Norü taxre ga popera ga Timutéuca̱x naxümatüxü̃ ga Pauru 2:26 - Tupanaarü Ore

²⁶ Erü Tupana nanaxwa̱xe nax naãẽxü̃ yacua̱xãchitanüxü̃ i ngẽma duü̃xü̃gü rü na̱xcha̱xwa yabuxmüxü̃ca̱x i ngẽma chixexü̃ i ngo̱xo i Chataná nagu nayixẽẽxü̃ nax ngẽmaãcü norü ngúchaü̃ ngẽma duü̃xü̃gümaxã naxüxü̃ca̱x i Chataná.

Norü taxre ga popera ga Timutéuca̱x naxümatüxü̃ ga Pauru 2:26 Iomraidhean Croise

Yox 1:12

Rü nüma ga Cori ya Tupana rü Chatanáxü̃ nangãxü̃ rü ñanagürü: —Marü name. ¡Ẽcü naxü i ta̱xacü i cuma cunaxwa̱xexü̃ namaxã i guxü̃ma i norü ngẽmaxü̃gü ya yimá Yox! Natürü tama chanaxwa̱xe nax namaxãxü̃chi chixexü̃ cuxüxü̃ —ñanagürü. Rü yexguma ga nüma ga Chataná rü Cori ya Tupanana nixũgachi.

Yox 2:6

Rü nüma ga Cori ya Tupana rü Chatanáxü̃ nangãxü̃ga rü ñanagürü: —Marü name. ¡Rü namaxã naxü i ngẽma cuma cunaxwa̱xexü̃, natürü taxũtáma nüxna cunayaxu i norü maxü̃! —ñanagürü.

Wiyaegü 124:7

Rü yemaacü nawa ítanguxü̃ ga yema ãũcümaxü̃ ga tórü uanügü taxca̱x mexẽẽxü̃ ñoma wüxi i weri i norü yauxruü̃wa iñaxü̃rüxü̃. Rü yema yauxruxü̃ ga tórü uanügü taxca̱x mexẽẽxü̃ rü narügáu rü tibuxmü.

Ichaía 28:13

Rü ngẽmaca̱x ya Cori ya Tupana rü ñoma buxü̃gü i buexüchixü̃ i ngexwaca̱xtama ugütaexü̃ cua̱xgüxü̃ãcü tá pemaxã nidexa. Rü pema rü ngẽxguma ipexĩxgu rü buxü̃gü i ngexwaca ũxü̃ cua̱xgüxü̃rüxü̃ tá peca̱xwe̱xmaxã ipeyayi rü peyapíe, rü perü uanügü tá pexü̃ ínayaxuxü̃.

Ichaía 53:12

Rü ngẽmaca̱x i nüma ya Tupana rü tá ñoma i naanearü ãẽ̱xgacügü i iporaexüchixü̃tanüwa nanangexmaxẽxẽ, rü tá nanatachigaxẽxẽ, yerü nügü inaxã nax pecaduca̱x nayuxü̃ca̱x. Rü nüma ga duü̃xü̃gü rü ñoma wüxi ga máetaxü̃ãcü nüxü̃ narüdaunü, natürü ga nüma rü guxü̃ma ga duü̃xü̃güarü pecadu ninge nax ngẽmaãcü naétüwa nachogüxü̃ca̱x i pecaduã̱xgüxü̃.

Ichaía 8:15

Rü muxẽtama nagu tacuxgü rü tiiyi rü tayue. Rü muxẽtama nagu ítayauxü̃ rü marü taxucürüwatama tibuxmü —ñanagürü.

Ore i mexü̃ ga Luca ümatüxü̃ 11:21

Rü ngẽxguma wüxi ya yatü ya poracü rü meama nügü naxüxnegu rü nüxna nada̱u̱xgu ya napata, rü taxúetama naxca̱x tangĩ̱x i norü ngẽmaxü̃gü i napatawa ngẽxmagüxü̃.

Ore i mexü̃ ga Luca ümatüxü̃ 15:17

Rü yexguma naãxẽwa nagu narüxĩnü, rü ñanagürü: “¿Ñuxre i chaunatüarü puracütanüxü̃ rü nüxü̃́ nangẽxma i õna rü nüxü̃́ ínayaxü? Rü choma i nua rü taiyamaxã tá nuxma chayu.

Ore i mexü̃ ga Luca ümatüxü̃ 5:10

Rü naba̱i̱xãchiãẽgü ta ga Chimóü̃mücügü ga Chantiágu rü Cuáü̃ ga Chebedéu nanegü. Natürü Ngechuchu rü Chimóü̃xü̃ ñanagürü: —¡Taxṹ i cumuü̃xü̃! Erü ñu̱xmacürüwa rü tá chauxü̃tawa cunagagü i duü̃xü̃gü —ñanagürü.

Ore i mexü̃ ga Cuáü̃ ümatüxü̃ 13:2

Natürü ga Chataná rü marü Yúda ga Chimóü̃ ga Icharióte nanena nangu nax bexma Ngechuchuxü̃ ínaxuaxü̃xü̃ca̱x. Rü Ngechuchu rü marü nüxü̃ nacua̱x ga Nanatüxü̃tawa nax ne naxũxü̃ rü wena táxarü Nanatüca̱x nax nataeguxü̃. Rü nüxü̃ nacua̱x ga Nanatü rü naxme̱xgu nax naxüaxü̃ ga guxü̃ma ga pora. Rü yemaca̱x ga yema chütaxü̃gu ga yexguma mechawa ínachibüeyane, rü inachi ga Ngechuchu. Rü ínacuxuchi ga norü gáuxü̃chiru, rü wüxi ga tuayamaxã nügü nigoye.

Ore i mexü̃ ga Cuáü̃ ümatüxü̃ 13:27

Rü yexguma Yúda nayaxugu ga yema paũarü bücuxü̃ rü yexgumatama ngo̱xo ga Chataná rü Yúdagu naxücu. Rü yexguma ga Ngechuchu rü ñanagürü nüxü̃: —Ngẽma cuxüxchaü̃xü̃, ¡rü paxa naxü! —ñanagürü.

Ngechuchuarü ngúexü̃gü ga yamugüxü̃arü puracüchiga 26:18

Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.

Ngechuchuarü ngúexü̃gü ga yamugüxü̃arü puracüchiga 5:3

Rü yexguma ga Pedru rü ñanagürü nüxü̃: —Pa Ananíax, ¿tü̱xcüü̃ ngo̱xo i Chatanága cuxĩnü rü Tupanaãxẽ i Üünecümaxã quidora, rü cugüxü̃́ ngĩxne cuyaxu i ñuxre i ngẽma curü naanetanü?

1 Corintios 15:34

Rü name nixĩ i mea pegüãẽgu perüxĩnüe rü nüxü̃ perüxoe i ngẽma perü chixexü̃gü. Rü wüxi i perü ãne nixĩ nax pemaxã nüxü̃ chixuxü̃ nax ñuxre i pemax rü tama aixcüma Tupanaxü̃ pecua̱xgüxü̃.

2 Corintios 2:11

Rü ngẽmaãcü chanaxü nax tama nayoxniexü̃ca̱x i Chataná nax chixexü̃gu tüxü̃ nayixẽẽxü̃ca̱x. Erü yixema rü meama nüxü̃ tacua̱x i nacüma i Chataná rü ñuxãcü chixexü̃gu tüxü̃ nayixẽẽchaü̃xü̃.

Efesios 5:14

Erü guxü̃ma rü ngẽxguma ngóonexü̃wa nangẽxmagu, rü meama nango̱x nax nañuxraxü̃xü̃. Rü ngẽmaca̱x i Tupanaarü orewa rü ñanagürü: “¡Naba̱i̱xãchi i cuma nax cupexü̃, rü írüda i cumax nax icuyarütaxuxü̃! Rü Cristu tá cuxca̱x nanangóonexẽxẽ”, ñanagürü i ngẽma ore.

Colosenses 1:13

Yerü nüma ga Tupana rü marü Chatanáme̱xẽwa tüxü̃ ínanguxü̃xẽxẽ rü Nane ya nüxü̃ nangechaü̃cüme̱xẽwa tüxü̃ nangẽxmagüxẽxẽ.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:20

Rü yema nixĩ ga nüxü̃ üpetüxü̃ ga Imenéu rü Areyándru. Rü düxwa choma Chatanána chanawogü ga yema taxre nax Chataná ngúxü̃ nüxü̃ ingexẽẽgüxü̃ca̱x nax ngẽmawa nüxü̃ nacua̱xgüxü̃ca̱x nax tama namexü̃ nax chixri Tupanachiga yadexagüxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 3:7

Rü tanaxwa̱xe i woo i ngẽma tama yaxõgüxü̃ rü tüxü̃ nangechaü̃gü nax taxúema chixri tümachiga idexagüxü̃ca̱x rü tama Chataná chixexü̃gu tüxü̃ nangu̱xẽẽxü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 12:9

Rü ínata̱xüchi ga daxũguxü̃ ga naanewa ga yema coya ga yema nũxcümaü̃xü̃ ga ãxtape. Rü nüma rü Ngo̱xogu rü Chatanágu naxãéga. Rü nüma nixĩ i guxü̃ma i ñoma i naanecüã̱x i duü̃xü̃güxü̃ nawomüxẽẽxü̃. Rü nüma rü norü orearü ngeruü̃gümaxã ñoma ga naanegu narüwoü̃.