Juan 19:34 - Tagbanwa

³⁴ Yan nayan lamang i binwat it esang sundaluꞌ, sininduꞌrak yat besak i sang baling kilid ni Jesus. Magkagabut i besak, magburwak i duguꞌ baw danum.

Juan 19:34 Iomraidhean Croise

Zacarias 13:1

Maat pay paꞌugdun it AMPUꞌANG DIYUS, “Kat aldaw ngayan, paburusun kuy tumbud nga ipaglimpiyuꞌ it kasalaꞌan baw karaꞌe-raꞌetan it muꞌsang mga kaduguꞌ-duguꞌan ni David, baw mga magtataꞌid duꞌun it Jerusalem.”

Mateo 27:62

Iting aldaw, aldaw nga pagpangaranat Pagsimpan it Pistaꞌ. Pagkadedelman it simnunud nga aldaw, naꞌaduꞌun it ki Pilato i mga pagbayaꞌen it mga sasirduti baw mga Pariseo.

Juan 19:33

Temed pagꞌabut nira duꞌut ki Jesus, naltegan nira nga patay na, aypaꞌ ega na biyariꞌan nirat aꞌay.

Juan 20:20

Pagkaꞌampang ya kayti, ipiyalteg yay mga alima ya baw kilid ya ngayti. Masagyang-masagya i mga alagad ngayti ka naltegan nira siꞌ i Ampuꞌan.

Mga Binwat 22:16

Bawnga inaat ya siꞌ aku, ‘Ta, unu pay pagꞌelaten? Timindeg ka na baw pabawtis. Manalangin ka duꞌun it Ampuꞌang Diyus nga mangut it pasinsiyaen i mga kasalaꞌan mu.’

1 Corinto 1:30

Maski kita, talagang garing duꞌut Ampuꞌang Diyus i magpakilagpit ta ngaytu it ki Cristo Jesus. Baw si Cristo Jesus ngaytu i binwat it Ampuꞌang Diyus nga ikakilala tami it kamatuudan nga kasepsep, nga kasepsep ngaytu nga paꞌaaten, mataldeng tami na kat panleteg it Ampuꞌang Diyus, ka ipiyagribri ta na kat panguripen it kasalaꞌan it aten, isaꞌun mangaꞌgenan tami na nga alaid kat muꞌsang kasalaꞌan.

1 Corinto 6:11

Iyan katꞌesa may atkayan naga yan asat imyu. Temed kayti, linimpiyuꞌ kamu na kat mga kasalaꞌan mi, baw ipiyasiguru kamu na duꞌun it Ampuꞌang Diyus nga mga taawan ya na. Ipagpabetang ya na kamu nga ega nay kakasalaꞌan kat panleteg ya. Muꞌsa ngaytu, kat keseg it binwat it Ampuꞌan nga si Jesu-Cristo baw guna it Espiritu Santo it Ampuꞌang Diyus nga ipiyapasarum ya situt bilug ta.

Efeso 5:26

Binwat yaytu isaꞌun mapakay nga tanggapen sirat Ampuꞌang Diyus sabap it nalimpiyuꞌ na sira kat panleteg ya duꞌun it pagbawtis nira baw kat pagneg baw pamayaꞌ nira it ampang ya.

Tito 2:14

Nangganti kanyat aten isaꞌun iribri ya kita kat pagsakep it karaꞌe-raꞌetan, baw isaꞌun mabwat ya kita nga limpiyuꞌ na nga naꞌawaꞌ nay kasalaꞌan tami. Binwat yaytu isaꞌun mabwat ya kita nga kanya talaga nga mga taawan, nga maꞌireg nga banar muwat it mga buwat nga magagayen.

Hebreo 9:13

Tagnaꞌ, iyan duguꞌ it mga kambing baw mga tudu nga bakaꞌ baw abu it inanteng nga dumaraga paꞌ nga bakaꞌ, ipagwaswas kat mga taw nga ipagpabetang nga ega limpiyuꞌ kat panleteg it Ampuꞌang Diyus, ka ipaglimpiyuꞌ it kanira. Ta kat atkaytung buwat buwaten sira nga limpiyuꞌ na kat panleteg it Ampuꞌang Diyus, nga inawaꞌan na it in unuy ega ipagkasamba nira, maski kat liꞌwan lamang it bilug i paglimpiyuꞌun ngaytu.

Hebreo 9:22

Ka sigun kat inaat it mga urdin, subuk egay beken nga ipaglimpiyuꞌ it maski unu kat panleteg it Ampuꞌang Diyus in daꞌga duguꞌ. Ta, atkayan naga, egay kaꞌawaꞌan it kasalaꞌan kat panleteg ya in daꞌgay ipaturuꞌ nga duguꞌ.

1 Pedro 3:21

Aypaꞌ sikayan may mapisiꞌ ta nga ladawan it karibriyan ta, sabap iyan biyawtisan ta, ladawan yan it bilang binilwat ta gasiꞌ kat panriga. Sabap pagbawtis ngaytu, ega maat magꞌawaꞌ it buring kat bilug ta, in daꞌga, magpamatuud tu nga miyangut tami na it kapasinsiyaan it mga kasalaꞌan tami. Aypaꞌ ega nay pagꞌiꞌlaman tami nga panriga it Ampuꞌang Diyus. Kapasinsiyaan ngaytu, mapakay na talaga sabap it inggen it paꞌuliꞌ si Jesu-Cristo.

1 Juan 5:6

Si Jesu-Cristo ngaytu, kanyay limnampud situt denaꞌ. Biyawtis kanya duꞌun it danum. Ipiyaturuꞌ i duguꞌ ya kat kamataynen ya. Talagang ega lamang desang nagpabawtis kanya duꞌun it danum, in daꞌga ipiyaturuꞌ ya naga gasiꞌ i duguꞌ ya. Baw yay magpamatuud kaytu, Espiritu Santo, sabap purus kamatuudan i ipagpaliꞌwan it Espiritu Santo ngaytu.

1 Juan 5:8

Tulu ngaytu, Espiritu Santo, danum baw duguꞌ. Baw nagꞌuyu-uyunun i tulu ngaytu.

Mga Ipiyalteg 1:5

Kanya ngaytung si Jesu-Cristo, purus kamatuudan i kumpur ipagpamatuud ya. Iti, inggen kanyat Ampuꞌang Diyus it paꞌuliꞌ. Talagang kanya i piyakamataꞌas kat muꞌsang egnen paꞌ it paꞌuliꞌ. Baw kanya ngaytu i magbebegbeg it maski siyung magsasakep nga subuk mga adiꞌ situt sinirungat langit. Sana bantugun tami si Jesu-Cristo, nga magraras talaga it aten. Sabap kat kamataynen ya, nga ipiyaturuꞌ yay duguꞌ ya, ipiyaliꞌwan ya na kita kat panguripen it kasalaꞌan.

Mga Ipiyalteg 7:14

Katubag aku, maat ku, “Tabing galang it imu, taꞌway. Ega magkaꞌrutan ku in ari piyamaggaringan kayan. Siguru ikaw yan i magꞌuꞌrut.” Maat ya siꞌ it aken, “Sira ngayan, iyan i nakalabay it dakulaꞌ talagang kakuriꞌan, temed maski atkayan, daꞌsira nangindiꞌ, naneꞌteꞌ i pamayaꞌ nira. Talagang linimpiyuꞌ nira baw piyaputiꞌ it duguꞌ it paꞌaaten ngaytung Uꞌuybun It Tupa i mga pakayan nira ngayan.