Juan 15:20 - Tagbanwa

²⁰ Dedemdemen mi i ipiyagꞌaat ku ngaytut imyu nga egay manigsirbi nga mataꞌas pat agalen ya. In aku, pagpakuriꞌan nira, simpri kamu atkayan naga yan, pakuriꞌan nira gasiꞌ. In pagsunudun niray ipagpanulduꞌ ku, sunudun nira gasiꞌ yan i imyung mga ipagpanulduꞌ.

Juan 15:20 Iomraidhean Croise

Mateo 10:24

Dedemdemen mi tu, nga basta alagad, simpri ega mataꞌas paꞌ kanya it manigtulduꞌ ya. Atkayan nagay uripen, ega gasiꞌ mataꞌas kat agalen ya.

Marcos 10:39

“Aaꞌ, kaya namen,” maat i tubag it duwa ngayti. “Yay matuud,” maat ni Jesus, “kakuriꞌan nga labayen ku, labayen mi gasiꞌ. Baw betanganan kamu naga it subraꞌ na nga panriga-riga nga subung it ibetangan it aken.

Lucas 2:34

Bawnga piyatdekan ni Simeon it ampang nga paꞌildaw na Jose ngayti duwa ni Maria, baw maat pay paꞌugdun ya, “Maria, matuud i iꞌaat ku pasar it itung waꞌwaꞌ. Talagang ipiyabetang-betang it Ampuꞌang Diyus nga sabap it waꞌwaꞌ ngaytu, dakel tami nga mga Judio nga maribri, temed dakel nagay beken nga maꞌilang ka daꞌsira kupasakep it kanya. Sabap kanyay bilang tandaꞌanan nga magtulduꞌ it dalan nga magpaꞌaduꞌun it Ampuꞌang Diyus, temed ta, dakel i pakiꞌambut it panulduꞌ ya ngaytu.

Lucas 6:40

Matuud nga iyan alagad, ega kasubraꞌ it manigtulduꞌ ya. Temed basta natulduꞌan na nga banar, simpri makasbung na kanya it manigtulduꞌ ya.

Juan 10:31

Pagkagneg it mga Judio ngayti, nagsigkuꞌmit siꞌ sirat batu, ka pagkubatuun nira siꞌ kanya.

Juan 11:57

Sabap ipiyagpaꞌimbanda it mga pagbayaꞌen it mga sasirduti baw mga Pariseo nga in siyu-siyuy magkaꞌrut it in ariyen si Jesus, kaꞌilangan itulduꞌ ya, isaꞌun madakep nira kanya.

Juan 13:16

Kamatuudan tu nga kamatuudan i pagꞌaaten ku ngaytu, nga iyan manigsirbi, ega mataꞌas paꞌ kanya it agalen ya. Baw iyan nga tiyaꞌeg lamang, ega mataꞌas paꞌ it nagtaꞌeg it kanya.

Juan 5:16

Ta paribasay binwat ni Jesus i atkayti kat Aldaw it Kapaꞌnaan, timnalaluꞌ nay kupakuriꞌ it mga pagbayaꞌen it mga Judio it ki Jesus ngayti.

Juan 7:32

Naringid-ringidan it mga Pariseo i pamagrundingen it mga katataawan ngayti pasar it ki Jesus. Aypaꞌ binwat it mga Pariseo ngayti baw mga pagbayaꞌen it mga sasirduti, piyapaꞌaduꞌunan nira it mga taawan nira nga guwardiya it Templo ka dakpen si Jesus ngayti.

Juan 8:51

Kamatuudan tuy pagꞌaaten ku ngaytu, nga in siyu-siyu nga magpangaꞌgenan uyun kat mga ipagtulduꞌ ku ngaytu, ega na labayen yay kamataynen.”

Juan 8:52

Inaat siꞌ kanya it mga Judio ngayti, “Daꞌga baꞌ maꞌyag na nga magpulpug ka! Ka naꞌlay nang natay si Abraham baw mga prupitaꞌ. Ta unuka magkaꞌaat mu nga ega matay it seked kaꞌnu-kaꞌnu i in siyu-siyu nga magpangaꞌgenan uyun kat mga ipagtulduꞌ mu?

Juan 8:59

Pagkagneg nira kayti, nagsigkuꞌmit nay mga Judio ngaytit batu ka batuun na kanya. Temed nagpalingeb-palingeb na si Jesus duꞌut katataawan ka nanliꞌwan na duꞌun it Templo ngayti.

Mga Binwat 14:22

Duꞌut kada rugar ngayti, pagpaksegen nira i nakem it mga magpamayaꞌ baw ipagbenge-bengel nirat kanira nga, sana, teꞌteꞌan i pamayaꞌ nirat Ampuꞌan maski pakuriꞌan. “Ka simpri,” maat nira, “kaꞌilangan, dakel i malabayan ta nga kakuriꞌan parabir mabut tami duꞌun it kaꞌadiꞌan it Ampuꞌang Diyus nga duꞌun it langit.”

1 Corinto 4:12

Ipagpaturuꞌ namen i liꞌnget namen isaꞌun lamang may ibtang it tinaꞌi. Pagdiyampaꞌen kami temed, iyan mga magdiyampaꞌ it amen, ipagpanalangin namen nga sana ildawan sirat Ampuꞌang Diyus. In pagpakuriꞌan kami, pagpataꞌnan namen lamang.

2 Corinto 4:9

Pagpakuriꞌan kami na, temed ega naga pagpabaya-bayaꞌan it Ampuꞌang Diyus. Talagang kugtasen nang ruyut i ginawa namen temed ega naga saꞌan magkalumsan kami.

1 Tesalonica 2:15

Mga Judio naga i minimatay it mga prupitaꞌ it tagnaꞌ, baw kayti, minimatay it pati Ampuꞌan nga si Jesus. Baw mga Judio naga i magpakuriꞌ it amen. Unuka ega atkayan it pagkuntraꞌen nira nga banar i kaꞌirgan it Ampuꞌang Diyus? Subung baꞌ it kalaban sira it muꞌsang katataawan.

2 Timoteo 3:12

Baw ta, yay matuud, in siyu-siyuy magꞌireg mangaꞌgenan it mataldeng kat panleteg it Ampuꞌang Diyus ka pakilagpit kanyat ki Cristo Jesus, talagang maglabay kanya gasiꞌ it pakuriꞌ it masigkataw.

1 Samuel 8:7

Tiyubag kanya it AMPUꞌANG DIYUS, nga magꞌaat, “Sunudun mu nay pagꞌangutun it mga taw ngayan, ka yay matuud, ega yan ikaw i pagdaꞌkuun nira, in daꞌga akuy pagdaꞌkuun nirang mamaalaꞌ it kanira.