Nüxíraxü̃xü̃ ga popera ga Timutéuca̱x naxümatüxü̃ ga Pauru 6:16 - Tupanaarü Ore

¹⁶ Rü nüxicatama nixĩ i guxü̃guma namaxechaxü̃. Rü nüma rü poraãcü ínangóonexü̃wa namaxü̃, rü taxucürüwa texé ngẽma ngóonexü̃na tangaicama. Taguma wüxi i duü̃xü̃ nüxü̃ nadau, rü taxuacüma texé nüxü̃ tadau. Rü name nax guxü̃ma nüxü̃ icua̱xüü̃güxü̃, erü nüma rü guxü̃guma Ãẽ̱xgacü nixĩ. Rü ngẽmaãcü yixĩ.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:16 Iomraidhean Croise

Yox 37:23

Rü tama nüxü̃ tacua̱x i norü ĩnü ya yimá Guxü̃étüwa Ngẽxmacü ya Tupana. Erü nüma rü guxü̃arü yexera naporaxüchi rü nixaixcüma. Rü norü ĩnü rü meama niwe̱x, rü taguma chixri texémaxã inacua̱x.

Wiyaegü 104:2

Rü cuma rü curü ngóonexü̃arü ngãxü̃wa cungexma. Rü cuma rü cuyangeechi ga daxũguxü̃ ga naane ñoma wüxi i tüeruxü̃ ingeechixü̃rüxü̃.

Wiyaegü 90:2

Rü nũxcümaxü̃chima naxü̃pa nax cunaxüxü̃ ga ñoma ga naane rü norü ma̱xpǘnegü rü woetama marü Tupana quixĩ. Rü cuma rü guxü̃gutáma cungexmaecha.

Ínachoxü̃xü̃chiga 3:14

Rü nüma ga Tupana rü nanangãxü̃ rü ñanagürü: —Chomatama nixĩ i Tupana Chixĩxü̃. ¡Rü ngẽmamaxã tá cunangãxü̃ i ngẽma Iraétanüxü̃ rü ñacurügü tá: “Yima Chomatama nixĩ i Tupana Chixĩxü̃ ñacü nixĩ ya petanüwa choxü̃ mucü”, ñacugürü tá nüxü̃! —ñanagürü ga Tupana.

Ínachoxü̃xü̃chiga 33:20

Natürü cumaxã nüxü̃ chixu rü taxucürüwatama chauchiwe cudau. Rü yíxema chauchiwe dauxe rü taxucürüwa tamaxecha —ñanagürü.

Ichaía 57:15

Erü choma ya Tupana ya Guxü̃étüwa Ngẽxmacü rü guxü̃guma chamaxü̃ rü chauéga rü Üünecü nixĩ. Rü ñachagürü: “Choma rü daxũwa chamaxü̃ i ngextá ínaxüünexü̃wa. Natürü tüxü̃ charüngü̃xẽẽxü̃ rü tüxü̃ chaporaxẽxẽ ya yíxema ngearü diẽruã̱xgüxe rü yíxema naxĩ̱xãchiãẽgüxe”.

Abacú 3:4

Rü ba̱i̱xbeanexü̃gu ngéma ne naxũ. Rü naxme̱xwa ínaxũxũ i omüema. Rü ngẽmawa nango̱x i ngẽma norü pora.

Ore i mexü̃ ga Cuáü̃ ümatüxü̃ 1:18

Taguma texé ñuxgu nüxü̃ tadau ga Tupana. Natürü Nane ya nügümaxã wüxicacü nixĩ ya tüxü̃ nüxü̃ cua̱xẽẽcü. Rü yimá Nane rü Tupanaxü̃chi nixĩ, rü Nanatümaxã wüxiwa nangẽxmagü.

Ore i mexü̃ ga Cuáü̃ ümatüxü̃ 14:9

Rü Ngechuchu nanangãxü̃, rü ñanagürü: —Pa Ferípex, ¿ñuxre ya taunecü marü petanüwa changexma rü ñu̱xma rü ta tama choxü̃ cucuáxü̃? Yíxema choxü̃ dauxe rü Chaunatüxü̃ rü ta tadau. ¿Rü tü̱xcüü̃ i ngẽxguma rü ta cunaxwa̱xexü̃ i pexü̃ nüxü̃ nax chadauxẽẽxü̃ ya Chaunatü?

Ore i mexü̃ ga Cuáü̃ ümatüxü̃ 6:46

Taguma texé Chaunatü ya Tupanaxü̃ tadau. Rü chaxicatama nixĩ i nüxü̃ chadauxü̃ erü naxü̃tawa ne chaxũ.

Ore i mexü̃ ga Cuáü̃ ümatüxü̃ 8:58

Rü Ngechuchu nanangãxü̃ rü ñanagürü nüxü̃: —Aixcüma pemaxã nüxü̃ chixu rü tauta Abraáü̃ ngo̱xgu rü choma rü marü chayexma —ñanagürü.

Efesios 3:21

Rü ñu̱xma rü name nax guxü̃ma i yaxõgüxü̃ guxü̃gutáma Tupanaxü̃ nicua̱xüü̃gü naxca̱x i ngẽma Ngechuchu ya Cristu üxü̃. Rü ngẽmaãcü yixĩ.

Wenaxarü naxümatü ga Tupanaarü mugü 32:40

Rü daxũguxü̃ i naanegu chaxunagüchacüxü, rü chorü maxü̃ i tagutáma íyaguxü̃xégagu nüxü̃ chixu rü ngẽxguma tá chanawaixmagugu i ngẽma chorü tara i íya̱u̱xratachinücüüxü̃, rü ngẽxguma tá nixĩ i ichanaxügü nax chaxütanüxü̃ rü chanadaixü̃ i chorü uanügü. Rü ngẽxguma tá nixĩ i chanapoxcuexü̃ i ngẽma duü̃xü̃gü i chauxchi aiexü̃.

Filipenses 4:20

Rü name nixĩ i guxü̃guma nüxü̃ ticua̱xüü̃gü ya Tanatü ya Tupana. Rü ngẽmaãcü yixĩ.

Colosenses 1:15

Taguma texé Tupanaxü̃ tadau, natürü nüma rü núma nanamu ga Nane nax duü̃xü̃gü nüxü̃ daugüxü̃ca̱x rü nüxü̃ nacua̱xgüxü̃ca̱x nax ñuxãcü yixĩxü̃ i nüma ya Tupana. Rü naxü̃pa ga guxü̃ma ga yema nango̱xẽẽxü̃, rü nüxíra marü nayexma ga Tupana Nane.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:17

Rü ñu̱xma tanaxwa̱xe i guxü̃gutáma nüxü̃ ticua̱xüü̃gü rü tanataxẽẽgü ya yimá nüxicatama Tupana ixĩcü. Rü woo tama nüxü̃ tadaugü i ñu̱xma, natürü nüma rü guxü̃guma Tupana nixĩ. Rü ngẽmaãcü yixĩ.

Popera ga Yudíugü ga yaxõgüxü̃ca̱x ümatüxü̃ 13:8

Rü nüma ya Ngechuchu ya Cristu rü ĩnex rü ñu̱xmax rü guxü̃guma nanaxaixrüguma rü taguma naxüchicüxü.

Popera ga Chantiágu ümatüxü̃ 1:17

Erü guxü̃ma i ngẽma aixcüma mexü̃ i tüxna naxãxü̃, rü naxü̃tawa ne naxũ ya Tupana ya daxũgucü ga naxücü ga üa̱xcü rü tauemacü rü woramacurigü rü ẽxtagü. Rü nüma rü guxü̃guma nanaxa̱i̱xrügumaraxü̃ rü taguma naxüchicüü.

Nüxíraxü̃xü̃ ga popera ga Cuáü̃ ümatüxü̃ 1:5

Rü ñaa nixĩ ga ore ga tomaxã nüxü̃ yaxuxü̃ ga Ngechuchu ya Cristu. Rü pemaxã nüxü̃ tixu nax ngóonexü̃ yixĩxü̃ ya Tupana, rü nawa rü nataxuma i ẽanexü̃, rü bai i íxraxü̃.

Nüxíraxü̃xü̃ ga popera ga Cuáü̃ ümatüxü̃ 1:7

Natürü ngẽxguma chi Tupanarüxü̃ ngóonexü̃wa imaxẽgu, rü yigütanüxü̃ tixĩgü, rü Tupana Nane ya Ngechuchu rü nagümaxã tüxü̃́ inayanaxoxẽxẽ i guxü̃ma i pecadugü.

Nüxíraxü̃xü̃ ga popera ga Cuáü̃ ümatüxü̃ 4:12

Taguma texé Tupanaxü̃ tadau. Natürü ngẽxguma aixcüma yigü ingechaü̃gügu, rü Tupana rü tawa namaxü̃ rü norü ngechaü̃ rü tórü maxü̃wa nango̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:6

Rü ñu̱xma nax guxü̃arü ãẽ̱xgacü yixĩxü̃ i nümax, rü tüxü̃ naxüchica i ngextá nüma ãẽ̱xgacü íyixĩxü̃wa. Rü chacherdótegüxü̃ tüxü̃ nixĩgüxẽxẽ nax Nanatü ya Tupanaaxü̃́ ipuracüexü̃ca̱x rü nüxü̃ icua̱xüü̃güxü̃ca̱x. Rü name nixĩ i guxü̃gutáma Cristuxü̃ ticua̱xüü̃gü, erü nüma rü guxü̃gutáma guxü̃arü ãẽ̱xgacü nixĩ. Rü ngẽmaãcü yixĩ.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:8

Rü nüma ya tórü Cori ya Tupana ya Guxü̃étüwa Ngẽxmacü ya Guxü̃guma Yexmacü rü Ñu̱xma Ngẽxmacü, rü Guxü̃gutáma Ngẽxmaechacü rü ñanagürü: “Chowa nixĩ ga inaxügüxü̃ ga guxü̃ma, rü chowa nixĩ i yacuáxü̃”, ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:3

Rü nüxü̃ chaxĩnü ga wüxi ga naga ga yema tochicaxü̃wa inaxũxü̃ ga tagaãcü ñaxü̃: “Ñaa nixĩ i nachica ya Tupana nawa maxü̃xü̃ natanüwa i duü̃xü̃gü. Rü nüma rü natanüwa tá nangẽxma, rü nümagü rü norü duü̃xü̃gü tá nixĩgü. Rü nüma tátama natanüwa namaxü̃ nax guxü̃guma norü Tupana yixĩxü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:5

Rü ngéma rü tagutáma nachüta. Rü ngẽma norü duü̃xü̃gü, rü taxuca̱xtama nanaxwa̱xe i daparínaarü omü rü ẽ̱xna üa̱xcüarü ngóonexü̃, erü nümatama ya tórü Cori ya Tupana rü norü ngóonexẽẽruxü̃ tá nixĩ. Rü nümagü rü guxü̃gutáma ãẽ̱xgacügü nixĩgüecha.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:11

Rü ñanagürügü: “Pa Torü Cori, Pa Torü Tupanax, cuxü̃ nixĩ i namexü̃ nax ticua̱xüü̃güxü̃ rü cuxü̃ tataxẽẽgüxü̃, yerü cuma nixĩ ga cunaxüxü̃ ga guxü̃ma, rü curü ngúchaü̃gagu nixĩ i ñu̱xma nangẽxmagüxü̃ i ngẽma cuxüxü̃”, ñanagürügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 7:12

Rü ñanagürügü: “Rü ngẽmaãcü yixĩ. Rü nüma ya Tupana nixĩ i namexü̃ nax guxü̃guma guxãma nüxü̃ icua̱xüü̃güxü̃, rü nataxẽẽgüxü̃, rü moxẽ nüxna ixãgüxü̃, rü nüxü̃ ingechaü̃güxü̃, erü guxü̃ i cua̱x nüxü̃́ nangẽxma, rü guxü̃étüwa nangẽxma, rü guxü̃arü yexera napora. Rü ngẽmaãcü yixĩ”, ñanagürügü.