Juan 20:12 - Tagbanwa

¹² May naltegan ya nga duwa nga mga anghil nga magꞌaꞌdung duꞌun it piyadayagan ngaytit ki Jesus. Esay duꞌun it uluwan manggid, esa duꞌun it aꞌayan. Mapuputiꞌ i pakayan nira.

Juan 20:12 Iomraidhean Croise

Mateo 17:2

Iyan duꞌun na sira, naltegan it tulu ngayti nga nagsiyang i kinataw ni Jesus. Simningkar nga subung it singkar it aldaw i rupa ya baw pakayan ya, magsinggat nat pamuti-putiꞌ.

Mga Binwat 1:10

Iyan sigi pang titingaraꞌ nira duꞌut langit, nga magyayaꞌngad it ki Jesus ngayti nga magpatibung, sakaling may magtitindeg duꞌun nat umid nira nga duwang kataawan nga lalaki nga magpapakay it maputiꞌ.

Mga Ipiyalteg 3:4

Temed may pira naga asan it Sardis nga maꞌintur, nga ega naga nakakursud duꞌun it mga mararaꞌway nga pagbuwaten. Talagang magkapakay sira nga kaꞌibaan ku duꞌun it kaꞌadiꞌan ku nga magpapakay it maputiꞌ.

Mga Ipiyalteg 7:14

Katubag aku, maat ku, “Tabing galang it imu, taꞌway. Ega magkaꞌrutan ku in ari piyamaggaringan kayan. Siguru ikaw yan i magꞌuꞌrut.” Maat ya siꞌ it aken, “Sira ngayan, iyan i nakalabay it dakulaꞌ talagang kakuriꞌan, temed maski atkayan, daꞌsira nangindiꞌ, naneꞌteꞌ i pamayaꞌ nira. Talagang linimpiyuꞌ nira baw piyaputiꞌ it duguꞌ it paꞌaaten ngaytung Uꞌuybun It Tupa i mga pakayan nira ngayan.