Nüxíraxü̃xü̃ ga popera ga Timutéuca̱x naxümatüxü̃ ga Pauru 5:5 - Tupanaarü Ore

⁵ Natürü name i ngẽma yaxõgüxü̃ tüxü̃ narüngü̃xẽẽgü ya yíxema yutexe ya tüxica irüxã́ũxe rü tüxü̃́ nataxúxe i tümatanüxü̃, rü Tupanaxü̃tawaxicatama ítanangu̱xẽxẽ i tümaarü ngü̃xẽxẽ, rü guxü̃guma chütacü rü ngunecü rü tayumüxẽ nax tüxü̃ nangü̃xẽẽxü̃ca̱x ya Tupana.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:5 Iomraidhean Croise

Wiyaegü 91:4

Rü nüma rü tá nügüpe̱xátütüü̃wa cuxü̃ nangẽxmaxẽxẽ rü ngéma rü taxuxü̃táma cuxü̃ nangupetü. Rü nüma rü tá aixcüma cuxna nadau rü tá cuxü̃ ínapoxü̃.

Ichaía 12:2

Rü Tupana nixĩ ya choxü̃ maxẽẽcü, rü ngẽmaca̱x nüxna charüyoe rü taxuca̱xma tü̱xcüü̃ chamuü̃. Rü nüma ya Cori ya Tupana nixĩ i chorü cu̱xchicaxü̃ rü chorü poraxẽẽruxü̃. Rü nüma nixĩ i chorü maxẽẽruxü̃ —ñacurügü tá.

Ichaía 3:26

Rü yima ĩanearü duü̃xü̃gü rü tá naxauxe. Rü norü yuetagüca̱x tá naxaure. Rü yima ĩanearü duü̃xü̃gü rü tá naxĩgü.

Ichaía 49:21

Rü ngẽxguma i pema Pa Yerucharéü̃cüã̱xgüx, rü tá peãẽwa ñaperügügü: “¿Texé tixĩ ya tüxna namugüxe i ñaa tanegü? Yixemagü rü tingexacügüchire̱x rü taxuacüma tixãxacü rü tüxü̃xica nua nawogü. ¿Rü texé tixĩxü̃ ya nayaexẽẽ́xẽ i ñaa tanegü? ¿Rü ngextá ne naxĩ?” ñaperügü tá —ñanagürü ya Tupana.

Ichaía 50:10

Rü pema nax Tupanaxü̃ pemuü̃exü̃ rü norü duü̃xü̃ga pexĩnüexü̃, rü ngẽxguma waanexü̃wa i omü ínataxuxü̃wa pexĩxgu rü ¡Tupanagu perüxĩnüe rü nüxü̃́ peyaxõgü!

Ichaía 54:1

Pa Yerucharéü̃cüã̱xgüx, perü ĩane rü ñoma wüxi ya ngexe ya ngexacüxe ya taguma ãxacüxerüxü̃ nixĩ. ¡Natürü tagaãcü rü taãẽãcü pewiyaegü! Erü nüma ya Tupana rü ñanagürü: —Yima perü ĩane ya Yerucharéü̃ i ñoma nge i taguma íxraxacücürüxü̃ nax yixĩxü̃, rü ñu̱xma rü tá namuxũchi i norü duü̃xü̃gü ngẽma nge i ãtecüarü yexera —ñanagürü.

Auxexü̃chiga 1:13

Rü Cori ya Tupana rü dauxü̃wa cha̱u̱xca̱x ne nanamu ga wüxi ga üxüema ga choxü̃ ixaxẽẽxü̃ ñu̱xmata chauxchina̱xãwa nangu. Rü choxü̃ nitoxyepe̱xe rü choxü̃ nacu̱xneta nax charünguxü̃ca̱x. Rü marü choxna nixũgachi, rü ngẽma ngúxü̃ i ñu̱xma chingexü̃ rü taguma inayacua̱x.

Ore i mexü̃ ga Luca ümatüxü̃ 18:1

Ngechuchu rü wüxi ga to ga cua̱xruxü̃ namaxã nixu nax yemawa nangúexẽẽãxü̃ca̱x nax taguma nüxü̃ naxoexü̃ca̱x nax nayumüxẽgüxü̃.

Ore i mexü̃ ga Luca ümatüxü̃ 18:7

¿Taux ẽ̱xna ya Tupana rü paxa tüxü̃ ínapoxü̃xü̃ ya yíxema duü̃xẽ ya tüxü̃ nayaxúxe i ngẽxguma chütacü rü ngunecü rü norü ngü̃xẽẽca̱x nüxna tacaxgu i tümaarü yumüxẽwa?

Ore i mexü̃ ga Luca ümatüxü̃ 2:37

Rü yemaacü wüxi ga yutecü ga yaxguã̱xü̃chi iyixĩ, rü 84 nixĩ ga ngĩrü taunecü. Rü taguma Tupanapata ga taxü̃newa íixũxũ. Rü guxü̃guma ngunecü rü chütacü rü naxaureãcüma iyumüxẽecha. Rü yemaacü Tupanaxü̃ iyacua̱xüxü̃.

Ngechuchuarü ngúexü̃gü ga yamugüxü̃arü puracüchiga 26:7

Rü guxü̃ma i ngẽma 12 tücumügü ga Iraétanüxü̃ i Yudíugü rü ínanangu̱xẽẽgü nax yanguxü̃ i ngẽma uneta. Rü ngẽmaca̱x guxü̃guma i ngunecü rü chütacü rü Tupanaxü̃ nicua̱xüxü̃gü. Rü choma rü ta íchananguxẽxẽ nax yanguxü̃ i ngẽma uneta, rü ngẽmaca̱x nixĩ, Pa Ãẽ̱xgacüx, i ñu̱xma i choxü̃ ínaxuaxü̃güxü̃ i ngẽma chautanüxü̃ i Yudíugü.

Ngechuchuarü ngúexü̃gü ga yamugüxü̃arü puracüchiga 6:1

Rü yema ngunexü̃gügu rü yexeraãcü nimuetanü ga yema duü̃xü̃gü ga yaxõgüxü̃. Rü natanüwa nayexmagü ga Yudíugü ga Griégugawa idexagüxü̃. Rü nayexma ta ga yaxõgüxü̃ ga Yudíugü ga woetama nagawa idexagüxü̃. Rü yema yaxõgüxü̃ ga Griégugawa idexagüxü̃ rü nidexagüecha nachigagu ga yema yaxõgüxü̃ ga Yudiugügawa idexagüxü̃, rü ñanagürügü: —Totanüwa yutegüxe rü tama mea õna tüxna naxãgüxü̃ i ngẽxguma õna inaxãgüü̱̃xgu i wüxichigü i ngunexü̃gu —ñanagürügü.

Ngechuchuarü ngúexü̃gü ga yamugüxü̃arü puracüchiga 9:39

Rü nüma ga Pedru rü nawe narüxũ. Rü yexguma Yópewa nanguxgu, rü yema ucapu ga yema yueta nawa yexmaxü̃wa nanagagü. Rü guxü̃ma ga yutegüxü̃ rü Pedruxü̃ ínachomaeguãchi, rü naxauxe, rü nüxü̃ nayawégü ga yema naxchirugü ga Tabitá nüxü̃́ íxüxü̃xü̃ ga yexguma namaxü̃gu.

Ngechuchuarü ngúexü̃gü ga yamugüxü̃arü puracüchiga 9:41

Rü yexguma ngĩxme̱xgu nayayauxãchi, rü ngĩxü̃ inachixẽxẽ. Rü ñu̱xũchi naxca̱x naca ga yema yaxõgüxü̃ rü yema yutegüxü̃, rü maxü̃cü nüxü̃ ngĩxü̃ nawe̱x.

Romanos 1:12

Rü ngẽxguma wüxiwa ingẽxmagügu rü tá yigüaxü̃́ tanangúchaü̃xẽxẽ namaxã i ngẽma õ i pema pexü̃́ ngẽxmaxü̃ rü choma choxü̃́ ngẽxmaxü̃

Romanos 1:5

Rü Ngechuchu ga Cristugagu Tupana chomaxã namecüma rü choxü̃ naxuneta nax norü puracü chaxüxü̃ca̱x. Rü yemaca̱x Ngechuchuégagu choxü̃ namu nax guxü̃ i nachixü̃anewa nüxü̃ chixuxü̃ca̱x i norü ore nax yaxõgüãxü̃ca̱x i duü̃xü̃gü rü Tupanaga naxĩnüexü̃ca̱x.

1 Corintios 7:32

Rü chanaxwa̱xe nax perü oegaãẽgüwa pexü̃ íchanguxü̃xẽẽxü̃. Rü ngẽxguma wüxi i yatü ngema̱xgu, rü Tupanaarü puracügu narüxĩnü rü nagu narüxĩnü nax Tupanaarü ngúchaü̃ naxüxü̃.

1 Corintios 7:34

Rü ngẽxgumarüxü̃ ta nixĩ i ngexü̃gü. Rü ngẽma ngexü̃ i ngetexü̃ rü Tupanaarü puracügu narüxĩnü, erü marü Tupanana nügü naxã rü guxü̃ i ngĩxü̃nemaxã rü ngĩãxẽmaxã naxca̱x imaxü̃. Natürü ngẽma ngexü̃ i ãtéxü̃ rü ñoma i naanearü ngẽmaxü̃gügu narüxĩnü, rü nagu narüxĩnü nax ñuxãcü natexü̃ nataãẽxẽẽxü̃.

Efesios 6:18

Rü name i guxü̃guma peyumüxẽgüxü̃. ¡Rü guxü̃guma Tupanaãxẽ i Üünexü̃arü ngü̃xẽẽmaxã Tupanana peca! ¡Rü pexuãxẽ nax taguma nüxü̃ perüxoexü̃ca̱x! Rü ngẽmaãcü name i naxca̱x peyumüxẽgü i guxü̃ma i duü̃xü̃gü i Tupanaaxü̃́ yaxõgüxü̃.

Filipenses 4:6

¡Rü taxuca̱xma penaxĩ̱xãchiãẽgü! ¡Rü perü yumüxẽwa Tupanamaxã nüxü̃ pixu i guxü̃ma i ngẽma pexü̃ ngupetüxü̃! ¡Rü naxca̱x ípeca rü moxẽ nüxna pexã!

Nüxíraxü̃xü̃ ga popera ga Timutéuca̱x naxümatüxü̃ ga Pauru 2:1

Rü ñu̱xma rü tá pemaxã nüxü̃ chixu nax ñuxãcü namexü̃ nax peyumüxẽgüxü̃. Rü ngẽma nüxíra naxca̱x peyumüxẽgüxü̃ tá nixĩ i guxü̃ma i duü̃xü̃gü i ñoma i naanewa maxẽxü̃. ¡Rü Tupanana naxca̱x peca nax nüxü̃ nangü̃xẽẽxü̃ca̱x rü nüxü̃́ nüxü̃ narüngü̃maxü̃ca̱x i norü pecadugü! ¡Rü moxẽ nüxna pexã ya Tupana naxca̱x i norü ngü̃xẽxẽ i guxü̃ i duü̃xü̃güna naxãxü̃!

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:16

Rü ngẽxguma chi wüxi ya yatü i yaxõ̱xcü rüe̱xna wüxi ya ngecü i yaxõ̱xcü rü ngĩxü̃́ nangẽxmagu i wüxi i ngĩtanüxü̃ i yutecü, rü name nixĩ i nümagütama ngĩxü̃ narüngü̃xẽẽgü nax ngẽmaãcü taxũtáma ngẽma yaxõgüxü̃arü puracü yixĩxü̃ca̱x nax ngĩxna nadaugüxü̃. Rü ngẽxguma tá nüxü̃́ natauxcha i ngẽma yaxõgüxü̃ nax ngĩxü̃ nangü̃xẽẽgüxü̃ i ngẽma yutecü i aixcüma ngĩxü̃́ natau̱xcüma i ngĩtanüxü̃ i ngĩxü̃ rüngü̃xẽẽgüxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:3

¡Tüxü̃ rüngü̃xẽxẽ ya yíxema yutegüxe ega aixcüma taxúema tüxü̃ rüngü̃xẽẽgu!

Norü taxre ga popera ga Timutéuca̱x naxümatüxü̃ ga Pauru 1:3

Guxü̃guma i chütacü rü ngunecü rü cuxna chacua̱xãchixü̃ i chorü yumüxẽwa, rü poraãcü cuxca̱x moxẽ Tupanana chaxã. Rü nüxü̃́ nixĩ i chapuracüxü̃ i mexü̃ i chauãẽmaxã, yexgumarüxü̃ ga nũxcümaü̃güxü̃ ga chorü o̱xigü naxügüxü̃rüxü̃.

Nüxíraxü̃xü̃ ga popera ga Pedru ümatüxü̃ 3:5

Rü yema nũxcümaü̃güxü̃ ga ngexü̃gü ga Tupanape̱xewa ixüünexü̃ rü Tupanaaxü̃́ iyaxõgü rü ngĩtega ixĩnüe, rü yema nixĩ ga ngĩxrü ngã̱xãẽruü̃gü.

Rux 2:12

¡Rü Tupana cuxü̃́ naxütanü i ngẽma! ¡Rü nüma ya Cori ya Iraéanecüã̱xgüarü Tupana ga norü ngü̃xẽẽca̱x cudaucü cuxü̃́ naxütanü naxca̱x ga guxü̃ma ga yema mexü̃ ga cuxüxü̃! —ñanagürü.