Nüxíraxü̃xü̃ ga popera ga Timutéuca̱x naxümatüxü̃ ga Pauru 4:6 - Tupanaarü Ore

⁶ Rü ngẽxguma ngẽma cumaxã nüxü̃ chixuxü̃ i oremaxã cunangúexẽẽgu i taenexẽ i yaxõgüxü̃, rü Ngechuchu ya Cristuarü mugüruxü̃ ya mecü tá quixĩ. Rü ngẽxguma nawa cungúechagu i ngẽma ore i marü quixõxü̃, rü ngẽxguma nagu quixũẽchagu i ngẽma mexü̃ i ngu̱xẽẽtae i marü nagu quixũxü̃, rü ngẽxguma tá nixĩ i wüxi ya mecü ya Ngechuchu ya Cristuarü mugüruxü̃ quixĩxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 4:6 Iomraidhean Croise

Wiyaegü 19:7

Rü Cori ya Tupanaarü ore rü aixcüma nawe̱xgu rü ngexwaca̱xü̃xü̃ i pora tüxna naxã. Rü Cori ya Tupanaarü mugü rü aixcümaxü̃ nixu rü cua̱xwa nananguxẽxẽ ya yimá yatü ya ímemarecü nax nayauxãxü̃ i ucu̱xẽgü.

Ucu̱xẽgüchiga 4:2

Choma rü pexna chanaxã i mexü̃ i ngu̱xẽẽtaegü rü ngẽmaca̱x tama name i nüxü̃ perüngümae i chorü ucu̱xẽgü.

Yeremía 15:16

Rü yexguma chomaxã quidexagu rü choma rü chanayaxu ga curü ore. Rü yema curü ore nixĩ ga choxü̃ poraxẽẽxü̃ rü choxü̃ taãẽxẽẽxü̃ erü curü duü̃xü̃ chixĩ, Pa Corix, Pa Tupana ya Guxü̃étüwa Ngẽxmacüx.

Ore i mexü̃ ga Matéu ümatüxü̃ 13:52

Rü yexguma ga Ngechuchu rü ñanagürü nüxü̃: —Rü guxü̃ma i ngúexẽẽruxü̃ i Tupanaarü mugüwa ngu̱xẽẽtaexü̃ rü nanaxwa̱xe nax mea nüxü̃ nacuáxü̃ i ngẽma nũxcümaü̃xü̃ i Tupanaarü ore rü ñaa ngexwaca̱xü̃xü̃ i chorü ore, ngẽxgumarüxü̃ i wüxi i yatü i norü taxepatawa duü̃xü̃güca̱x inawéxü̃ i norü ngẽmaxü̃gü i ngexwacaxü̃güxü̃ rü norü ngẽmaxü̃gü i nũxcümaü̃güxü̃ —ñanagürü ga Ngechuchu.

Ore i mexü̃ ga Luca ümatüxü̃ 1:3

Rü ngẽmaca̱x, Pa Teóquirux, rü choma rü ta meama naxca̱x íchaca nachiga ga guxü̃ma ga yema Ngechuchu üxü̃ ga yexguma noxritama inaxügüãgu ga norü puracü. Rü ñu̱xma rü cha̱u̱xca̱x name nax meama cuxca̱x chanaxümatüxü̃ i ngẽmachiga nax meama nüxü̃ cucuáxü̃ca̱x nax aixcüma yixĩxü̃ ga yema ore ga marü cuxü̃ nangu̱xẽẽgüxü̃.

Ngechuchuarü ngúexü̃gü ga yamugüxü̃arü puracüchiga 1:15

Rü yema ngunexü̃gügu ga yexguma nangutaque̱xegügu ga yema yaxõgüxü̃ ga maneca 120 ixĩgüxü̃ rü Pedru rü inachi ga norü ngãxü̃tanüwa, rü ñanagürü:

Ngechuchuarü ngúexü̃gü ga yamugüxü̃arü puracüchiga 20:31

¡Pegüna pedaugü, rü nüxna pecua̱xãchie nax tomaepü̱x ga taunecügu rü ngunecü rü chütacü taguma íchayachaxãchixü̃ nax chaxauxãcüma pexü̃ chixucu̱xẽgüxü̃ ga wüxichigü!

Ngechuchuarü ngúexü̃gü ga yamugüxü̃arü puracüchiga 20:35

Rü guxü̃guma mea pexü̃ changúexẽxẽ nax ngẽmaãcü pepuracüexü̃ nax nüxü̃ perüngü̃xẽẽxü̃ca̱x i ngẽma duü̃xü̃gü i nüxü̃́ nataxuxü̃. Rü name nixĩ nax nüxna pecua̱xãchiexü̃ i Cori ya Ngechuchuarü ore ga nümatama ñaxü̃: “Rü narümemae nixĩ i pema nax toguxena penaxãxü̃ rü tama i tüma pexna nax tanaxãxü̃” —ñaxü̃.

Romanos 15:15

Natürü ñaa poperawa rü tama chamuü̃ãcüma pexca̱x chanaxümatü i ñuxre i ucu̱xẽgü, erü tama chanaxwa̱xe i nüxü̃ ipeyarüngümae i ngẽma ucu̱xẽgü. Rü pexca̱x chanaxümatü i ngẽmachiga yerü Tupana chomaxã namecüma rü choxü̃ namu nax pexca̱x chanaxümatüxü̃ca̱x.

1 Corintios 4:17

Rü ngẽmaca̱x pexü̃tawa chanamu ya Timutéu ya poraãcü nüxü̃ changechaü̃cü. Rü nüma rü chaunerüxü̃ nixĩ i Coriarü puracüwa, rü aixcüma mea nayanguxẽxẽ i guxü̃ma i ngẽma nagu chanamuxü̃. Rü nüma tá pexna nüxü̃ nacua̱xãchixẽxẽ nax ñuxãcü Ngechuchu ya Cristupe̱xewa mea chamaxü̃xü̃ rü mea chanangúexẽẽxü̃ ga yema yaxõgüxü̃ ga natanügu chixũgüxü̃.

2 Corintios 11:23

Nümagü rü nügü yaxugügu rü Cristuaxü̃́ napuracüe. Natürü choma rü norü yexera Cristuaxü̃́ chapuracü. Rü ngẽma ñachagürü pexü̃ woo pema nagu perüxĩnüegu nax ñoma wüxi i ãũãẽxü̃rüxü̃ chidexaxü̃. Rü ngẽma duü̃xü̃güarü yexera poraãcü Tupanaaxü̃́ chapuracü. Rü norü yexera Tupanaarü oreca̱x chapoxcu, rü norü yexera choxü̃ nacua̱i̱xgü. Rü mue̱xpü̱xcüna ãũcümaxü̃wa chayexma, yerü choxü̃ nima̱xgüchaü̃.

2 Corintios 3:6

Rü nümatama ya Tupana nixĩ i toxü̃ nangúexẽẽxü̃ nax nüxü̃́ tapuracüexü̃ca̱x rü nüxü̃ tixuxü̃ca̱x i ngẽma ngexwaca̱xü̃xü̃ i norü uneta i tama Moichéarü mugüwa ne daxü̃ natürü Tupanaãxẽ i Üünexü̃wa ne ũxü̃. Rü yema mugü ga Moiché ümatüxü̃ rü yuwa tüxü̃ nagagü, natürü Tupanaãxẽ ya Üünecü rü tüxna nanaxã i maxü̃ i taguma gúxü̃.

2 Corintios 6:4

Rü guxü̃guma duü̃xü̃güxü̃ nüxü̃ tadauxẽxẽ nax aixcüma Tupanaarü duü̃xü̃gü tixĩgüxü̃. Rü ngẽmaca̱x yáxna namaxã taxĩnüe i ngẽxguma woo ngúxü̃ tingegügu, rüe̱xna ta̱xacü toxü̃́ taxu̱xgu, rüe̱xna ta̱xacürü guxchaxü̃ toxü̃́ ngẽxmagu, rüe̱xna toxü̃ yacua̱i̱xgügu, rüe̱xna toxü̃ napoxcuegu, rü ẽ̱xna tomaxã nanuegu nax toxü̃ nada̱i̱xü̃ca̱x. Rü poraãcü tapuracüe, rü ñuxguacü rü tama tapee, rü ñuxguacü rü taiya toxü̃́ nangu̱x. Natürü yáxna namaxã taxĩnüe i guxü̃ma i ngẽma.

Efesios 6:21

Rü taenexẽ ya nüxü̃ ingechaü̃cü ya Tíquicu, rü mecü ya chorü ngü̃xẽẽruxü̃ nixĩ i tórü Coriarü puracüwa. Rü nüma tá pemaxã nüxü̃ nixu i guxü̃ma i chauchiga nax ñuxãcü choxü̃ naxüpetüxü̃ i nua.

Filipenses 2:20

Rü aixcüma nataxuma i to i chorü ngü̃xẽẽruxü̃ i Timutéurüxü̃ aixcüma pegu rüxĩnüxü̃ rü pexü̃ rüngü̃xẽẽchaü̃xü̃.

Filipenses 2:22

Natürü i pema rü marü nüxü̃ pecua̱x nax ñuxãcü mea namaxü̃xü̃ i Timutéu, rü ñuxãcü choxü̃ nangü̃xẽẽxü̃ i Tupanaarü orearü uchigawa, ñoma wüxi i nane i nanatüxü̃ rüngü̃xẽẽxü̃rüxü̃.

Filipenses 3:16

Rü ngẽma inaxwa̱xexü̃ nixĩ nax aixcüma nagu imaxẽxü̃ i ngẽma ore i marü nüxü̃ icuáxü̃.

Colosenses 2:19

Natürü i nümagü rü tama aixcüma naga naxĩnüe ya yimá taeru ixĩcü ya Cristu. Rü nüma ya Cristu nixĩ i tüxü̃ yamuxẽẽxü̃ rü tüxü̃ naporaexẽẽxü̃ ya guxãma ya yíxema nüxü̃́ yaxõgüxe nax guxãma wüxigu tarüxĩnüexü̃ca̱x ngẽma Tupana naxwa̱xexü̃rüxü̃.

Colosenses 3:16

Rü name nixĩ i guxü̃guma peãẽwa nangẽxma i Cristuarü ore i taãxẽ pexna ãxü̃. Rü name nixĩ i nüxü̃ pecuáãcüma ngẽma oremaxã pegü pengúexẽxẽ rü pegü pixucu̱xẽgü. Rü name nixĩ i Tupanana moxẽ pexãgüãcüma nagu pewiyaegü i naguxü̃raü̃xü̃ i norü wiyaegü.

Colosenses 4:7

Rü nüma ya taenexẽ ya Tíquicu ya nüxü̃ ingechaü̃gücü rü aixcüma choxü̃ narüngü̃xẽxẽ rü wüxigu chomaxã Cori ya Tupanaaxü̃́ napuracü. Rü nüma tá pemaxã nüxü̃ nixu i chauchiga.

1 Tesalonicenses 3:2

Rü nagu tarüxĩnüe nax pexü̃tawa tanamuxü̃ ga taenexẽ ga Timutéu nax pexü̃ íyadauxü̃ca̱x. Rü nüma nixĩ i Tupanaarü puracütanüxü̃ i wüxigu tomaxã puracüxü̃ nax nüxü̃ tixuxü̃ca̱x i ngẽma ore i mexü̃ i Cristuchiga. Rü yéma petanüwa tanamu nax pexü̃ nangü̃xẽẽxü̃ca̱x nax yexeraãcü peyaxõgüxü̃ca̱x rü aixcüma petaãẽgüxü̃ca̱x rü yemaacü taguma texé ga petanüwa nüxü̃ rüxoxü̃ca̱x ga yexguma yema guxchaxü̃gü pexü̃́ yexmagu. Erü pematama marü nüxü̃ pecua̱x nax guxãma i yixema nax yaxõgüxü̃ rü ngúxü̃ tá tingegü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 4:16

¡Naxuãxẽ rü mea cugüna nadau rü mea nangúexẽxẽ i ngẽma ore rü mea naxüama i ngẽma puracü ya Tupana nagu cuxü̃ muxü̃! Erü ngẽxguma mea cunaxü̱xgu i ngẽma puracü, rü tá cunayaxu i maxü̃ i taguma gúxü̃ rü ngẽma cuxü̃́ irüxĩnüexü̃ rü tá ta nanayauxgü i ngẽma maxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:3

Rü ngẽxguma chi tangẽxmagu ya wüxíe ya namaxã tangu̱xẽẽtaegu i wüxi i ngu̱xẽẽtae i tama namaxã wüxiguxü̃ i tórü ngu̱xẽẽtae i aixcüma mexü̃, rü tama namaxã wüxiguxü̃ i tórü Cori ya Ngechuchu ya Cristuarü ngu̱xẽẽtae i mexü̃, rü tama namaxã wüxiguxü̃ i ngẽma ngu̱xẽẽtae i Tupanaarü orewa ngóxü̃, rü tügü ticua̱xüxü̃ rü taxuxü̃ma tacua̱x. Rü ngẽmaca̱x ngexü̃rüüxü̃mare i dexaca̱x rü tachoxü̃gawa̱xe, rü tama texéga taxĩnüchaü̃. Rü düxwa ñoma tida̱xawexü̃rüxü̃ tixĩ namaxã i ngẽma tümacüma. Rü ngẽmagagu rü taxãũxãchiwa̱xe, rü tanuxwa̱xe, rü taguxchigawa̱xe, rü taxúeãxü̃ma tayaxõ.

Norü taxre ga popera ga Timutéuca̱x naxümatüxü̃ ga Pauru 1:6

Rü ngẽmaca̱x cumaxã nüxü̃ chixu nax cugü cuporaxẽẽxü̃ nax yexeraãcü cunaxüamaxü̃ca̱x i ngẽma Tupanaarü puracü ga naxca̱x cuxna naxããxü̃ ga cua̱x ga yexguma noxri cuétü chaxǘxme̱xãcüma cumaxã chayumüxẽgu.

Norü taxre ga popera ga Timutéuca̱x naxümatüxü̃ ga Pauru 3:10

Natürü cumax, Pa Timutéux, marü nüxü̃ cucua̱x i ngẽma chorü ngu̱xẽẽtae, rü chaucüma, rü ngẽma nagu charüxĩnüxü̃, rü ngẽma chorü õ, rü ñuxãcü nüxü̃ changechaü̃xü̃ ga yema yaxõgüxü̃ rü yáxna namaxã chaxĩnüxü̃.

Norü taxre ga popera ga Timutéuca̱x naxümatüxü̃ ga Pauru 4:3

Erü yixcüra i duü̃xü̃gü rü taxũtáma nüxü̃ naxĩnüechaü̃ i ngẽma ngu̱xẽẽtae i mexü̃. Erü ngẽma duü̃xü̃gü rü nichixecüma, rü ngẽmaca̱x naxca̱x nadaugü i norü ngúexẽẽruü̃gü i nüma nanaxwa̱xegüxü̃ãcüma nangúexẽẽxü̃.

Popera ga Títoca̱x naxümatüxü̃ ga Pauru 2:1

Natürü i cumax, Pa Títox, rü name i guxü̃gutáma ngẽma mexü̃ i ngu̱xẽẽtaemaxã cunangúexẽxẽ.

Nüxíraxü̃xü̃ ga popera ga Pedru ümatüxü̃ 2:2

Rü ñoma wüxi i õxchana i ngexwaca buxü̃ i naégünenixü̃ nüxü̃́ ngúchaü̃xü̃rüxü̃ penaxwa̱xe i poraãcü pexü̃́ nangúchaü̃ i Tupanaarü ore nax ngẽmawa peporaexü̃ca̱x rü mea peyaexü̃ca̱x i perü õwa nax ngẽmaãcü guxü̃wama namexü̃ca̱x i perü maxü̃ i taguma gúxü̃.

Norü taxre ga popera ga Cuáü̃ ümatüxü̃ 1:9

Rü yíxema nangupetüxẽẽ́xe ga yema Cristu tüxü̃ ngúexẽẽxü̃, rü tama Tupanaxü̃ tacua̱x. Natürü yíxema tama nüxna íchoxü̃xẽ ga yema Cristu tüxü̃ ngúexẽẽxü̃, rü aixcüma nüxü̃ tacua̱x ya Tanatü ya Tupana rü Nane ya Ngechuchu.

Popera ga Yúda ümatüxü̃ 1:5

Rü woo marü nüxü̃ nax pecuáxü̃, natürü chanaxwa̱xe nax pexna nüxü̃ chacua̱xãchixẽẽxü̃ ga yema nüxü̃ ngupetüxü̃ ga yema nũxcümaü̃güxü̃ ga Iraétanüxü̃ ga Moichéwe rüxĩxü̃. Rü nüma ga Cori ya Tupana rü Equítuanewa ínananguxü̃xẽxẽ, natürü yemawena rü nanadai ga yema tama nüxü̃́ yaxõgüchaü̃xü̃.