Norü taxre ga popera ga Pedru ümatüxü̃ 1:6 - Tupanaarü Ore6 Rü ngẽma cua̱xétüwa penaxwa̱xe nax wüxichigü mea tügümaxã itacuáxü̃. Rü ngẽma nax mea tügümaxã itacuáxü̃étüwa penaxwa̱xe nax yáxna pexĩnüexü̃. Rü ngẽma nax yáxna pexĩnüexü̃étüwa penaxwa̱xe nax Tupanaga pexĩnüexü̃. Faic an caibideil |
Norü taxre ga popera ga Pedru ümatüxü̃ 1:6
40 Iomraidhean Croise
Natürü yexguma Pauru namaxã nüxü̃ ixuxgu nax Tupana naxwa̱xexü̃ nax mea imaxü̃xü̃ rü nanaxwa̱xexü̃ nax tórü maxü̃maxã mea icuáxü̃ rü wüxi i ngunexü̃ Tupana tá tüxna naca̱xaxü̃ i tórü maxü̃chiga, rü yexguma ga Férix rü poraãcü naba̱i̱xãchi. Rü ñanagürü nüxü̃: —¡Ẽcü íixũ i ñu̱xmax! Rü ngẽxguma ñuxguacü icharüxã̱ũ̱xmaregu, rü wena táxarü cuxca̱x changema —ñanagürü.
Rü guxü̃guma duü̃xü̃güxü̃ nüxü̃ tadauxẽxẽ nax aixcüma Tupanaarü duü̃xü̃gü tixĩgüxü̃. Rü ngẽmaca̱x yáxna namaxã taxĩnüe i ngẽxguma woo ngúxü̃ tingegügu, rüe̱xna ta̱xacü toxü̃́ taxu̱xgu, rüe̱xna ta̱xacürü guxchaxü̃ toxü̃́ ngẽxmagu, rüe̱xna toxü̃ yacua̱i̱xgügu, rüe̱xna toxü̃ napoxcuegu, rü ẽ̱xna tomaxã nanuegu nax toxü̃ nada̱i̱xü̃ca̱x. Rü poraãcü tapuracüe, rü ñuxguacü rü tama tapee, rü ñuxguacü rü taiya toxü̃́ nangu̱x. Natürü yáxna namaxã taxĩnüe i guxü̃ma i ngẽma.
Rü guxü̃guma i ngẽxguma Tanatü ya Tupanamaxã tidexagügu, rü nüxna tacua̱xãchie nax aixcüma mea peyaxõgüãcüma penaxüxü̃ i Tupanaarü puracü, rü nüxü̃ pengechaü̃güãcüma togüxü̃ perüngü̃xẽẽxü̃. Rü mea ípenangu̱xẽẽxü̃ ya tórü Cori ya Ngechuchu ya Cristu rü ngẽmaca̱x yáxna namaxã pexĩnüe i ngẽma ngúxü̃ i ñu̱xma pingegüxü̃.
Rü nüxü̃ tacua̱x nax aixcüma yixĩxü̃ i ngẽma ore ga noxri ẽxü̃guxü̃ i ñu̱xma Tupana tüxü̃ nüxü̃ cua̱xẽẽxü̃ i Cristuchiga. Rü nüma ga Cristu rü duü̃xü̃xü̃ nügü nixĩxẽxẽ rü yemaacü nügü nango̱xẽxẽ ga yexguma ñoma ga naanewa nayexmagu. Rü Naãxẽ ya Üünexü̃ tüxü̃ nüxü̃ nacua̱xẽxẽ nax Cristu rü aixcüma Tupana yixĩxü̃. Rü Tupanaarü orearü ngeruü̃gü i daxũcüã̱x nüxü̃ nadaugü. Rü ngẽma tama Yudíugü ixĩgüxü̃maxã nüxü̃ nixuchigagü. Rü guxü̃wama i ñoma i naanewa rü nüxü̃́ nayaxõgü. Rü Nanatü rü wenaxarü daxũguxü̃ i naanewa nanaga.
Natürü cumax, Pa Timutéux, rü wüxi ya yatü ya Tupanaaxü̃́ yaxõcü quixĩ. ¡Rü ngẽmaca̱x nüxna ixũgachi i guxü̃ma i chixexü̃! ¡Rü mea Tupanape̱xewa namaxü̃, rü norü ngúchaü̃ naxü, rü mea nüxü̃́ yaxõ, rü nüxü̃ nangechaxü̃ i duü̃xü̃gü, rü cugü naporaxẽxẽ i ngẽxguma guxchaxü̃ cuxca̱x ínguxgu! Rü tama name i cugü quicua̱xüxü̃.
Rü ngẽxguma chi tangẽxmagu ya wüxíe ya namaxã tangu̱xẽẽtaegu i wüxi i ngu̱xẽẽtae i tama namaxã wüxiguxü̃ i tórü ngu̱xẽẽtae i aixcüma mexü̃, rü tama namaxã wüxiguxü̃ i tórü Cori ya Ngechuchu ya Cristuarü ngu̱xẽẽtae i mexü̃, rü tama namaxã wüxiguxü̃ i ngẽma ngu̱xẽẽtae i Tupanaarü orewa ngóxü̃, rü tügü ticua̱xüxü̃ rü taxuxü̃ma tacua̱x. Rü ngẽmaca̱x ngexü̃rüüxü̃mare i dexaca̱x rü tachoxü̃gawa̱xe, rü tama texéga taxĩnüchaü̃. Rü düxwa ñoma tida̱xawexü̃rüxü̃ tixĩ namaxã i ngẽma tümacüma. Rü ngẽmagagu rü taxãũxãchiwa̱xe, rü tanuxwa̱xe, rü taguxchigawa̱xe, rü taxúeãxü̃ma tayaxõ.
Pa Títox, choma i Pauru i Tupanaarü puracütanüxü̃ nixĩ i cuxca̱x chanaxümatüxü̃ i ñaa popera. Rü Ngechuchu ya Cristu nixĩ ga choxü̃ mucü nax ngẽma duü̃xü̃gü ya Tupana dexü̃maxã nüxü̃ chixuxü̃ca̱x i norü ore nax Tupanaaxü̃́ yaxõgüãxü̃ca̱x rü nüxü̃ nacua̱xgüxü̃ca̱x i ngẽma norü ore i aixcüma ixĩxü̃ i tüxü̃ rüngü̃xẽẽxü̃ nax naxca̱x imaxẽxü̃ca̱x. Rü ngẽmaca̱x Tupanaaxü̃́ tayaxõgü erü tanayauxgüchaü̃ i ngẽma maxü̃ i taguma gúxü̃. Rü ngẽma maxü̃ i taguma gúxü̃ nixĩ ga nũxcümaxü̃chima ga tauta naane ü̱xgu Tupana ya taguma idoracü nüxü̃ ixuxü̃.
¡Rü ngẽma yaxõgüxü̃ i yaxü̃ rü yaxucu̱xẽgü nax mea naãẽxü̃ yacuáxü̃ca̱x, rü taxúema chixri nachiga idexagüxü̃ca̱x, rü mexü̃gu naxĩnüexü̃ca̱x! ¡Rü nangúexẽxẽ nax mea Tupanaaxü̃́ yaxõgüãxü̃ca̱x, rü guxü̃ i duü̃xü̃güxü̃ nangechaü̃güxü̃ca̱x, rü yáxna namaxã naxĩnüexü̃ca̱x ega woo ta̱xacürü guxchaxü̃ naxca̱x ínguxgu!
Rü yema muxü̃ma ga duü̃xü̃gü ga Tupanaaxü̃́ yaxõgüxü̃ ga yuexü̃, rü ñu̱xma torü ngaicamana nangẽxmagü nax tórü cua̱xruü̃gü yixĩgüxü̃ca̱x. Rü ngẽmaca̱x i ñu̱xmax, ¡rü ngĩxã nüxü̃ tarüxoe i guxü̃ma i ngẽma guxchaxü̃gü rü pecadugü i tüxü̃́ naguxchaxẽẽxü̃ nax mea yaxõgüxü̃! ¡Rü ngĩxã pora taxüe nax nawa ingugüxü̃ca̱x i ngẽma maxü̃ i tape̱xewaama ngẽxmaxü̃!
Rü choma i Cuáü̃ rü peenexẽ chixĩ. Rü ñu̱xma nax Ngechuchuarü duü̃xü̃ chixĩxü̃ rü pexrüxü̃ chaxãchica i Tupana ãẽ̱xgacü íyixĩxü̃wa. Rü Ngechuchuca̱x pexrüxü̃ ngúxü̃ chinge, natürü nüma pexü̃ naporaexẽẽxü̃rüxü̃ choxü̃ naporaxẽxẽ nax yáxna namaxã chaxĩnüxü̃ca̱x i guxü̃ma i ngẽma ngúxü̃ i chingexü̃. Rü choma rü capaxũ ga Pátmugu chapoxcu naxca̱x nax nüxü̃ chixuxü̃ ga Tupanaarü ore ga Ngechuchuchiga.
Choma nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x nax ñuxãcü poraãcü choxü̃́ cupuracüxü̃ rü ñuxãcü cunaxüamaxü̃ i ngẽma puracü woo ngẽmaca̱x muxü̃ma i guxchaxü̃gü cuxca̱x ínguxgu. Rü nüxü̃ chacua̱x nax tama curü me yixĩxü̃ i ngẽma duü̃xü̃gü i chixexü̃ ügüxü̃. Rü ngẽxgumarüxü̃ ta nüxü̃ chacua̱x nax mea cunangugüarü maxü̃ã́xü̃ i ngẽma duü̃xü̃gü i nügü ixugüxü̃ nax Tupana imugüxü̃ yixĩgüxü̃, natürü tama aixcüma Tupana nayamugü. Rü cuma rü nüxü̃ cucua̱xama nax idorata̱a̱xgüxü̃ yixĩgüxü̃.
Sanasan