Lucas 10:21 - Tagbanwa

²¹ Kat iting uras, piyasagya nga banar it Espiritu Santo si Jesus. Egay beken, nanalangin kanya nga magꞌaat, “Amaꞌ, pagbantugun ku ikaw nga Ampuꞌan it langit baw banwa, sabap ipiyagtaguꞌ muy kamatuudan ngaytu isaꞌun ega matantuwan it makakaꞌrut baw mapipikir kat sadiling pasepsep lamang. Iyan i piyaꞌyagan mu, mga taw nga mapiyababaꞌ nga magpasbung it dekeyeꞌ nga waꞌwaꞌ. Talagang matuud tu, Amaꞌ, ka iyan i ipiyabetang-betang mu nga magkasagyaan mu.”

Lucas 10:21 Iomraidhean Croise

Isaias 53:11

Maat it Ampuꞌang Diyus, “Pagkatupus it kakuriꞌan, magantiyan siꞌ it kasagyaan, sabap matantuwan ya nga ega desang kaꞌuruꞌ-uruꞌan i siyagkaꞌan ya nga kakuriꞌan. Kat kamatuudan nga pagkilala it aken it manigsirbi ku ngaytu nga mataldeng, dakel nga taw i buwaten ya nga mataldeng kat panleteg ku. Sabap tanggungun ya i mga kasalaꞌan nira.

Mateo 16:17

Pagtubag ni Jesus, maat ya, “Magkasagya ka, Simon nga anak ni Jonas, sabap kamatuudan ngaytung ituꞌun, ega ipiyaꞌrut it imu it maski siyu nga taw, in daꞌga Amaꞌ ku nga duꞌun it langit.

Mateo 21:16

Maat nira it ki Jesus, “Unu, magkagnegan muy pagꞌampangen nira ngayan?” “Eeꞌ, magkagnegan ku,” maat ni Jesus. “Unu, ega paꞌ nabasa mi duꞌun it isiyurat nga ampang it Ampuꞌang Diyus ngayan nga magꞌaat, ‘Gumaring kat baꞌbaꞌ it mga dedekeyeꞌ nga mangaꞌwaꞌ pati mga paduduꞌun paꞌ, ipagpatlaꞌ muy pagbantug it imu.’ ”

Mateo 3:7

Temed ta, namuyaan ni Juan nga dakel i mga Pariseo baw mga Saduceo nga magpaꞌaduꞌut kanya ka magpabawtis gasiꞌ. Maat yat kanira, “Unuka situ kamu nga mga mapiyandayaꞌ nga subung it adat it dukul? Siyuy miyaat nga mapalagyuwan mi i panriga nga magꞌaꞌabut?

Marcos 10:15

Matuud tu i iꞌaat ku ngaytut imyu, nga in siyu i ega pasbung it waꞌwaꞌ nga dekeyeꞌ kat pagpasakep yat pamegbeg it Ampuꞌang Diyus, ega talaga makasled duꞌun it kaꞌadiꞌan ya ngaytu.”

Lucas 15:5

Ta, pagkaparag ya, magsasagya nga ulakbayen ya nat muliꞌ.

Lucas 15:9

Ta, pagkaparag ya, pangimbitaren yay mga iba-iba ya baw mga kamalay ya. ‘Sigi,’ maat ya, ‘paragiꞌ kamu it kasagyaan ku, ka naparagan ku nagay naꞌlam ku ngayan nga pirak ku.’

Juan 11:41

Pagkaꞌampang ya kayti, inawaꞌ niray maglelpen ngayti nga batu. Yimnaꞌngad si Jesus bawnga miyampang kanya nga magꞌaat, “Amaꞌ, magpasalamat akut imu ka pagtubagen mu aku.

2 Corinto 4:3

In beteꞌ subuk magtataguꞌ paꞌ i paꞌaaten it Magayen ngaytung Baritaꞌ nga ipagpangadal namen, pagsisiguruun ku nga atkaytu lamang kat mga taw nga kamatayneng panriga nga egay kaskedan i abutun.

Efeso 1:11

Pakilagpit tami it ki Cristo ngaytu i pagpanggaringan it ildawan ta it karibriyan gasiꞌ kat pagdadarapaꞌen. Garing it tagna-tagnaꞌ paꞌ piniliꞌ ya kita nga lagi nga ildawan ya it kagayenan ngaytu. Sigun nagaytu kat pabetang-betang ya, kanya nga magpabetang-betang it muꞌsa uyun kat magayen nga paꞌiguꞌ-iguꞌ nga kaꞌirgan ya.

Efeso 1:5

Kat kadakulat raras yat aten, talagang ipiyasiguru ya nga, kita, magbaraꞌ nga mga anak ya sabap it buwaten ni Jesu-Cristo ngaytu. Talagang ituytu i pabetang-betang yang lagi baw kaꞌirgan ya.