Mateo 4:3 - Tagbanwa

³ Unupat miyabut nay manigpakursud nga si Satanas. Maat ya, “It Anak ka it Ampuꞌang Diyus, mampang ka lamang ka pabaraꞌen mu nga pangaꞌen i mga batu ngaytu.”

Mateo 4:3 Iomraidhean Croise

Exodo 16:3

Magꞌaat siꞌ nira, “Magayen paꞌ talaga in inimatay kami na lamang it AMPUꞌANG DIYUS duꞌun it Egipto. Ka duꞌun, pagsekdan namen i pagsedaꞌ baw maski unu nga pangaꞌen. Takaꞌ in situt itung rugar nga tiyabanan mi it amen, baraꞌan ya kaytu pamuyangten kami nang muꞌsa!”

Mateo 14:33

Siyamba si Jesus it muꞌsa ngayting magsasakay baw maat nira, “Kamatuudan nga Anak ka talaga it Ampuꞌang Diyus.”

Mateo 16:16

Katubag si Simon Pedro, maat ya, “Anak ka talaga it Ampuꞌang Diyus nga egen it egay kaskedan. Ikaw talagay isiyanggup ya nga Cristo.”

Mateo 26:63

Temed egay tetet ni Jesus. Inaat kanya it Piyakamataꞌas nga Sasirduti ngayti, “Kayti pasumpaen ku ikaw nga pagdedngegen ka it Ampuꞌang Diyus nga egen it egay kaskedan, ka isugid mut amen in ikaw na talaga i isiyanggup nga Cristo nga Anak it Ampuꞌang Diyus!”

Mateo 3:17

Dengan it may ampang nga duꞌut langit i garing, nga magꞌaat, “Itu i pagmaꞌa-maꞌalen ku nga Anak nga talagang kasasagyaan ku.”

Marcos 1:1

Itu, magsugid tu it Magayen nga Baritaꞌ pasar it ki Jesu-Cristo, nga kanya i Anak it Ampuꞌang Diyus.

Marcos 3:11

Kada pagpapulpugun it maraꞌe-raꞌet nga makalteg it kanya, mamagkeleb duꞌun it sarungaan ya. Pagpagaꞌuyun sirat mga maraꞌe-raꞌet ngayti, nga magꞌaat, “Ikaw i Anak it Ampuꞌang Diyus!”

Marcos 5:7

Ipiyaggaꞌuy ya na, nga magꞌaat, “Jesus, nga Anak it Ampuꞌang Diyus nga Subrang Piyakamataꞌas, unuy lalabeten mut aken? Sumumpa ka it pagdedngegen it Ampuꞌang Diyus nga ega pakuriꞌan mu aku!”

Lucas 1:35

Katubag i anghil ngayti, “Talagang matuud i inaat mu. Temed kat tabang it Espiritu Santo magbaraꞌ tu. Aypaꞌ ka dumarugmatiꞌ ka sabap it guna it Ampuꞌang Diyus nga Subrang Piyakamataꞌas. Aypaꞌ ka ipanganak mu ngayan, alaid nga alaid kat kasalaꞌan ka Anak kanya it Ampuꞌang Diyus.

Lucas 22:70

“Ta in atkayan palan, ireg mung sugiden, Anak ka it Ampuꞌang Diyus!” maat i muꞌsa ngayti nga nagtingped. “Eeꞌ, matuud bay inaat mi ngayan,” maat siꞌ ni Jesus.

Lucas 4:3

Aypaꞌ ka inaat kanya ni Satanas, nga magꞌaat, “It Anak ka it Ampuꞌang Diyus, mampang ka lamang ka pabaraꞌen mu nga pangaꞌen i batu ngaytu.”

Lucas 4:41

Dakel gasiꞌ i mga taw nga piyaꞌimugawan it maraꞌe-raꞌet. Magliꞌwan sira, magpanggaꞌmaran nga magꞌaat, “Ikaw i Anak it Ampuꞌang Diyus!” Temed siyuraraw sira ni Jesus. Ega piyataꞌnan ya nga makaꞌampang i mga maraꞌe-raꞌet ngayti sabap urut na nira nga kanyay isiyanggup nga Cristo.

Lucas 4:9

Beken nga binwat ni Satanas it ki Jesus ngayti, tiyaban ya duꞌun it siyudad it Jerusalem. Piyatindeg ya duꞌun it piyakaꞌabwatay nga bagiꞌ it Templo, bawnga inaat kanya, “In talagang matuud nga Anak ka it Ampuꞌang Diyus, manugpa ka.

Juan 1:34

Naltegan ku nga talaga, aypaꞌ ipagpamatuud ku nga kanyay Anak it Ampuꞌang Diyus.”

Juan 1:49

“Aa bilaꞌ,” maat siꞌ ni Natanael, “Manigtulduꞌ, in atkayan palan, matuud nga ikaw i Anak it Ampuꞌang Diyus! Ikaw talagay Adiꞌ it bangsa nga Israel!”

Juan 20:31

Temed iyan mga magsusurat situ, isiyurat tu ka isaꞌun mamayaꞌ kamu nga si Jesus na ngaytu i isiyanggup nga Manriribri baw kanyay Anak it Ampuꞌang Diyus. Baw kat pamayaꞌ baw pakilagpit mit kanya, siguradu nga maꞌimyu i kaꞌgenan nga egay kaskedan.

Juan 9:35

Nabaritaꞌan ni Jesus nga taw ngayting beleg nga piyagayen ya, inimugaw nat mga Pariseo. Pagkaparag ni Jesus it kanya, iningkut ya nga magꞌaat, “Unu, magpamayaꞌ ka it kanya nga Taga Langit nga Ipiyanganak it Taw?”

Mga Binwat 9:20

Buwat ya, nagpapuꞌun nga lagi it mangadal duꞌun it mga papagsambaan it mga Judio pasar it ki Jesus, nga kanya talagay Anak it Ampuꞌang Diyus.

2 Corinto 1:19

Ka iyan si Jesu-Cristo ngaytu nga Anak it Ampuꞌang Diyus, nga ipiyangadal namen nga tulu asat imyu, aku, si Silvano baw si Timoteo, ega maat “eeꞌ” kayti bawnga dedelem “ega” siꞌ. In daꞌga talagang kamatuudan i kanya.

Galacia 2:20

Ta kayti, maski egen aku paꞌ ngaytu, pagkilalaen ku nga subung it ega na akuy egen in daꞌga si Cristo na i egen kat bilug ku. Ka ega na aken nga kaꞌirgan i pagsunudun ku, in daꞌga kaꞌirgan ya na. Aypaꞌ mintras situ aku pat banwa, magpangaꞌgenan aku kat keseg it pamayaꞌ baw pagsarig ku it kanya nga Anak it Ampuꞌang Diyus, kanya nga nagpagtas it ginawa ya kat kadakulat raras ya it aken.

1 Tesalonica 3:5

Aypaꞌ ka, iyan daꞌku na magkabaraꞌan, piyapanaw ku si Timoteo nga paꞌasan it imyu, isaꞌun masiguru ku nga banar in maꞌunu nay pamayaꞌ mi kayti. Abaa, magregen aku baꞌ ka barang narayak kamu nat manigpaneꞌag-teꞌag nga si Satanas. Ka in beteꞌ atkayan na, daꞌga limiꞌwan nga salaud nay paꞌres namen ngayan asat imyu?

Hebreo 12:16

Magꞌintur kamu gasiꞌ nga egay asat imyu nga mapiyamakun kat ega asawa ya. Baw sana egay maski siyu it imyu nga ega magꞌintindi it mga bagay nga ega basta-basta kat panleteg it Ampuꞌang Diyus, subung it ki Esau nga, pudir ya kat pagkapanganay, itiyukar yat sang pinggan lamang i pangaꞌen.

Hebreo 4:14

Iyan talaga i magayen, subrang ipapaꞌgen tami i pagpakimatuud baw pamayaꞌ tami it ki Jesus. Ka kanya i Anak it Ampuꞌang Diyus baw nagbaraꞌ kanya nga Ega Basta-bastang Piyakamataꞌas nga Sasirduti tami duꞌut langit, nga magpanindeg nga pirmi it aten duꞌun it adapan it Ampuꞌang Diyus.

Hebreo 7:3

Egay magkasangpit nga pasar it inaꞌ baw amaꞌ ni Melquisedec ngaytu u kaduguꞌan nga piyanggaring-garingan ya. Ega gasiꞌ nakasurat i pasar it pagpanganak it kanya u kamataynen ya. Kabilangan ya, subung it Anak it Ampuꞌang Diyus ka subuk egay katupusan it pagkasasirduti ya.

1 Juan 3:8

Temed iyan nga magbuwat pat kasalaꞌan, ki Satanas payan, sabap garing paꞌ it tagnaꞌ magsisigi nang magkasalaꞌan si Satanas ngaytu. Aypaꞌ ka piyalampud situt aten i Anak it Ampuꞌang Diyus, isaꞌun ranggaꞌen yay buwat ni Satanas ngaytu.

Mga Ipiyalteg 2:10

Ega na iꞌlaman mi i mga pakuriꞌ nga magꞌadeꞌdeng na nga labayen mi. Eeꞌ baꞌ, kat buwat-buwat ni Satanas may mapirisu yan it imyu ka pagsukda-sukdanan i pamayaꞌ mi. Kaꞌilangan sagkaꞌen mi i pakuriꞌ ngaytu seledan it sang pulung aldaw. Teꞌteꞌan mi lamang aku maski maat ikagtas nat ginawa mi, ka siguradu yan nga ibgay kut imyu i tumbas nga kaꞌgenan nga egay kaskedan.