Juan 20:17 - Tagbanwa

¹⁷ “Ega na daꞌan sumari kat sekel it aken, ka daꞌku paꞌ nakaꞌuliꞌ duꞌun it Amaꞌ. Iyan i buwaten mu kayti, paꞌaduꞌun kat mga alagad ku nga ipagpabetang ku na nga mga sulsug ku baw isugid mut kanira nga muliꞌ aku na duꞌun it Amaꞌ ku, nga Amaꞌ mi gasiꞌ, duꞌun it Ampuꞌang Diyus ku nga Ampuꞌang Diyus mi gasiꞌ.”

Juan 20:17 Iomraidhean Croise

Jeremias 31:33

Itu siꞌ i ipakiꞌupakat ku it bangsa nga Israel kat pagdadarapaꞌen. Mga urdin ku, idawaꞌ ku na kat ulu nira baw ipatdek ku nang banar kat nakem nira. Simirbi sirang matuud it aken nga Ampuꞌang Diyus nira, baw arigraen ku sirang banar nga mga taawan ku.

Mateo 12:50

Sabap in siyu-siyu nga magsunud nga banar it kaꞌirgan it Amaꞌ ku nga duꞌun it langit, sira i bilang inaꞌ ku baw mga sulsug ku.”

Mateo 25:40

Bawnga aaten ku yan nga Adiꞌ nira, ‘Matuud talagay iꞌaat kut imyu. Iyan binwat mi i mga itu ngaytu kat maski piyakatimawaꞌ nga bilang mga sulsug ku, simpri aku na i binwatan mi.’

Mateo 28:7

Bawnga mapanaw kamu nga lagi, ka ituturan mi duꞌun it mga alagad ya nga inggen na kanyat paꞌuliꞌ, baw muꞌna nayan kanya duꞌun it Galilea. Makitaan mi yan kanya duꞌun. Ta, nasugid ku nat imyu.”

Marcos 12:26

Ta, sabap gasiꞌ it pagꞌegen ngaytu it paꞌuliꞌ it mga miyatay, unu, ega paꞌ nabasa mi duꞌun it kasuratan ni Moises i pasar it magsugu nga kayu-kayu nga magdiklap-diklap na? Daꞌga magꞌaat ngayan i magsusurat nga inaat it Ampuꞌang Diyus it ki Moises, ‘Aku i Ampuꞌang Diyus ni Abraham, ni Isaac baw ni Jacob.’

Marcos 16:19

Pagkatupus it pagꞌampangen ngaytit Ampuꞌan nga si Jesus duꞌun it mga alagad ya, piyapatibung na kanya duꞌun it langit baw miyadung na kat iwanan nga ayun it Ampuꞌang Diyus.

Lucas 10:4

Ayaw kamut pagbalun it ipagꞌalang, pagbetangan it ipagꞌildaw it imyu, u panggaganti it talumpaꞌ. Baw ayaw kamu it pagꞌatrasu asat dalan nga pakituturan paꞌ it maski siyu.

Juan 13:1

Naꞌbut nay papuꞌun na it Pistaꞌ ngaytit Tiyaꞌliban. Si Jesus ngayti, magkaꞌrutan ya nang lagi nga naꞌbut nay timpu nga ilꞌid ya situt banwa ngaytu, ka muliꞌ na duꞌun it Amaꞌ ya. Talagang pagmaꞌalen yay mga alagad ya nga situt banwa ngaytu. Ta kayti, ipiyalteg ya na in sang unuy kadakulat pagmaꞌal ya ngayti it kanira.

Juan 13:3

Urut talaga ni Jesus nga ibinggay nat kanya it Amaꞌ i muꞌsang pudir. Baw urut ya nga kanya, egay beken nga giyaringan ya, duꞌun it Ampuꞌang Diyus, baw duꞌun nagat Ampuꞌang Diyus i uliꞌan ya.

Juan 14:2

Duꞌut langit nga pagtataꞌidan it Amaꞌ ku, subraꞌ nga marugar nga istaran. Talagang matuud tu, baw muꞌna aku na, ka buwaten kuy ikataꞌid mi duꞌun. In ega matuud, simpri ega iꞌaat kut imyu.

Juan 14:28

Isiyugid ku nang lagit imyu nga magliꞌid aku temed paꞌuliꞌ aku naga. In talagang pagmaꞌalen mi aku, sagyaan mi i panguliꞌ ku ngaytu duꞌut Amaꞌ, sabap subrang mataꞌas i Amaꞌ, subraꞌ paꞌ it aken.

Juan 14:6

Timnubag si Jesus, maat ya, “Aku na ngaytu i dalan, aku i kamatuudan baw aku gasiꞌ i kaꞌgenan. Egay kapaꞌaduꞌun it Diyus Amaꞌ in daꞌga akuy dalan nga panawan ya.

Juan 16:28

Talagang garing aku duꞌut Amaꞌ bawnga limnampud aku nga naꞌasitut banwa ngaytu. Ta kayti, limꞌid aku na situt sinirungat langit ka muliꞌ aku na duꞌun it Amaꞌ.”

Juan 17:11

Daꞌku na maꞌlay sinit sinirungat langit, ka muliꞌ aku na asat imu. Temed sira, sini pat banwa ngayni. Amaꞌ nga alaid kat muꞌsang kasalaꞌan, tatarimaen mu sira kat keseg it guna baw kabantugan mu nga itanyag mu sinit aken. Tatarimaen mu sira isaꞌun urunyun sirang pirmi, subung nagat aten.

Juan 17:25

Amaꞌ ku nga mataldeng talaga, daꞌka pagkilalaen it kadaklan sinit banwa ngayni, temed aku, pagkilalaen ku talaga ikaw. Baw mga kaꞌibaan ku ngayni, naꞌrutan na nira nga ikaw i nagtaꞌeg it aken.

Juan 17:5

Aypaꞌ kayti, Amaꞌ, in asan aku sit imu, ibgay mu sit aken i kabantugan nga aken nang lagi, iyan asan aku paꞌ ngayat imu, parabir giyuna i banwa ngaytu.”

Juan 20:27

Bawnga inaat ya si Tomas, “Letganan muy mga alima ku, baw iruꞌuk mu nay tutulduꞌ mu sinit bungad nga piyanawan it ransang. Ilaꞌut mu na gasiꞌ i alima mu sinit kilid ku. Ayaw ka nat pakiꞌambut. Pamayaꞌnen mu na.”

Juan 7:33

Ta it atkayti, maat ni Jesus, “Maꞌiba-iba mi paꞌ aku it sang dekeyeꞌ nga timpu bawnga muliꞌ aku nayan duꞌun it nagtaꞌeg ngaytit aken it paꞌasitu.

Roma 8:29

Sabap talagang garing paꞌ it katagnaꞌ-tagnaꞌan, pagnanakmen nang lagi it Ampuꞌang Diyus in siyu may siyu i panakman ya nga pasakep it kanya, baw ipiyasiguru ya gasiꞌ nga makasbung sirat Anak ya nga si Jesus. Kabilangan ya, si Jesus na ngaytu i mabantug nga kiyaꞌakaꞌan tami nga muꞌsang nagsulsu-sulsugun nga inanak it Ampuꞌang Diyus.

2 Corinto 6:18

Mabut i aldaw nga, aku, Amaꞌ mi na, baw kamu, babay, lalaki, ipabetang ku nayan nga mga anak ku.” Yanay inaat it Ampuꞌang Diyus nga landaw nga guna.

Galacia 3:26

Pati kamu nga ega Judio, mga anak na gasiꞌ it Ampuꞌang Diyus, nga maglalagpit nat ki Cristo Jesus sabap it pagsarig baw pamayaꞌ mi it kanya.

Hebreo 11:16

Temed ega, in daꞌga subraꞌ pang magayen nga banwa i pagpaꞌbutun nira, nga egay beken, langit tuy paꞌaaten ngaytu. Aypaꞌ talagang ega ipagꞌeyaꞌ it Ampuꞌang Diyus nga mataꞌwag kanya nga kanirang Ampuꞌan, sabap talagang inargan ya sira it pirmaminting banwa nga mataꞌidan nira.

Hebreo 8:10

Ituꞌun siꞌ i ipakiꞌupakat ku it mga Israelita kat pagdadarapaꞌen. Mga urdin ku, idawaꞌ ku na kat ulu nira baw ipatdek ku nang banar kat nakem nira. Sakpen ku sira it ega basta-bastang pagsakep it kamatuudang Ampuꞌan, baw ipabetang ku sira nga mga taawan ku nga pagꞌarigraen ku nang banar.

1 Pedro 1:3

Kayti, bantugun tami nga muꞌsa i Ampuꞌang Diyus, nga Amaꞌ it Ampuꞌan tami nga si Jesu-Cristo! Sabap natantuwan ta nga, kat kadakulat ildaw yat aten, bilang ipiyanganak ta kayti it sumaꞌup baw siguradu na talagay pagꞌiꞌinawaren tami nga kagayenan. Ildaw ya ngaytu, siguraduytu sabap duꞌun it pagkaꞌgen ni Jesu-Cristo it paꞌuliꞌ.

1 Juan 3:2

Mga pagmaꞌalen ku, kayti mga anak tami nang matuud it Ampuꞌang Diyus. Lamang ega paꞌ magkaꞌrutan ta in maꞌunuy pamilug ta duꞌun. Temed ituy pagsisiguruun ta, asan it pamaꞌuliꞌ situ ni Jesu-Cristo, masbungan ta na kanya, ka maltegan ta nat magayen in maꞌunu kanya.

Mga Ipiyalteg 21:3

Baw siꞌ nga may nagnegan ku nga panggaꞌmarang dadakulaꞌ nga duꞌun it araꞌdungan ngaytit adiꞌ i sinraꞌan, nga magꞌaat, “Kayti iyan pamalay-balay it Ampuꞌang Diyus, asan nat mga taw. Pakisagpun na kanyat kanira ka mga taawan ya na sira. Baw talagang kanya ngaytu i Ampuꞌang Diyus nira, nga maꞌiba-iba nira nang pirmi.

Mga Ipiyalteg 21:7

Siguradung tumbasan ku i iyan nga nakaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, ka aku nay Ampuꞌang Diyus ya baw kanya nayan i anak ku.