Mateo 1:21 - Tagbanwa

²¹ Lalaki yan i sumakit. Si Jesus i ipangaran mu, sabap kanya i rimibri it mga taawan ya kat mga kasalaꞌan nira.”

Mateo 1:21 Iomraidhean Croise

Genesis 17:19

Maat i tubag it Ampuꞌang Diyus it ki Abraham, “Eeꞌ, mapakay naga yan. Temed manganak naga si Sara, sumakit yan, lalaki. Pangaranan mut ki Isaac. Muꞌsa ngaytung isiyanggup baw ipiyakiꞌupakat kut imu, gumaring kat itung anak mu seked anak-inapuꞌ ya mana, magtetdek paytu it bilug nira it seked maꞌlay nga banar.

Genesis 17:21

Temed pakiꞌupakat ku ngaytut imu, ega uyut si Ismael ngayti, in daꞌga, katumanan ya, duꞌun lamang it anak mu nga si Isaac, nga anak mi ni Sara nga ipanganak yat tumaꞌun siꞌ.”

Genesis 18:10

Maat it sang kataawan ngayti, “Pagtaꞌlib it sang taꞌun, siguradung paꞌuliꞌ aku naga yan situt imyu. Pagpaꞌuliꞌ ku, manganak nat lalaki i asawa mu nga si Sara.” Itu palan, magpapagneg naga si Sara duꞌut linge-lingeb it salakwatan it balay.

Jeremias 23:6

Kat timpu it pagꞌadiꞌ ya ngaytu maꞌawaꞌ i muꞌsang ipagkagulu it mga taga Juda, baw maꞌimbeng nga magpangaꞌgenan i bangsa ngaytu nga Israel. Baw itu i ipangaran it kanya, ‘AMPUꞌANG DIYUS nga pagpanggaringan it kataldengan tami.’”

Zacarias 9:9

Sumagya kamu nga sumagya, mga taga Sion. Igaꞌuy-gaꞌuy mi i kasagyaan mi, mga taga Jerusalem. Sabap magdadarapaꞌ na i magꞌadiꞌ situt imyu. Mataldeng kanya nga ruyut baw pirmi nga pagtabangen it Ampuꞌang Diyus isaꞌun mandaꞌeg. Mapiyalulus kanya baw kabayuꞌ nga asno i pagsasakayan ya, esang uꞌuybun nga uꞌuybun it asno.

Mateo 1:25

Temed ega riniꞌe-riꞌeng ni Jose si Maria seked it ega paꞌ simnakit i pagbebtengen ya ngayti, nga si Jesus na ngayti i ipiyangaran ya.

Lucas 1:13

Temed miyampang i anghil ngayti. “Zacarias,” maat ya, “ayaw kat iꞌlam, piyagnegan it Ampuꞌang Diyus i panalangin mu it kaꞌlay ngaytu baw may sambung ya na. Kayti, manganak nay asawa mu nga si Elisabet. Lalaki yan i sumakit. Si Juan i ipangaran mu.

Lucas 1:31

Pagnegan muy isugid kut imu. Dumarugmatiꞌ ka. Sumakit yan, lalaki. Si Jesus i ipangaran mu.

Lucas 2:11

Sabap ipiyanganak kayti duꞌun it lansangan ni David i Manriribri mi. Kanya i isiyanggup nga Cristo nga Ampuꞌan.

Lucas 2:21

Pagꞌikawalung aldaw, nga aldaw nga ituriꞌ baw ipangaran it waꞌwaꞌ, si Jesus i ipiyangaran it kanya, ka iti i inaat it anghil nga ipangarat kanya, parabir diyarugmatiꞌ i waꞌwaꞌ ngayti.

Juan 1:29

Pagꞌeyag it aldaw, nalawag ni Juan si Jesus nga magꞌelep duꞌun it kanya. Pagkalteg ya, maat ya, “Wayan na, kanya nga ibinggay it Ampuꞌang Diyus, nga subuk uꞌuybun it tupa nga ipagsalisi, sabap kanya na ngayan i mangawaꞌ it kasalaꞌan it mga katataawan.

Juan 4:42

Maamaatan sirat babay ngayti, “Magpamayaꞌ kami na kayti, it ega lamang duꞌun it mga nasugid mu ngayti, in daꞌga duꞌun nat mga nagnegan namen ngaytu duꞌut kanya, natantuwan namen nga kanya na ngaytu i Manriribri it muꞌsang katataawan.”

Mga Binwat 13:23

Ta, kat pabetang-betang it Ampuꞌang Diyus, garing duꞌut mga tungtung-inapuꞌ ni David ngayti i liniꞌwanan it Manriribri nga isiyanggup ya nga rimibri it aten nga mga tungtung-inapuꞌ ni Israel. Si Jesus na ngaytu i paꞌaaten.

Mga Binwat 3:26

Ta, kitay uꞌna-uꞌna nga nakatanggap it ildaw ya ngaytu ka, pagkapatindeg it Ampuꞌang Diyus it manigsirbi ya nga si Jesus, kita nga mga Judio i tiyaꞌgan ya, nga pasinguliꞌen ya kita baw paꞌindiꞌen it mga karaꞌe-raꞌetan nga pamagbuwaten tami.”

Mga Binwat 4:12

Yay matuud, talagang egay maski siyu nga magkapisiꞌan it karibriyan kat panrigat kasalaꞌan, puyrat ki Jesu-Cristo ngaytu. Ka egay maski siyung beken situt sinirungat langit nga ibinggay it Ampuꞌang Diyus nga magkaribri it aten, in daꞌga kanya lamang ngaytu.”

Mga Binwat 5:31

Pagkaꞌgen it kanya, miyuliꞌ na duꞌun it langit ka binggayan nat Diyus Amaꞌ it ega basta-bastang kataꞌasan duꞌun it iwanan nga ayun ya. Baw kanya na ngaytu i Manigpamegbeg baw Manriribri tami, nga magbegay nat aten nga mga tungtung-inapuꞌ ni Israel nga masinguliꞌan baw indiꞌan i mga kasalaꞌan tami isaꞌun mapasinsiya.

Tito 2:14

Nangganti kanyat aten isaꞌun iribri ya kita kat pagsakep it karaꞌe-raꞌetan, baw isaꞌun mabwat ya kita nga limpiyuꞌ na nga naꞌawaꞌ nay kasalaꞌan tami. Binwat yaytu isaꞌun mabwat ya kita nga kanya talaga nga mga taawan, nga maꞌireg nga banar muwat it mga buwat nga magagayen.

Hebreo 7:25

Aypaꞌ, sabap it muꞌsa ngaytu, kayang-kaya ya nga iribri it kaꞌustuꞌang karibriyan i muꞌsa nga, kat keseg it pamayaꞌ nirat binwat ya, magpasakep duꞌut Ampuꞌang Diyus. Magkapanindegan ya sirang pirmi ka egen kanya it egay kaskedan.

1 Juan 1:7

Temed in pirmi ta nga magpangaꞌgenan uyun kat kaꞌyagan, nga alaid kat kasalaꞌan, subung nagat Ampuꞌang Diyus, nga kanya, purus kat kaꞌyagan talaga, magayen talagay pakiꞌiba-iba tami nga magpamayaꞌ it kanya. Baw iyan timnuruꞌ nga duguꞌ ni Jesus nga Anak ya, paglimpiyuꞌun ya kita, ka pagꞌawaꞌen yay muꞌsang kasalaꞌan ta.

1 Juan 3:5

Magkaꞌrutan mi nga piyalampud na pasiꞌ si Jesu-Cristo situt banwa isaꞌun matanggung ya nay mga kasalaꞌan ta. Baw kanya, talagang egay kakasalaꞌan.

Mga Ipiyalteg 7:14

Katubag aku, maat ku, “Tabing galang it imu, taꞌway. Ega magkaꞌrutan ku in ari piyamaggaringan kayan. Siguru ikaw yan i magꞌuꞌrut.” Maat ya siꞌ it aken, “Sira ngayan, iyan i nakalabay it dakulaꞌ talagang kakuriꞌan, temed maski atkayan, daꞌsira nangindiꞌ, naneꞌteꞌ i pamayaꞌ nira. Talagang linimpiyuꞌ nira baw piyaputiꞌ it duguꞌ it paꞌaaten ngaytung Uꞌuybun It Tupa i mga pakayan nira ngayan.

Mga Pagbayaꞌen 13:3

Kaꞌsa nagpakikita it babay ngayti i Anghil it AMPUꞌANG DIYUS baw maat i inaat it kanya, “Seked kayti ega pay anak mu, temed ega maꞌlay dumarugmatiꞌ ka. Sumakit yan, lalaki.

1 Samuel 1:20

Pagkaꞌbut it pananakit nat beteng, sumakit lalaki. Pangaranan ya, si Samuel, ka maat ya, “Ildaw tut aken nga inangut ku duꞌun it AMPUꞌANG DIYUS.”