Nüxíraxü̃xü̃ ga popera ga Pedru ümatüxü̃ 3:8 - Tupanaarü Ore

⁸ Rü chanaxwa̱xe i guxãma i pemax rü wüxigu perüxĩnüe, rü pegüxü̃́ pengechaü̃tümüxü̃gü rü pegü pengechaü̃gü, ñoma pegüenexẽxü̃chixü̃ pengechaü̃xü̃rüxü̃. Rü chanaxwa̱xe i aixcüma pemecümagü rü pegü íperüxíxragü.

Nüxíraxü̃xü̃ ga popera ga Pedru ümatüxü̃ 3:8 Iomraidhean Croise

Wiyaegü 103:13

Rü nüma ya Cori rü tüxü̃ nangechaü̃ ya yíxema naga ĩnüexe ñoma wüxi i papa naxacügüxü̃ ngechaü̃xü̃rüxü̃.

Ucu̱xẽgüchiga 28:8

Yíxema togüna diẽru taxãxgu naxüétüãcüma nayauxtanüxẽ, nax ngẽmaãcü yexera tamuarü diẽruã́xü̃ca̱x, rü natüca̱xmamare nixĩ i ngẽma diẽru i tayaxuxü̃. Erü nüma ya Tupana rü ngẽma duü̃xü̃ i mexü̃gu rüxĩnüxü̃na tá ngĩxü̃ naxã, nax ngẽmamaxã nüxü̃ nangü̃xẽẽxü̃ca̱x i ngẽma duü̃xü̃gü i ngearü diẽruã̱xgüxü̃.

Ore i mexü̃ ga Matéu ümatüxü̃ 18:33

Rü cuma rü chita nüxü̃́ nüxü̃ cungechaü̃ i ngẽma cumücü i cuxü̃́ nangetanüxü̃, yexgumarüxü̃ ga choma rü cuxü̃́ nüxü̃ nax changechaü̃xü̃rüxü̃ ga yema choxü̃́ cungetanüxü̃”, ñanagürü nüxü̃.

Ore i mexü̃ ga Luca ümatüxü̃ 10:33

Natürü yixcüra rü wüxi ga Chamáriaanecüã̱x ga yatü rü yematama namawa naxüpetü. Rü yexguma gumá yatüxü̃ nada̱u̱xgu rü nüxü̃́ nangechaü̃tümüxü̃.

Ngechuchuarü ngúexü̃gü ga yamugüxü̃arü puracüchiga 2:1

Rü yexguma nawa nanguxgu ga yema Yudíugüarü peta ga Pẽntecostégu ãégaxü̃, rü yema ngunexü̃gu rü guxü̃ma ga yema yaxõgüxü̃ rü wüxi ga nachicagu nangutaque̱xegü.

Ngechuchuarü ngúexü̃gü ga yamugüxü̃arü puracüchiga 27:3

Rü moxü̃ãcü rü Chidóü̃arü türewa tangugü. Rü Paurumaxã namecüma ga capitáü̃ ga Yúriu rü ínanaxüexẽxẽ ga Pauru nax yémacüã̱x ga namücügüxü̃tagu naxũãneaxü̃ca̱x rü nüxü̃ nangü̃xẽẽgüxü̃ca̱x.

Ngechuchuarü ngúexü̃gü ga yamugüxü̃arü puracüchiga 28:7

Rü yema nachicaarü ngaicamana nayexma ga norü naane ga yema capaxũarü ãẽ̱xgacü ga Púbiru ga naéga. Rü nüma meama toxü̃ nayaxu, rü yexma toxü̃ napegüxẽxẽ ga tomaepü̱x ga ngunexü̃. Rü tomaxã namecümaxüchi.

Ngechuchuarü ngúexü̃gü ga yamugüxü̃arü puracüchiga 4:32

Rü namu ga yema yaxõgüxü̃. Rü guxü̃ma rü wüxigu narüxĩnüe. Rü taxuxü̃ma nagu narüxĩnü nax noxrüxicatama yixĩxü̃ ga norü yemaxü̃gü, natürü guxü̃ma ga ta̱xacü nüxü̃́ yexmaxü̃ rü guxãarü nixĩ.

Romanos 12:10

Rü name nixĩ i wüxichigü pegü pengechaü̃gü, ñoma pegüenexẽxü̃chixü̃ pengechaü̃xü̃rüxü̃. Rü name nixĩ i pegümaxã petaãẽxẽxẽ rü pegü perüngü̃xẽxẽ erü pegüenexẽ pixĩgü.

Romanos 15:5

Rü Tupana nixĩ ya tüxü̃ rüngü̃xẽẽcü nax yáxna namaxã ixĩnüexü̃ca̱x i guxü̃ma i guxchaxü̃gü. Rü nüma nixĩ i pexü̃ nataãẽxẽẽxü̃ rü pexü̃ rüngü̃xẽẽxü̃ nax wüxigu perüxĩnüexü̃ca̱x ngẽma Ngechuchu ya Cristu pexü̃́ naxwa̱xexü̃rüxü̃.

1 Corintios 1:10

Pa Chauenexẽgüx, tórü Cori ya Ngechuchu ya Cristuégagu pexü̃ chaca̱a̱xü̃ nax wüxigu perüxĩnüexü̃ca̱x. Rü tama name i pegü pitoyex. Rü name nixĩ i aixcüma pegü pengechaü̃gü nax wüxigutama perüxĩnüexü̃ca̱x.

1 Corintios 12:26

Rü ngẽxguma chi wüxi i ngẽma taxünearü üye nüxü̃́ ngu̱xgu, rü guxü̃ma i ngẽma togü i natanüxü̃ rü ta nüxü̃́ nangu̱x. Rü ngẽxguma chi wüxi i ngẽma taxünearü üye taãẽgu, rü guxü̃ma i ngẽma togü i natanüxü̃ rü ta nataãxẽgü.

Efesios 4:2

Rü tama name i pegü íperütagü. Rü name nixĩ i pemecümagü rü yáxna pegümaxã pexĩnüe rü pegü pengechaü̃gü.

Efesios 4:31

¡Rü nüxü̃ perüxoe nax nagu perüxĩnüexechaxü̃ ega texé ta̱xacürü chixexü̃ pexca̱x uxgux! Rü ngẽxgumarüxü̃ ta name nixĩ nax nüxü̃ perüxoexü̃ nax pegüchi pexaiexü̃, rü pegümaxã penuexü̃, rü pegü nax pengaexü̃, rü pegümaxã peguxchigagüxü̃. Rü ngẽmaãcü name nax nüxü̃ perüxoexü̃ i guxü̃ma i ngẽma chixexü̃ i dexagü.

Efesios 4:32

Rü name nixĩ i pegü perüngü̃xẽẽgü rü pegümaxã pemecümagü, rü pegüxü̃́ pengechaü̃tümüxü̃gü i wüxichigü. Rü ngẽxguma petanüwa texé ta̱xacürü chixexü̃ pexca̱x ü̱xgu, rü name i tüxü̃́ nüxü̃ perüngü̃ma ya wüxíechigü, yema Cristugagu Tupana pexü̃́ nüxü̃ rüngü̃maxü̃rüxü̃ ga perü pecadugü.

Filipenses 2:3

Rü tama name nax togüarü yexera pegü pixĩgüxẽẽxü̃ rü pegü picua̱xüü̃güxü̃. Rü narümemae nixĩ i wüxichigü nagu perüxĩnüe nax ngẽma togü rü perü yexera yixĩgüxü̃.

Filipenses 3:16

Rü ngẽma inaxwa̱xexü̃ nixĩ nax aixcüma nagu imaxẽxü̃ i ngẽma ore i marü nüxü̃ icuáxü̃.

Colosenses 3:12

Rü ñu̱xma ya Tupana rü pexü̃ nangechaü̃ i pema rü pexü̃ nidexechi nax noxrü pixĩgüxü̃ca̱x. Rü ngẽmaca̱x name nixĩ i nagu pexĩ i ngẽma mexü̃ i nacümagü, rü pexü̃́ nangechaü̃tümüü̃gü i duü̃xü̃gü, rü namaxã pemecümagü, rü taguma pegü picua̱xüü̃gü rü tama penuxwa̱xegü, rü yáxna pexĩnüe ega guxchaxü̃ pexca̱x ínguxgu.

Popera ga Yudíugü ga yaxõgüxü̃ca̱x ümatüxü̃ 13:1

Rü ñu̱xma rü name nax guxü̃guma pegü pengechaü̃güxü̃ ñoma peenexẽxü̃ pengechaü̃xü̃rüxü̃.

Popera ga Chantiágu ümatüxü̃ 2:13

Erü guxãma ya yíxema tama tümamücügü tüxü̃́ ngechaü̃tümüü̃güxe, rü Tupana rü taxũtáma nüxü̃́ tangechaü̃tümüü̃güãcüma tüxna naca i tümaarü maxü̃chiga. Natürü yíxema tümamücügü tüxü̃́ ngechaü̃tümüü̃güxe, rü taxũtáma tamuü̃e i ngẽxguma Tupana tüxna caxgux, erü nüxü̃́ tangechaü̃tümüü̃güãcüma tá tüxna naca.

Popera ga Chantiágu ümatüxü̃ 3:17

Natürü guxãma ya yíxema aixcüma tüxü̃́ nangẽxmagüxe i ngẽma cua̱x i Tupanawa ne ũxü̃, rü taxuxü̃ma i chixexü̃ taxü, rü tama tanuewa̱xe, rü timecüma, rü itarüxĩnüe i ucu̱xẽgü, rü tangechaxü̃tümüxü̃wa̱xegü, rü duü̃xü̃güétüwa tachogü, rü tixaixcümagü, rü mexü̃ taxügü.

Popera ga Chantiágu ümatüxü̃ 5:11

Yixema rü nüxü̃ tacua̱x nax nataãẽgüxü̃ ga yema duü̃xü̃gü ga mea Tupanaca̱x maxẽãmaxü̃ ga yexguma ngúxü̃ yangegügu. Rü pema nüxü̃ pecua̱x ga ñuxãcü yáxna namaxã naxĩnüxü̃ ga gumá Yox ga yexguma ngúxü̃ yangegügu. Rü nüxü̃ pecua̱x ga ñuxãcü yixcama tórü Cori ya Tupana nüxü̃ rüngü̃xẽẽxü̃. Erü nüma ya tórü Cori ya Tupana rü namecümaxüchi rü poraãcü nüxü̃́ tangechaü̃tümüü̃gü.

Nüxíraxü̃xü̃ ga popera ga Pedru ümatüxü̃ 1:22

Rü ñu̱xma nax naga pexĩnüexü̃ i Tupanaarü ore i aixcüma ixĩxü̃ rü pexü̃́ natauxcha nax pegü pengechaü̃güxü̃ erü Tupana rü marü pexü̃́ inayanaxoxẽxẽ i perü chixexü̃gü. Rü ngẽmaca̱x penaxwa̱xe i guxü̃ i perü ngúchaü̃maxã aixcüma pegü pengechaü̃gü.

Nüxíraxü̃xü̃ ga popera ga Pedru ümatüxü̃ 2:17

Rü name nixĩ i mea penayauxgü i guxü̃ma i duü̃xü̃gü. ¡Rü nüxü̃ pengechaxü̃ i taenexẽgü i yaxõgüxü̃! ¡Rü nüxü̃ pemuü̃e ya Tupana! ¡Rü naga pexĩnüe ya yimá ãẽ̱xgacü ya Rómawa ngẽxmacü!

Nüxíraxü̃xü̃ ga popera ga Pedru ümatüxü̃ 5:5

Rü ngẽxgumarüxü̃ ta i pemax, Pa Ngextü̱xücügüx, rü name nixĩ i naga pexĩnüe i ngẽma perü ãẽ̱xgacügü i Tupanaarü puracümaxã icua̱xgüxü̃. Rü guxãma i pema i yaxõgüxü̃, rü name nixĩ i wüxichigü mea pegüga pexĩnüe rü tama pegügu perüxĩnüe nax pemücügüarü yexera pixĩgüxü̃. Erü Tupanaarü ore i ümatüxü̃wa rü ñanagürü: “Tupana rü tama norü me nixĩ i ngẽma duü̃xü̃gü i nügü icua̱xüxü̃güxü̃. Natürü nüxü̃ narüngü̃xẽxẽ rü namaxã namecüma i ngẽma duü̃xü̃gü i tama nügü icua̱xüxü̃güxü̃”, ñanagürü i ngẽma ore.

Norü taxre ga popera ga Pedru ümatüxü̃ 1:7

Rü ngẽma nax Tupanaga pexĩnüexü̃étüwa penaxwa̱xe nax peenexẽgüxü̃ pengechaü̃güxü̃. Rü ngẽma nax peenexẽgüxü̃ pengechaü̃güxü̃étüwa penaxwa̱xe nax guxü̃ma i duü̃xü̃güxü̃ pengechaü̃güxü̃.

Nüxíraxü̃xü̃ ga popera ga Cuáü̃ ümatüxü̃ 3:14

Yixema rü marü nüxna ítanguxü̃ i ngẽma yu, rü ñu̱xma rü marü maxü̃wa tangexmagü. Nüxü̃ tacua̱x i ngẽma erü nüxü̃ tangechaü̃gü i taenexẽgü. Yíxema tama tümaenexẽxü̃ ngechaü̃xe rü yuxme̱xwa tangexma.