Mateo 18:3 - Tagbanwa

³ Bawnga miyampang kanya, nga magꞌaat, “Dedemdemen mi tu. Basta daꞌkamu magbaꞌgu it adat mi ngaytu nga magtulus it kataꞌasan, baw basta ega pasbung kamu it mga dedekeyeꞌ paꞌ nga mangaꞌwaꞌ, talagang egang-ega makaꞌuyut kamu nga masinakepan it Ampuꞌang Diyus duꞌun it kaꞌadiꞌan ya.

Mateo 18:3 Iomraidhean Croise

1 Pedro 2:2

Panawun it pikiran mi i adat it madaragen nga magkududuꞌ nga pirmi. Ta sana, atkayan nagay imyu, nga magkuꞌadal nga pirmi it ampang it Ampuꞌang Diyus, ampang ya nga purus kamatuudan, isaꞌun kemseg kamu nga mga anak ya, nga magsisigi nga dumakulaꞌ i pamayaꞌ mi, seked it maꞌbut na nga maribri kamu duꞌun it langit.

Mateo 19:14

Takaꞌ mampang si Jesus, “Ega sulang-sulangen mi i mangaꞌwaꞌ nga magpaꞌasitut aken. Pataꞌnan mi lamang. Sabap mga mapiyababaꞌ nga subung it mangaꞌwaꞌ ngaytu, sira i mapakay nga pasakep it kaꞌadiꞌan it Ampuꞌang Diyus.”

1 Corinto 14:20

Mga sulsug ku kat pamayaꞌ, sana gantiyan mi nay pikir mi pasar it mga itu ngaytu. Ka pikir mi kayti, subung lamang it pikir it waꞌwaꞌ. Sabagay in pasar it kubwat it karaꞌe-raꞌetan, sana yay subung kamu it madaragen nga ega pay kat nakem nira nga itu ngaytu. Temed in pasar it kasepsep it kaꞌirgan it Ampuꞌang Diyus, kaꞌilangan ustuꞌ nay pikir mi.

Juan 3:5

Timnubag si Jesus, “Kamatuudan tuy iꞌaat ku ngaytut imu. Egay makaꞌuyut duꞌun it kaꞌadiꞌan it Ampuꞌang Diyus in daꞌga kanya lamang nga ipiyanganak it danum baw Espiritu Santo.

Juan 3:3

Katubag si Jesus, nga maat ya, “Itu talagay kamatuudan nga isugid kut imu. Egay makaꞌuyut duꞌun it kaꞌadiꞌan it Ampuꞌang Diyus, in daꞌga iyan lamang nga ipiyanganak it sumaꞌup.”

Lucas 13:24

“Talagang paꞌresan mi nga semled duꞌun it masupit nga puwirtaꞌan. Ka matuud i iꞌaat kut imyu nga mabut i aldaw nga dakel nay magreges nga kusled duꞌun it kaꞌadiꞌan it Ampuꞌang Diyus, temed ega na makasled ka nasauryan na.

Mga Binwat 3:19

Aypaꞌ kayti, magsinguliꞌ kamut kamatuudan baw pasakep kamu nat Ampuꞌang Diyus, isaꞌun mapasinsiya kamu nga maꞌawaꞌ i mga kasalaꞌan mi.

Mga Binwat 28:27

Talagang ining mga taw, piyadsen na niray ulu nira. Paglagpasen nay mga talinga nira baw ipagpeyeng na niray mga mata nira. Ka in daꞌga atkayan, barang mamagkalteg naga sira, mamagkagneg naga, mamagkasepsep naga, baw paꞌuliꞌ naga sira situt aken, nga mapagayen ku naga sira, arit ega.’”

Juan 1:51

Kamatuudan talagay ipagsugid ku ngaytut imu. Maltegan mu nga abri i langit baw mga anghil it Ampuꞌang Diyus, mapyat, lumampud, magpaꞌasitut aken nga Taga Langit nga Ipiyanganak it Taw.”

Mateo 5:20

Matuud tu talaga i ipagꞌaat ku ngaytut imyu nga, in pagsunud mi it kaꞌirgan it Ampuꞌang Diyus subung na lamang it pagsunud it mga Pariseo baw mga manigpaꞌyag it urdin, talagang daꞌkamu kasled duꞌun it kaꞌadiꞌan it Ampuꞌang Diyus ngaytu.”

Lucas 22:32

Temed ta, ipiyanalangin ku naga, Simon, nga ega kapangindiꞌ ka it pamayaꞌ mut aken. Bawnga in kasinguliꞌ ka na baw makaꞌuliꞌnang kemseg i pamayaꞌ mut aken, paksegen mu i pamayaꞌ it mga kaꞌibaan mu ngaytu nga mga sulsug mu kat pamayaꞌ.”

Marcos 4:12

Atkaytuytu ka isaꞌun maski temegel sirat semyek, ega makilalaan niray pagletganan nira. Baw maski manamar nat pagneg, daꞌsira makasepsep. Ka in daꞌga atkayan, barang magsinguliꞌ sira baw pasinsiyaen it Ampuꞌang Diyus.”

2 Pedro 1:11

In daꞌga, talagang tanggapen kamut masagya it Ampuꞌan tami nga Manriribri nga si Jesu-Cristo, ka paꞌistaren ya na kamu duꞌun it egay kaskedan nga kaꞌadiꞌan ya.

Mga Binwat 14:22

Duꞌut kada rugar ngayti, pagpaksegen nira i nakem it mga magpamayaꞌ baw ipagbenge-bengel nirat kanira nga, sana, teꞌteꞌan i pamayaꞌ nirat Ampuꞌan maski pakuriꞌan. “Ka simpri,” maat nira, “kaꞌilangan, dakel i malabayan ta nga kakuriꞌan parabir mabut tami duꞌun it kaꞌadiꞌan it Ampuꞌang Diyus nga duꞌun it langit.”

Mateo 19:23

Pagkagaring, maat ni Jesus it mga alagad ya, “Matuud talagay iꞌaat kut imyu. Talagang makuriꞌ makaꞌuyut i manggaden duꞌun it kaꞌadiꞌan it Ampuꞌang Diyus.

Mateo 13:15

Talagang ining mga taw, piyadsen na niray ulu nira. Paglagpasen nay mga talinga nira baw ipagpeyeng na niray mga mata nira. Ka in daꞌga atkayan, barang mamagkalteg naga sira, mamagkagneg naga, mamagkasepsep naga, baw paꞌuliꞌ naga sira situt aken, nga mapagayen ku naga sira, arit ega.’

Mateo 6:16

Beken paꞌ gasiꞌ nga iꞌaat kut imyu, in pagbuwaten mi i pagpuwasa, ayaw kamut pagrupa it subuk magkasmek, nga subung it pagꞌadaten it mga taw nga mamagbete-beteꞌ nga mamagsunud it kaꞌirgan it Ampuꞌang Diyus. Ka buwat nira yan, daꞌna mamagpangayus it bilug, ka isaꞌun maꞌrutan lamang it beken nga mamagpuwasa sira. Matuud tu talaga nga tiyanggap na nira i kanirang tumbas.

Mateo 6:5

“Atkayan naga in magpanalangin kamu, ega pasbung kamu it mga magbete-beteꞌ ngayan nga mamagsunud it kaꞌirgan it Ampuꞌang Diyus. Ka yay kaꞌiꞌirgan nira, mamagtitindeg i mamagpanalangin duꞌun it papagsambaan nira baw duꞌun it salangayan it mga karsadaꞌ, isaꞌun magkaltegan sira it mga taw. Matuud i isugid kut imyu, tiyanggap na nirang lagi i tumbas nira.

Isaias 6:10

Tulduꞌan mu sira it ipagpasugid ku isaꞌun limiꞌwan nga demsen i ulu nira, nga subung it benglen i talinga nira baw belgen i mata. Ka in daꞌga, barang mamagkalteg naga sira, mamagkagneg naga, mamagkasepsep naga, baw paꞌuliꞌ naga sira situt aken nga mapagayen ku naga sira, arit ega.”

Mateo 6:2

Aypaꞌ, in magbegay ka it ildaw mu duꞌun it in siyuy may kaꞌilangan, ega na itingeg-tingeg mu nga subung it pamagbuwaten it mga mamagbete-beteꞌ nga mamagsunud it kaꞌirgan it Ampuꞌang Diyus. Pagbuwaten niray atkaytu in duꞌun sirat papagsambaan baw duꞌun it mga karsadaꞌ ka isaꞌun tuꞌgudun sira it mga taw. Isugid kut imyu, tiyanggap na nira nga lagi i tumbas nira kat pagtuꞌgud ngayti. Ega nay inawaren nirang beken nga tumbas.

Mateo 5:18

Ka ituy matuud nga iꞌaat kut imyu. Talagang maꞌawaꞌ i langit baw banwa, takaꞌ talagang egay kaꞌawaꞌan it maski piyakadekeyeꞌ nga bagiꞌ it mga urdin it Ampuꞌang Diyus seked it ega matuman i muꞌsa.

Mateo 18:2

Parabir timnubag si Jesus, binwat ya, tiyaꞌwagan yay esang waꞌwaꞌ, piyatindeg duꞌun it adapan nira.

Mateo 18:4

Ka in siyu-siyuy mapiyababaꞌ nga subung it waꞌwaꞌ ngaytu, kanya talagay ipabetang nga mataꞌas duꞌun it kaꞌadiꞌan it Ampuꞌang Diyus.