Juan 5:19 - Tagbanwa

¹⁹ Ta it atkayti, inaat ni Jesus i mga Judio ngayti, “Kamatuudan tuy pagꞌaaten ku ngaytut imyu, nga egay magkabwat it Anak in kat sadili ya na lamang, in daꞌga iyan i pagbuwaten ya, iyan nga magkaltegan ya nga pagbuwaten it Amaꞌ. Iyan pagbuwaten it Amaꞌ ya, simpri iyan naga i buwaten ya.

Juan 5:19 Iomraidhean Croise

Genesis 1:1

Puꞌun-puꞌun it langit baw banwa, giyuna it Ampuꞌang Diyus.

Genesis 1:26

Bawnga maat siꞌ it Ampuꞌang Diyus, “Iyan nay magayen tang buwaten, taw, baw ipasbung tat aten. Ibgay tat kanira i pudir kat muꞌsang banwa, pati betang ya nga subuk sedaꞌ, mga manu-manuk, muꞌsang ramu-ramu nga magkaꞌpet baw ega, baw kada ramu-ramu nga magkambang kat sagpaw it lugtaꞌ.”

Exodo 4:11

Temed maat i tubag it AMPUꞌANG DIYUS, “Siyu i nagbuwat it baꞌbaꞌ it taw? Siyu i may kaya nga magkapabngel baw magkapabuyun ya i taw? Baw siyu gasiꞌ i magkapableg it taw baw siyu i magkabgay it maꞌyag nga panleteg? Daꞌga aku ga nga AMPUꞌANG DIYUS i may kakayaan kaytu?

Mateo 26:39

Nagpaꞌala-alaid si Jesus duꞌut kanira. Kiminleb kanya bawnga nanalangin, nga magꞌaat, “Amaꞌ ku, in mapakay sana, ipaꞌalaid mut aken i itu nga labayen ku nga kakuriꞌan. Takaꞌ ega aken nga kaꞌirgan i masunud, in daꞌga imu nga kaꞌirgan.”

Lucas 21:15

Sabap aku ngaytu i megay it imyu it pangangampang mi nga may ega basta-bastang kasepsep, nga ega kaya nga tubagan u pakidaꞌgan it maski siyu nga mga kakuntraꞌ mi.

Juan 10:18

Egay taw nga makagtas it ginawa ku, in daꞌga ituy kaꞌirgan ku nga ibgay. Aku i magtatagpuꞌun it ginawa baw may guna ku nga ibgay i ginawa ku baw baiꞌen it sumaꞌup. Itu gasiꞌ i taꞌeg it aken nga garing duꞌun it Amaꞌ ku.”

Juan 12:49

Sabap egay pagꞌampangen ku nga pagsadiliyen ku lamang, in daꞌga iyan Amaꞌ nga nagtaꞌeg it aken it paꞌasitu, iyan i magꞌaat in unuy ampangen ku baw ipaꞌyag ku.

Juan 12:50

Baw talagang magkaꞌrutan ku nga iyan mga ampang ya ngaytu i puꞌun it kaꞌgenan nga egay kaskedan. Aypaꞌ in unuy ipagpasugid it Amaꞌ, simpri iyan i pagꞌampangen ku.”

Juan 14:10

Unu, daꞌka magpamayaꞌ nga aku baw Amaꞌ ku, sang kagina-ginawaan kami? Iyan mga pagꞌampangen ku ngaytu nga ipagꞌaat kut imyu, egaytu pagsadiliyen ku na lamang, in daꞌga iyan Amaꞌ nga kasagpun kut ginawa ku, iyan i magbuwat it mga buwaten ya ngaytu.

Juan 2:19

Katubag si Jesus, maat ya, “Ranggaꞌen mi i balay ngaytu, ka ipaꞌuliꞌnan ku it tulu lamang nga aldaw.”

Juan 3:3

Katubag si Jesus, nga maat ya, “Itu talagay kamatuudan nga isugid kut imu. Egay makaꞌuyut duꞌun it kaꞌadiꞌan it Ampuꞌang Diyus, in daꞌga iyan lamang nga ipiyanganak it sumaꞌup.”

Juan 5:21

Ka in magꞌuꞌunu pagꞌegnen it Amaꞌ i mga miyatay, atkayan naga egnen naga it Anak i kumpur ireg ya nga egnen.

Juan 6:38

Sabap nanlampud aku nga garing duꞌut langit, ega enged ku, buwaten ku i sadili ku nga kaꞌirgan, in daꞌga iyan kaꞌirgan it nagtaꞌeg it aken.

Juan 8:28

Aypaꞌ maat siꞌ ni Jesus it kanira, “Basta makapatindeg mi na i krus nga pagraransangan it kanya nga Taga Langit nga Ipiyanganak it Taw, sikayan payan matantuwan mi nga talagang matuud i ipagsugid ku nga in siyu aku. Maꞌrutan mi nga egaytuy pagbuwaten ku nga kat sadili ku na lamang, in daꞌga pagꞌampangen ku, iyan nga ipagtulduꞌ it aken it Amaꞌ ku.

Juan 9:4

Kaꞌilangan kita, buwaten tami i mga ipagpabwat it Ampuꞌang Diyus, kanya nga nagtaꞌeg ngaytit aken it paꞌasitu. Kaꞌilangan buwaten tami mintras egen tami paꞌ ka yay subuk aldawun. Sabap in patay na, ega nay rugar nga muwat, kabilangan ya delemen na. Ta, siyu pay makabwat? Daꞌga ega na?

Mga Binwat 2:24

Talagang nakapaꞌimatay mi si Jesus ngaytu, temed inggen kanyat paꞌuliꞌ it Ampuꞌang Diyus, ka ega mapakay nga mapuꞌgunan kanya it kamataynen.

Roma 6:4

Aypaꞌ, kaꞌalimbawaan it pagbawtis ngaytut aten, natay baw ilimbeng na nga iba ni Cristo. Temed it inggen naga ngaytu kanya it paꞌuliꞌ kat keseg it guna it Diyus Amaꞌ, subuk sang tamiyan nagay inggen. Aypaꞌ, kaꞌilangan mangaꞌgenan tami na uyun duꞌun it pagbaꞌgu ngaytut pangaꞌgenan ta.

Roma 8:11

Matuud tu, in magꞌuꞌunu kat guna it Espiritu Santo ya inggen it Ampuꞌang Diyus si Jesus it paꞌuliꞌ, atkayan naga, maski matay paꞌ i bilug mi, kat guna it Espiritu Santo ya nga ipiyapasarum it Ampuꞌang Diyus kat bilug mi, egnen ya gasiꞌ kamu it paꞌuliꞌ in timpu na.

1 Corinto 15:12

Ta kayti, it ipagpangadal namen nga, si Cristo, nagꞌegen it paꞌuliꞌ, ta unuka pagꞌaaten it beken asat imyu nga ega egnen it paꞌuliꞌ kat pagdadarapaꞌen i bilug it mga miyatay?

2 Corinto 4:14

Sabap magkaꞌrutan namen nga Ampuꞌang Diyus nga minggen it paꞌuliꞌ it Ampuꞌan nga si Jesus, egnen ya gasiꞌ kami sabap it pakilagpit namen it ki Jesus ngaytu, bawnga ipabulun ya kita nga muꞌsa kat adapan ya, nga mga taawan na nga ega nay kakasalaꞌan.

2 Corinto 5:10

Sabap, yay matuud, mabut i aldaw nga kada esat aten, talagang ipaꞌadap it ki Cristo nga Manigꞌukuman, isaꞌun matanggap tami i tumbas nga uyun kat in unuy binwat ta, magayen u maraꞌe-raꞌet, situt banwa ngaytu.

Efeso 2:5

Sabap maski subuk patay ta nang patay sabap it kasalaꞌan tami, subuk ipiyaꞌuyut ya na kita it ki Cristo nga inggen yat paꞌuliꞌ, nga begayan tami na it kaꞌgenang egay kaskedan. Talagang sabap lamang it ildaw ngaytut Ampuꞌang Diyus maribri tami kat panriga yat tagnang pangaꞌgenan ta.

Efeso 3:16

Ipagpanalangin ku duꞌut kanya nga garing kat kadakulat kabantugan ya nga egay kaꞌbusan, sana begayan ya kamut kaksegan it nakem, nga magꞌeꞌget talagay pamayaꞌ mi kat tabang it magsasarum nga Espiritu Santo.

Filipos 3:21

Kanya i may guna nga ipagkasakep ya it muꞌsang mga bagay. Baw kat keseg it guna ya ngaytu, baꞌguun ya i bilug ta nga pandenaꞌ, ipasbung ya nat kagayen it kanyang bilug nga panlangit.

Filipos 4:13

Iyan muꞌsa ngaytu, magkabwat ku sabap it keseg nga ipagꞌildaw ni Cristo it aken.

Colosas 1:11

Ipagpanalangin namen gasiꞌ nga kat keseg it ega basta-bastang guna ya, sana begayan ya kamu nga magbastanting-magbastanti i keseg it pamayaꞌ mi, isaꞌun magkateꞌteꞌ kamu baw magkasagkaꞌ it kakuriꞌan it magayen i nakem.

Colosas 1:16

Sabap si Cristo talagay nagguna it muꞌsa ngaytu nga mga duꞌut langit baw situt banwa, iyan mga magkaltegan ta baw iyan nga, lamang ega magkaltegan, temed may dakulang keseg baw pudir duꞌut kanirang pagsasakpan. Talagang muꞌsang-muꞌsa, kanya naga i giyaringan baw kat ikabantug ya sirang muꞌsa.

1 Tesalonica 4:14

Ka daꞌga baꞌ, pagpakimatuudun tami nga Ampuꞌan ngaytu nga si Jesus, natay kanya baw naꞌgen naga it paꞌuliꞌ? Aypaꞌ ka siguruun tami nga kumpur patay na nga maglalagpit it ki Jesus ngaytu, talagang egnen it Ampuꞌang Diyus it paꞌuliꞌ baw ipabayaꞌ ya it ki Jesus kat pamaꞌuliꞌ ya situ.

1 Pedro 3:18

Subung it ki Cristo nga, maski egay kakasalaꞌan ya, temed piyakuriꞌan kanya nga inimatay sabap it aten nga makasalaꞌan. Kat kaꞌsa lamang ngayti nga binwat ya tiyanggung yay kasalaꞌan tami isaꞌun makapaꞌuliꞌ ya tami duꞌun it Ampuꞌang Diyus. Natay talagay bilug ya temed inggen naga kanya it guna it Espiritu Santo.

Mga Ipiyalteg 2:23

Pangimatayen ku gasiꞌ i mga anak ya nga lupaw. Sikayan maꞌrutan it muꞌsang magpamayaꞌ nga aku i manigrikisaꞌ it kaꞌirgan baw in unuy kat nakem it taw. Talagang tumbasan kuy kada esat imyu uyun kat mga pagbuwaten mi.