Juan 4:23 - Tagbanwa

²³ Temed magꞌaꞌabut nay timpu, kayti na ngaytu, nga iyan mga maratuudan i pagsamba nirat Diyus Amaꞌ, sumamba na sirat tingled i nakem baw uyun kat kamatuudan nga garing duꞌut kanya, sabap itu talagay kaꞌirgan it Amaꞌ kat mga magsamba it kanya.

Juan 4:23 Iomraidhean Croise

Isaias 58:2

Sabagay aldaw-aldaw mamagsamba sirat aken, nga maat ireg nira nga ireg nga maꞌrutan i kaꞌirgan ku, subung nagat esang bangsa nga magbuwat it mataldeng baw ega magpaski kat mga urdin it Ampuꞌang Diyus nira. Mamagꞌangut sira sinit aken it mga ukuman nga mataldeng, baw kasagyaan nira kunuꞌ i pagsamba nirat aken.

Juan 1:17

Sabap ibinggay it Ampuꞌang Diyus i mga urdin ya duꞌut ki Moises nga ipiyagꞌurdin yat aten, temed iyan ildaw ya baw kamatuudan pasar it sadili ya, ipiyatantu yat aten duꞌun it ki Jesu-Cristo.

Juan 12:23

Katubag si Jesus, nga maat ya, “Naꞌbut nay timpu nga makapaliꞌwan nay kabantugan it Taga Langit nga Ipiyanganak it Taw.

Juan 16:2

Siguradu yang awaꞌen i pagkaJudio mi. Mabut i timpu nga in siyu-siyuy mimatay it imyu, kat pasepsep ya, tanud ya magayeng ipagsirbi duꞌun it Ampuꞌang Diyus i pagbuwaten ya ngayti.

Juan 16:32

Temed ta, mabut yan i uras, kayti na ngaytu, nga matari-tariwanak kamu. Manganya-kanya kamu nayan it uliꞌ duꞌut kanyang pagꞌiꞌistaran. Tananan mi nayan aku. Takaꞌ ega naga yan kaꞌesa-esa aku ka iba ku nagay Amaꞌ ku.

Juan 4:21

Tiyubag kanya ni Jesus, maat ya, “Sana Edeꞌ, pamayaꞌnen muy iꞌaat ku ngaytu. Magꞌaꞌabut nay timpu nga sambaen mi i Diyus Amaꞌ it ega lamang situt mungsuꞌ ngaytu u duꞌun it Jerusalem.

Juan 5:25

Ituy kamatuudan, mabut i timpu, kayti na ngaytu, nga magnegan it mga sakep it kamataynen i gaꞌmaran it Anak it Ampuꞌang Diyus, baw iyan nga pagneg baw sumunud, magꞌegen.

Juan 5:28

Ega maliluꞌan mi tu, sabap mabut talagay timpu nga magnegan it mga miyatay, nga maglelbeng na, i gaꞌmaran ya.

Roma 1:9

Yay matuud, pirmi ku kamung ipagpanalangin. Talagang urut tu it Ampuꞌang Diyus, kanya nga pagsirbiyan ku it muꞌsang keseg ku isaꞌun dakel i mamayaꞌ it Magayeng Baritaꞌ pasar it Anak ya ngaytu.

Roma 8:15

Matuud tu, mga anak it Ampuꞌang Diyus i panaꞌwag it aten, ka iyan Espiritu Santo nga magsasarum situt bilug tami, egaytu Espiritu it pagkaꞌuripen isaꞌun pirmi tang manguripeꞌpey kat adapan it Ampuꞌang Diyus sabap it mga kasalaꞌan tami. In daꞌga, kat panakem it Espiritu Santo ngaytu, magkatantuwan ta na nga inanak tami na talaga it Ampuꞌang Diyus. Aypaꞌ, kayti, mataꞌwag tami nay Ampuꞌang Diyus nga “Amaꞌ.”

Roma 8:26

Kat mga kakuriꞌan nga magkalabayan tami talagang dakulaꞌ nga tabang it aten it paniguru ta ngaytu. Atkayan naga, pagtabangen tami gasit Espiritu Santo kat in unu nga magkakurangan ta. Alimbawa kat panalangin. Ka ega naga magkaꞌrut ta manalangin uyun kat kaꞌirgan it Ampuꞌang Diyus. Temed maski atkayan, kat kadakulat sanguꞌ yat aten, pirmi gasiꞌ nga magpanalangin i Espiritu Santo ngaytu, nga bilang pagbatuꞌan ya kita kat adapan it Ampuꞌang Diyus. Baw Espiritu Santo ngaytu, magkapanalangin kanyat ampang nga ega mapakay in ampang it taw lamang.

Galacia 4:6

Ta it paribasay mga anak ya na kita, aypaꞌ piyapasaruman ya gasiꞌ kita it Espiritu Santo, iyan Espiritu Santo nga ipiyangadal baw isiyanggup it Anak ya nga si Jesus. Aypaꞌ, kat panakem it Espiritu Santo ngaytu, mayaꞌngan nay dilaꞌ tami it tumaꞌwag it Ampuꞌang Diyus it Amaꞌ.

Efeso 6:18

Muꞌsa ngaytu, buwaten mi tu kat keseg it panalangin. Magayen, kat panguꞌna it Espiritu Santo, mapiyanalangin kamu nga pirmi kat muꞌsang kalasit panalangin. Sarungaen mit magayen i itung buwat, paꞌresan, ega palubay-lubay. Baw sana muꞌsang mga magpamayaꞌ i ipagpanalangin mi.

Filipos 3:3

Temed yay matuud, ega sira in daꞌga kita i matuud nga mga taawan it Ampuꞌang Diyus. Ka aten nga pagsamba it Ampuꞌang Diyus, kat tabang tu it Espiritu Santo nga magsasarum situt bilug tami. Baw talagang pagsagyaan tami si Cristo Jesus, nga kanya talagay pagsarigan tami, ega maat mga pagbuwaten it taw nga subuk pagsunud it mga urdin.

Josue 24:14

Aypaꞌ kayti ngaytu, kaꞌilangan galangen mi it may iꞌlam i AMPUꞌANG DIYUS ngaytu baw sirbiyan mi kanya it kamatuudan. Indiꞌan mi na i mga pagbete-beteꞌen nga diyus nga nasulagan nga pagsambaen it mga kiyaꞌapuꞌ-apuꞌan mi duꞌun it Mesopotamia baw duꞌun it Egipto. Siguruun mi nga AMPUꞌANG DIYUS na lamang i pagsirbiyan mi.

1 Pedro 2:9

Temed kamu, mga taw kamu nga piniliꞌ it Ampuꞌang Diyus. Mga adiꞌ kamu kat kaꞌadiꞌan ya, baw mga sasirduti nga magsirbi it kanya. Subung kamu nat esang bangsat taw nga ipiyasiguru it Ampuꞌang Diyus nga talagang kanya na. Piniliꞌ kamu nga mga taawan ya isaꞌun ipatanyag mi i mga kalililuꞌan nga mga buwat ya. Ka kanya i nagpaliꞌwan it imyu kat kadleman it kasalaꞌan isaꞌun mangaꞌgenan kamu kat kaꞌyagan it ega basta-bastang kagayenan ya.