué rü ñanagürü: —¿Ta̱xacüca̱x i choxü̃ cuchixewexü̃ rü nua choxü̃ cuxũxẽxẽxü̃? —ñanagürü. Rü nüma ga Chaú nanangãxü̃ rü ñanagürü: —Poraãcü chaxoegaãxẽ, erü nüma i Firitéugü rü toxca̱x ínayaxüãchi, natürü nüma ya Tupana rü marü choxna nixũgachi rü tama choxü̃ nacuáxchaü̃, rü tama choxü̃ nangãxü̃ga i orearü uruü̃güwa rüe̱xna chaunegüwa. Rü ngẽmaca̱x nixĩ i cuxca̱x changemaxü̃ nax chomaxã nüxü̃ quixuxü̃ca̱x nax ta̱xacü tá chaxüxü̃ —ñanagürü.

1 Chamué 3:1

Rü nüma ga ngextü̱xücü ga Chamué rü Cori ya Tupanaaxü̃́ napuracü yema Erí namuxü̃ãcüma. Rü yexguma ga Tupana rü ñuxguacürica texémaxã nidexa. Rü ñuxguacürica texéca̱x nanango̱xẽxẽ ga ẽxü̃guxü̃.