Juan 5:24 - Tagbanwa

²⁴ Talagang matuud tuy itu nga ipagꞌaat kut imyu. Iyan magpagneg it mga pagꞌampangen ku baw magpamayaꞌ it nagtaꞌeg ngaytit aken, iyan i may kaꞌgenan nga egay kaskedan. Ega na ukumanan kanya it mabeꞌgat. Imbis nga panriga nga kamataynen, siguradung may magꞌaꞌareg nat kanya nga kaꞌgenan nga egay kaskedan.

Juan 5:24 Iomraidhean Croise

Mateo 25:46

Ta, egay beken, idedeg na sira duꞌun it panriga nga egay katupusan. Temed iyan mga mataldeng ngaytu kat panleteg it Ampuꞌang Diyus, tumanggap sirat kaꞌgenan nga egay kaskedan.”

Marcos 16:16

Siyu-siyu nga pakimatuud baw mamayaꞌ baw pabawtis, siguradu yan nga maribri. Temed in siyuy ega mamayaꞌ, siguradu yan nga ukumanan it panriga.

Juan 11:26

Baw in siyu nga kamatuudan i pamayaꞌ yat aken baw magpangaꞌgenan uyun it pamayaꞌ ya ngaytu, may kaꞌgenan ya talaga nga egay kaskedan. Ta unu, pagpamayaꞌnen muytu?”

Juan 12:44

Igiyaꞌuy na ni Jesus nga magꞌaat, “Iyan mamayaꞌ baw magsarig it aken, ega lamang aku i pagpamayaꞌnen baw pagsarigan ya, in daꞌga pati kanya nga nagtaꞌeg it aken it paꞌasitu.

Juan 20:31

Temed iyan mga magsusurat situ, isiyurat tu ka isaꞌun mamayaꞌ kamu nga si Jesus na ngaytu i isiyanggup nga Manriribri baw kanyay Anak it Ampuꞌang Diyus. Baw kat pamayaꞌ baw pakilagpit mit kanya, siguradu nga maꞌimyu i kaꞌgenan nga egay kaskedan.

Juan 3:16

Ka talagang pagrarasan nga banar it Ampuꞌang Diyus i muꞌsang taw situt sinirungat langit. Aypaꞌ ibinggay yay Anak ya nga paeꞌesa-esa, isaꞌun in siyuy mamayaꞌ baw sumarig it kanya, ega kaꞌaduꞌun it kakuriꞌan, in daꞌga mabgayan kanyat kaꞌgenan nga egay kaskedan.

Juan 3:18

Talagang ega na betanganan it ukuman nga panriga i kumpur mamayaꞌ baw sumarig it kanya. Temed iyan ega magpamayaꞌ, inukumanan sirang lagi nga mabgayan it panriga, sabap ega pagpamayaꞌnen niray paeꞌesa-esa ngaytung Anak it Ampuꞌang Diyus.

Juan 3:36

Iyan magpamayaꞌ baw magsarig nat Anak ngaytut Ampuꞌang Diyus, may kaꞌgenan ya na nga egay kaskedan. Temed iyan nga ega magpamayaꞌ it Anak ngaytu, ega makanya i itung kaꞌgenan. Siguradung ega kaꞌbut duꞌut kagayenan nga duꞌun it langit. Magtetdek paꞌ duꞌun it kanya i iseg it Ampuꞌang Diyus.

Juan 4:36

Aypaꞌ magayen in papuꞌun kamu na kayti it kumayeg. Nakasiguru talaga i ibgay it Ampuꞌang Diyus nga tumbas kat mga binwatan mi, nga papamayaꞌnen mit aken i mga taw isaꞌun makanira i kaꞌgenan nga egay kaskedan. Talagang ega basta-bastay kasagya it iyan manigkayeg, atnaga i nanguma.

Juan 6:40

Sabap talagang itu i kaꞌirgan it Amaꞌ ku, iyan muꞌsa nga mamayaꞌ it aken nga Anak ya, baw sumarig it aken, begayan sira it kaꞌgenan nga egay kaskedan. Baw egnen ku sirang muꞌsa asan it umur nat banwa.”

Juan 6:47

Kamatuudan tuy iꞌaat ku ngaytut imyu. Iyan nga mamayaꞌ baw pasakep it aken, may kaꞌgenan ya nga egay kaskedan.

Juan 6:50

Temed may pangaꞌen siꞌ nga garing duꞌut langit baw in siyu-siyuy kumaꞌen it itu ngaytung pangaꞌen, ega na matay kanya.

Juan 6:51

Aku i pangaꞌen ngaytu nga magbegay it kaꞌgenan, nga limnampud nga garing duꞌut langit. May kaꞌgenan nga egay kaskedan it in siyu-siyuy kumaꞌen kaytu. Iyan pangaꞌen ngaytu nga ibgay ku, nga megay it kaꞌgenan nga egay kaskedan kat muꞌsang katataawan, sadili kung bilug.”

Juan 6:58

Sabap aku na ngaytu i matuud nga pangaꞌen nga garing duꞌut langit. Kayti, in siyu-siyuy kumaꞌen it itu nga pangaꞌen, may kaꞌgenan ya nga egay kaskedan. Ega matay nga subung it mga kagiyaringanan mi, maski maat nakakaꞌen na sira it manna ngayting pangaꞌen nga gimnaring duꞌut langit.”

Juan 8:51

Kamatuudan tuy pagꞌaaten ku ngaytu, nga in siyu-siyu nga magpangaꞌgenan uyun kat mga ipagtulduꞌ ku ngaytu, ega na labayen yay kamataynen.”

Roma 8:1

Temed kayti, ituy kamatuudan nga iyan mga maglalagpit nat ki Cristo Jesus, nga magpasakep nat kanya, talagang ega na maꞌulug kat maski unu nga ukuman nga panriga.

1 Tesalonica 5:9

Sabap ega iyan i piniliꞌan it Ampuꞌang Diyus it aten, isaꞌun rigaen ya, in daꞌga, isaꞌun matanggap tami i karibriyan nga maꞌaten sabap it Ampuꞌan tami nga si Jesu-Cristo.

1 Pedro 1:21

Ta kayti, sabap it binwat ngaytu ni Cristo nga panribri, pagpakimatuudun baw pagsarigan mi nay Ampuꞌang Diyus, kanya nga minggen it kanya it paꞌuliꞌ baw minggay it kanya it ega basta-bastang kabantugan. Nakasiguru na kayti i pagsarig baw inawar mi, nga duꞌun na it Ampuꞌang Diyus.

1 Pedro 1:5

Ta sabap it pagsarig baw pamayaꞌ mi it kanya, pagtatarimaen kamu nga pirmi kat guna it Ampuꞌang Diyus, mintras pagꞌeꞌlaten mi i karibriyan nga tumanen ya baw itanyag asan it umur nat banwa.

1 Juan 3:14

Temed maꞌyag nat aten nga kita, ega na subuk patay kat panleteg it Ampuꞌang Diyus, in daꞌga, pagbebgayan ta nat kaꞌgenan nga egay kaskedan. Urut ta naytu sabap may raras ta na talaga it mga sulsug ta kat pamayaꞌ. Iyan ega pay raras ngaytu, subuk sakep paꞌ kanyat kamataynen.

1 Juan 5:1

In siyu-siyuy magpamayaꞌ nga si Jesus, kanya nay paꞌaateng Cristo ngayti nga Manriribring Adiꞌ nga isiyanggup, subung na kanyat ipiyanganak it Ampuꞌang Diyus. Baw yay matuud, in pagmaꞌalen ta kanya ngaytu nga bilang nanganak, simpri rarasan ta na i kumpur bilang ipiyanganak ya nga beken.