Juan 7:35 - Tagbanwa

³⁵ Namagrunding-rundingen siꞌ i mga Judio ngayti, “Ay ari tuy aduꞌunan it taw ngaytu nga ega maparagan tami? Barang duꞌun i aduꞌunan ya it mga kaꞌibaan ta ngayan nga mga Judio nga nagpakilaꞌuk-laꞌuk nat mga Griego duꞌut banwa nira, ka duꞌun nat kanira i panulduꞌan ya.

Juan 7:35 Iomraidhean Croise

Isaias 49:6

Maat it Ampuꞌang Diyus it aken nga manigsirbi ya, “May subraꞌ paꞌ nga mabantug nga ipabwat kut imu, puyra it papaꞌuliꞌen mu ngaytu i mga ipiyaꞌped ku nga mga tungtung-inapuꞌ ni Jacob, nga bangsa nga Israel. Ipatindeg ku ikaw nga bilang tidaw it mga taw nga ega kat bangsa nga Israel, ka maꞌyagan mu i muꞌsang taw situt sinirungat langit pasar it dalan it karibriyan nga gumaring sinit aken.”

Mateo 12:21

Baw iyan karibriyan nga pagꞌiꞌinawaren it muꞌsang bangsa, isarig nira it kanya.”

Lucas 2:32

Maꞌyagan yay mga bangsa nga ega Judio pasar it dalan it karibriyan. Baw sabap it kanya ngaytu, dumakulaꞌ i kabantugan nameng mga Judio nga mga taawan mu, nga tungtung-inapuꞌ ni Israel.”

Juan 12:20

Ta uyut it kadakel nga miyabut duꞌut Jerusalem nga pakiragiꞌ it pistaꞌ ngayti baw sumamba it Ampuꞌang Diyus, may pirang kataawan nga mga Griego.

Juan 7:1

Ega naꞌlay napanaw siꞌ na Jesus, nanlekep-lekep it Galilea. Pagtemden yang ega paꞌ paꞌaduꞌun it Judea ka kuꞌimatayen kanyat mga pagbayaꞌen it mga Judio duꞌun.

Juan 8:22

Pagkagneg nira, namagrunding na sira, nga magꞌaat, “Barang sayan mangeget kanya. Yay paꞌaaten ya ngayang daꞌta kapaꞌaduꞌun it aduꞌunan ya ngayti.”

Mga Binwat 11:18

Pagkagneg it mga magpakidaꞌeg ngaytit ki Pedro, mindek na sirat pakibatir. Iyan siꞌ i binwat nira, biyantug niray Ampuꞌang Diyus. Maamaatan sira, “Ta, in atkayan palan, inildawanan na gasiꞌ it Ampuꞌang Diyus i pati mga taw nga ega Judio, nga masinguliꞌan baw indiꞌan nira i mga kasalaꞌan nira, isaꞌun makanira i kaꞌgenan nga egay kaskedan.”

Mga Binwat 11:20

Takaꞌ, uyut it mga magpangadal ngayti i beken nga, lamang Judio sira, duꞌun i diyakulaꞌan nira it Chipre baw Cirene. Ta, pagꞌabut nira duꞌut Antioquia ngayti, nangadal sira duꞌun gasiꞌ it mga Griego pasar it Ampuꞌan nga si Jesus.

Mga Binwat 14:1

Pagꞌabut na Pablo, duwa ni Bernabe, duꞌun it Iconio, binwat nira, subung nagat buwat nira ngayti duꞌun it Antioquia, nga siminled sira duꞌun it papagsambaan ka nanulduꞌ. Timindek nga banar i mga ampang nira kat nakem it mga magpagneg, aypaꞌ talagang dakel nga dakel i namayaꞌ, mga Judio baw ega Judio gasiꞌ.

Mga Binwat 17:4

Pagkagneg nira it panulduꞌ na Pablo, duwa ni Silas, dakel na i namayaꞌ it pagꞌaaten nira ngayti. May namayaꞌ naga nga mga Judio, temed yay dakel nga banar, sira nga maski ega Judio temed masiyambaen naga it Ampuꞌang Diyus. Pati mga babay nga mataꞌas i duguꞌ, dakel gasit kanira i namayaꞌ it ki Jesus.

Mga Binwat 18:4

Kada Aldaw it Kapaꞌnaan, magpanulduꞌ kanya duꞌun it papagsambaan it mga Judio, ka ipagpaꞌyag yay Magayeng Baritaꞌ isaꞌun sana, mamayaꞌ gasiꞌ i mga Judio baw Griego nga mamagsamba duꞌun.

Mga Binwat 21:21

Nabaritaꞌan nira nga ipagtulduꞌ mu nga pirmi kat muꞌsang mga Judio kat piyanawan mung mga banwa nga indiꞌan na niray mga urdin ni Moises. Ipagꞌaat mut kanira, kunuꞌ, nga ega na turiꞌan i mga anak nirang lalaki baw ega na sunudun i muꞌsang kaꞌugaliꞌan nga ipiyasubli ni Moises it aten.

Mga Binwat 22:21

Temed maat ya sit aken, ‘Mapanaw ka kayti, ka duꞌun i pagtaꞌgan kut imu it mangadal, duꞌut babanwaan it mga taw nga ega Judio.’”

Roma 1:16

Talagang ipagpabetang ku nga ega basta-basta i Magayen ngaytung Baritaꞌ, ka pagꞌuꞌrutan kung banar nga duꞌun i keseg it Ampuꞌang Diyus. Sabap ituy pabetang-betang ya nga ikaribri it muꞌsang taw nga mamayaꞌ nga uꞌna nay mga Judio, subung naga i beken nga bangsa nga maski ega Judio.

Efeso 3:8

Kalililuꞌan talagaytu ka maski piyakatimawaꞌ nga taawan it Ampuꞌang Diyus, akuy timawaꞌ pat kanya. Takaꞌ maski atkayan, kat kadakulat ildaw ya, napakay ya naga aku nga binggayan it itung buwaten, nga ipangadal ku duꞌun it mga taw nga ega Judio i pasar it kagayenan nga magkapisiꞌ duꞌun it ki Cristo, kagayenan nga bastanting-bastanti baw ega pagtaꞌseben it pikiran.

Colosas 1:27

Ituy tagu-taguꞌ nga pabetang-betang nga ipiyaꞌrut ya na, nga mga bangsa it taw nga ega Judio i maꞌildawan ya it daꞌna masugid nga kagayenan. Eeꞌ baꞌ, mapakay na nga kamu na i pagtatakenaꞌan na ni Cristo, nga ituy puꞌun-sabap it kasiguruwan mi it kagayenang tumbas kat pagdadarapaꞌen.

1 Timoteo 2:7

Ta, kat pagpangadal it ituꞌun ngaytu, piyaꞌapustul ya aku. Tiyaꞌeg ya aku nga manigpaꞌrut it karibriyan ngaytu duꞌun it mga taw nga ega Judio, ka ipanulduꞌ kut kanira i kamatuudan ya, isaꞌun pamayaꞌnen nira. Matuud tuy pagꞌaaten ku ngaytu. Egaytu maat ambut ku.

2 Timoteo 1:11

Ta it isaꞌun makapaꞌyag i Magayen ngaytung Baritaꞌ, esa akung binwat nga apustul baw manigpangadal.

Santiago 1:1

Aku nga si Santiago, nga manigsirbi it Ampuꞌang Diyus baw Ampuꞌan nga si Jesu-Cristo, i tagsurat kaytu. Ipagpaꞌabut ku i aken nga pangumusta kat muꞌsang piniliꞌ it Ampuꞌang Diyus nga taawan ya, nga natari-tariwanak na kat paꞌari-aring rugar.

1 Pedro 1:1

Aku nga si Pedro, nga esang apustul ni Jesu-Cristo, i tagsurat kaytu. Mga pagsuratan ku, kamung mga piniliꞌ it Ampuꞌang Diyus nga mga taawan ya, nga subuk tari-tariwanak baw dayuꞌan kat rugar it Ponto, Galacia, Capadocia, Asia baw Bitinia. Sabagay magꞌiꞌistar kamu paꞌ situt sinirungat langit, takaꞌ yay matuud, bilang mga dumadayuꞌ kamu lamang.