Amúx 4:11 - Tupanaarü Ore

¹¹ Rü wüxi ga taxü̃ ga guxchaxü̃ pexca̱x íchanguxẽxẽ yema Chodómaca̱x rü Gomóraca̱x íchanguxẽẽxü̃rüxü̃. Rü pema rü ñoma nai i üxüwa ixaxü̃ rü nawa íyaxuchixü̃rüxü̃ pixĩgü. Natürü ga pema rü tama cha̱u̱xca̱x pewoegu —ñanagürü ya Cori ya Tupana.

Amúx 4:11 Iomraidhean Croise

Ichaía 13:19

Pa Babiróniax, cuma nax guxü̃ i nachixü̃anegüarü yexera quixĩxü̃, rü cumaxã nixĩ i nügü yacua̱xüü̃güxü̃ i curü duü̃xü̃gü i Cadéugü. Natürü tá icuyarüxo yexguma Chodóma rü Gomóraxü̃ chayarüxoxẽẽxgurüxü̃.

Ichaía 7:4

Rü ñaa orexü̃ namaxã ixu: “¡Naxuãxẽ rü cugüna nadau! Natürü tama name nax cubaixãchixü̃ rü cumuü̃xü̃ rü icurümaãchixü̃ naxca̱x i ngẽma Chíriaanearü ãẽ̱xgacü i Rechíü̃ rü ñu̱xũchi Peca i Remaría nane i pemaxã nuexü̃. Erü ngẽmagü rü ñoma taxre i üxüchametü irücaixgüxü̃rüxü̃ nixĩgü, natürü paxa tá nixogü.

Ichaía 9:12

Rü éstewaama ne naxĩ i Chíriaanecüã̱xgü, rü oéstewaama ne naxĩ i Firitéutanüxü̃. Rü ñoma ta̱xacü i noxtacüma íga̱xaxü̃rüxü̃ tá Iraéanecüã̱xgüxü̃ nadai. Rü woo ngẽmaãcü napoxcueãxü̃ ya Cori ya Tupana, natürü tama Iraéanecüã̱xgümaxã inarüngü̃xmü. Rü yexeraãcü nayaxãxũnechigüama.

Yeremía 23:14

Rü choma rü marü nüxü̃ chadau i ngẽma Yerucharéü̃arü orearü uruü̃güneta nax poraãcü chixexü̃ naxügüxü̃. Rü ngexü̃gü i ãtéxü̃maxã namaxẽxü̃ rü duü̃xü̃güxü̃ nawomüxẽẽgüxü̃. Rü ngẽma duü̃xü̃gü i chixexü̃gu maxẽxü̃axü̃́ nanangúchaü̃xẽxẽ nax tama nüxna yaxĩgachixü̃ca̱x i ngẽma chixexü̃ i nagu namaxẽxü̃. Rü nümagü i ngẽma orearü uruü̃güneta rü ñu̱xũchi ngẽma ĩanecüã̱xgü rü chope̱xewa rü ñoma Chodómacüã̱x rü Gomóracüã̱xrüxü̃ nixĩgü.

Yeremía 49:18

Rü yexgumarüxü̃ nax iyanaxoxü̃ ga Chodóma, rü Gomóra, rü guxü̃nema ga guma ĩanegü ga nüxna ngaicamagüne, rü ngẽxgumarüxü̃ tá ta nixĩ ya Edóü̃arü ĩanegü nax inayanaxogüxü̃. Rü tagutáma texé ngéma tamaxẽ rü bai ngéma taxüpetü. Rü choma ya Cori ya Tupana nixĩ i ngẽma ñachaxü̃.

Yeremía 5:3

Pa Corix, ngẽma naxca̱x cudauxü̃ nixĩ i duü̃xü̃gü i aixcüma cuga ĩnüexü̃. Natürü woo cunapoxcue, rü tama cuga naxĩnüechaü̃. Rü cunadai, natürü tama inaxĩnüechaü̃. Yerü nutaarü yexera nataiarü maxü̃ã̱xgü, rü tama nüxü̃ narüxoechaü̃ i nacüma i chixexü̃.

Yeremía 50:40

Rü yima Babirónia rü ñoma Chodómarüxü̃, rü Gomórarüxü̃, rü guxü̃nema ga guma ĩanegü ga nüxna ngaicamagünerüxü̃ tá inarütaxu. Rü tagutáma texé ngéma tamaxẽ rü bai texé nachicawa taxüpetü. Rü choma ya Cori ya Tupana nixĩ i ngẽma ñachaxü̃ —ñanagürü.

Echequié 24:13

Rü cumax, Pa Yerucharéü̃x, rü ñoma panera ya aüxǘchicürüxü̃ quixĩ. Rü choma rü nüxü̃ chadau nax poraãcü curü ngúchaü̃ cuxüxü̃. Rü ngẽma nixĩ i cuwa íchapixchaü̃xü̃ nax cumexü̃ca̱x. Natürü i cuma rü tama cunaxwa̱xe. Rü ngẽxguma chorü numaxã cuxü̃ chapoxcuguxicatama tá cume.

Ochéa 11:5

Natürü i nümagü rü tama cha̱u̱xca̱x nawoeguchaü̃. Rü ngẽmaca̱x woo taxũtáma Equítuaneca̱x nawoegu natürü Achíriaaneme̱xẽwa tá nangẽxmagü, erü tama cha̱u̱xca̱x nawoeguchaü̃.

Ochéa 11:8

Natürü taxucürüwa pexna chixũgachi, Pa Efraíü̃tanüxü̃x. Rü taxucürüwa pexü̃ íchawogü, Pa Iraéanecüã̱xgüx. Rü taxucürüwa pexü̃ chadai yexgumarüxü̃ ga yema Axmácüã̱xgüxü̃ chadaixgurüxü̃. Rü taxucürüwama pexü̃ charüxoxẽxẽ guma ĩane ga Cheboíü̃xü̃ charüxoxẽẽxü̃rüxü̃. Erü daa chorü maxü̃newa rü pexü̃ changechaü̃ rü íchamemare nax choxü̃́ pengechaü̃tümüxü̃güxü̃.

Amúx 4:6

Rü choma nixĩ ga taiya pexca̱x íchanguxẽẽxü̃ ga guxü̃nema ga perü ĩanegüwa. Rü choma nixĩ ga pexü̃́ chanatauxẽẽxü̃ ga õna ga guxü̃nema ga perü ĩanexacügüwa. Natürü woo nax yema pexca̱x íchanguxẽẽxü̃ rü tama cha̱u̱xca̱x pewoegu. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Aguéu 2:17

Rü yemaacü pexü̃ nangupetü yerü choma rü da̱xaweanegümaxã rü gáuxü̃pü̱xümaxã chanadai ga yema perü nanetügüarü o ga poraãcü naxca̱x pepuracüexü̃. Natürü ga pemax rü tama cha̱u̱xca̱x pewoegu ga yexguma. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Chacaría 3:2

Rü nüma ga yema Tupanaarü duü̃xü̃ i daxũcüã̱x rü Chatanáxü̃ ñanagürü: —¡Nüma ya Cori ya Tupana cuxü̃ nangax! ¡Rü yimátama Cori ya Tupana ya Yerucharéü̃xü̃ ngechaxü̃cü rü cuxü̃ nangax! Erü ñaa yatü rü ñoma wüxi ya ã́xwe ya üxüétüwa yaxuxcürüxü̃ Babiróniawa taeguxü̃ nixĩ —ñanagürü.

Romanos 9:29

Rü nümatama ga Ichaía, rü ñanagürü ga ü̃pa: “Ngẽxguma chi nüma ya tórü Cori ya Guxü̃étüwa Ngẽxmacü rü taxũchima íyaxügüxẽẽãgu i ñuxre i tatanüxü̃ i Yudíugü, rü chi itayarüxoxochi, yexgumarüxü̃ nax iyanaxogüxü̃ ga gumá ĩanegü ga Chodóma rü Gomóra namaxã ga guxü̃ma ga yema duü̃xü̃gü ga yéma yexmagüxü̃”, ñanagürü ga Ichaía.

1 Corintios 3:15

Natürü yíxema tama aixcüma mea naxǘxe i ngẽma puracü, rü yima ĩpata ya tama taixü̃ne ya üxümaxã ixaxü̃nerüxü̃ tá nixĩ i ngẽma tümaarü puracü. Rü tá ngẽxma inayarüxomare i guxü̃ma i ngẽma taxüxü̃. Rü tüxicatama taxũtáma tixa ñoma wüxi i duü̃xü̃ i üxüemawa iyagoxü̃rüxü̃.

Wenaxarü naxümatü ga Tupanaarü mugü 28:24

Rü Cori ya Tupana rü nachicüü ya pucü rü tá pexca̱x ínananguxẽxẽ i waixü̃müte̱xearü caixnagüxü̃ rü naxnücüarü caixnagücü ñu̱xmatáta ngẽmagu peyue.

Wenaxarü naxümatü ga Tupanaarü mugü 29:23

Rü tá nüxü̃ pedau i ngẽma naane i nawa pengẽxmagüxü̃ rü achúfremaxã, rü yucüramaxã napaxü̃, rü ñu̱xũchi waixü̃müane ixaxü̃xicatama nax yixĩxü̃. Rü ngẽma naanegu rü taxucürüwama nagu tatoe, rü ngẽma nanetü i nagu petoxü̃ rü taxũtáma narüxügü, rü bai wüxi i maxẽ nawa rüxüxü̃. Rü guma ĩanegü ga Cori ya Tupana norü numaxã iguxü̃ne ga Chodóma, rü Gomóra, rü Axmá rü Cheboíü̃maxã üpetüxü̃rüxü̃ tá perü naanemaxã naxüpetü.

Norü taxre ga popera ga Pedru ümatüxü̃ 2:6

Rü Tupana rü yexgumarüxü̃ ta inayanaxoxẽxẽ ga gumá ĩanegü ga Chodóma rü Gomóra ga poraãcü chixexü̃gü nawa naxügüne. Rü ínanagu ga gumá ĩanegü ñu̱xmata norü tanimacaxicatama íyaxü. Rü yemaacü nanaxü nax gumá ĩanegü rü wüxi ga cua̱xruxü̃ yixĩxü̃ca̱x nüxü̃́ ga yema duü̃xü̃gü ga chixexü̃ ga yemawena maxẽxü̃.

Popera ga Yúda ümatüxü̃ 1:23

Rü togü, ¡rü norü pecaduwa ípenatúxü̃ nax namaxẽxü̃ca̱x rü tama yima üxü ya taguma ixoxü̃newa yawocuxü̃ca̱x! ¡Rü pexü̃́ nangechaü̃tümüxü̃gü i ngẽma tama yaxõgüxü̃! ¡Natürü pegüna pedaugü nax tama norü chixexü̃gu peyixü̃ca̱x! ¡Rü nüxü̃ pixo i nacüma i chixexü̃ rü woo naxchiru i norü chixexü̃maxã ãũãchixü̃!

Popera ga Yúda ümatüxü̃ 1:7

Rü yexgumarüxü̃ ta nüxü̃ nangupetü ga gumá ĩanegü ga Chodóma rü Gomóra rü gumá ĩanegü ga norü ngaicamana yexmagü̃ne. Rü nüma ga yema duü̃xü̃gü rü nügü inaxãgü nax naxügüã̱xü̃ca̱x ga naguxü̃raü̃xü̃ ga naxü̃nearü ngúchaü̃gü. Rü yemaca̱x ga Tupana rü yema üxü i taguma gúxü̃maxã ínanagu. Rü inayanaxoxẽxẽ ga gumá ĩanegü nax wüxi ga cua̱xruxü̃ yixĩxü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 9:20

Natürü ga yema togü ga duü̃xü̃gü ga tama yema poxcuruü̃gümaxã yuexü̃, rü tama nüxü̃ narüxoe ga yema chixexü̃gü ga naxügüxü̃. Rü tama nüxü̃ narüxoe nax nüxü̃ yacua̱xüü̃güxü̃ ga ngo̱xogü rü yema tupananetachicüna̱xãgü ga úirunaxca̱x rü diẽrumünaxca̱x rü cobrenaxca̱x rü nutagünaxca̱x rü nainaxca̱x. Rü yemaacü nüxü̃ nicua̱xüü̃güama ga yema norü tupananetachicüna̱xãgü ga ngearü maxü̃ã́xü̃ rü tama nüxü̃ daugüxü̃ rü tama nüxü̃ ĩnüexü̃ rü tama ixĩxü̃.