Mateo 24:3 - Tagbanwa

³ Bawnga iyan duꞌun na Jesus it Mungsuꞌ it Olibo, nga magꞌaꞌdung na kanya, tiyeꞌe-teꞌeng it mingkut it mga alagad ya. Maat nira, “Kaꞌnu bayan magꞌabut i paꞌaaten mu ngayan nga maranggaꞌ i Templo ngayti? Unuy mga tandaꞌanan nga magdadarapaꞌ nay pamaꞌuliꞌ mu situ baw umur it banwa?”

Mateo 24:3 Iomraidhean Croise

Mateo 13:36

Pagkatupus it pangadal ngayti ni Jesus, piyaꞌuliꞌ ya nay kadakel ngayti bawnga miyuliꞌ na sang siraan it mga alagad ya duꞌut balay. Nagpatpad i mga alagad ya duꞌun it kanya. Maat nira, “Ituturan mut amen i kaꞌulugan it inalimbawa mu ngayan nga kaꞌiꞌilu nga ilamunun duꞌun it uma.”

Mateo 13:49

Ta, magꞌaꞌatkayan gasiꞌ yan in asan nat umur it banwa. Mabut i mga anghil ka ipablag nira i mga mamumuwat it karaꞌe-raꞌetan kat mga taw nga mataldeng kat panleteg it Ampuꞌang Diyus.

Mateo 15:12

Magkatupus i iting inampang ni Jesus, nagpakiꞌumid it kanya i mga alagad ya baw maat nira, “Ampuꞌan, magkaꞌrutan mu, rimnaꞌe-raꞌet i nakem it mga Pariseo it inampang mu ngayan.”

Mateo 16:27

Sabap talagang matuud nga paꞌuliꞌ aku naga situ, aku nga Taga Langit nga Ipiyanganak it Taw, nga matanyag na situt aken i kabantugan it Amaꞌ ku, baw kaꞌibaan kuy mga anghil ku. Kat iyan nga aldaw, tumbasan kuy kada taw uyun kat kanyang binwatan.

Mateo 16:28

Matuud talagaytu i iꞌaat ku ngaytut imyu, nga may pira situ kayti nga ega matay seked it ega naltegan nira aku nga Taga Langit nga Ipiyanganak it Taw nga magpapuꞌun nat magꞌadiꞌ.”

Mateo 17:19

Iyan sira-sira mana, iningkut si Jesus it mga alagad ya ngayti. Maat nira, “Unuka ega naꞌimugaw namen i iyan nga maraꞌe-raꞌet?”

Mateo 21:1

Iyan adeꞌdeng na sira duꞌun it Jerusalem, pagꞌabut nira duꞌut Betfage nga duꞌun it Mungsuꞌ it Olibo, may itiyaꞌeg ni Jesus it duwang kataawan nga mga alagad ya.

Mateo 24:27

Sabap in magꞌuꞌunu maꞌyagan i langit garing it lebatan seked duꞌun it sedpan basta magkilat, atkayan naga yan i pamaꞌuliꞌ ku situ, aku nga Taga Langit nga Ipiyanganak it Taw. Talagang mamuyaan tu it muꞌsang katataawan.

Mateo 24:30

Bawnga maltegan duꞌut langit i tandaꞌanan nga pangabut ku na nga Taga Langit nga Ipiyanganak it Taw. Sumgaw nay muꞌsang mga bangsa ka magꞌadeꞌdeng nay pangukuman. Ka maltegan nira aku, nga Taga Langit nga Ipiyanganak it Taw, nga magpangindelangan it kunum, nga maꞌyag i ega basta-bastang guna ku baw kadakulaꞌ it kabantugan ku.

Mateo 24:37

In magꞌuꞌunu ega kat ulu it mga taw kat timpu ni Noe i panriga nga mabut it kanira, atkayan naga kat pamaꞌuliꞌ situ it aku nga Taga Langit nga Ipiyanganak it Taw.

Mateo 24:39

Aypaꞌ pagꞌabut it lenep ngayti, egay tiya-tiyakap it katataawan. Ta unupat biyaraꞌan, namagkalmes sira nga muꞌsa ka isiyari nat belbeg. Atkayan naga yan i magꞌabut in pangabut na ngayan it Taga Langit nga Ipiyanganak it Taw.

Mateo 24:43

Dedemdemen mi tu. In beteꞌ magkaꞌrutan lamang it tagbalay in unung uras it delem mabut i mananakaw, simpri sipiꞌan ya. Ega yan pataꞌnan ya na lamang nga masled i balay ya.

Mateo 28:20

Baw itulduꞌ it kanira nga sunudun i muꞌsa nga ipiyagꞌurdin ku it imyu. Baw dedemdemen mi nga iba mi aku nga pirmi seked it umur nat banwa.”

Lucas 21:7

Pagkagneg it mga alagad, miningkut sira nga magꞌaat, “Manigtulduꞌ, kaꞌnu bayan magꞌabut i paꞌaaten mu ngayan nga mga bagay, baw unuy mga tandaꞌanan nga matuman nay muꞌsa ngayan?”

Mga Binwat 1:7

Tiyubag sira ni Jesus, “Amaꞌ ku lamang i magkaꞌrut it in kaꞌnung timpu u uras i ituman yat kumpur ipiyabetang-betang ya. Kamu ngaytu, ega mapakay nga maꞌrutan mi i mga itu ngaytu.

Hebreo 9:26

Ka in beteꞌ kaꞌilangan ni Cristo nga ipaturuꞌ nga pirmi i duguꞌ ya daꞌga baꞌ, ubus matay, matay kanya garing paꞌ it pagkaguna it banwa? Temed ega atkayan in daꞌga, kayti, kat timpu ngaytu it katumanan it muꞌsa ngayti nga pagbuwaten it tagnaꞌ, kaꞌsa lamang limnampud kanya situt banwa nga parawun na i kasalaꞌan it taw. Ipiyagparaw ya, sadili yang duguꞌ nga ipiyaturuꞌ it kaꞌsa ngayti.