Amúx 2:15 - Tupanaarü Ore

¹⁵ Rü ngẽma würaarü ma̱xruxü̃ rü taxũtáma yáxna chomaxã naxĩnü. Rü woo i ngẽma paxa iñaxü̃ rü taxucürüwa cha̱u̱xcha̱xwa niña, rü bai i tá namaxü̃ i ngẽma cowarumaxã iñaxü̃.

Amúx 2:15 Iomraidhean Croise

Ngu̱xẽẽtaeruü̃arü ore 9:11

Rü to i ñoma i naanewa nüxü̃ chadauxü̃ nixĩ nax ngẽma ñaãchiwa poraexü̃ rü tama guxü̃guma nüxíra ínangugüxü̃. Rü ngẽma daiwa poraexü̃ rü tama guxü̃guma narüporamaegü. Rü ngẽma cua̱x nüxü̃́ ngẽxmagüxü̃ rü tama guxü̃guma nüxü̃́ nangẽxma i norü õna. Rü ngẽma naãẽxü̃ cuáxü̃ rü tama guxü̃guma nidiẽruã̱x. Rü ngẽma poperawa ngu̱x nüxü̃́ ngẽxmagüxü̃ i duü̃xü̃gü rü tama guxü̃guma namaxã nataãẽgü. Rü guxãca̱x ínangu i tümaarü taãxẽ rü tümaarü guxchaxü̃.

Ichaía 31:3

Rü ngẽma Equítuanecüã̱x rü duü̃xü̃gümare nixĩgü, rü tama tupanagü nixĩgü. Rü ngẽma norü cowarugü rü namachimare nixĩgü, rü tama nixããxẽ. Rü nüma ya Cori ya Tupana rü tá guxchaxü̃ naxca̱x ínanguxẽxẽ i ngẽma Equítuanecüã̱x nax ngẽmaãcü napoxcugüãxü̃ca̱x. Rü ngẽma Equítuanecüã̱x rü ngẽma Iraétanüxü̃ i norü ngü̃xẽẽca̱x daugüxü̃ rü wüxigu tá guxchaxü̃gu nayi rü tá nayue.

Yeremía 51:56

Rü ngẽma uanügü rü ínangugü nax nagu napogüexü̃ ya yima ĩane. Rü marü ínanayauxü̃ i norü churaragü. Rü nagu nabügüe ya norü würagü. Erü Cori ya Tupana rü wüxichigüna nanaxã i ngẽma nüxna üxü̃.

Echequié 39:3

Rü ñu̱xũchi tá chayabüye ya curü würa ya curü to̱xweme̱xẽwa cungexü̃ne. Rü tá chanayixẽxẽ ya yima chuxchigü ya curü tügüneme̱xẽwa cunaxü̃ne.

Amúx 9:1

Nüxü̃ chadau ga Cori ya Tupana. Rü nüma rü ngẽma tupananetagüarü ãmarearü guruü̃xü̃tagu nachi, rü ñanagürü choxü̃: —¡Daa tupananetapataarü caxtagüerugu napogü nax duü̃xü̃güétü nangutaü̃xü̃ca̱x rü ngẽxma nayuexü̃ca̱x! Rü ngẽma maxẽxü̃ rü woo nabuxmügu rü norü uanügü tá taramaxã nanadai. Rü ngẽmaãcü taxuxü̃táma niña.

Aguéu 2:22

Rü guxü̃ma i ñoma i naanewa ngẽxmagüxü̃ i nachixü̃anegüarü ãẽ̱xgacügü rü tá ichayanaxoxẽxẽ i norü pora. Rü tá nagu chapogü i ngẽma ãẽ̱xgacügüarü tochicaxü̃gü. Rü tá chanangüegutanü i norü carugü i daiwexü̃ wüxigu namaxã i norü ũxẽẽruü̃gü. Rü tá nayue i norü cowarugü wüxigu namaxã i ngẽma nagu ĩxü̃. Rü wüxichigü rü tá naenexẽarü taragu tátama nayu.

Chacaría 10:5

Rü nümagü rü tá ñoma churaragü i ãcharaxü̃gu nügü da̱i̱xü̃rüxü̃ nixĩgü. Rü tá naporae, erü Cori ya Tupana rü natanüwa nangẽxma. Rü ngẽmaãcü tá nanaxãnexẽxẽ i norü uanügüarü churaragü i cowarugu ĩxü̃.