Nüxíraxü̃xü̃ ga popera ga Timutéuca̱x naxümatüxü̃ ga Pauru 1:16 - Tupanaarü Ore

¹⁶ Natürü Tupanaaxü̃́ changechaü̃tümüxü̃ nax ngẽmaãcü chowa duü̃xü̃güxü̃ nawéaxü̃ca̱x ga ñuxãcü nüma ga Ngechuchu ya Cristu yáxna chomaxã nax naxĩnüxü̃. Rü ngẽmaãcü wüxi i cua̱xruxü̃ chixĩ naxca̱x i guxü̃ma i duü̃xü̃gü nax nümagü rü ta nayaxõgüãxü̃ca̱x rü nayauxgüãxü̃ca̱x i maxü̃ i taguma gúxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:16 Iomraidhean Croise

Norü taxre ga to ga popera ga ãẽ̱xgacügüchiga ümatüxü̃ 33:19

Rü norü yumüxẽchiga, rü norü yumüxẽarü ngãxü̃chiga, rü ñuxãcü nax chixexü̃ naxüxü̃chiga, rü ñuxãcü ma̱xpǘnegügu tupananetagüca̱x ínaxüxü̃ãxü̃ ga ngutaque̱xechicagüchiga, rü ñuxãcü yemagu yanuaxü̃ ga Acheráchicüna̱xã rü togü ga tupananetachicüna̱xãgüchiga, rü yema naxü naxü̃pa ga nax Cori ya Tupanamaxã nüxü̃ yaxuxü̃ ga norü chixexü̃ rü nape̱xegu nügü ínaxíraxü̃, rü guxü̃ma i ngẽma rü Tupanaarü orearü uruü̃gü ümatüxü̃ i poperagu naxümatü.

Wiyaegü 25:11

Pa Cori Pa Tupanax, nata i chorü chixexü̃ i cupe̱xewa chaxüxü̃ ¡Rü choxü̃́ nüxü̃ irüngüma i ngẽma nax taxúema chixri cuchiga idexaxü̃ca̱x!

Ínachoxü̃xü̃chiga 34:8

Rü yemaca̱x ga Moiché rü yexgumatama yexma ñaxtüanegu nanangücuchi rü Tupanaxü̃ nicua̱xüxü̃.

Ichaía 1:18

¡Ẽcü nua pexĩ rü ngĩxã perü chixexü̃chiga tidexagü! Rü ngẽxguma chi perü maxü̃ rü woo nadauxuchigu namaxã i perü chixexü̃, natürü i choma rü ñoma gáuxü̃chara i cómüxü̃chixü̃rüxü̃ tá chayaxĩxẽxẽ. Rü ngẽxguma chi woo wüxi i naxchiru i waxüchixü̃rüxü̃ yixĩxgu i perü pecadugü, natürü i choma rü ñoma wüxi i carnéruta̱xa i cómüxü̃chixü̃rüxü̃ tá chanacómüxẽxẽ.

Ichaía 43:25

Natürü i choma nax perü Tupana chixĩxü̃ rü tá íchanapigü rü nüxü̃ ichayarüngü̃ma i guxü̃ma i perü pecadugü rü chixexü̃gü i chope̱xewa pexüxü̃.

Ichaía 55:7

Rü ngẽma duü̃xü̃ i chixecümaxü̃, rü name nixĩ i nüxü̃ narüxo i ngẽma nacüma i chixexü̃. Rü ngẽma duü̃xü̃ i chixexü̃gu rüxĩnüxü̃, rü name nixĩ i nüxü̃ narüxo i ngẽma chixexü̃ i nagu naxĩnüxü̃. ¡Rü Cori ya Tupanaca̱x pewoegu! Rü tá nüxü̃́ pengechaü̃tümüxü̃gü. ¡Rü naxca̱x pewoegu ya tórü Tupana! Erü nüma rü ínamemare nax pexü̃́ nüxü̃ nangümaxü̃ i perü chixexü̃gü.

Iraétanüxü̃arü muxchiga 23:3

Rü ñu̱xũchi Balaáü̃ rü ñanagürü Baláxü̃: —¡Ẽcü nuxã ãmarearü guruü̃xü̃tagu rüxã̱ũ̱x! Rü choma rü yoxni tá íchayadau rü aixcüma cha̱u̱xca̱x ngéma naxũ ya Cori nax ngẽxma choxü̃ nanga̱xauxü̃ca̱x. Rü ñu̱xũchi tá cumaxã nüxü̃ chixu i ngẽma chomaxã nüxü̃ yaxuxü̃ —ñanagürü. Rü nüma ga Balaáü̃ rü wüxi ga ma̱xpǘne ga chianenewa naxũ, rü yéma nixĩ ga Tupana naxca̱x ngóxü̃. Rü nüma ga Balaáü̃ rü ñanagürü Tupanaxü̃: —Marü chanaxü i 7 i ãmarearü guruxü̃, rü wüxichigü i ngẽma guruü̃wa rü cuxca̱x chayagu i wüxi i wocaxacü rü wüxi i carnéru —ñanagürü.

Ore i mexü̃ ga Luca ümatüxü̃ 15:10

Rü pemaxã nüxü̃ chixu rü ngẽxgumarüxü̃ ta nataãẽgü i daxũcüã̱x i Tupanaarü orearü ngeruü̃gü i ngẽxguma wüxi i duü̃xü̃ i pecaduã́xü̃ nüxü̃ rüxoxgu i nacüma i chixexü̃ rü Tupanaaxü̃́ yaxõõgu —ñanagürü ga Ngechuchu.

Ore i mexü̃ ga Luca ümatüxü̃ 23:43

Rü Ngechuchu nanangãxü̃ rü ñanagürü: —Aixcüma cumaxã nüxü̃ chixu rü ñomatátama i ngunexü̃gu chomaxã cungexma i daxũguxü̃ i naanewa —ñanagürü.

Ore i mexü̃ ga Luca ümatüxü̃ 7:47

Rü ngẽmaca̱x woo namu i ngĩrü pecadugü, natürü Tupana ngĩxü̃́ nüxü̃ narüngüma i guxü̃ma, erü ngĩma rü aixcüma choxü̃ ingechaü̃. Rü ngẽxguma wüxi i íxraxü̃ i guxchaxü̃ texéaxü̃́ nüxü̃ rüngü̃magu rü naxíra i tümaarü ngechaü̃ —ñanagürü.

Ore i mexü̃ ga Cuáü̃ ümatüxü̃ 20:31

Natürü guxü̃ma ga yema Ngechuchu üxü̃ rü ñaa poperagu naxümatü nax peyaxõgüxü̃ca̱x nax Ngechuchu rü Tupana Nane ya Cristu nax yixĩxü̃ rü ngẽxguma nüxü̃́ peyaxõgügu pexü̃́ nangẽxmaxü̃ca̱x i maxü̃ i taguma gúxü̃.

Ore i mexü̃ ga Cuáü̃ ümatüxü̃ 3:36

Rü yíxema Tupana Naneaxü̃́ yaxṍxe rü tüxü̃́ nangẽxma i maxü̃ i taguma gúxü̃. Natürü yíxema tama nüxü̃́ yaxõxchaü̃xẽ ya Tupana Nane, rü taxũtáma tüxü̃́ nangẽxma i ngẽma maxü̃ i taguma gúxü̃. Natürü tá tanayaxu i ngẽma ãũcümaxü̃ i poxcu ya Tupana tá namaxã tüxü̃ poxcuxü̃ —ñanagürü ga Cuáü̃ ga baiü̃ẽẽruxü̃.

Ore i mexü̃ ga Cuáü̃ ümatüxü̃ 5:24

Aixcüma pemaxã nüxü̃ chixu rü yíxema texé ya choxü̃́ irüxĩnüxe i chorü ore, rü nüxü̃́ yaxṍxe ya yimá Chaunatü ya núma choxü̃ mucü, rü tüxü̃́ nangẽxma i maxü̃ i taguma gúxü̃. Rü Chaunatü rü taxũtáma tümamaxã nanaxuegu nax tapoxcuxü̃, erü marü nüxna ítanguxuchi nax tayuxü̃, rü tüxü̃́ nangẽxma i maxü̃ i taguma gúxü̃.

Ore i mexü̃ ga Cuáü̃ ümatüxü̃ 6:37

Rü guxãma ya yíxema duü̃xẽgü ya Chaunatü choxna tüxü̃ mugüxe rü chorü duü̃xü̃gü tixĩgü. Rü texé ya choxü̃́ yaxõgüxe rü taxũtáma tüxü̃ chaxoo̱x.

Ore i mexü̃ ga Cuáü̃ ümatüxü̃ 6:40

Rü Chaunatü ya Tupanaarü ngúchaü̃ nixĩ nax guxãma ya texé ya Nanexü̃ daugüxe rü nüxü̃́ yaxõgüxe tüxü̃́ nangẽxmaxü̃ i maxü̃ i taguma gúxü̃. Erü choma tá nixĩ i tüxü̃ ícharüdagüxẽẽxü̃ i naanearü gu̱xgu —ñanagürü.

Ore i mexü̃ ga Cuáü̃ ümatüxü̃ 6:54

Texé ya chaxunemaxã ãwemüxẽ rü chaugüwa axexe rü tüxü̃́ nangẽxma i maxü̃ i taguma gúxü̃. Erü choma rü tá tüxü̃ chamaxẽxẽ ega naanearü gu̱xgu.

Ngechuchuarü ngúexü̃gü ga yamugüxü̃arü puracüchiga 13:39

Rü ñu̱xma ya guxãma ya yíxema nüxü̃́ yaxõgüxe, rü Ngechuchugagu Tupana tüxü̃́ nüxü̃ narüngüma i guxü̃ma ga yema pecadugü ga noxri taxucürüwa tüxü̃́ nüxü̃ yanangümaxü̃ ga yexguma nagu taxĩxgu ga yema mugü ga Moiché ümatüxü̃.

Romanos 15:4

Rü guxü̃ma ga yema nũxcüma ümatüxü̃ ga Tupanaarü orewa, rü naxümatü nax tüxü̃ nangu̱xẽẽxü̃ca̱x nax taguma nüxü̃ rüxoexü̃ ega woo ta̱xacürü guxchaxü̃ taxca̱x ínguxgu. Rü yema Tupanaarü ore rü naxümatü nax tüxü̃ nataãẽxẽẽxü̃ca̱x rü tüxü̃ nüxü̃ nacua̱xẽẽxü̃ca̱x nax aixcüma Tupanaarü ixĩgüxü̃.

Romanos 6:23

Rü natanü i ngẽma pecadu tüxna ãxü̃, rü yu nixĩ. Natürü ngẽma ãmare ya Tupana tüxna ãxü̃ rü maxü̃ i taguma guxü̃ nixĩ i ngẽxguma tórü Cori ya Ngechuchuaxü̃́ yaxõgügu.

1 Corintios 7:25

Rü ñu̱xma rü tá pemaxã nüxü̃ chixu nachiga i ngẽma ngema̱xgüxü̃ rü ngetegüxü̃. Rü tórü Cori ya Ngechuchu rü taxuxü̃ma i mu choxna naxã i ngẽmachiga. Natürü tá pemaxã nüxü̃ chixu i chorü ĩnü. Erü choma nixĩ i wüxi i duü̃xü̃ ga nüxü̃́ changechaü̃tümüü̃ãcüma choxü̃ nayaxuxü̃ ga tórü Cori.

2 Corintios 4:1

Rü ngẽmaca̱x taguma nüxü̃ tarüchau i ñaa puracü, erü Tupana ya nüxü̃́ tangechaü̃tümüü̃cü nixĩ ga toxü̃ mucü nax tanaxüxü̃ca̱x i ñaa puracü nax nüxü̃ tixuxü̃ca̱x i norü ore.

Efesios 1:12

Rü yemaacü Tupana tamaxã nanaxuegu nax yixema i yixira Cristuaxü̃́ yaxõgüxe nüxü̃ icua̱xüü̃güxü̃ca̱x naxca̱x i norü pora i üünexü̃.

Efesios 1:6

Rü yemaacü nanaxü ga Tupana nax guxü̃guma nüxü̃ icua̱xüü̃güxü̃ca̱x naxca̱x i norü ngechaü̃ rü norü mecüma ga yexguma taxca̱x núma namuãxgu ga Nane ya nüxü̃ nangechaü̃xü̃chicü.

Efesios 2:7

Rü yemaacü nanaxü ga Tupana erü yimá taunecügü ya íngugücügu tá duü̃xü̃güxü̃ nanawe̱x nax aixcüma Cristugagu poraãcü tüxü̃ nangechaü̃xü̃ rü tamaxã namecümaxü̃.

2 Tesalonicenses 1:10

Rü ngẽmaãcü tá ngẽma duü̃xü̃gümaxã nangupetü i ngẽxguma tórü Cori ya Ngechuchu núma ũxgu nax norü duü̃xü̃gü i üünexü̃ nüxü̃ icua̱xüü̃güxü̃ca̱x. Rü guxü̃ma i yaxõgüxü̃ rü tá naba̱i̱xãchiãẽgü rü nataãẽgü i ngẽxguma nüxü̃ nadaugügu. Rü pema rü tá ta ngéma pengẽxmagü, yerü peyaxõgü ga yema Tupanaarü ore ga pemaxã nüxü̃ tixuxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:13

Rü woo ga ü̃pa ga choma rü chixri nachiga chidexa ga Cristu, rü nawe chingẽchigü ga yema nüxü̃́ yaxõgüxü̃ rü chixexü̃ Cristumaxã chixugü, natürü ga Tupana rü nüxü̃́ changechaü̃tümüxü̃, yerü tauta Cristuaxü̃́ chayaxõ rü tama nüxü̃ chacua̱x nax tama namexü̃ ga yema chaxüxü̃.

Popera ga Yudíugü ga yaxõgüxü̃ca̱x ümatüxü̃ 7:25

Rü ngẽmaca̱x nüxü̃́ natauxcha nax tüxü̃ namaxẽxẽẽxü̃ ya guxãma ya yíxema norü ngü̃xẽẽmaxã Tupanaxü̃tawa ngugüxe. Erü nüma ya Ngechuchu rü guxü̃guma namaxecha nax Tupanape̱xewa tümaétüwa nachogüxü̃ca̱x.

Nüxíraxü̃xü̃ ga popera ga Pedru ümatüxü̃ 3:20

Rü yema naãxẽgü ga yexma poxcuexü̃, rü yema nixĩ ga naãxẽgü ga yema duü̃xü̃gü ga Noé maxü̃gu tama ixĩnüechaü̃xü̃ woo Tupana yáxna namaxã naxĩnü ga yexguma Noé naxüyane ga gumá wapuru. Rü 8 ga duü̃xü̃güxicatama nixĩ ga gumá wapurugu ichoü̃xü̃, rü yema nixĩ ga gumá mucü ga taxüchicüarü dexáétüwa maxẽxü̃.

Norü taxre ga popera ga Pedru ümatüxü̃ 3:15

Rü name nixĩ i nüxna pecua̱xãchie nax yáxna tamaxã naxĩnüxü̃ ya tórü Cori, erü nanaxwa̱xe nax tüxü̃́ nangẽxmaxü̃ i maxü̃ i taguma gúxü̃. Rü ngẽmatama ucu̱xẽ i pexca̱x chaxümatüxü̃rüxü̃ nixĩ ga pexca̱x naxümatüaxü̃ ga taenexẽ ya nüxü̃ ingechaü̃gücü ya Pauru ga yexguma Tupana cua̱x nüxna ãxgu nax pexca̱x naxümatüaxü̃ca̱x.

Norü taxre ga popera ga Pedru ümatüxü̃ 3:9

Rü ñuxre i duü̃xü̃gü rü nagu narüxĩnüe nax tórü Cori tama paxa yangu̱xẽẽãxü̃ i norü uneta. Natürü ngẽmaãcü nixĩ erü yáxna pemaxã naxĩnü. Rü nüma rü tama nanaxwa̱xe nax texé iyarütaxuxü̃, natürü nanaxwa̱xe nax guxãma nüxü̃ rüxoexü̃ i tümacüma i chixexü̃ rü nüxü̃́ tayaxõgüxü̃.