Lucas 3:11 - Tagbanwa

¹¹ Pagtubag ni Juan, maat ya, “Ta, mga atkaytu i magayen nga buwaten mi. In beteꞌ nagduwa naga i badyuꞌ mu, kaꞌilangan tunggalan muy iyan talagang ega na. Subung nagay iyan may pangaꞌen, ega riga-rigaen yay iyan ega nay magkasikep.”

Lucas 3:11 Iomraidhean Croise

Daniel 4:27

Aypaꞌ, kagalang-galang nga Adiꞌ, in mapakay pagnegan mu i masugid ku. Sana indiꞌan mu nay karaꞌe-raꞌetan mu. Baꞌguun mu nay adat mu. Magayen na nga adat i adaten mu, nga maꞌildaw ka na it mga makukuriꞌ. Ka barang in atkayan, maneꞌteꞌ naga nga maꞌimbeng i pangaꞌgenan mu.’ ”

Mateo 25:40

Bawnga aaten ku yan nga Adiꞌ nira, ‘Matuud talagay iꞌaat kut imyu. Iyan binwat mi i mga itu ngaytu kat maski piyakatimawaꞌ nga bilang mga sulsug ku, simpri aku na i binwatan mi.’

Lucas 11:41

Aypaꞌ imbis nga adat nga malupig, mamgay kamut masagyay nakem it ildaw mi duꞌun it mga makukuriꞌ. Ta, magbaraꞌ nayan nga subuk limpiyuꞌ kamu na nga matuud.

Lucas 18:22

Pagkagneg ni Jesus kayti, maat ya siꞌ, “May esa paꞌ nga bagay nga magkakurangan mu. Ipaꞌalang muy muꞌsang mga kusas mu bawnga iyan bayad ya, pamagiꞌ-bagiꞌen mu kat mga makukuriꞌ. Ka in buwaten mu gaytu, siguradung may kamanggadan mu duꞌun it langit. Pagkabwat mut muꞌsa ngaytu, paꞌuliꞌ ka siꞌ situ, ka magbaya-bayaꞌ ka nat aken, nga alagad ku na.”

Lucas 19:8

Iyan mamagꞌaꞌdung na sira duꞌun it balay, timnindeg siꞌ si Zaqueo baw miyampang, nga magꞌaat, “Ampuꞌan, kayti, sang lubuk nga kusas ku, ipamgay ku na duꞌun it mga makukuriꞌ. Baw in unuy liyupigan ku duꞌut maski siyu, epaten ku nga dubli i iꞌuliꞌ ku.”

Juan 13:29

Sabap si Judas ngayti i magseskel it pirak nira, tanud niraytu, pagtaꞌgen si Judas it mangalang it kaꞌilangan nirat pistaꞌ, u pagtaꞌgen kanyat mamgay duꞌun it mga makukuriꞌ.

Mga Binwat 10:2

Iting taw, maski ega Judio kanya, masiyambaen kanya baw paggalangen ya it may iꞌlam i Ampuꞌang Diyus. Atnaga i kapuꞌsaan kat pamalay-balay ya. Talagang matiyabangen kanya it mga makukuriꞌ baw pirmi gasing magpanalangin duꞌun it Ampuꞌang Diyus.

Mga Binwat 10:31

Inaat ya aku, ‘Cornelio, magkagnegan it Ampuꞌang Diyus i mga panalangin mu baw pagsagyaan ya i tabang mu it mga makukuriꞌ. Talagang ega paglilipaten ya.

Mga Binwat 10:4

Pasesyek si Cornelio ngayti ka nakaiꞌlam kanya nga banar. Yanay naꞌampang ya, “Unu bayan, Agalen?” Maat siꞌ it anghil ngayti, “Magkagnegan it Ampuꞌang Diyus i mga panalangin mu baw pagsagyaan ya i tabang mu it mga makukuriꞌ. Talagang ega paglilipaten ya.

Efeso 4:28

Iyan taw nga magtakaw i adat ya, kaꞌilangan indiꞌan ya na baw ipaturuꞌ ya nay liꞌnget ya kat in unu nga buwaten nga magayen, isaꞌun may ikatabang ya paꞌ kat in siyu nga may kakurangan.

1 Timoteo 6:17

Iyan mga magpamayaꞌ nga manggaden, aaten mu nga daꞌsira pataꞌas-taꞌas. Ayaw sirat sarig it kamanggadan ngayan ka ega yan magpaneꞌteꞌ. Iyan talagay magayen nga sarigan nira, Ampuꞌang Diyus nga ipagbastanti yat mildaw i muꞌsang mga bagay nga pagkaꞌilanganen ta, isaꞌun makasagya tami.

1 Timoteo 6:18

Sekaten mu sira nga pasigi nga muwat it mga magagayen nga buwaten, ka kadakel it mga magagayeng pagbuwaten nira ngaytu, iyan i matuud nga manggad, ega yan kadakulat pirak nga magkarinut. Aypaꞌ yay magayen, ega magꞌimet in daꞌga magmaꞌatag sira baw mapiyanabang sirat masigkataw nira.

Hebreo 6:10

Ka talagang mataldeng i Ampuꞌang Diyus. Ega lipaten ya i mga binwatan mi baw pagmaꞌal mit kanya nga ipiyalteg mi, baw seked kayti ipagpalteg mi paꞌ, kat pagsirbi mit mga kasubung mi nga magpamayaꞌ it ki Jesus.

Santiago 1:27

Temed iyan taw nga pagsunud ya, talagang magkapakay baw pagsagyaan it Amaꞌ tami nga Ampuꞌang Diyus, ega paglilipaten ya i mga taw nga magkakuriꞌan, nga subung it mga ilu-ilu baw mga babay nga balu, in daꞌga pagtabangen ya. Baw pagꞌinturun yay sadili ya, nga ega maduraꞌitan it karaꞌe-raꞌetan nga pagbuwaten it katataawan situt sinirungat langit.

Santiago 2:14

Mga sulsug ku kat pamayaꞌ, talagang egay mapulus it esang taw, maski maat ya, “Aken, may pamayaꞌ ku na,” temed ega nagay pagbuwaten ya nga magpamatuud it kat Ampuꞌan na kanya. Yay matuud, atkayang kalasit pamayaꞌ, ega siguruun ya nga maribri kanya.

1 Juan 3:17

Temed in beteꞌ pagpabaya-bayaꞌan ta na lamang i mga makukuriꞌ nga kabetangan it mga sulsug ta kat pamayaꞌ, ka maski may kaya ta, pagꞌaligan tami nga itabang it kanira, in atkayan magꞌuꞌunu maꞌaat tami nga may pagmaꞌal ta nat Ampuꞌang Diyus?

1 Juan 4:20

In beteꞌ may magꞌaat nga, “Pagmaꞌalen ku nay Ampuꞌang Diyus,” temed in may sulsug ya paꞌ kat pamayaꞌ nga pagpakitabugan ya, ambut ya lamang i pagmaꞌal ya ngayan. Ka in ega pay raras yat kaꞌibaan ya nga lelete-letegan ya nat kaꞌlay, magꞌuꞌunu maꞌalen yay Ampuꞌang Diyus nga ega magkaltegan ya?