Juan 6:57 - Tagbanwa

⁵⁷ Egen talagay Amaꞌ nga timnaꞌeg it aken it paꞌasitu baw aku, egen gasiꞌ sabap it kanya. Atkayan nagay in siyu-siyu nga kumaꞌen it aken. Egen kanya sabap it aken.

Juan 6:57 Iomraidhean Croise

Mateo 16:16

Katubag si Simon Pedro, maat ya, “Anak ka talaga it Ampuꞌang Diyus nga egen it egay kaskedan. Ikaw talagay isiyanggup ya nga Cristo.”

Juan 14:19

Ega na maꞌlay nga timpu, daꞌku na maltegan it kadakel ngayting ega magpamayaꞌ it aken. Temed kamu, maltegan mi naga aku. Baw sabap it magꞌegen akut paꞌuliꞌ, siguradu nga kamu gasiꞌ, mabut nga magꞌegen kamu naga kat matuud nga kaꞌgenan nga egay kaskedan.

Juan 14:6

Timnubag si Jesus, maat ya, “Aku na ngaytu i dalan, aku i kamatuudan baw aku gasiꞌ i kaꞌgenan. Egay kapaꞌaduꞌun it Diyus Amaꞌ in daꞌga akuy dalan nga panawan ya.

Juan 17:21

isaꞌun magꞌurunyun sirang muꞌsa. Subung nagat aten, Amaꞌ, nga nagꞌuyun ta nga banar, ikaw sinit aken, aku asat imu, sang kagina-ginawaan ta lamang. Pagꞌangutun ku nga urunyun sira kat kaꞌirgan mu, isaꞌun sira baw kita, subuk sang kabilu-bilugan na. Pagꞌangutun kuytu isaꞌun pamayaꞌnen it mga katataawan nga ikaw i nagtaꞌeg it aken.

Juan 3:17

Sabap ega yay piyapaꞌasituwan it Ampuꞌang Diyus it Anak ya, betanganan it ukuman nga panriga i katataawan, in daꞌga isaꞌun maribri ya i katataawan ngaytu.

Juan 5:26

Iyan Amaꞌ, egay piyanggaringan it kaꞌgenan ya ka kanyay puꞌun it kaꞌgenan. Baw ipiyabetang-betang ya nga atkayan gasiꞌ i kaꞌgenan it Anak ya.

Juan 6:29

“Ta itu bay ipagpabwat it Ampuꞌang Diyus, kaꞌilangan nga mamayaꞌ kamu it tiyaꞌeg ya nga paꞌasitu,” maat i tubag ni Jesus it kanira.

Juan 6:38

Sabap nanlampud aku nga garing duꞌut langit, ega enged ku, buwaten ku i sadili ku nga kaꞌirgan, in daꞌga iyan kaꞌirgan it nagtaꞌeg it aken.

1 Corinto 15:22

Sabap in magꞌuꞌunu matay i muꞌsa sabap it kabit nira duꞌun it ki Adan, atkayan naga, egnen it paꞌuliꞌ i muꞌsang magpamayaꞌ sabap it kabit nira duꞌun it ki Cristo.

1 Corinto 15:45

Ka magsusurat duꞌut kasuratan nga iyan uꞌna nga taw nga si Adan, giyuna baw binggayan it ginawa. Temed subraꞌ kaytu si Cristo, nga pangaran it kanya, sauryan nga Adan. Ka giyantiyan i bilug ya it panlangit nga bilug baw nagbaraꞌ kanya nga manigbegay it panlangit nga kaꞌgenan nga egay kaskedan.

2 Corinto 13:4

Iyan iriyansang si Cristo duꞌut krus, kat panleteg it katataawan, taw lamang kanya nga egay kakayaan. Temed pagꞌegen yat paꞌuliꞌ, natanyag na nga duꞌut kanya i guna it Ampuꞌang Diyus. Atkayan gasiꞌ i aken ka, kat pakilagpit kut ki Cristo, iyan asan aku ngayat imyu katꞌesa, kaꞌaat ka egay pudir ku nga mukuman it mga kasalaꞌan mi ka nagpalulus aku lamang. Temed pagꞌabut ku siꞌ asan, in kaꞌilangan ku nga mukuman it imyu, kat keseg it guna it Ampuꞌang Diyus, ega itaguꞌ ku i pudir ku nga ipiyagrumra ni Cristo it aken.

Galacia 2:20

Ta kayti, maski egen aku paꞌ ngaytu, pagkilalaen ku nga subung it ega na akuy egen in daꞌga si Cristo na i egen kat bilug ku. Ka ega na aken nga kaꞌirgan i pagsunudun ku, in daꞌga kaꞌirgan ya na. Aypaꞌ mintras situ aku pat banwa, magpangaꞌgenan aku kat keseg it pamayaꞌ baw pagsarig ku it kanya nga Anak it Ampuꞌang Diyus, kanya nga nagpagtas it ginawa ya kat kadakulat raras ya it aken.

1 Tesalonica 1:9

sabap sira na mismu i magsugid it in magꞌuꞌunuy pangaꞌgenan baw pangadal namen asan it imyu. Ipagsugid nira gasiꞌ in magꞌuꞌunu inindiꞌan mi na i pamagsambaen mi nga mga pagbete-beteꞌen nga diyus, sabap natantuwan mi na nga iyan talagay dapat nga sirbiyan, matuud ngaytu nga Ampuꞌang Diyus nga talagang egen.

Hebreo 9:14

Ta in atkayan, subraꞌ nga may kapulusan it duguꞌ ni Cristo nga piyaturuꞌ ya! Sabap kat keseg it Espiritu Santo nga egay kamataynen ipiyagbegay ya i ginawa ya, kanya nga egay maski unu nga maꞌiway u kakurangan kat panleteg it Ampuꞌang Diyus. Duguꞌ ngaytu ni Cristo i magkalimpiyuꞌ it nakem tami kat muꞌsang karaꞌe-raꞌetan nga binwat, nga yay magtaban it taw kat kamatayneng panriga nga egay kaskedan. Aypaꞌ kayti, pagsirbiyan ta nat masagyay nakem i Ampuꞌang Diyus nga egen it egay kaskedan.

1 Juan 4:9

Eeꞌ baꞌ, talagang ipiyalteg nat Ampuꞌang Diyus i kadakulat raras yat aten, iyan ipiyalampud ya na ngayan situt denaꞌ i Anak yang paeꞌesa-esa nga egay kasbung, nga tumanggung it kasalaꞌan ta, isaꞌun mabgayan ya kita it kaꞌgenan nga egay kaskedan.