Juan 15:5 - Tagbanwa

⁵ Aku i puꞌun baw tangkayan it luwak nga ubas. Kamu i subuk sanga ku. Iyan temeꞌteꞌ it aken, aku gasiꞌ i temeꞌteꞌ it kanya. In atkayan, pirmi nang dakulaꞌ i buwaꞌ ya. Ka yay matuud, egay maski unu nga mabwat mi in magpablag kamut aken.

Juan 15:5 Iomraidhean Croise

Mateo 13:21

Temed ega ipagdawaꞌ nirat magayen kat ulu nira. Aypaꞌ ka daꞌsira magpaneꞌteꞌ kat pamayaꞌ nira, nga subuk luwak nga ega maggagamut. In abutun it kakuriꞌan u pakuriꞌan sira sabap it pamayaꞌ nira ngaytut ampang it Ampuꞌang Diyus, mangindiꞌ sira nga lagi.

Juan 12:24

Kamatuudan i ipagꞌaat ku ngaytut imyu, kabilangan ku, subuk biꞌni. Basta biꞌni, in ilwak na subuk matay ka marunut, temed iyan i paggaringan it dumakel. Temed in ega ilwak, esa-esa ya lamang.

Juan 15:16

Ega maat kamu i miniliꞌ it aken. Akuy miniliꞌ it imyu, baw tiyaꞌeg ku kamu nga subuk muwaꞌ kamu it mga buwaꞌ nga maneꞌteꞌ. Aypaꞌ in unuy angutun mi duꞌun it Amaꞌ kat keseg it pakilagpit mit aken, ibgay ya talaga it imyu.

Juan 5:19

Ta it atkayti, inaat ni Jesus i mga Judio ngayti, “Kamatuudan tuy pagꞌaaten ku ngaytut imyu, nga egay magkabwat it Anak in kat sadili ya na lamang, in daꞌga iyan i pagbuwaten ya, iyan nga magkaltegan ya nga pagbuwaten it Amaꞌ. Iyan pagbuwaten it Amaꞌ ya, simpri iyan naga i buwaten ya.

Juan 9:33

Talagang egay mabwat it iyan nga taw nga mga atkaytu in daꞌga talagang garing kanya duꞌun it Ampuꞌang Diyus.”

Mga Binwat 4:12

Yay matuud, talagang egay maski siyu nga magkapisiꞌan it karibriyan kat panrigat kasalaꞌan, puyrat ki Jesu-Cristo ngaytu. Ka egay maski siyung beken situt sinirungat langit nga ibinggay it Ampuꞌang Diyus nga magkaribri it aten, in daꞌga kanya lamang ngaytu.”

Roma 12:5

Ta kita, atkayan naga kayti. Dakel tami nga magpamayaꞌ it ki Cristo, temed kat pakilagpit tami it kanya ngaytu, subung ta nat sang kabilu-bilugan. Kada esat aten, subuk nagsugpa-sugpaten na, baw may kanya-kanyang kaꞌargan kat ikagayen it muꞌsa.

Roma 6:22

Temed ta, kayti nga piyaliꞌwan kamu na kat pamegbeg it kasalaꞌan, kayti nga nagpaꞌuripen kamu na it Ampuꞌang Diyus, dakulay kapulusan ya ka magpangaꞌgenan kamu na uyun kat kaꞌirgan ya, nga egay beken nga uliꞌan kaytu, kaꞌgenang egay kaskedan.

Roma 7:4

Ta, atkayan nagay karibriyan ta, mga kasulsugan ku. Ka tagnaꞌ, subuk inasawa ta it mga urdin nga yanay magbebegbeg it aten. Temed paribasay subuk natay tami na nga iba ni Cristo duꞌut krus, daꞌta na kat pamegbeg it mga urdin ngaytu. Kayti, belag nay asawa ta, ka inggen si Cristo it paꞌuliꞌ baw subuk inasawa ya na kita. Aypaꞌ kanya na i magbebegbeg it aten isaꞌun mangaꞌgenan ta nat pangaꞌgenang mataldeng kat ikabantug it Ampuꞌang Diyus.

1 Corinto 10:16

Ka daꞌga baꞌ in magpasalamat tami duꞌun it Ampuꞌang Diyus it pagꞌimnun in magꞌapunan tami, pagpaꞌiguꞌan ya, sang kanake-nakeman tami nga magpakiꞌiba-iba it ki Cristo ka may kaꞌuyutan it kagayenan nga maꞌaten sabap it duguꞌ ya nga ipiyaturuꞌ? Baw in magkaꞌen tami gasiꞌ it tinapay nga pagbagiꞌ-bagiꞌen, subung naga, sang kanake-nakeman tami nga magpakiꞌiba-iba it ki Cristo ka may kaꞌuyutan it kagayenan nga maꞌaten sabap it bilug ya nga ipiyagsalisi.

1 Corinto 12:12

Ta, in panawun it pikiran tami i bilug it taw, daꞌga baꞌ maski dakel i buwat-buwat, esa-esa nagang bilug? Baw mga buwat-buwat ngaytu, sang kabilu-bilugan sira. Ta, atkayan naga si Cristo baw muꞌsang magpamayaꞌ it kanya.

1 Corinto 12:27

Ta kamu ngaytu, kaꞌuyutan it bilug ni Cristo, nga kabilangan it kada esat aten nga magpamayaꞌ, subuk mga buwat-buwat ya.

2 Corinto 13:8

Sabap ega talaga mapakay nga sagyaan ku nga muwat i maski siyu it ega uyun it kamatuudan. Iyan lamang i sagyaan ku, pagbuwaten nga kagayenan kat panleteg it Ampuꞌang Diyus.

2 Corinto 9:10

Ka in magꞌuꞌunu magbegay i Ampuꞌang Diyus it biꞌni nga ipagluwak, baw pagpaksegen ya isaꞌun magbaraꞌ nga magkakaꞌen, atkayan naga pabastantiyan ya kita it ipagkabgay ta duꞌut beken nga may kaꞌilangan. Baw subung it paksegen it Ampuꞌang Diyus i subuk ipagluwak ta ngaytu nga ipagtabang it beken, isaꞌun dakulay paglapusan it kaꞌildaw ta ngaytu it masigkataw ta.

Galacia 5:22

Temed in magpasakep i taw kat pamegbeg it Espiritu Santo itu may itu i liꞌwan ya, kamatuudang raras it masigkataw, magꞌuꞌunay nga kasagyaan baw kaꞌimbengan it nakem, masagkaꞌ it kakuriꞌan it magayen i nakem, maꞌildaw, magayen i adat, magkasarigan nga banar,

Efeso 5:9

Sabap yay liꞌwan it magpangaꞌgenan ngaytu kat kaꞌyagan, purus kagayenan, kataldengan baw kamatuudan.

Filipos 1:11

Baw mamuyaan kat pangaꞌgenan mi nga mataldeng i adat mi, kat ikabantug it Ampuꞌang Diyus. Temed kagayen ngaytu it adat mi, mapakay lamang tu kat tabang ni Jesu-Cristo.

Filipos 4:13

Iyan muꞌsa ngaytu, magkabwat ku sabap it keseg nga ipagꞌildaw ni Cristo it aken.

Filipos 4:17

Ega maat yay dakulaꞌ kat nakem ku, pirmi nga magkatanggap it ildaw mi ngaytu, in daꞌga yay ireg ku, ipasigi mi i buwat mi ngaytu nga bilang buwaꞌ it pamayaꞌ mi ka tumbasan kamu yan it Ampuꞌang Diyus.

Colosas 1:10

Ka in atkayan, makapangaꞌgenan kamu nat pangaꞌgenan nga kasasagyaan it Ampuꞌan, pangaꞌgenan nga bagay it mga maglalagpit it kanya, ka subuk magtumbud kat pangaꞌgenan mi i muꞌsang buwat nga magagayen baw magdudungag-dudungag i kasepsep mi it adat baw kaꞌirgan it Ampuꞌang Diyus.

Colosas 1:6

Egaytu lamang asat imyu i inabutan it kamatuudan ngaytu in daꞌga maglekep naytu it banwa. Baw paꞌari-ari nga pagꞌabutun ya magbaꞌguy adat it mga magpamayaꞌ, subung nagat imyu garing it uꞌnang pagkagneg mit ildaw ngaytut Ampuꞌang Diyus baw pagkatantu mi nga kamatuudan talagaytu.

Santiago 1:17

Ampuꞌang Diyus i puꞌun it muꞌsang kagayenan, baw purus magayen i ipagbegay ya. Ega talagay kakurangan it ildaw nga magpanggaring duꞌun it Amaꞌ ta ngaytu nga gimnuna it muꞌsang mga mamagꞌeyag duꞌun it langit. Mga giyuna ya ngaytu, magꞌugad-ugad i eyag nira, temed Ampuꞌang Diyus, talagang ega magꞌugad-ugad i adat yat kanya.

1 Pedro 2:4

Si Cristo ngaytu, egen talaga baw kabilangan ya, subuk lininuꞌ nga batu nga ega napakay it mga taw. Temed napakay talaga it Ampuꞌang Diyus ka piniliꞌ baw talagang pagrarasan ya.

2 Pedro 3:18

In daꞌga, kaꞌilangan pasigi kamu nga pagpapaꞌgenen mi i pamayaꞌ mi it Ampuꞌan baw Manriribri tami nga si Jesu-Cristo, kat ildaw nga ipagbegay ya. Baw paꞌresan mi i pagkilala mit kanya, isaꞌun dumakulaꞌ i kasepsep mi it kaꞌirgan baw adat ya. Dapat nga bantugun kanya kayti baw seked it kaꞌnu-kaꞌnu. Kamatuudan tu.