Lucas 16:15 - Tagbanwa

¹⁵ Pagkamuya ni Jesus kayti, maat yat kanira, “Kamu i pagpaꞌiguꞌan ku ngayan, nga buwat mi, pagpapamayaꞌnen mi i katataawan nga mataldeng kamu nga mga taw, isaꞌun istimaren kamut magayen. Temed ega talaga magkataguꞌ duꞌun it Ampuꞌang Diyus i karaꞌe-raꞌetan kat nakem mi. Yay matuud, iyan ipagpabetang mi nga mabantug nga ipagkatuꞌgud it imyu it mga taw, maraꞌway nga maraꞌway yan kat panleteg it Ampuꞌang Diyus.

Lucas 16:15 Iomraidhean Croise

Malakias 3:15

Yay matuud, kayti, iyan mga mapiyataꞌas-taꞌas, sira na i pagꞌildawan nga banar kat pangaꞌgenan nira. Eeꞌ baꞌ, magpanggayen i pangaꞌgenan it mamumuwat it karaꞌe-raꞌetan. Baw ega lamang iyan, ka iyan beken, kat karaꞌe-raꞌetan nira talagang magꞌangut sira it panriga it Ampuꞌang Diyus, temed daꞌsira naga pagrigaen.’ Itu nay paꞌaaten ku ngayan nga mabebeꞌgat nga arampangen nga ipagsaꞌbug mi it aken,” maat it Ampuꞌang Diyus.

Mateo 23:5

Buwat nira, purus paleteg-leteg lamang it masigkataw nira. Iyan ipagbegkes kat ulu baw alima nga pagbetangan it isiyurat nga in pirang tagaꞌ nga ampang it Ampuꞌang Diyus, pagpalabgen niray kanira. Baw iyan mga ipagkabit duꞌun it sagyaden it gulamen, arubwatay i kanira.

Mateo 6:16

Beken paꞌ gasiꞌ nga iꞌaat kut imyu, in pagbuwaten mi i pagpuwasa, ayaw kamut pagrupa it subuk magkasmek, nga subung it pagꞌadaten it mga taw nga mamagbete-beteꞌ nga mamagsunud it kaꞌirgan it Ampuꞌang Diyus. Ka buwat nira yan, daꞌna mamagpangayus it bilug, ka isaꞌun maꞌrutan lamang it beken nga mamagpuwasa sira. Matuud tu talaga nga tiyanggap na nira i kanirang tumbas.

Mateo 6:2

Aypaꞌ, in magbegay ka it ildaw mu duꞌun it in siyuy may kaꞌilangan, ega na itingeg-tingeg mu nga subung it pamagbuwaten it mga mamagbete-beteꞌ nga mamagsunud it kaꞌirgan it Ampuꞌang Diyus. Pagbuwaten niray atkaytu in duꞌun sirat papagsambaan baw duꞌun it mga karsadaꞌ ka isaꞌun tuꞌgudun sira it mga taw. Isugid kut imyu, tiyanggap na nira nga lagi i tumbas nira kat pagtuꞌgud ngayti. Ega nay inawaren nirang beken nga tumbas.

Mateo 6:5

“Atkayan naga in magpanalangin kamu, ega pasbung kamu it mga magbete-beteꞌ ngayan nga mamagsunud it kaꞌirgan it Ampuꞌang Diyus. Ka yay kaꞌiꞌirgan nira, mamagtitindeg i mamagpanalangin duꞌun it papagsambaan nira baw duꞌun it salangayan it mga karsadaꞌ, isaꞌun magkaltegan sira it mga taw. Matuud i isugid kut imyu, tiyanggap na nirang lagi i tumbas nira.

Lucas 10:29

Ta, it ireg it manigpaꞌyag ngayti nga makalandaw i kanya nga pasepsep, iningkut ya sit sumaꞌup si Jesus, nga magꞌaat, “Ta siyu yay masigkataw ku ngayan nga kaꞌilangan nga rarasan ku?”

Lucas 11:39

Temed mampang i Ampuꞌan nga si Jesus, maat ya it Pariseo ngayti, “Kamu nga mga Pariseo, subung kamu it esang taw nga pagꞌugasan ya, kat liꞌwan lamang it iꞌimnan baw karung. Temed damil duꞌut seled, pagpataꞌnan ya lamang. Ka paglimpiyuꞌun mi i bilug mi, temed kat nakem mi, punung-punuꞌ it panlupig baw karaꞌe-raꞌetan.

Lucas 18:11

Timnindeg it pagayen-gayen i Pariseo ngayti ka maat kunuꞌ manalangin, arit kanya ngayting panalangin, desang magpatuꞌgud. Ka maat ya, ‘Ampuꞌang Diyus, magpasalamat akut imu nga daꞌku subung it beken nga ega magayen i adat, ka sira, malupig, mapiyanluku, baw magpamakun duꞌun it ega asawa nira. Magayen ku talagay daꞌku makasalaꞌan nga subung it manigpabayad ngayni.

Lucas 18:14

Matuud talagay iꞌaat kut imyu, nga iti nga taw, miyuliꞌ kanya nga ipagpabetang nat Ampuꞌang Diyus nga mataldeng, ka piyasinsiya nay mga kasalaꞌan ya. Temed iti, Pariseo ngayti, ega. Sabap yay matuud, siyu-siyuy mapiyataꞌas-taꞌas, buwaten kanya nga mababaꞌ, temed iyan mapiyababaꞌ, iyan i ipataꞌas.”

Lucas 18:21

“Manigtulduꞌ,” maat siꞌ it lalaki ngayti, “muꞌsa ngayan, pagsunudun ku nayan garing it pagwaꞌwaꞌ ku.”

Lucas 18:9

May alimbawa gasiꞌ nga ipiyagneg ni Jesus it mga taw nga, tanud nira, mataldeng na sira kat panleteg it Ampuꞌang Diyus aypaꞌ magpanibabaꞌ it beken.

Lucas 20:20

Talagang pagniidan na si Jesus it mga kudakep ngaytit kanya, ka pagꞌelaten niray katimpu sira. Yay binwat nira, may tiyaꞌeg nira nga pirang kataawan nga bilang baklay, nga magbete-beteꞌ it egay antap it nakem nira nga ega magayen. Piyapaꞌaduꞌun sirat ki Jesus ka sigapulun nira kanya kat pagꞌampangen ya, isaꞌun may kadimanda nira kuntraꞌ it kanya, bawnga ipaꞌalima kanya duꞌun it pudir it gubirnadur ngayting magpamegbeg it banwa nira.

Lucas 20:47

Baw pagꞌubsun nira gasiꞌ i kaꞌgenan it mga babay nga balu kat mga ipagpabgay nira. Baw paribasay kutagnepan i mga adat nira nga maraꞌe-raꞌet, pagkaꞌlayen na nira nga panalangin. Talagang subraꞌ naytu nga mabeꞌgat i panriga it kanira.”

Juan 2:25

Ega na kaꞌilangan paꞌ nga may sumugid duꞌut kanya, sabap magkaꞌrutan ya nga banar i kat nakem it taw.

Juan 21:17

Tulung saꞌup i ingkut ngayti ni Jesus ngayting magꞌaat, “Simon nga anak ni Juan, unu talagang, kamatuudan i pagꞌireg mu ngayat aken?” Nasmek si Pedro kat ikatlu ngayting ingkut it kanya, nga magꞌaat, “Unu, pagꞌirgan mu aku?” Tumubag siꞌ si Pedro, maat ya, “Ampuꞌan, talagang magkaꞌrutan mu nay muꞌsang mga bagay. Urut mu na gasiꞌ in sang unuy pagꞌireg kut imu.” “Ta in atkayan,” maat siꞌ ni Jesus, “arigraen mut magayen i mga tupa ku.

Mga Binwat 1:18

Ta si Judas ngayti, iyan natanggap ya ngayan nga pabur it karaꞌe-raꞌetan ngayting binwat ya nga subuk idiyagang ya si Jesus, giyamit nga ipiyagꞌalang it esang lugtaꞌ. Baw nabetangan ni Judas, naꞌulug kanya baw nabasway i tinaꞌi ya. Unupat limniꞌwan nga muꞌsa i betang it tinaꞌi ya.

Mga Binwat 1:24

Bawnga nanalangin sira, nga magꞌaat, “Ampuꞌan, urut mu talaga i kat nakem it muꞌsang taw. Aypaꞌ ipakilala mut amen in siyu manggid kat duwa ngaytu i piniliꞌ mu,

Mga Binwat 15:8

Pagkagneg nira, namagpamayaꞌ. Paribasay namuyaan it Ampuꞌang Diyus nga matuud i pamayaꞌ nira ngayti, ka magkaꞌrutan yay kat nakem it muꞌsang taw, piyapasaruman ya sira it Espiritu Santo, subung nagat binwat yat aten. Duꞌun ipiyalteg yat kadakel nga tiyanggap ya na sira ngayti.

Roma 3:20

Sabap egay maski siyung taw nga tumaldeng kat panleteg it Ampuꞌang Diyus kat pagsunud yat mga urdin, ka ipagpatantut aten it mga urdin ngaytu nga makasalaꞌan tami nga muꞌsa.

Roma 8:27

Baw Ampuꞌang Diyus, paribasay magkaꞌrutan yay maski kat nakem it taw, talagang magkasepsepan ya i pagꞌaaten it Espiritu Santo, beken it uyun nga pirmi kat kaꞌirgan ya i mga ipagpanalangin nga panindeg it Espiritu Santo it aten nga mga taawan it Ampuꞌang Diyus.

1 Corinto 4:5

Aypaꞌ ega betanganan mit ukuman i maski siyu in magayen u ega i pagsirbi nira. Elaten mi i timpu nga ipangukuman kat pamaꞌuliꞌ it Ampuꞌan. Siguradu yan nga ipalbaw ya i mga bagay nga kayti magtataguꞌ paꞌ kat kadleman. Baw ipalbaw ya gasiꞌ i maski pagꞌantapen it nakem it kada esa. Bawnga tumanggap na i kada esa it kabantugan nga gumaring duꞌun it Ampuꞌang Diyus nga bagay it kanya-kanyang binwatan.

1 Pedro 3:4

In daꞌga, asikasuun mit magayen i kat nakem mi. Ka iyan talagay matuud nga kadaraga nga egay pagꞌumrasan ya, nakman kamu baw mapiyalulus kat muꞌsang pagbuwaten baw pagꞌampangen mi. Yay pandaraga nga pagrarasan talaga it Ampuꞌang Diyus.

1 Pedro 5:5

Ta kamu gasiꞌ nga mga kamangaꞌwaꞌan, pasakep kamut magayen it padisir it mga magugurang nga magpamaalaꞌ it imyu. Baw kaꞌilangan nga mapiyababaꞌ kamu nga muꞌsa, nga magsigsirbi it esa may esa. Sabap inaat ngayan duꞌun it kasuratan, “Talagang pagkuntraꞌen it Ampuꞌang Diyus i mga mapiyataꞌas-taꞌas, temed dakulay ildaw nga ipagbegay ya kat mga mapiyababaꞌ.”

Mga Ipiyalteg 2:23

Pangimatayen ku gasiꞌ i mga anak ya nga lupaw. Sikayan maꞌrutan it muꞌsang magpamayaꞌ nga aku i manigrikisaꞌ it kaꞌirgan baw in unuy kat nakem it taw. Talagang tumbasan kuy kada esat imyu uyun kat mga pagbuwaten mi.

1 Samuel 16:7

Temed maat it AMPUꞌANG DIYUS it kanya, “Ega letganan mu i kalawas ya baw kagayen it tindeg ya. Ega kanya i piniliꞌ ku. Ka aku, ega yay pagletganan ku, pagkinataw, nga subuk imyung mga taw nga pagkinataw i pagletganan. Pamataw i kat taw nga pagletganan temed aken, kat nakem ya i paglilingen ku.”