Lucas 15:8 - Tagbanwa

⁸ “Atkayan naga,” maat ni Jesus, “nga in beteꞌ may esang babay nga may pirak ya nga sang pulung batu i madedsen nga pirak, nga kada sangbat, balit sang aldaw i tangdanan, bawnga sakaliꞌ nga may maꞌlam nga sangbat, unu yan i buwaten ya? Daꞌga baꞌ, pagketan yay tidaw? Walisan yat magayen i balay ya ka tulusun yat tulus banar seked it maparagan ya.

Lucas 15:8 Iomraidhean Croise

Mateo 5:15

Dedemdemen mi tu gasiꞌ, nga simpri egay magket it tidaw nga pagkapagket ya, sukruban ya it alupan. In daꞌga iduꞌun ya talaga it dadaꞌtunan, isaꞌun maꞌyagan i muꞌsang seled it balay.

Lucas 15:7

Matuud talagay iꞌaat kut imyu, nga subraꞌ talagang kasagyaan i duꞌun it langit sabap it esang makasalaꞌan nga magsinguliꞌ baw indiꞌan ya nay mga kasalaꞌan ya. Ka subraꞌ paytu it siyam nga puluꞌ may siyam nga ega magsinguliꞌ it kasalaꞌan nira sabap, kat pikir nira, egay kanirang kakasalaꞌan.”

Lucas 15:9

Ta, pagkaparag ya, pangimbitaren yay mga iba-iba ya baw mga kamalay ya. ‘Sigi,’ maat ya, ‘paragiꞌ kamu it kasagyaan ku, ka naparagan ku nagay naꞌlam ku ngayan nga pirak ku.’

Lucas 19:10

Sabap aku nga Taga Langit nga Ipiyanganak it Taw, yay inasitu ku, pagtulusun kuy mga nateꞌag-teꞌag ka iribri ku sira kat panriga sabap it kasalaꞌan nira.”

Juan 10:16

May mga tupa ku pang beken nga magpuyrat mga itu ngaytu nga kat antur na ngaytu. Kaꞌilangan ipaꞌuyut ku gasiꞌ sira it pagꞌaypeten ku. Pagnegan nira gasiꞌ i gaꞌmaran ku, isaꞌun sang siraan nat dati nga mga tupa, baw esa-esa gasiꞌ i manigꞌeper nira.

Juan 11:52

Baw ega lamang bangsat Judio, in daꞌga isaꞌun mabwat sira nga sang siraan it matingped yang mga anak it Ampuꞌang Diyus nga gumaring kat paꞌari-aring rugar.

Mga Binwat 19:19

Dakel sira nga, lamang namayaꞌ na sirat Ampuꞌan, may pagsarigan nira pang beken, nga subuk mutyaꞌ, duwaꞌa, baw beken pang kiyaꞌrutan. Ta, egay beken, mga kasuratan nga pamagsusuratan it kaꞌrut nira ngayti, ipiyagparada nira nang muꞌsa, bawnga siyuriban kat matat kadakel. May kimnatu-katu it regat muꞌsa ngayting mga kasuratan, nagkantidad it subrat limang pulung ribu.

Efeso 2:17

Limnampud kanya situt banwa ka ipiyangadal yat katataawan in magꞌuꞌunu makanira i matuud nga kaꞌimbengan it nakem, kamu nga mga ega Judio nga paꞌaateng alaid kat Ampuꞌang Diyus, baw kami nga mga Judio nga adeꞌdeng it kanya.