Norü taxre ga popera ga Pedru ümatüxü̃ 3:7 - Tupanaarü Ore

⁷ Natürü ngẽma ñu̱xma daxũwa ngẽxmaxü̃ rü ñoma i naane i ñu̱xma ngẽxmaxü̃ rü Tupana marü namaxã nanaxuegu nax üxüwa tá yaxaexü̃. Rü ngẽma ngunexü̃ ya Tupana nagu unetaxü̃ nax duü̃xü̃güxü̃ yacagüxü̃ rü napoxcueãxü̃ i ngẽma duü̃xü̃gü i chixexü̃gu maxẽxü̃, rü ngẽma ngunexü̃gu rü yima üxüwa tá nixĩ i ínaguxü̃ i ñoma i naane rü ngẽma daxũwa ngẽxmagüxü̃.

Norü taxre ga popera ga Pedru ümatüxü̃ 3:7 Iomraidhean Croise

Wiyaegü 102:26

Rü guxü̃ma i ngẽma rü tá inayarüxo, natürü i cuma rü guxü̃gutáma cunaxa̱i̱xrügumaraxü̃. Rü ñoma i naane rü ngẽma dauxü̃wa nüxü̃ idauxü̃ rü wüxi i naxchirurüxü̃ tá nangau. Rü cuma rü tá cunaxüchicüxü rü ñoma wüxi i duü̃xü̃ i naxchiru i ngauxü̃ ítáxü̃ rü ngexwaca̱xü̃xü̃ i naxchirugu icúxü̃rüxü̃ tá nixĩ.

Wiyaegü 50:3

Rü nüma ya tórü Tupana rü nua naxũ. Natürü tama bexma ínangu erü nape̱xewa nangẽxma i wüxi i üxüema i guxü̃xü̃ma ixaxẽẽxü̃, rü nacüwawa nangẽxma ya buanecü ya taxüchicü.

Ichaía 51:6

¡Rü dücax, rü dauxü̃gu perüdaunü rü ñoma i naanegu perüdaunü! Erü guxü̃ma i ngẽma dauxü̃wa nüxü̃ pedauxü̃ rü ñoma caxixü̃rüxü̃ tá inarütaxu rü ñoma i naane rü wüxi i naxchiru i ngauxü̃rüxü̃ tá nagu̱x. Rü ngẽma duü̃xü̃gü i nawa maxẽxü̃ rü ñoma murenü yuexü̃rüxü̃ tá nayue. Natürü ngẽma maxü̃ i chorü duü̃xü̃güna chaxãxü̃ rü taguma nagu̱x. Rü ngẽma chorü ngü̃xẽxẽ rü guxü̃gutáma nangẽxmaecha.

Ichaía 66:15

Rü nüma ya Tupana rü tá üxüemagu ínangu rü yima norü carugü ya daiwexü̃ rü ñoma wüxi ya buanecü ya íxã̱ũ̱xemacürüxü̃ tá nixĩgü. Rü tá nanapoxcue i norü uanügü, rü ngẽma norü poxcu rü ñoma üxüema iya̱u̱xraxü̃rüxü̃ tá nixĩ.

Danié 7:9

Rü chaunegüwa nüxü̃ chadawenü rü nüxü̃ chadau ga ñuxre ga tochicaxü̃ yexma nuxü̃ rü ñu̱xũchi nüma ya Ãẽ̱xgacü ya Tupana nawa nayarüto. Yema naxchiru rü ñoma gáuxü̃te̱xe i cómüxü̃chixü̃rüxü̃ nixĩ. Rü yema nayae rü nachoxochi ñoma carnérua̱xmü i cho̱xochixü̃rüxü̃. Rü yema toruxü̃ rü nachicugü rü niyauratanücüxü. Rü wüxi ga üxüema ga taxü̃ ga iya̱u̱xraxü̃ nape̱xewa ínaxũxũ. Rü muxü̃ma nixĩ ga yema nüxü̃́ puracuexü̃. Rü muxũchixü̃ma nixĩ ga yema nape̱xegu chigüxü̃. Rü yema poperagü rü nayange̱xgü.

Chofonía 3:8

¡Rü ngẽmaca̱x choxü̃ ípeyangu̱xẽxẽ ñu̱xmata nawa nangu i ngẽma ngunexü̃ i nagu tá pexna naxca̱x chaca̱xü̃ i perü chixexü̃gü! Rü choma ya Cori ya Tupana rü ñachagürü: “Wüxigu tá chanangutaque̱xexẽxẽ i guxü̃ma i nachixü̃anecüã̱xgü rü guxü̃ma i ãẽ̱xgacügü nax chanapoxcuexü̃ca̱x naxca̱x i ngẽma chixexü̃ i naxügüxü̃. Rü guxü̃táma i ñoma i naane rü tá inayarüxo rü ngẽma chorü üxüema tá nayagu”, ñachagürü.

Maraquía 4:1

Rü nüma ya Cori ya Tupana ya Guxãétüwa Ngẽxmacü rü ñanagürü: —Rü ningaica i ngẽma ngunexü̃ i ãũcümaxü̃ i nagu tá chanapoxcuexü̃ i ngẽma chixexü̃ ügüxü̃ ñoma üxüemawa yaxaexü̃rüxü̃. Rü guxü̃ma i ngẽma duü̃xü̃gü i nügü írütagüxü̃ rü chixexü̃ ügüxü̃ rü ñoma maxẽ i pacü i üxüxétüwa yata̱xcuchichapa̱xacürüxü̃ tá nixĩgü. Rü ngẽma ngunexü̃gu rü guxü̃táma nixae rü taxuxü̃táma ínayaxügü.

Ore i mexü̃ ga Matéu ümatüxü̃ 10:15

Rü aixcüma pemaxã nüxü̃ chixu rü ngẽma ngunexü̃ i nagu Tupana nüxü̃ ícagüxü̃ i duü̃xü̃gü, rü Gomóracüã̱x rü Chodómacüã̱x i duü̃xü̃güarü yexera Tupana tá nanapoxcue i ngẽma duü̃xü̃gü i tama mea pexü̃ yauxgüxü̃.

Ore i mexü̃ ga Matéu ümatüxü̃ 11:22

Natürü pemaxã nüxü̃ chixu rü ngẽma ngunexü̃ ya Tupana nagu napoxcuexü̃ i pecaduã̱xgüxü̃, rü ngẽma ngunexü̃gu rü ngẽma Tírucüã̱x rü Chidóü̃cüã̱xarü yexera tá pexü̃ napoxcue i pemax, Pa Corachíü̃cüã̱x rü Bechaídacüã̱x.

Ore i mexü̃ ga Matéu ümatüxü̃ 11:24

Natürü pemaxã nüxü̃ chixu rü ngẽma ngunexü̃ ya Tupana nagu napoxcuexü̃ i pecaduã̱xgüxü̃, rü ngẽma ngunexü̃gu rü Chodómacüã̱xarü yexera tá pexü̃ napoxcue i pemax, Pa Capernáü̃cüã̱x”, ñanagürü.

Ore i mexü̃ ga Matéu ümatüxü̃ 12:36

Rü choma pemaxã nüxü̃ chixu rü ngẽma ngunexü̃ ya Tupana duü̃xü̃güxü̃ nagu icagüxü̃ rü tá guxü̃ i duü̃xü̃güna naca naxca̱x i guxü̃ma i ore i chixexü̃ i nüxü̃ yaxuxü̃ i ñoma i naanewa.

Ore i mexü̃ ga Matéu ümatüxü̃ 24:35

Rü ñoma i naane rü ngẽma daxũwa nüxü̃ idauxü̃ rü tá nagu̱x. Natürü chorü ore rü tagutáma inayarüxo rü aixcüma tá ningu.

Ore i mexü̃ ga Matéu ümatüxü̃ 25:41

Rü ñu̱xũchi i Ãẽ̱xgacü, rü ñanagürü tá nüxü̃ i ngẽma to̱xwewa ngẽxmagüxü̃: “¡Choxna pixĩgachi i pema i perü chixexü̃ca̱x poxcuexe! ¡Rü ngéma pexĩ nawa ya yimá üxü ya taguma ixoxü̃ne ya Tupana ímexẽẽ́ne naxca̱x i ngo̱xo i Chataná rü norü duü̃xü̃gü!

Ore i mexü̃ ga Márcu ümatüxü̃ 6:11

Rü ngẽxguma wüxi ya ĩanewa tama mea pexü̃ nayauxgüchaü̃gu rü tama pexü̃́ inaxĩnüẽchaü̃gu, ¡rü ípechoxü̃ i ngéma! Rü ngẽxguma ipexĩãchigu, ¡rü ipenapagü i perü üxaxü̃cutü nax ngẽmawa nüxü̃ nacua̱xgüxü̃ca̱x nax nataxü̃ tá i norü poxcu i ngẽxguma nagu̱xgu i naane! —ñanagürü.

Ore i mexü̃ ga Cuáü̃ ümatüxü̃ 12:48

Yíxema tama choxü̃́ yaxṍxe rü tama chauga ĩnüxe rü marü tüxü̃́ nangẽxma nax ta̱xacüca̱x tapoxcuxü̃. Erü ngẽma ore i nüxü̃ chixuxü̃gagu tátama nixĩ i tapoxcuxü̃ i naanearü gu̱xgu, erü tama tayaxõ i ngẽma ore i nüxü̃ chixuxü̃.

Romanos 2:5

Natürü cuma rü tama Tupanaxü̃ cucuáxchaü̃ rü tama nüxü̃ curüxoxchaü̃ i curü chixexü̃. Rü ngẽmaãcü cugüca̱xtama cunayexeraxẽxẽ i curü poxcu i tá cuyaxuxü̃ i ngẽma ngunexü̃ i nagu Tupana norü numaxã napoxcuexü̃ i ngẽma chixexü̃ ügüxü̃.

1 Corintios 3:13

Natürü ngẽxguma nawa nanguxgu i ngẽma ngunexü̃ i nagu Tupana tüxna ca̱xaxü̃, rü tá nango̱x nax ñuxãcü wüxichigü i duü̃xü̃ naxüxü̃ i Tupanaarü puracü. Erü ngẽma ngunexü̃gu rü tá nangẽxma ya üxü ya taxüchine. Rü ñoma ta̱xacü üxüwa iguxü̃rüxü̃ tá nixĩ ya Tupana nüxü̃ üxü̃ i wüxichigü i duü̃xü̃arü puracü rü aixcüma name rüe̱xna tama.

Filipenses 1:28

¡Rü taxũtáma perü uanügüxü̃ pemuü̃e nax nüxü̃ pixuxü̃ i ngẽma ore! Rü ngẽma nax tama nüxü̃ pemuü̃exü̃ rü ngẽma rü wüxi i cua̱xruxü̃ tá nixĩ nüxü̃́ i perü uanügü. Rü ngẽmawa tá nüxü̃ nacua̱xgü nax yuwa tá naxĩxü̃ i nümagü natürü i pema rü tá maxü̃wa nax pexĩxü̃. Rü Tupana tá nixĩ ya pexü̃ rüngü̃xẽxẽcü nax tama nüxü̃ pemuü̃exü̃ca̱x i ngẽma perü uanügü.

2 Tesalonicenses 2:3

¡Rü taũtáma naga pexĩnüe i ngẽma duü̃xü̃gü i ngẽmaãcü pexü̃ womüxẽẽgüchaü̃xü̃! Erü naxü̃pa nax Ngechuchu núma ũxü̃ rü tá ínangu i ngẽma yatü i Tupanaarü uanü ixĩxü̃, rü tá nananuexẽxẽ i muxü̃ma i duü̃xü̃gü i yaxõgüchiréxü̃. Natürü Tupana marü ngẽma yatümaxã nanaxuegu rü tá nax napoxcuxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:9

Natürü ngẽma duü̃xü̃gü i diẽruã̱xgüchaü̃xü̃, rü tama yáxna namaxã naxĩnüe i ngẽxguma ngẽma diẽruarü ngúchaü̃ nüxü̃ poragu. Rü ngẽmaca̱x nagu nayi i muxü̃ma i ngúchaü̃gü i taxuwama nüxü̃́ mexü̃ i chixexü̃wa nagagüxü̃. Rü ngẽmaca̱x düxwa i ngẽma duü̃xü̃gü rü poraãcü nachixe rü norü guxü̃maãma inayarütauxe.

Popera ga Yudíugü ga yaxõgüxü̃ca̱x ümatüxü̃ 12:29

Erü tórü Tupana, rü wüxi ya üxü ya guxü̃ma ixaxẽẽcü nixĩ.

Norü taxre ga popera ga Pedru ümatüxü̃ 2:9

Rü nüma ya Tupana, rü nüxü̃́ natauxcha nax tüxü̃ ínanguxü̃xẽẽxü̃ i ngẽxguma Chataná tüxna ĩnügu ya yíxema mea maxẽxe. Rü ngẽma chixexü̃ ügüxü̃, rü Tupanaaxü̃́ natauxcha nax napoxcueãxü̃ i ngẽma ngunexü̃ i nagu duü̃xü̃güxü̃ yacagüxü̃.

Norü taxre ga popera ga Pedru ümatüxü̃ 3:10

Natürü ngẽma ngunexü̃ i tórü Cori nagu ínguxü̃, rü ngürüãchimare tá ínangu ñoma wüxi i ngĩ́ta̱xaxü̃ ínguxü̃rüxü̃. Rü ñu̱xũchi guxü̃ma i ta̱xacü i daxũguxü̃ i naanewa ngẽxmagüxü̃ rü tá tagaãcü niwã̱ĩ̱xgü rü ngẽmaãcü tá üxüwa inayarütauxe. Rü yimá üa̱xcü rü tauemacü rü ẽxtagü rü woramacurigü rü tá nixae rü ngẽxma tá nayarüxogü. Rü ngẽxgumarüxü̃ ta i ñoma i naane rü tá nixa namaxã i guxü̃ma i ta̱xacü i nawa ngẽxmagüxü̃.

Norü taxre ga popera ga Pedru ümatüxü̃ 3:12

Rü name nixĩ i mea ípenangu̱xẽxẽ i ngẽma ngunexü̃ i nagu tá ínanguxü̃ ya tórü Cori. Rü ngẽma ngunexü̃gu rü guxü̃ma i daxũwa nüxü̃ idauxü̃ rü tá nixa rü tá inachaxichigü. Rü ñoma i naane rü üa̱xcü rü tauemacü rü ẽxtagü rü woramacurigü rü yima üxümaxã tá inachaxichigü.

Nüxíraxü̃xü̃ ga popera ga Cuáü̃ ümatüxü̃ 4:17

Rü ngẽxguma aixcüma taenexẽxü̃ ingechaü̃gügu, rü tórü maxü̃wa nango̱x i ngẽma ngechaü̃, rü taxũtáma nüxü̃ tamuü̃e i ngẽma ngunexü̃ i nagu Tupana tüxü̃ yacagüxü̃gu naxca̱x i tórü maxü̃. Erü yixema rü ñoma i naanewa rü Ngechuchurüxü̃ tixĩgü.

Popera ga Yúda ümatüxü̃ 1:7

Rü yexgumarüxü̃ ta nüxü̃ nangupetü ga gumá ĩanegü ga Chodóma rü Gomóra rü gumá ĩanegü ga norü ngaicamana yexmagü̃ne. Rü nüma ga yema duü̃xü̃gü rü nügü inaxãgü nax naxügüã̱xü̃ca̱x ga naguxü̃raü̃xü̃ ga naxü̃nearü ngúchaü̃gü. Rü yemaca̱x ga Tupana rü yema üxü i taguma gúxü̃maxã ínanagu. Rü inayanaxoxẽxẽ ga gumá ĩanegü nax wüxi ga cua̱xruxü̃ yixĩxü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 17:11

Rü ngẽma ngo̱xo ga nũxcüma maxü̃ rü ñu̱xma rü marü yuxü̃, rü ngẽma nixĩ i norü 8 i ngẽma ãẽ̱xgacügü. Rü nüma rü ngẽma 7 tanüxü̃ nixĩ. Natürü i nüma rü ngẽma nachica i guxü̃gutáma nagu napoxcuxü̃wa tá naxũ.

Yema Cuáü̃ nüxü̃ dauxü̃ i yixcüra tá ngupetüxü̃chiga 17:8

Rü ngẽma ngo̱xo i nüxü̃ cudauxü̃, rü yema nixĩ ga nũxcüma maxü̃xü̃ natürü marü yuxü̃ rü ngẽma ãxmaxü̃ i taxuguma iyacuáxü̃wa ngẽxmaxü̃. Natürü tá ínaxũxũ nawa i ngẽma ãxmaxü̃ naxü̃pa nax ngẽma nachica i guxü̃gutáma nagu napoxcuxü̃wa naxũxü̃. Rü ngẽma ngo̱xomaxã tá naba̱i̱xãchiãẽgü i ngẽma duü̃xü̃gü i ñoma i naanewa maxẽxü̃ i noxritama naane ixügügu tama nawa ngo̱xégagüxü̃ i Tupanaarü popera i nagu naxümatüxü̃ i naéga i ngẽma maxü̃ nüxü̃ ngẽxmagüxü̃. Rü ngẽmaãcü i ngẽma duü̃xü̃gü i tama nawa ngo̱xégagüxü̃ i Tupanaarü popera rü tá naba̱i̱xãchie i ngẽxguma nüxü̃ nada̱u̱xgu i ngẽma ngo̱xo ga nũxcüma maxü̃xü̃ rü marü yuxü̃, natürü wena tá ínguxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:11

Rü ñu̱xũchi nüxü̃ chadau ga wüxi ga taxü̃ ga tochicaxü̃ ga cómüxü̃, rü nüxü̃ chadau ga gumá nawa rütocü. Rü gumácha̱xwa nibuxmü ga ñoma ga naane rü guxü̃ma ga daxũwa nüxü̃ idauxü̃, rü inayarütauxe.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:1

Rü yemawena nüxü̃ chadau nax nayexwaca̱xü̃xü̃ ga ñoma ga naane rü nayexwaca̱xü̃xü̃ ga guxü̃ma ga ta̱xacü ga daxũwa yexmagüxü̃. Yerü yema nüxíra yexmagüxü̃ rü marü nangupetü, rü yema már rü marü nataxuma.