Amúx 6:8 - Tupanaarü Ore

⁸ Rü nüma ya Cori ya Tupana rü nügüégagu nanaxuegu. Rü Cori ya Tupana ya Guxãétüwa Ngẽxmacü rü nüxü̃ nixu rü ñanagürü: —Choma rü naxchi chaxai nax nügü yacua̱xüü̃güxü̃ i ngẽma Acóbuarü duü̃xü̃gü. Rü tama namaxã chataãxẽ ya yima norü ãẽ̱xgacüpatagü ya mexẽchine. Rü norü uanügüme̱xẽwa tá chanangexmagüxẽxẽ ya yima norü ĩane namaxã i guxü̃ma i ngẽma nawa ngẽxmaxü̃ —ñanagürü.

Amúx 6:8 Iomraidhean Croise

Naanearü ügüchiga 22:16

Rü ñanagürü nüxü̃: —Nüma ya Cori ya Tupana rü ñanagürü cuxü̃: “Ngẽma cuxüxü̃wa nüxü̃ chacua̱x nax aixcüma chauga cuxĩnüxü̃, erü tama choxna cunachu̱xu ya yimá cune ya nügümaxã wüxicacü. Rü ngẽmaca̱x chauégagutama cumaxã nüxü̃ chixu rü tá poraãcü cuxü̃ curüngü̃xẽxẽ. Rü ngẽma cutaagü rü tá chayamuxẽxẽ. Rü ẽxtagüe̱xpü̱x rü naxnücüte̱xe ya taxtüpechinüwa ngẽxmacüe̱xpü̱x tá nixĩ i norü mu. Rü nümagü rü guxü̃gutáma norü uanügüxü̃ narüporamaegü.

Wiyaegü 106:40

Rü nüma ga Tupana rü poraãcü namaxã nanu ga yema norü duü̃xü̃gü. Rü yemaca̱x noxtacüma nüxü̃ naxo.

Wiyaegü 47:4

Rü nümatama ya Cori ya Tupana nixĩ ga nüxü̃ naxunetaxü̃ i ñaa norü naane nax guxü̃gutáma tóxrü yixĩxü̃ca̱x. Rü ñaa naanemaxã tataãẽgü i yixema i Acóbutanüxü̃ nax Tupana poraãcü tüxü̃ ngechaü̃güxü̃.

Wiyaegü 50:12

Rü ngẽxguma chi chataiyaxgu i choma rü taxũchima pemaxã nüxü̃ chixu erü choxrü nixĩ i ñoma i naane rü guxü̃ma i ta̱xacü i nawa ngẽxmagüxü̃.

Wiyaegü 78:59

Rü yemaxü̃ nada̱u̱xgu ga nüma ga Tupana rü poraãcü nanu rü yema Iraétanüxü̃na nixũgachi.

Ucu̱xẽgüchiga 8:13

Yíxema Tupanaga ĩnüxe rü naxchi taxai i chixexü̃. Choma i cua̱x rü naxchi chaxai i ngẽma nacüma i nügü icua̱xüüxü̃, rü nacüma i nügü írütaxü̃, rü nacüma i chixexü̃ üxü̃, rü nacüma i dora.

Ichaía 28:1

Wüxi i ngechaü̃ tá nixĩ naxca̱x ya Chamária ya Efraíü̃anearü ĩane ya taxü̃ne ya namaxã nügü yacua̱xüü̃güne i ngẽma duü̃xü̃gü i ngãxẽxü̃. Yima ĩane ya Chamária ya metachinüxü̃ iyacuáxü̃arü ma̱xpǘnewa ngẽxmane, rü ñoma putüragü i mexü̃gü i paxãma rüñẽ̱xchacuxü̃rüxü̃ nixĩ, rü norü duü̃xü̃gü rü bínumaxã nangãxẽecha.

Yeremía 12:8

Rü ñaa duü̃xü̃gü ga choxrüchire̱x ixĩgüxü̃, rü ñu̱xma i cha̱u̱xca̱x rü ñoma wüxi i leóü̃ i naixnecüwa ngẽxmaxü̃rüxü̃ nixĩgü. Rü poraãcü chixri chauchiga nidexagü, rü ngẽmaca̱x nixĩ i naxchi chaxaixü̃.

Yeremía 22:14

Rü cuma rü ñacurügü: “Wüxi ya taxü̃ne ya ãẽ̱xgacüpata tá chaugüxü̃́ chaxü. Rü norü dauxü̃chixü̃wa rü tá nangẽxma i ñuxre i naxmachiãgü i taxü̃”, ñacurügü. Rü cuyataxẽxẽ i norü beü̃tánagü. Rü ngẽma naxtapü̱xgü rü mürapewa i ocayiwamaxã cuyapexgü. Rü ñu̱xũchi chauxruxü̃ i dauxü̃maxã cuyachagü.

Yeremía 22:5

Natürü ngẽxguma taxũtáma naga pexĩnüegu i ñaa pemaxã nüxü̃ chixuxü̃ rü naxchipe̱xexica tá ngéma nayaxü ya daa ãẽ̱xgacüpata. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü ya Cori ya Tupana.

Yeremía 44:26

¡Natürü, iperüxĩnüe i guxãma i pemax i Yudátanüxü̃ i ñu̱xma Equítuanewa pemaxẽxü̃! Rü choma ya Cori ya Tupana rü ñachagürü pexü̃: ‘Choma rü chauéga i üünexü̃maxã pemaxã chanaxuegu rü guxü̃ma i Equítuanewa rü tama chanaxwa̱xe nax texé i Yudátanüxü̃ chauéga tanaxuxuchixü̃ rü ñatarügü: Cori ya Tupanaégagu cumaxã ichaxuneta, ñatarügü.

Yeremía 49:13

Choma ya Cori ya Tupana rü chauégagu pemaxã nüxü̃ chixu rü yima perü ĩane ya Bochrá rü wüxi i chianexü̃ tá nixĩ rü nachitaü̃ica tá ínayaxü. Rü ngẽma togü i nachixü̃anecüã̱x i duü̃xü̃gü rü chixri yima ĩanechiga tá nidexagü, rü tá namaxã naba̱i̱xãchie, rü tá nüxü̃ nacugüe. Rü yima ĩane rü tá nangeãcumare. Rü guxü̃nema ya yima naigü ya Edóü̃anearü ĩanegü rü guxü̃gutáma nachitaü̃ica ínayaxü” —ñanagürü.

Yeremía 51:14

Rü nüma ya Cori ya Tupana ya Guxãétüwa Ngẽxmacü rü nügüégagu cumaxã nanaxuegu rü ñanagürü: “Pa Babiróniax, curü uanügümaxã tá chayapaxẽxẽ ya curü ĩane. Rü ñoma munügürüxü̃ tá namu. Rü nümagü rü tá tagaãcü aita naxüe i ngẽxguma cuxü̃ naporamaegügu”, ñanagürü.

Auxexü̃chiga 2:5

Rü nüma ga Cori ya Tupana rü ñoma wüxi i torü uanürüxü̃ nügü nixĩxẽxẽ. Rü nayachixexẽxẽ ga guxü̃nema ga ĩanegü ga Iraéanewa yexmagüne. Rü nagu napogü ga guxü̃nema ga norü ãẽ̱xgacügüpatagü rü nayawa̱xgüxẽxẽ ga guma ĩanegüarü poxeguxü̃tápü̱xgü. Rü yema naane ga mexẽchixü̃ ga Yudáane rü naxca̱x ínananguxẽxẽ ga guxchaxü̃gü rü axu ga nügüwe ãgüxü̃.

Echequié 24:21

Rü choxü̃ namu nax pemaxã nüxü̃ chixuxü̃ca̱x i norü ore i ñaxü̃: “Pa Iraétanüxü̃x, pema rü namaxã pegü picua̱xüü̃gü ya yima chopata ya taxü̃ne ya namaxã pegü íperüporaene. Natürü woo nax nüxü̃ pingechaü̃xü̃chixü̃ rü perü meruxü̃ nax yixĩxü̃ rü choma rü tá nagu chapogü. Rü ngẽma Yerucharéü̃wa yaxǘgüxü̃ ga penegü rü pexacügü rü taramaxã tá nayue.

Ochéa 11:6

Rü norü uanügü rü tá taramaxã Iraéanearü ĩanegüca̱x ínayaxüãchi. Rü tá nagu napogüe ya yima ĩanegüarü poxeguxü̃. Rü ngẽmaãcü tá namaxã nangupetü yerü choxna nixĩgachi nax norü tupananetagüwe naxĩxü̃ca̱x.

Lebítanüxü̃arü puracüchiga 26:11

Rü choma rü petanüwa tá chamaxü̃ rü taxũtáma pexü̃ chaxo.

Lebítanüxü̃arü puracüchiga 26:30

Rü choma rü tá nagu chipogügü i ngẽma nachicagü i nawa perü tupananetaxü̃ picua̱xüü̃güxü̃. Rü taxregu tá chanamate i perü pumarate̱xearü guruü̃gü. Rü wüxigu tá chananutaque̱xe i pexene i yuexü̃ naétügu i ngẽma tupanachicüna̱xãgü i ngearü maxü̃ã́xü̃. Rü ngẽmawa tá pexü̃ chanawe̱x nax pexü̃ chaxoxü̃.

Amúx 3:10

Rü ngẽma duü̃xü̃gü rü tama naãẽxü̃ nacua̱xgüéga nax mexü̃ naxügüxü̃. Rü napatagü ya mexẽchínegu nananu ga yema namáetagüãcüma naxca̱x nangĩ̱xgüxü̃ —ñanagürü ya Cori ya Tupana.

Amúx 3:11

Rü nüma ya Cori ya Tupana rü ñanagürü ta: —Wüxi i to i nachixü̃ane rü tá pemaxã narüxuanü. Rü norü churaragü rü tá pechixü̃anegu nachocu. Rü tá perü ĩanexü̃ ínachomaeguãchi. Rü ngẽma perü poxü̃chica rü tá nagu napogüe. Rü yima ãẽ̱xgacüpatagü rü tá nanadeãcu —ñanagürü.

Amúx 4:2

Rü nüma ya Cori ya Tupana rü marü norü üüneégagu pemaxã nanaxuegu rü ñanagürü: —Tá ínangu i ngunexü̃ i pexü̃ yawe̱xgüraxü̃ãcüma pexü̃ yagagüxü̃, rü yíxema penegü rü tá poxwamaxã tüxü̃ niwe̱xgüraxü̃.

Amúx 5:21

Rü Cori ya Tupana rü ñanagürü pexü̃: —Choma rü naxchi chaxai rü nüxü̃ chaxo i ngẽma taxü̃ i peta i chauégagu pexüxü̃. Rü tama namaxã chataãxẽ i ngẽma perü ngutaque̱xegü i cha̱u̱xca̱x pexüxü̃.

Amúx 8:3

Rü ñanagürü ta: —Ngẽma ngunexü̃gu rü ngẽma ãẽ̱xgacüpatawa taãẽãcü nax nawiyaegüxü̃ rü tá ngechaü̃xü̃ nananguxuchi. Erü ngẽma ngunexü̃gü rü muxü̃tama i duü̃xü̃gü nayue. Rü bexma tá düxétüguama ínanawoxü̃ i ngẽma yuexü̃ —ñanagürü ya Cori ya Tupana.

Amúx 8:7

Rü ñanagürü ta: —Choma ya perü Cori ya Tupana rü Acóbuégagu pemaxã nüxü̃ chixu rü tagutáma nüxü̃ charüngüma ga yema chixexü̃ ga pexügüxü̃.

Chacaría 11:8

Rü wüxi ga tauemacügutama rü íchanawoxü̃ ga tomaepü̱x ga norü dauruü̃gü, yerü tama yáxna namaxã chaxĩnü, rü chauxchi naxaie.

Wenaxarü naxümatü ga Tupanaarü mugü 32:19

Rü yemaca̱x nixĩ ga Cori ya Tupana rü pemaxã nanuxü̃, rü pexü̃ naxoxü̃ i pema nax naxacügü pixĩgüxü̃.