Nüxíraxü̃xü̃ ga popera ga Pedru ümatüxü̃ 1:5 - Tupanaarü Ore

⁵ Rü ñu̱xma nax Tupanaaxü̃́ peyaxõgüxü̃, rü nüma rü norü poramaxã tá pexna nadau ñu̱xmatáta penayauxgü i ngẽma maxü̃ i taguma gúxü̃ i tá pexna naxãxü̃ i ngẽxguma nagu̱xgu i naane.

Nüxíraxü̃xü̃ ga popera ga Pedru ümatüxü̃ 1:5 Iomraidhean Croise

Yox 19:25

Rü choma rü nüxü̃ chacua̱x rü yimá choxü̃ ípoxü̃cü rü namaxü̃. Rü nüma tá nixĩ i chauétüwa nachogüxü̃ i ñoma i naanewa.

Wiyaegü 37:28

Erü nüma ya Cori ya Tupana rü nüxü̃ nangechaü̃ i ngẽma maxü̃ i we̱xguxü̃, rü taguma tüxü̃ ínawogü ya yíxema aixcüma nawe rüxĩxe. Rü guxü̃gutáma tüxna nadau. Natürü ngẽma chixexü̃gu maxẽxü̃, rü Tupana tá inayanaxoxẽxẽ i nanegü rü nataagü.

Ucu̱xẽgüchiga 2:8

Rü tüxna nadau ya yíxema mexü̃ i nacümagu ĩxẽ, rü tüxü̃ ínapoxü̃ ya yíxema aixcüma naga ĩnüexe.

Ichaía 45:17

Natürü i Iraétanüxü̃ rü Tupana ínananguxü̃xẽxẽ nax tagutáma togüme̱xẽwa nangẽxmagüxü̃ca̱x. Rü tagutáma naxãnee rü tagutáma narümaachitanü —ñanagürü.

Ichaía 51:6

¡Rü dücax, rü dauxü̃gu perüdaunü rü ñoma i naanegu perüdaunü! Erü guxü̃ma i ngẽma dauxü̃wa nüxü̃ pedauxü̃ rü ñoma caxixü̃rüxü̃ tá inarütaxu rü ñoma i naane rü wüxi i naxchiru i ngauxü̃rüxü̃ tá nagu̱x. Rü ngẽma duü̃xü̃gü i nawa maxẽxü̃ rü ñoma murenü yuexü̃rüxü̃ tá nayue. Natürü ngẽma maxü̃ i chorü duü̃xü̃güna chaxãxü̃ rü taguma nagu̱x. Rü ngẽma chorü ngü̃xẽxẽ rü guxü̃gutáma nangẽxmaecha.

Ichaía 54:17

Natürü taxúema tá tanaxü i wüxi i naxne i pexü̃ rüxoxẽẽxü̃. Rü pemax, Pa Iraétanüxü̃x, rü tá peyanangea̱xgüxẽxẽ i guxü̃ma i ngẽma pemaxã guxchaca̱x daugüxü̃, erü choma i Cori ya Tupana rü aixcüma nüxü̃ charüngü̃xẽxẽxü̃ i ngẽma chorü duü̃xü̃gü ixĩxü̃. Rü pemaxã chanaxuegu nax ngẽmaãcü tá yixĩxü̃ —ñanagürü ga Tupana.

Ichaía 66:22

Rü ñanagürü ta: —Ngẽma petaagü rü ngẽma peéga rü guxü̃gutáma nangẽxmagüecha naxrüxü̃ i ngẽma ngexwaca̱xü̃xü̃ i daxuguxü̃ i naane rü ngexwaca̱xü̃xü̃ i ñoma i naane i tá chaxüxü̃.

Yeremía 23:4

Rü natanügu tá chanamugü i ãẽ̱xgacügü i aixcüma mea nüxna dauxü̃ nax ngẽmaãcü taxuca̱xma namuü̃exü̃ca̱x, rü taxuxü̃ma iyarütaxuxü̃ca̱x. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.

Yeremía 32:40

Rü namaxã tá chanaxü i wüxi i uneta i guxü̃guca̱x ixĩxü̃ rü tagutáma nüxü̃ charüchau nax mexü̃ naxca̱x chaxüxü̃. Rü tá nüxna chanaxã i wüxi i ngúchaü̃ nax choxü̃ yacua̱xüü̃güxü̃ca̱x rü taguma choxna yaxĩgachixü̃ca̱x.

Ore i mexü̃ ga Cuáü̃ ümatüxü̃ 12:48

Yíxema tama choxü̃́ yaxṍxe rü tama chauga ĩnüxe rü marü tüxü̃́ nangẽxma nax ta̱xacüca̱x tapoxcuxü̃. Erü ngẽma ore i nüxü̃ chixuxü̃gagu tátama nixĩ i tapoxcuxü̃ i naanearü gu̱xgu, erü tama tayaxõ i ngẽma ore i nüxü̃ chixuxü̃.

Ore i mexü̃ ga Cuáü̃ ümatüxü̃ 17:15

Tama cuxna naxca̱x chaca nax cuyagagüxü̃ca̱x i ñoma i naanewa. Natürü cuxna chaca nax ícunapoxü̃xü̃ca̱x nüxna i ngo̱xo i Chataná.

Ore i mexü̃ ga Cuáü̃ ümatüxü̃ 4:14

Natürü texé ya yíxema choma tá tüxna chaxãxü̃ i dexáwa axexe, rü tagutáma wena tita̱xawa. Erü ngẽma dexá i choma tá tüxna chaxãxü̃ rü wüxi ya puchu ya guxü̃guma ibaibecürüxü̃ tá nixĩ i tümawa, erü ngẽma dexáwa nangẽxma i maxü̃ i taguma gúxü̃ —ñanagürü.

Ore i mexü̃ ga Cuáü̃ ümatüxü̃ 5:24

Aixcüma pemaxã nüxü̃ chixu rü yíxema texé ya choxü̃́ irüxĩnüxe i chorü ore, rü nüxü̃́ yaxṍxe ya yimá Chaunatü ya núma choxü̃ mucü, rü tüxü̃́ nangẽxma i maxü̃ i taguma gúxü̃. Rü Chaunatü rü taxũtáma tümamaxã nanaxuegu nax tapoxcuxü̃, erü marü nüxna ítanguxuchi nax tayuxü̃, rü tüxü̃́ nangẽxma i maxü̃ i taguma gúxü̃.

Romanos 11:20

Ngẽmáacü aixcüma nixĩ ga Tupana nüxü̃ oxü̃ ga yema Yudíugü yerü tama nayaxõgü. Rü ngẽma nax peyaxõgüxü̃ca̱xicatama nixĩ i nachicüü Tupana pexü̃ dexü̃ i ñu̱xmax. Rü ngẽmaca̱x tama name i pegü picua̱xüü̃gü. ¡Rü Tupanaxü̃ pemuü̃e nax tama yema Yudíugüxü̃ üpetüxü̃rüxü̃ pexü̃ üpetüxü̃ca̱x!

Romanos 8:18

Rü choma nagu charüxĩnü rü ngẽma ngúxü̃ i ñu̱xma ñoma i naanewa ingegüxü̃, rü taxuxü̃ma nixĩ i ngẽxguma nagu nanguxgu i ngẽma mexü̃ i yixcüra tá nüxü̃ idauxü̃ i ngẽxguma Cristumaxã ingẽxmagügu i daxũguxü̃ i naanewa.

1 Corintios 1:21

Natürü nüma ya Tupana ya guxü̃xü̃ma cuácü, rü tama nanaxwa̱xe nax ñoma i naanecüã̱x i duü̃xü̃güarü cua̱xgagu nax yixĩxü̃ i naxü̃tawa nangugüxü̃ i nümagü. Natürü nanaxwa̱xe nax ngẽma norü ore i mexü̃gagu nax yixĩxü̃ inamaxẽxẽẽãxü̃ i ngẽma duü̃xü̃gü i yaxõgüxü̃ woo ngẽma togü i duü̃xü̃güca̱x rü natüca̱xmamare yixĩxgu i ngẽma ore.

2 Corintios 1:24

Rü toma rü tama pexü̃ taxucu̱xegüecha nax Tupanaaxü̃́ peyaxõgüxü̃, erü pema rü marü meama peyaxõgü. Natürü ngẽma tanaxwa̱xexü̃ nixĩ nax pexü̃ tarüngü̃xẽẽgüxü̃ nax yexeraãcü peporaexü̃ca̱x i perü õwa.

Gálatas 2:20

Rü choma rü wüxigu Cristumaxã curuchawa chipota. Rü ñu̱xma rü marü tama chaugümaxãtama ichacua̱x, natürü Cristu nixĩ ya chomaxã icuácü erü chowa namaxü̃. Rü ñu̱xma rü Tupana Nane ya Cristuaxü̃́ chayaxõõcüma nixĩ i chamaxü̃xü̃. Rü nüma nixĩ ga choxü̃ nangechaü̃xü̃, rü nügü inaxãxü̃ nax cha̱u̱xca̱x nayuxü̃ca̱x.

Efesios 2:8

Rü Tupanaarü ngechaü̃gagu penayaxu i maxü̃ i taguma gúxü̃ yerü peyaxõgü. Rü ngẽma maxü̃ rü tama pegünatama penaxã, natürü Tupana nixĩ ga pexna naxãmarecü ga yema.

Efesios 3:17

Rü ngẽxgumarüxü̃ ta nüxna naxca̱x chaca nax perü õgagu pewa namaxü̃xü̃ca̱x ya Cristu. Rü nüxna chaca nax ngẽma Tupanaarü ngechaü̃ i pewa ngẽxmaxü̃ca̱x rü pema rü wüxigu guxü̃ma i yaxõgüxü̃maxã nüxü̃ pecuáxü̃ nax ñuxãcü nataxüchixü̃ i norü ngechaü̃ i namaxã tüxü̃ nangechaü̃xü̃ ya Cristu.

Filipenses 1:6

Rü Tupana rü marü inanaxügü i wüxi i mexü̃ i puracü i perü maxü̃wa. Rü nüxü̃ chacua̱x rü nüma rü guxü̃gutáma nanaxüecha i ngẽma puracü ñu̱xmatáta yanguxẽẽã i ngẽxguma ínanguxgu ya Ngechuchu ya Cristu.

Filipenses 4:7

Rü ngẽmaãcü nüma ya Tupana rü tá pexna nanaxã i norü taãxẽ i guxü̃ma i taãxẽ i nüxü̃ icuáxü̃arü yexera mexẽchixü̃. Rü ñu̱xma nax Ngechuchu ya Cristuarü duü̃xü̃gü pixĩgüxü̃, rü ngẽma taãxẽ ya Tupana pexna ãxü̃ rü tá ínanapoxü̃ i perü maxü̃negü rü perü ĩnügü nüxna i ngẽma chixexü̃.

Norü taxre ga popera ga Timutéuca̱x naxümatüxü̃ ga Pauru 3:15

¡Rü nüxna nacua̱xãchi rü cubuxgumamatama nüxü̃ cucua̱x i Tupanaarü ore i üünexü̃! Rü ngẽma orewa nüxü̃ cucua̱x rü ngẽxguma Ngechuchu ya Cristuaxü̃́ yaxõgügu nixĩ i tüxü̃́ nangẽxmaxü̃ i maxü̃ i taguma gúxü̃.

Popera ga Títoca̱x naxümatüxü̃ ga Pauru 2:13

Rü name nax ngẽmaãcü mea imaẽxü̃ ñu̱xma nax ínangu̱xẽẽgüxü̃ nax nataeguxü̃ ya Ngechuchu ya Cristu ya tórü Maxẽxẽxẽruxü̃ ya tórü Tupana ya tacü ixĩcü.

Popera ga Yudíugü ga yaxõgüxü̃ca̱x ümatüxü̃ 6:12

Rü tama tanaxwa̱xe nax nüxü̃ perüxoetanücüüxü̃ nax Cristuwe perüxĩxü̃. Natürü name i naxrüxü̃ pixĩgü i ngẽma duü̃xü̃gü i guxü̃guma mea yaxõgüãcüma Cristuwe rüxĩãmaxü̃ rü nayauxgüxü̃ i guxü̃ma i ngẽma mexü̃gü ga Tupana namaxã ixunetaxü̃.

Nüxíraxü̃xü̃ ga popera ga Pedru ümatüxü̃ 1:13

Rü ñu̱xma nax Cristuarü duü̃xü̃gü pixĩgüxü̃, rü penaxwa̱xe nax pexuãẽgüxü̃ rü ípememarexü̃ nax penaxüxü̃ i norü ngúchaü̃. Rü name nixĩ i aixcüma ípenangu̱xẽxẽ i guxü̃ma i ngẽma mexü̃gü ya Tupana tá pexna ãxü̃ i ngẽxguma Ngechuchu ya Cristu núma ũxgu.

Nüxíraxü̃xü̃ ga popera ga Pedru ümatüxü̃ 4:13

Natürü narümemae nixĩ nax petaãẽgüxü̃, yerü yema Cristu ngúxü̃ nax ingexü̃rüxü̃ nixĩ i ngúxü̃ nax pingegüxü̃ i ñu̱xmax nax ngẽmaãcü petaãẽgüxü̃ca̱x i ngẽxguma wena núma naxũxgu i nümax.

Nüxíraxü̃xü̃ ga popera ga Pedru ümatüxü̃ 5:1

Rü ñu̱xmax, Pa Yaxõgüxü̃arü Ãẽ̱xgacügüx, rü pemaxã nüxü̃ chixu i wüxi i ucu̱xẽ i mexü̃, erü choma rü ta pexrüxü̃ yaxõgüxü̃arü ãẽ̱xgacü chixĩ. Rü chomaxü̃chima nixĩ ga nüxü̃ chadauxü̃ ga ngúxü̃ nax yangexü̃ ga Cristu. Rü choma rü tá ta pexrüxü̃ choxü̃́ nangẽxma i chauchica i mexü̃ i ngẽxguma wena núma naxũxgu.

Norü taxre ga popera ga Pedru ümatüxü̃ 1:3

Rü yexguma Tupana noxrütama poramaxã tüxü̃ nüxü̃ nacua̱xẽẽgu ga gumá tórü Cori ya mexẽchicü ga norü üünemaxã tüxü̃ decü, rü nüma ya Tupana rü marü tüxna nanaxã ga guxü̃ma i nacüma i mexü̃ i inaxwa̱xexü̃ nax mea naxca̱x imaxẽxü̃ca̱x.

Nüxíraxü̃xü̃ ga popera ga Cuáü̃ ümatüxü̃ 3:2

Pa Chauenexẽgü ya Pexü̃ Changechaü̃güxe, ñu̱xma rü marü Tupanaxacügü tixĩgü. Rü woo tama tüxü̃ nüxü̃ nacua̱xẽxẽ nax ñuxãcü tá ixĩgüxü̃ i yixcüra, natürü nüxü̃ tacua̱x nax Ngechuchurüxü̃ tá ixĩgüxü̃ i ngẽxguma nüma nango̱xgu, erü tá nüxü̃ tadau nax nañuxraü̃xü̃ i nüma.

Popera ga Yúda ümatüxü̃ 1:1

Choma i Yúda i Chantiáguenexẽ ya Ngechuchu ya Cristuarü puracütanüxü̃ chixĩ i pexü̃ charümoxẽxü̃ i pema nax Tanatü ya Tupana pexü̃ dexü̃ rü pexü̃ ngechaü̃xü̃ rü Ngechuchu ya Cristu pexna dauxü̃.

Popera ga Yúda ümatüxü̃ 1:24

Rü yimá nüxicatama Tupana ixĩcü ya tórü Maxẽxẽẽruxü̃ ixĩcü, rü nüxü̃́ nangẽxma i pora nax pexna nadauxü̃ nax tama pecadugu peyixü̃ca̱x. Rü nüxü̃́ nangẽxma i pora nax iyanaxoxẽẽãxü̃ca̱x i perü chixexü̃gü nax ngẽmaãcü ngearü pecaduãcüma rü taãẽãcüma nape̱xewa pengugüxü̃ca̱x i ngextá nüma ínaxüünexü̃wa ãẽ̱xgacü íyixĩxü̃wa. Rü tanaxwa̱xe i tórü Cori ya Ngechuchu ya Cristuégagu Tupanaxü̃ ticua̱xüü̃gü, erü nüma rü naxüüne, rü guxü̃étüwa nangẽxma, rü guxü̃arü yexera napora, rü guxü̃maxã inacua̱x. Rü yemaacü nixĩ ga nũxcüma, rü ngẽmaãcü nixĩ i ñu̱xmax, rü guxü̃gutáma ngẽmaãcü nixĩ. Rü ngẽmaãcü yixĩ.

1 Chamué 2:9

Tupana rü tüxna nadau ya yíxema naga ĩnüexe natürü ngẽma tama naga ĩnüexü̃ rü ẽanexü̃gu nayue. Erü taxúema nüxü̃ tacua̱x nax tümaarü poramaxãtama tügü tamaxẽẽxü̃.