Mateo 3:2 - Tagbanwa

² Ipagsugid yat mga taw, nga magꞌaat, “Singuliꞌan baw indiꞌan mi na i mga kasalaꞌan mi, sabap adeꞌdeng nay kaꞌadiꞌan it Ampuꞌang Diyus.”

Mateo 3:2 Iomraidhean Croise

Ezekiel 33:11

Aypaꞌ isugid mu talaga duꞌun it mga Israelita ngaytu nga ituy ipagsugid it AMPUꞌANG DIYUS nga egay kasbung. ‘In magꞌuꞌunu ipagpamatuud ku nga egen aku, ipagpamatuud ku gasiꞌ nga ega talaga magkasagyaan ku i magpatay nga makasalaꞌan. Iyan talagay magkasagyaan ku, in indiꞌan ya nay kasalaꞌan ya isaꞌun ega na matay. Bangsa nga Israel, pedkanan mi na i mga karaꞌe-raꞌetan nga pamagbuwaten mi. Eeꞌ baꞌ, pedkanan mi na talaga. Unuka magpangeget kamu na?!’”

Daniel 2:44

Kat timpu it mga adiꞌ it ikaꞌpat ngaytu nga kaꞌadiꞌan, iyan Ampuꞌang Diyus nga duꞌut langit nga magbebegbeg it muꞌsa, patindeg kanyat kaꞌadiꞌan nga egay karanggaꞌan ya seked it kaꞌnu-kaꞌnu, baw egay maski siyu nga makasakep kaytu. Baw mabut nga ranggaꞌen yay beken ngaytu nga mga kaꞌadiꞌan, temed ega talagay kaꞌawaꞌan it itu ngaytung kaꞌadiꞌan nga ipatindeg it Ampuꞌang Diyus.

Mateo 10:7

Mapanaw kamu ka ipangadal mi i adeꞌdeng na ngaytu nga kaꞌadiꞌan it Ampuꞌang Diyus.

Mateo 11:20

Bawnga biyasul ni Jesus i mga taw duꞌun it mga lansangan nga binwatan yat dakel nga kalililuꞌang mga bagay. Biyasul ya sabap daꞌsira nagsinguliꞌ baw nangindiꞌ it mga kasalaꞌan nira.

Mateo 12:41

Aypaꞌ in asan nat aldaw it pangukuman, basulun kamu baw mga kaꞌibaan mi it mga taga Ninive, sabap kanira, nagsinguliꞌ, langkuy inindiꞌan niray kasalaꞌan pagkagneg nirat pangadal ni Jonas. Temed ta, kayti may situ nat imyu nga subraꞌ paꞌ nga mabantug it ki Jonas ngayti, temed daꞌkamu magsinguliꞌ.

Mateo 13:11

Katubag si Jesus, maat ya, “Talagang ipiyagꞌildaw it imyu nga maꞌrutan mi i patagu-taguꞌ nga kaꞌulugan it ipagpanulduꞌ ku pasar it kaꞌadiꞌan it Ampuꞌang Diyus. Temed sira, ega ipiyagꞌildaw ya it kanira.

Mateo 13:24

May esa siꞌ nga alimbawa nga inampang ni Jesus, nga magꞌaat, “Iyan kaꞌadiꞌan it Ampuꞌang Diyus, subung it itu ngaytu. May esang taw nga magayen nga biꞌni it tirigu i itiyugdaꞌ ya duꞌun it uma ya.

Mateo 13:31

Esa siꞌ nga alimbawa i itiyulduꞌ ni Jesus it kanira, nga magꞌaat, “Iyan kaꞌadiꞌan it Ampuꞌang Diyus,” maat ya, “subung it itu ngaytu. May esang taw nga liminwak it alit it mustasaꞌ duꞌun it uma ya.

Mateo 13:33

May beken paꞌ nga alimbawa ni Jesus, nga magꞌaat, “Iyan kaꞌadiꞌan it Ampuꞌang Diyus, subung it ipagpaꞌalsa nga iriyagiꞌ it esang babay duꞌun it dakulang arina, isaꞌun magꞌalsa it magayen i sang iꞌilutuꞌan ngayti.”

Mateo 13:47

“Ta,” maat siꞌ ni Jesus, “subung gasit lambat i kaꞌadiꞌan it Ampuꞌang Diyus. Iyan iꞌinlug duꞌun it dagat, kalasi-kalasi i sedaꞌ nga siminled.

Mateo 13:52

“Ta,” maat siꞌ ni Jesus it kanira, “iyan manigpaꞌyag it ampang it Ampuꞌang Diyus nga nakapagꞌadal nat mga kamatuudan ngaytu sabap it kaꞌadiꞌan it Ampuꞌang Diyus, subung kanya it tagpuꞌun it pamalay-balay nga magpangrut-magpangrut it mga kusas ya nga baꞌgu baw lagi-lagi duꞌun it pagdawaꞌan ya. Sabap magkaꞌrut kanya mangadal it ega lamang tagnaꞌ ngayting panulduꞌ in daꞌga pati baꞌgu ngaytu.”

Mateo 18:23

Sabap kaꞌadiꞌan it Ampuꞌang Diyus, subung it itu ngaytu. Napikir it esang adiꞌ nga pabayaden i kumpur may utang duꞌut kanya nga mga manigsirbi ya.

Mateo 20:1

May piyaꞌalimbawaan siꞌ ni Jesus, nga magꞌaat, “Iyan kaꞌadiꞌan it Ampuꞌang Diyus, subung it itu ngaytu. Madlem paꞌ, nagbangun nay tagpuꞌun it esang kalulwakan nga ubas ka tumulus it murnal.

Mateo 22:2

“Iyan kaꞌadiꞌan it Ampuꞌang Diyus, subung it itu ngaytu. Dakulang pagkaraꞌnen i binwat it esang adiꞌ, pagsadu it anak ya nga lalaki.

Mateo 23:13

Talagang subrang makuriꞌ i magꞌaꞌareg it imyu, mga manigpaꞌyag it urdin baw mga Pariseo, mga magbete-beteꞌ nga magpamayaꞌ it Ampuꞌang Diyus. Ka sabap it imyu magkabaeran i katataawan it pasakep it kaꞌadiꞌan it Ampuꞌang Diyus. It daꞌkamu nay imyu magꞌireg pasakep it kaꞌadiꞌan ya ngayti, pagpaaren mi paꞌ i magꞌireg pasakep.

Mateo 25:1

Magꞌaat pay beken nga ipiyanulduꞌ ni Jesus, “Kaꞌalimbawaan it kaꞌadiꞌan it Ampuꞌang Diyus, subung it itu ngaytu. May sang puluꞌ nga umbay paꞌ nga mga babay. Kaꞌsang apu-apun, uyun it adat ta, napanaw sira ka sumusmu it lalaki nga papagsaduun na. Kada esat kanira, may taban nga titidawan.

Mateo 25:14

Maat siꞌ ni Jesus, “Kaꞌalimbawaan gasiꞌ it kaꞌadiꞌan it Ampuꞌang Diyus, subung it itu ngaytu. May esang taw nga magpana-panaw it alaid. Egay beken, tiyaꞌwagan ya i mga uripen ya ka isiyanaꞌ it kanira i muꞌsang kusas ya.

Mateo 4:17

Gimnaring it iti nga timpu, nagpapuꞌun na si Jesus it manulduꞌ. Kat panulduꞌ ya, ipagꞌaat ya nga, “Siminguliꞌ kamu na it kasalaꞌan mi baw indiꞌan mi na, ka adeꞌdeng nay kaꞌadiꞌan it Ampuꞌang Diyus.”

Mateo 4:23

Ta, it magpangadal na ngayti si Jesus, liyekep-lekep yay rugar it Galilea ngayti. Magpanulduꞌ kanya duꞌut mga papagsambaan, nga ipagpanulduꞌ ya i Magayen nga Baritaꞌ sabap it kaꞌadiꞌan it Ampuꞌang Diyus. Pagpagayenen ya gasiꞌ i mga taw kat in unu nga sarut nira.

Mateo 5:10

Magkasagya i mga pagpakuriꞌan sabap it kanira nga pagsunud it kaꞌirgan it Ampuꞌang Diyus, sabap talagang kaꞌuyut sira duꞌun it kanyang kaꞌadiꞌan.

Mateo 5:3

“Magkasagya i mga taw nga, ipagpabetang nira nga talagang egay sadiling kakayaan nga masarigan, in daꞌga Ampuꞌang Diyus lamang, sabap kaꞌuyut sira duꞌun it kanyang kaꞌadiꞌan.

Mateo 6:10

Pagꞌangutun namen nga madaliꞌ na mabut i pagꞌadiꞌan mu nay muꞌsang katataawan, baw pagsunudun nay kaꞌirgan mu situt sinirungat langit nga subung it pagsunud asan it langit.

Mateo 6:33

Aypaꞌ ipadaꞌeg mi nga pirmi kat nakem mi i kamatuudang pagpasakep mi it Ampuꞌang Diyus baw eꞌres nga pagsunud mi it pangaꞌgenang mataldeng nga ipiyagꞌurdin ya. Bawnga iꞌildaw yat imyu i mga bagay ngaytu nga pagkaꞌilanganen mi.

Marcos 1:15

Ipagpangadal ya nga magꞌaat, “Naꞌbut nay ipiyabetang-betang nga timpu. Adeꞌdeng nay kaꞌadiꞌan it Ampuꞌang Diyus. Singuliꞌan mi nay mga kasalaꞌan mi baw indiꞌan mi na. Pamayaꞌnen mi i Magayen ngaytung Baritaꞌ.”

Marcos 1:4

Natuman tu iyan nanluꞌsut na si Juan. Namawtis na kanya duꞌun it rugar nga kapupuyangtan baw nangadal, nga magꞌaat, “Singuliꞌan baw indiꞌan mi na i mga kasalaꞌan mi baw pabawtis nga pamatuud it indiꞌan mi na, isaꞌun pasinsiyaen kamu naga it Ampuꞌang Diyus.”

Marcos 6:12

Ta, napanaw nay sang puluꞌ baw duwa ngayting mga alagad ka nangadal na sira duꞌun it katataawan. Ipagpangadal nira nga kaꞌilangan singuliꞌan baw indiꞌan nay mga kasalaꞌan.

Lucas 1:16

Talagang dakel nga tungtung-inapuꞌ ni Israel i ipapaꞌuliꞌ ya duꞌun it Ampuꞌang Diyus nira.

Lucas 11:20

Ta, kayti, in magꞌimugaw akut mga maraꞌe-raꞌet kat keseg it guna it Ampuꞌang Diyus, daꞌga baꞌ nangangaꞌulugan nga miyabut na situt imyu i kaꞌadiꞌan it Ampuꞌang Diyus ngaytu?

Lucas 13:3

Talagang ega maat atkayan. Ka basta ega singuliꞌan mi baw indiꞌan i mga kasalaꞌan mi, surubung kamu nga muꞌsa nga mapuuꞌ!

Lucas 13:5

Talagang ega maat atkayan. Ka basta ega singuliꞌan mi baw indiꞌan i mga kasalaꞌan mi, surubung kamu nga muꞌsa nga mapuuꞌ!”

Lucas 15:10

Talagang matuud baꞌ i ipagꞌaat ku ngaytu, nga dakulaꞌ talaga nga kasagyaan it mga anghil it Ampuꞌang Diyus sabap it esang taw nga makasalaꞌan nga magsinguliꞌ na baw indiꞌan ya nay mga kasalaꞌan ya.”

Lucas 15:7

Matuud talagay iꞌaat kut imyu, nga subraꞌ talagang kasagyaan i duꞌun it langit sabap it esang makasalaꞌan nga magsinguliꞌ baw indiꞌan ya nay mga kasalaꞌan ya. Ka subraꞌ paytu it siyam nga puluꞌ may siyam nga ega magsinguliꞌ it kasalaꞌan nira sabap, kat pikir nira, egay kanirang kakasalaꞌan.”

Lucas 16:30

‘Aaꞌ ega atkayan, Amay Abraham,’ maat ya, ‘ka barang egayti pamayaꞌnen nira it sang unu. Temed in yay paꞌaduꞌut kanira, esa nga miyatay na nga naꞌgen it paꞌuliꞌ, siguradu talaga nga magsinguliꞌ baw indiꞌan na niray mga kasalaꞌan nira.’

Lucas 21:31

Ta, atkayan naga yan, basta mamuyaan mi nga magꞌabut na i mga bagay ngaytu, magkaꞌrutan mi na nga adeꞌdeng na talagay timpu nga pagꞌadiꞌan nat Ampuꞌang Diyus i muꞌsang katataawan.

Lucas 24:47

Baw kat ngaran ya, ipangadal kat muꞌsang bangsa, gumaring na situt Jerusalem, nga pasinsiyaen it Ampuꞌang Diyus i kumpur magsinguliꞌ baw indiꞌan na niray kasalaꞌan.

Lucas 6:20

Liminteg si Jesus duꞌun it mga alagad ya baw miyampang, nga magꞌaat, “Magkasagya kamu nga ipagpabetang mi nga talagang egay sadiling kakayaan nga masarigan, in daꞌga Ampuꞌang Diyus lamang, sabap kaꞌuyut kamu duꞌun it kanyang kaꞌadiꞌan.

Lucas 9:2

Bawnga tiyaꞌeg ya na sira nga mapanaw ka ipangadal nira i pasar it kaꞌadiꞌan it Ampuꞌang Diyus baw pagayenen nira i kumpur magpangabang nga may sarut.

Mga Binwat 11:18

Pagkagneg it mga magpakidaꞌeg ngaytit ki Pedro, mindek na sirat pakibatir. Iyan siꞌ i binwat nira, biyantug niray Ampuꞌang Diyus. Maamaatan sira, “Ta, in atkayan palan, inildawanan na gasiꞌ it Ampuꞌang Diyus i pati mga taw nga ega Judio, nga masinguliꞌan baw indiꞌan nira i mga kasalaꞌan nira, isaꞌun makanira i kaꞌgenan nga egay kaskedan.”

Mga Binwat 17:30

Iyan tagnaꞌ paꞌ, subuk piyabaya-bayaꞌan it Ampuꞌang Diyus i mga kamaliꞌ it mga taw nga daꞌgay uru-urut pasar it kanya. Temed kayti, ipagsasar yat muꞌsang katataawan, kat paꞌari-aring rugar, nga magsinguliꞌ na sira baw indiꞌan nay muꞌsang kasalaꞌan nira.

Mga Binwat 2:38

Tiyubag sira ni Pedro, nga magꞌaat, “Ta, kaꞌilangan, magsinguliꞌ kamu it mga kasalaꞌan mi, baw pabawtis nga magpamatuud it pakilagpit kamu nat ki Jesu-Cristo. Buwaten mi tu isaꞌun mapasinsiya i mga kasalaꞌan mi baw begayan kamu nga pasaruman it Espiritu Santo.

Mga Binwat 20:21

Ipagpamatuud ku kat maski siyu, Judio baw ega Judio, nga kaꞌilangan nirang pagsinguliꞌan duꞌun it Ampuꞌang Diyus i mga kasalaꞌan nira baw mamayaꞌ it Ampuꞌan ta nga si Jesus.

Mga Binwat 26:20

Uꞌnang piyangadalan ku, duꞌun nat Damasco, bawnga duꞌun it Jerusalem. Garing duꞌun liyekep-lekep kuy muꞌsang sakep it Judea bawnga naꞌaduꞌun akut mga banwa it taw nga ega Judio. Ipagpangadal kut kanira nga magsinguliꞌ baw indiꞌan i mga kasalaꞌan nira, ka pasakep nat Ampuꞌang Diyus, bawnga muwat it mga magagayeng buwat nga magpamatuud it sininguliꞌan baw inindiꞌan na niray tagnang buwat nirang ega magayen.

Mga Binwat 3:19

Aypaꞌ kayti, magsinguliꞌ kamut kamatuudan baw pasakep kamu nat Ampuꞌang Diyus, isaꞌun mapasinsiya kamu nga maꞌawaꞌ i mga kasalaꞌan mi.

2 Corinto 7:10

Sabap iyan kasmek nga uyun kat kaꞌirgan it Ampuꞌang Diyus, magtaban it taw it magsinguliꞌ baw magpangindiꞌ it kasalaꞌan nira, nga liꞌwan ya, karibriyan nga ega alang-alang. Temed iyan kasmek nga begay it banwa ngaytu, ipagdesen lamang it ulu aypaꞌ, liꞌwan ya, kamatayneng panriga nga egay kaskedan.

Colosas 1:13

Ka ipiyagribri ya na kita kat pagsakep it kadleman, baw ipiyagꞌugad ya na kita kat pagsakep it pagmaꞌa-maꞌalen ya nga Anak.

2 Timoteo 2:25

Ireg kung sugiden, ayaw kat pakerat-kerat, in daꞌga luway-luway nga tulduꞌan muy mga magkuntraꞌ it imu. Ka barang ildawan naga sirat Ampuꞌang Diyus it magsinguliꞌ baw mangindiꞌ it kamaliꞌ nga pasepsep nira baw matantuwan na nira i kamatuudan.

Hebreo 6:1

Aypaꞌ ega na mga uꞌna-uꞌna ngayti nga ipagpangadal pasar it ki Cristo i tegelan tat madal in daꞌga iyan na nga megay it dakulaꞌ nga kasepsep. Ega madungagan i kasepsep mi in mga uꞌna-uꞌna ngayting ipagpangadal lamang i pirmi nga pagsaꞌu-saꞌupun. Ka sana maꞌyag nat imyu i pangadal nga ega maꞌaten i karibriyan kat pagsarig tat mga magagayeng pagbuwaten tami, in daꞌga kat pagsarig baw pamayaꞌ ta lamang it Ampuꞌang Diyus.

2 Pedro 3:9

Aypaꞌ it belag i kanya nga pabetang it timpu, ega maꞌaat ta nga subung it patandes it beken, nga sanggup ya ngaytu sabap it pamaꞌuliꞌ situ ni Jesu-Cristo, sanggup lampud na lamang ka ega paꞌ tiyuman ya. Temed yay matuud, ega paꞌ tiyuman ya sabap lamang it kadakulat sanguꞌ yat aten nga muꞌsa. Ka pagbegayan ya pat rugar i kadakel, nga makapagsinguliꞌ baw mangindiꞌ it kasalaꞌan nira. Ka talagang ireg ya nga maribri i muꞌsa, nga egay maski siyu nga kaꞌaduꞌun it egay kaskedan nga kakuriꞌan.

Mga Ipiyalteg 2:21

Binggayan ku na kanyat rugar nga magsinguliꞌ baw indiꞌan i mga maraꞌway ngaytu nga pangaꞌgenan ya, temed talagang pagtemden ya na nga ega indiꞌan ya.

Mga Ipiyalteg 2:5

Sana demdemen mi naga i kadakulat pagmaꞌal mit aken iyan baꞌgu kamu paꞌ nga nagpasakep it aken. Bawnga pikiren mi kayti in sang unu nay kakurangan ya, isaꞌun masinguliꞌan mi i itu ngaytu. Kaꞌilangan, iyan siꞌ i buwaten mi, subuk buwat mi ngaytit tagnaꞌ. Ka basta daꞌkamu magsinguliꞌ it kamatuudan, talagang asanen ku kamu ka awaꞌen kuy titidawan mi, pati magtitindeg nga dadaꞌtunan ya asat puwistuꞌ ya. Bibasen ta nayan kamu.