Juan 4:10 - Tagbanwa

¹⁰ Mampang siꞌ si Jesus, maat yat babay ngayti, “In beteꞌ naꞌrutan mu lamang in magꞌuꞌunuy kadakulat ildaw nga ibgay it Ampuꞌang Diyus, baw in nakilalaan mu na in siyuy magꞌaat ngaytut imu, ‘Paꞌimnun aku,’ ikaw nay mangut situt aken isaꞌun mabgayan ka it egen nga danum nga magkabgay it kaꞌgenan.”

Juan 4:10 Iomraidhean Croise

Exodo 17:6

Elaten ta kamu duꞌun it dakulang batu nga duꞌut Horeb. Pagꞌabut mi, bangkalen mu it sungkud mu i batu ngayan. Tumumbud yan i danum nga maꞌinum mi nga muꞌsa.” Ta, atkayti nga matuud i binwat ni Moises, nga pagleltegan it mga ginuꞌu ngaytit mga Israelita.

Isaias 42:6

Ituy pagꞌaaten it AMPUꞌANG DIYUS, “Uyun kat pabetang-betang ku nga purus mataldeng, ipiyatindeg ku ikaw. Tatarimaen baw tabangen ku ikaw nga pirmi. Ikaw i ibgay ku nga bilang tidaw kat muꞌsang mga bangsa, nga papaꞌgen it pakiꞌupakat ku it katataawan.

Isaias 9:6

Sabap ipiyanganak situt aten i esang waꞌwaꞌ. Ipiyagbegay i itung lalaki kat ikagayen tami. Kanya na i mamaalaꞌ it aten. Kanya ngaytu, kilalaen nga “Kalililuꞌan nga Manigpadisir,” “Ampuꞌang Diyus nga Gunaan,” “Amaꞌ tami nga Egay Pinꞌunan, Egay Kaskedan,” baw “Manigpamegbeg nga Magbegay it Kamatuudan nga Kaꞌimbengan.”

Zacarias 13:1

Maat pay paꞌugdun it AMPUꞌANG DIYUS, “Kat aldaw ngayan, paburusun kuy tumbud nga ipaglimpiyuꞌ it kasalaꞌan baw karaꞌe-raꞌetan it muꞌsang mga kaduguꞌ-duguꞌan ni David, baw mga magtataꞌid duꞌun it Jerusalem.”

Lucas 11:13

Ta, in kamu nga makasalaꞌan, magkaꞌrut naga megay it magagayen nga bagay kat mga anak mi, daꞌga subraꞌ na i Amaꞌ mi nga duꞌut langit? Talagang ibgay ya i Espiritu Santo ya kat matuud nga magꞌangut duꞌun it kanya.”

Juan 16:3

Talagang buwaten niraytu sabap it ega magkakilalaan nira aku, atnagay Amaꞌ.

Juan 17:3

Ituy mapisiꞌan nirat kaꞌgenang egay kaskedan, kamatuudang pagkilala nira it imu nga esa-esang matuud nga Ampuꞌang Diyus baw aku nga si Jesu-Cristo gasiꞌ nga tiyaꞌeg mu.

Juan 3:16

Ka talagang pagrarasan nga banar it Ampuꞌang Diyus i muꞌsang taw situt sinirungat langit. Aypaꞌ ibinggay yay Anak ya nga paeꞌesa-esa, isaꞌun in siyuy mamayaꞌ baw sumarig it kanya, ega kaꞌaduꞌun it kakuriꞌan, in daꞌga mabgayan kanyat kaꞌgenan nga egay kaskedan.

Juan 4:14

Temed iyan minum it danum ngayan nga ibgay ku, ega na kumuꞌinum pat sumaꞌup, ka subung naytut esang tumbud duꞌun it seled ya, nga magbegay it kaꞌgenan nga egay kaskedan.”

Juan 6:35

“Aku i paꞌaateng pangaꞌen ngayan nga magkabgay it kaꞌgenan,” maat ni Jesus. “Iyan pasakep it aken, ega na maat getmanan paꞌ, baw iyan nga mamayaꞌ nat aken, seked kaꞌnu-kaꞌnu ega na kumuꞌinum.

Juan 6:51

Aku i pangaꞌen ngaytu nga magbegay it kaꞌgenan, nga limnampud nga garing duꞌut langit. May kaꞌgenan nga egay kaskedan it in siyu-siyuy kumaꞌen kaytu. Iyan pangaꞌen ngaytu nga ibgay ku, nga megay it kaꞌgenan nga egay kaskedan kat muꞌsang katataawan, sadili kung bilug.”

Mga Binwat 9:11

Nagnegan siꞌ ni Ananias, maat it Ampuꞌan, “Ananias, mapanaw ka. Paꞌaduꞌun kat karsadaꞌ nga pagpangaranat Mataldeng. Balay na Judas i abutun mu. Aaten mu sira nga magtulus ka it taw ngayang pagpangaranat ki Saulo nga taga Tarso. Siging panalangin ya kayti.

Roma 8:32

Maski sadili yang Anak, ega ipiyagꞌimet it Ampuꞌang Diyus, in daꞌga ipiyalugut yat ukuman nga kamataynen kat ikagayen tami nga muꞌsa nga mga taw. Ta, it ipiyagbegay-matag yat aten i Anak ya ngaytu, daꞌga baꞌ iꞌatag ya nagat aten i muꞌsang bagay nga ipagkagayen tami?

1 Corinto 1:30

Maski kita, talagang garing duꞌut Ampuꞌang Diyus i magpakilagpit ta ngaytu it ki Cristo Jesus. Baw si Cristo Jesus ngaytu i binwat it Ampuꞌang Diyus nga ikakilala tami it kamatuudan nga kasepsep, nga kasepsep ngaytu nga paꞌaaten, mataldeng tami na kat panleteg it Ampuꞌang Diyus, ka ipiyagribri ta na kat panguripen it kasalaꞌan it aten, isaꞌun mangaꞌgenan tami na nga alaid kat muꞌsang kasalaꞌan.

1 Corinto 10:4

Atkayan naga i maꞌinum nira. Subung nagat kaꞌsa ngayti nga piyabugasꞌas i danum duꞌun it batu nga duꞌut Horeb. Batu ngayti, ladawan ni Cristo ngaytu nga bilang keseg nira nga magꞌiba-iba baw magtatarima nga pirmi it kanira.

2 Corinto 9:15

Temed may ipiyagꞌildaw yat aten nga talagang subraꞌ it muꞌsa. Dapat nga dakulaꞌ i pasalamat ta duꞌun it Ampuꞌang Diyus sabap it ipiyagꞌildaw ya ngaytu nga talagang ega masugid i kagayen ya.

Efeso 2:8

Talagang kaꞌildaw ngaytut Ampuꞌang Diyus, yanayan i puꞌun it naribri tami na kat panriga yat kasalaꞌan tami, sabap it pagsarig baw pamayaꞌ tami it ki Cristo. Baw maski pagsarig baw pamayaꞌ ta ngaytu, ipagbegay yat aten, egaytu maat kitay garing.

Hebreo 6:4

Naꞌaat ku, “in palugtan kamu,” sabap urut it Ampuꞌang Diyus in siyu may siyuy ega na magpaneꞌteꞌ it kanya. Ta magꞌuꞌunu paꞌ mapasinguliꞌ baw mapapaꞌuliꞌ it sumaꞌup duꞌun it Ampuꞌang Diyus i iyan nga namagpangindiꞌ na? Ka tagnaꞌ, naꞌyagan na sira pasar it matuud nga dalan, nakalabay na sira it ega basta-bastang ildaw nga garing duꞌut langit, baw kaꞌuyutan na gasiꞌ sira it piyasaruman it Espiritu Santo.

1 Juan 5:20

Baw talagang magkaꞌrutan ta nga limnampud na situt aten i Anak it Ampuꞌang Diyus, baw binggayan ya na kita it ipagkasepsep, isaꞌun makilalaan tami nga banar i matuud nga Ampuꞌang Diyus. Kayti magpakiꞌuyun tami na it Ampuꞌang Diyus sabap maglalagpit ta nat Anak ya nga si Jesu-Cristo. Yay matuud, si Jesu-Cristo ngaytu, kanya talagay matuud nga Ampuꞌang Diyus nga puꞌun it kaꞌgenang egay kaskedan.

Mga Ipiyalteg 21:6

Baw maat pay beken nga inaat yat aken, “Kayti natuman naytung muꞌsa. Ka akuy uꞌna it muꞌsa baw aku naga i kat sinauryan. Aku i gimnuna it muꞌsa baw kat pudir ku i kaꞌbusan ya. In siyu nga pagbaꞌnekan, siguradu nga begayan ku kanyat danum nga egay bayad nga garing duꞌun it tumbud nga magbegay it kaꞌgenan.

Mga Ipiyalteg 22:17

Pagꞌaaten it Espiritu Santo baw mga taawan it Ampuꞌang Diyus, sira nga subuk asawaen it paꞌaateng Uꞌuybun It Tupa, “Daliꞌ na!” Baw muꞌsa nga makagneg it itung mga bagay, kaꞌilangan maat gasiꞌ sira nga, “Daliꞌ na!” Melep sini i siyu-siyu nga pagbaꞌnekan. Misiꞌ lamang i iyan magꞌireg it danum ngaytu nga magbegay it kaꞌgenan. Egaytu kaꞌman bayadan.

Mga Ipiyalteg 7:17

Sabap kanya ngaytung paꞌaaten nga Uꞌuybun It Tupa nga situt tepad it araꞌdungan ngaytut adiꞌ, kanya ngaytuy marigra nat kanira. Talagang tabanen ya na sira duꞌun it pagtumbudan it danum nga magbegay it kaꞌgenan. Baw daꞌnay tumuruꞌ nga luwaꞌ kat mga mata nira ka subuk panisen nat Ampuꞌang Diyus, ka awaꞌen ya nay kasmek nira.”