Lucas 8:39 - Tagbanwa

³⁹ Yay isiyambung ni Jesus it kanya, “Magayen,” maat ya, “muliꞌ ka na duꞌut imyu, ka ituturan mu duꞌun i muꞌsa nga binwat it imu it Ampuꞌang Diyus.” Aypaꞌ napanaw nay taw ngayti. Ipiyanuturan-tuturan ya na duꞌun it muꞌsang lansangan i binwat ngayti ni Jesus it kanya.

Lucas 8:39 Iomraidhean Croise

Marcos 1:45

Temed pagpanaw it taw ngayti, ipiyanugid-sugid ya in magꞌuꞌunu mindek i sarut ya ngayti. Aypaꞌ biyaraꞌan, ega na magkapalansangan si Jesus it magparayag-rayag sabap gandur nat taw i mamagpaꞌaduꞌut kanya. Duꞌun na lamang kanya it liꞌwan it lansangan, kat mga rugar nga kapupuyangtan. Pagꞌaduꞌunun na kanya it mga taw nga maggaring kat paꞌari-aring rugar.

Marcos 5:18

Iyan maggagaring na na Jesus nga sumakay, inupakat kanya it taw ngayti nga piyagayen ya nga pabayaꞌen na kanya.

Marcos 5:19

Temed ega minireg si Jesus. Maat gay inaat ya, “Magayen siguru, muliꞌ ka na duꞌut imyu, ka ituturan mu nat mga kaꞌibaan mu duꞌun i muꞌsa nga binwat it imu it Ampuꞌan baw in magꞌuꞌunu siyanguꞌan ya ikaw.”

Lucas 8:38

Kat taw ngayti nga inimugawan it mga maraꞌe-raꞌet, ipagpakiꞌupakat yat ki Jesus nga pabayaꞌen, temed ega minireg si Jesus.

Lucas 8:40

Ta, namagsakay siꞌ na Jesus it nagpaꞌuliꞌ duꞌut sang dipag. Padungguꞌan nira, dakel siꞌ nga taw nga magꞌeꞌlat it kanya. Tiyanggap nira si Jesus it masagyang-masagyay nakem nira.

Juan 4:29

“Daliꞌ mi na! Mayaꞌ kamut aken! May taw baꞌ duꞌun nga nakasugid yay kumpur nabwat ku. Barang yanayti i Cristo ngayang isiyanggup.”

Deuteronomio 10:21

Kanya lamang i talagang bantugun mi. Kanya i Ampuꞌang Diyus mi. Kanya lamang i minwat it muꞌsa ngayti nga kalililuꞌang bagay nga nagpasar kat mata mi.

1 Timoteo 5:8

Ka iyan taw nga maat magpamayaꞌ it Ampuꞌang Diyus temed ega magkaꞌrut mepet it mga kaduguꞌan ya, subraꞌ nay mga anak baw giyaringan ya, maꞌyag nga pagdaꞌgaen ya na i matuud nga pagsunud it kaꞌirgan it Ampuꞌang Diyus. Ipabetang kanya nga adat ya, maraꞌe-raꞌet pat mga taw nga ega namayaꞌ.