Amúx 5:7 - Tupanaarü Ore

⁷ Rü ngẽma duü̃xü̃gü i pexü̃tawa ĩxü̃ nax penamexẽẽxü̃ca̱x i norü guxchaxü̃gü rü pema, Pa Ãẽ̱xgacügüx, rü tama aixcüma nüxü̃́ penamexẽxẽ. Rü ngẽmaca̱x tama nataãxẽ i duü̃xü̃gü erü tama mugü nüxü̃ ixuxü̃ãcüma penaxü.

Amúx 5:7 Iomraidhean Croise

Wiyaegü 125:5

Natürü ngẽma duü̃xü̃gü i chixexü̃ i nacümagu ĩxü̃ ¡rü poxcu namaxã naxuegu! Erü ngẽmatama nixĩ i woetama naxca̱x ixĩxü̃ i ngẽma chixexü̃ ügüxü̃. ¡Rü Iraétanüxü̃na naxã i taãxẽ!

Wiyaegü 36:3

Rü ngẽma duü̃xü̃ i chixexü̃ rü ngẽxguma yadexagu rü taguma mexü̃ i orexü̃ nixu rü doraxü̃xicatama nixu. Rü wüxi i duü̃xü̃ i tama naãẽxü̃ cuáxü̃ nixĩ, rü taguma mexü̃ naxü.

Ucu̱xẽgüchiga 21:7

Ngẽma duü̃xü̃gü i chixexü̃gu maxẽxü̃, rü ngẽma norü chixexü̃gu tátama nixĩ i nayuexü̃, erü tama mexü̃ca̱x nadaugü.

Ichaía 1:23

Rü perü ãẽ̱xgacügü rü tama Tupanaga naxĩnüe rü namaxã naxãmücügü i duü̃xü̃gü i máxwa̱xegüxü̃. Rü diẽruca̱x rü ãmareca̱x ínacagü nax tama napoxcuexü̃ca̱x i ngẽma chixexü̃ ügüxü̃. Rü taxcutagü rü tama tüxü̃ narüngüxẽẽgü, rü tama tümagu narüxĩnüe ya yixema yutegüxe.

Ichaía 10:1

¡Rü pegümaxã pengechaü̃gü i pema i ãẽ̱xgacügü nax chixexü̃ i mugü duü̃xü̃güca̱x ipexüxü̃ rü penaxunagüchigaxü̃ i mugü i taxucürüwama duü̃xü̃gü íngu̱xẽẽxü̃!

Ichaía 46:12

¡Rü choxü̃́ iperüxĩnüe Pa Duü̃xü̃gü i Taxúegama Ĩnüexü̃! Pema nüxü̃ pecua̱xgu rü taxũtáma paxa pexü̃ íchanguxü̃xẽxẽ. Natürü pemaxã nüxü̃ chixu rü marü ningaica nax pexü̃ íchanguxü̃xẽẽxü̃ rü marü taxũtáma nũxcü nixĩ. Rü choma rü tá Chióü̃xü̃ íchanguxuchixẽxẽ rü Iraétanüxü̃xü̃ tá chanawe̱x i chorü pora —ñanagürü ga Tupana.

Ichaía 5:20

¡Rü pegümaxã pengechaü̃gü! Erü ngẽma nacüma i mexü̃ rü pexca̱x nachixe, rü ngẽma nacüma i chixexü̃ rü pexca̱x name. Rü ngẽma ngóonexü̃ rü pexca̱x waanexü̃ nixĩ, rü ngẽma waanexü̃ rü pexca̱x ngóonexü̃ nixĩ. Rü ngẽma üxüxü̃ rü pexca̱x maixcuraxü̃ nixĩ. Rü ngẽma maixcuraxü̃ rü pexca̱x üxüxü̃ nixĩ.

Ichaía 5:7

Rü ngẽma norü úbanecü i nüxü̃́ ngúchaü̃xü̃ ya Cori ya Tupana ya Guxãxétüwa Ngẽxmacü, rü ngẽma nixĩ i Iraétanüxü̃ i Yudáanewa ngẽxmagüxü̃. Rü nüma ya Cori ya Tupana rü nanaxwa̱xe i nagu naxĩxü̃ i ngẽma norü mugü. Natürü ngẽma Iraétanüxü̃ rü máetaguxicatama narüxĩnüe. Rü nüma ya Tupana rü ínananguxẽxẽ nax nügü nangechaü̃güxü̃, natürü ngẽma natanüwa nüxü̃ ĩnüxü̃ nixĩ nax ngúxü̃maxã aita naxüexü̃.

Echequié 18:24

Natürü ngẽxguma chi wüxi i duü̃xü̃ i mea maxchiréxü̃ nüxü̃ rüxoxgu nax mea namaxü̃xü̃, rü naxüãxgu i guxü̃ma i chixexü̃ i tama namaxã chataãẽxü̃ ¿rü namexü̃ yixĩxü̃ nax tama napoxcuxü̃? Rü pemaxã nüxü̃ chixu rü tá napoxcu. Rü guxü̃ma ga yema mexü̃ ga noxri naxüxü̃ rü choma rü tá nüxü̃ icharüngüma. Rü nüma rü tá nayu nagagu i ngẽma norü chixexü̃gü. Rü choma ya Cori ya Tupana nixĩ i ngẽma ñachaxü̃.

Echequié 3:20

Rü ngẽxguma chi wüxi i duü̃xü̃ i noxri mea maxü̃xü̃ rü nüxü̃ naxoxgu nax mea namaxü̃xü̃ rü poxcu namaxã chaxueguxgu rü ngẽxguma cuma rü tama cunaxucu̱xẽgu rü nüma rü norü chixexü̃gu tá nayu. Rü yema mexü̃ ga noxri naxüxü̃ rü taxũtáma chope̱xewa ínanapoxü̃. Rü nüma rü norü chixexü̃gagu tá nayuama, natürü i choma rü tá cuxna naxca̱x chaca i ngẽma duü̃xü̃ erü tama cunaxucu̱xẽ.

Echequié 33:18

Rü ngẽxguma yimá yatü ya mexü̃ i nacümagu maxü̃cü, rü nawena nüxü̃ naxoxgu nax ngẽma mexü̃ i nacüma naxüxü̃, rü ñu̱xũchi chixexü̃ i nacümagu namaxü̃gu, rü ngẽma chixexü̃ i nacüma i naxüxü̃gagu tá nayu.

Ochéa 10:4

Rü yexü̃cürü nidexaechamare rü natüca̱xmamare tamaxã inaxuneta rü nanaxunagü i mugü natürü taguma nayanguxẽẽgü. Rü ngẽmaca̱x i tatanüwa rü duü̃xü̃gü rü nügümaxã nanue rü ñoma wüxi i nanetü i nawa iyuxü̃rüxü̃ nangẽxma i chixexü̃ i tatanüwa”, ñanagürügü.

Amúx 2:3

Rü norü duü̃xü̃güpe̱xewa tá íchanata̱xüchi i ngẽma norü ãẽ̱xgacü. Rü wüxigu norü ngü̃xẽẽruü̃gümaxã tá chanadai —ñanagürü ya Cori ya Tupana.

Amúx 3:10

Rü ngẽma duü̃xü̃gü rü tama naãẽxü̃ nacua̱xgüéga nax mexü̃ naxügüxü̃. Rü napatagü ya mexẽchínegu nananu ga yema namáetagüãcüma naxca̱x nangĩ̱xgüxü̃ —ñanagürü ya Cori ya Tupana.

Amúx 6:12

¿Rü nüxü̃́ natauxchaxü̃ nax nutapütawa dauxü̃ naxĩgüxü̃ i cowarugü? ¿Ẽ̱xna natauxchaxü̃ i márwa nax naxaimüaneãxü̃ i wocagü? Natürü i pema rü ngẽma mugü i duü̃xü̃güarü ngü̃xẽẽruxü̃ ixĩxü̃ rü dairuxü̃ peyanguxuchixẽxẽ. Rü ngẽma aixcüma mexü̃ rü pema rü guxchaxü̃xü̃ peyanguxuchixẽxẽ.

Miquéa 3:9

¡Iperüxĩnüe i pema i Iraéanearü Ãẽ̱xgacügüx rü pema i Iraétanüxü̃maxã icua̱xgüxe! Pema rü naxchi pexaie i ngẽma mexü̃, rü ñu̱xũchi ípeyatoxẽxẽ i ngẽma mexü̃.

Abacú 1:4

Rü duü̃xü̃gü rü tama aixcüma nagu namaxẽ i ngẽma Tupanaarü mugü rü tochixü̃anearü mugü. Rü ngẽma mugü i duü̃xü̃güétüwa idexaxü̃ rü tama naga naxĩnüe. Rü ngẽma duü̃xü̃gü i chixexü̃gu maxẽxü̃ rü tüxü̃ napoxcu ya yíxema mexü̃ ügüxe. Rü ngẽmaãcü ínayatoxẽẽgü i ngẽma aixcüma we̱xguxü̃ —ñanagürü.

Chofonía 1:6

Rü ngẽxgumarüxü̃ tá ta ichayanaxoxẽxẽ i ngẽma duü̃xü̃gü i choxna ixĩgachixü̃, rü tama cha̱u̱xca̱x daugüxü̃ rü tama choxna cagüexü̃ ega ta̱xacü nanaxwa̱xegügu —ñanagürü tá.

Wenaxarü naxümatü ga Tupanaarü mugü 29:18

Rü tama penaxwa̱xe nax petanüwa nangemaxü̃ i wüxi i yatü, rüe̱xna wüxi i ngexü̃, rüe̱xna wüxi ya ĩpatacüã̱xgü, rüe̱xna wüxitücumü i duü̃xü̃gü i Cori ya Tupanana ixĩgachixü̃ naxca̱x nax ngẽma nachixü̃anegüarü tupananetagüxü̃ yacua̱xüü̃güxü̃ca̱x. Rü petanüwa rü tama name nax wüxíe ñoma wüxi i nai i üxchuma̱xãxü̃ i nawa iyuxü̃rüxü̃ ixĩxẽ.