Juan 17:13 - Tagbanwa

¹³ Temed kayti, magꞌuꞌuliꞌ aku na asat imu, baw ipagsugid ku nang lagi i mga itu ngaytung bagay mintras sini aku pat banwa ngayni isaꞌun, kadakulaꞌat kasagyaan ku, makanira it egay kurang ya.

Juan 17:13 Iomraidhean Croise

Juan 13:3

Urut talaga ni Jesus nga ibinggay nat kanya it Amaꞌ i muꞌsang pudir. Baw urut ya nga kanya, egay beken nga giyaringan ya, duꞌun it Ampuꞌang Diyus, baw duꞌun nagat Ampuꞌang Diyus i uliꞌan ya.

Juan 15:11

Ipiyagsugid kut imyu i itu nga mga bagay isaꞌun mabagiꞌan kamu it magꞌuꞌunay nga kasagyaan ku, baw sumagya kamut kasagyaan nga egay kakurangan.

Juan 16:33

Isiyugid kut imyuytu isaꞌun may kaꞌimbengan it nakem mi kat pakilagpit mit aken. Talagang may kakuriꞌan mi naga yan, mintras situ kamu pat banwa ngaytu. Temed paksegen mi i nakem mi ka aku ngaytu, diyaꞌeg ku nay magsasakep situt sinirungat langit.”

Juan 17:11

Daꞌku na maꞌlay sinit sinirungat langit, ka muliꞌ aku na asat imu. Temed sira, sini pat banwa ngayni. Amaꞌ nga alaid kat muꞌsang kasalaꞌan, tatarimaen mu sira kat keseg it guna baw kabantugan mu nga itanyag mu sinit aken. Tatarimaen mu sira isaꞌun urunyun sirang pirmi, subung nagat aten.

Juan 3:29

Ka subuk pasar it pagꞌasawa, iyan babay nga pagꞌasawaen na, kat lalaki lamang nga magpangasawa. Baw iyan lalaki nga magpasimpan it pagsadu ngaytu, nga iba-iba it magpangasawa, masagya kanyang banar pagkagneg yat ampang it iba-iba ya ngaytu nga papagsaduun na sira. Kayti aku, atkayan naga. Masagyang-masagya aku na, sabap it miyabut na si Jesus nga subuk pagsimpanan ku.

Juan 7:33

Ta it atkayti, maat ni Jesus, “Maꞌiba-iba mi paꞌ aku it sang dekeyeꞌ nga timpu bawnga muliꞌ aku nayan duꞌun it nagtaꞌeg ngaytit aken it paꞌasitu.

Mga Binwat 13:52

Temed, sira nga nagpakimatuud it panulduꞌ nira baw nagpasakep it Ampuꞌan, dakulaꞌ nang kasagyaan nira baw magsasarum nay Espiritu Santo kat bilug nirang muꞌsa.

Roma 14:17

Sabap kaꞌadiꞌan ngaytu it Ampuꞌang Diyus, ega iyan i pagpaꞌiguꞌan, in unuy pagkaꞌnen baw pagꞌimnun tami, in daꞌga iyan pangaꞌgenan nga mataldeng, maꞌimbeng nga pakiꞌiba-iba it masigkataw, baw kasagyaan it nakem nga begay it Espiritu Santo.

Galacia 5:22

Temed in magpasakep i taw kat pamegbeg it Espiritu Santo itu may itu i liꞌwan ya, kamatuudang raras it masigkataw, magꞌuꞌunay nga kasagyaan baw kaꞌimbengan it nakem, masagkaꞌ it kakuriꞌan it magayen i nakem, maꞌildaw, magayen i adat, magkasarigan nga banar,

Hebreo 12:2

Kaꞌilangan, subuk ega lisuꞌun i seyek tami duꞌun it ki Jesus, nga kanya i nagpalteg it aten nga muꞌsa in magꞌuꞌunu i kaꞌustuꞌan baw egay kasbung nga pagsarig baw pamayaꞌ duꞌun it Ampuꞌang Diyus. Biyaliwalaꞌ ya lamang i kadakulat kaꞌeyaꞌan it kamataynen ya duꞌut krus ka yay ipagpadaꞌeg ya nga pirmi kat nakem ya, ega basta-bastang kasagyaan nga makanya duꞌun it langit. Ta kayti, magꞌaꞌdung na kanya kat iwanang ayun it araꞌdungan it pagkaꞌadiꞌ it Ampuꞌang Diyus.

1 Juan 1:4

Ipagsurat namen i mga itu ngaytu isaꞌun makasagya tami it kasagyaan nga egay kakurangan.

2 Juan 1:12

Sana dakulaꞌ pang kusugiden ku, temed ega na isurat ku. Ka ireg ku baꞌ sana, kapaꞌasan akut imyu. Masugi-sugid ku kamu it nagꞌada-adapen tami isaꞌun makasagya tami it kasagyaan nga egay kakurangan.