Juan 15:16 - Tagbanwa

¹⁶ Ega maat kamu i miniliꞌ it aken. Akuy miniliꞌ it imyu, baw tiyaꞌeg ku kamu nga subuk muwaꞌ kamu it mga buwaꞌ nga maneꞌteꞌ. Aypaꞌ in unuy angutun mi duꞌun it Amaꞌ kat keseg it pakilagpit mit aken, ibgay ya talaga it imyu.

Juan 15:16 Iomraidhean Croise

Genesis 18:18

Sabap piniliꞌ ku kanya nga garingan it esang dakulaꞌ nga bangsa. Baw muꞌsang bangsat taw kat sinirungat langit, talagang begayan kut dakulang ildaw nga subuk manggaring situt kanya.

Mateo 21:22

Baw in unu-unuy ipanalangin mi nga angutun mi, matanggap mi yan, basta magpamayaꞌ kamu nga matuud.”

Mateo 7:7

“Temegel kamu it mangut duꞌun it Ampuꞌang Diyus, ka siguradu yan nga begayan kamu. Tegel-tegelan mit tumulus duꞌut kanya i pagkaꞌilanganen mi, ka tabangen ya kamu nga maparagan mi. Paꞌungaꞌ-ungaꞌ kamu it pasleden kat adapan ya, ka talagang sumambung kanya.

Lucas 6:13

Pagkadedelman, tiningped yay kadakel it mga alagad ya baw miniliꞌ kanya it sang puluꞌ may duwa nga kataawan. Tiyaꞌwag ya sira nga mga apustul, ka sira ngayti i mga kaꞌiba-iba ya nga pirmi baw sira i taꞌgen ya nga mangadal.

Juan 13:18

Inaat paꞌ ni Jesus, “Egaytu kamu nga muꞌsa i pagpaꞌiguꞌan ku it pagꞌaaten ku ngaytu nga makasagya kamu, sabap magkakilalaan ku in unu nga mga taw i mga piniliꞌ ku. Temed atkaytuytu i piniliꞌ ku ka isaꞌun matuman i magbebtang duꞌun it kasuratang ampang it Ampuꞌang Diyus nga magꞌaat, ‘Karaꞌe-raꞌetan i itiyumbas it aken it taw nga siyakep kut pangaꞌen ku.’

Juan 15:19

In beteꞌ kaꞌuyutan kamu paꞌ it mga ega magpamayaꞌ ngayti, simpri pagmaꞌalen nira kamu ka sang kamuwan. Temed it ega na, sabap it piniliꞌ ku kamu baw subuk ipiyapinpin na kat kadakel ngayti. Aypaꞌ ka isgan nayan nira kamu.

Juan 15:5

Aku i puꞌun baw tangkayan it luwak nga ubas. Kamu i subuk sanga ku. Iyan temeꞌteꞌ it aken, aku gasiꞌ i temeꞌteꞌ it kanya. In atkayan, pirmi nang dakulaꞌ i buwaꞌ ya. Ka yay matuud, egay maski unu nga mabwat mi in magpablag kamut aken.

Juan 6:70

“Daꞌga baꞌ,” maat ni Jesus, “sang puluꞌ may duwa kamung kataawan i piniliꞌ ku? Takaꞌ yay matuud, may esa nagat imyu nga magnanakem pat nakem it maraꞌe-raꞌet!”

Mga Binwat 1:24

Bawnga nanalangin sira, nga magꞌaat, “Ampuꞌan, urut mu talaga i kat nakem it muꞌsang taw. Aypaꞌ ipakilala mut amen in siyu manggid kat duwa ngaytu i piniliꞌ mu,

Mga Binwat 1:8

Temed yay matuud, pagpasarum it Espiritu Santo kat bilug mi, maꞌimyu nay ega basta-bastang kakayaan. Baw pamatuud kamu na sabap it aken, ega lamang situt Jerusalem in daꞌga duꞌun it muꞌsang rugar nga sakep it Judea baw Samaria, baw kat paꞌari-aring rugar nga situt sinirungat langit.”

Mga Binwat 10:41

Sabagay ega na muꞌsang taw i nakalteg it kanya. In daꞌga, kami na lamang nga, garing it tagnaꞌ, piniliꞌ it Ampuꞌang Diyus nga pamatuud it pagꞌegen ngaytu ni Jesus. Baw yay matuud, pagkaꞌgen ya, ega desang naltegan namen kanya, in daꞌga nagkaraꞌnen-karaꞌnen kami paꞌ.

Mga Binwat 22:14

Bawnga miyampang siꞌ kanya, nga maat ya, ‘Garing it tagnaꞌ, piniliꞌ ka nang lagi it Ampuꞌang Diyus it mga kagiyaringanan ta. Ipiyabetang-betang ya nga matantuwan mu i kaꞌirgan ya, ka maltegan muy mataldeng nga Manigsirbi ya baw magnegan muy ampang ya nga pakisugi-sugid yat imu.

Mga Binwat 9:15

Temed maat siꞌ it Ampuꞌan it ki Ananias, “Aduꞌunun mu na kanya, ka piniliꞌ ku nagay itung taw nga magsirbi it aken. Manuturan nayan kanya pasar it aken. Baw ega lamang mga Judio i tuturanan ya, in daꞌga mga bangsa gasiꞌ nga ega Judio, pati mga adiꞌ nira.

Roma 1:13

Mga kasulsugan ku kat pamayaꞌ, ireg ku nga maꞌrutan mi nga kaꞌlay na ngaytu i rima-rima ku nga paꞌasan sana it imyu, temed daꞌku magkatabu-tabus. Ka ireg ku gasing makapangadal asan it imyu isaꞌun limiꞌwan nga subraꞌ nga mamayaꞌ it ki Jesu-Cristo i katataawan, subung nagat tiyanaꞌan it pangadal ku duꞌun it beken nga rugar it mga taw nga ega Judio.

Roma 1:5

Kanya i minildaw it aken it katengdanan ngaytut apustul, nga mangadal akut Magayeng Baritaꞌ duꞌut mga babanwaan it mga taw nga ega Judio. Itu naytuy pagsirbi kut kanya isaꞌun, sana, dakel i mamayaꞌ it ki Jesu-Cristo ngaytu, nga yay tumaban it kanira it pangaꞌgenang masiyunudun it kaꞌirgan ya.

Roma 15:4

Ega lipaten mi nga, muꞌsa nga magbebtang duꞌun it kasuratan garing paꞌ it tagnaꞌ, panulduꞌ naytut Ampuꞌang Diyus it aten. Ka sabap it ampang ya ngaytu magkasagkaꞌ ta it mga kakuriꞌan nga magꞌabut it aten, baw pagpaksegen i nakem tami isaꞌun subraꞌ nga maꞌingget i paniguru ta it kagayenan nga maꞌaten kat pagdadarapaꞌen.

Roma 9:21

Pakapikiren mi i buwat it manigbuwat it dakut. Maski esa-esay dakut nga bubwaten ya, daꞌga baꞌ may pudir ya nga bagiꞌen baw buwaten i kada sang bagiꞌ it in unuy ireg ya nga buwaten, mga berebtangan nga ega basta-bastay paggamitan u garamiten it aldaw-aldaw?

1 Corinto 10:11

Nagꞌabut tu it kanira nga bilang paꞌimbanda it kadakel, baw isiyurat isaꞌun paꞌimbandaan tami gasiꞌ, kita nga mga inabut na it sauryan nga timpu.

Galacia 1:15

Temed kat kaꞌildaw it Ampuꞌang Diyus it aken, piniliꞌ ya nang lagi aku parabir aku ipiyanganak baw ipiyatindeg ya aku nga manigsirbi it kanya.

Efeso 2:10

Sabap iyan pagbaꞌgu it adat ta kayti, Ampuꞌang Diyus i garing kaytu. Ipiyalagpit ya kita duꞌut ki Cristo Jesus baw biyaꞌgu ya i pangaꞌgenan tami isaꞌun gamiten ta na kat buwat nga magayen, nga ipiyagꞌareg yang lagi it aten garing paꞌ it tagnaꞌ.

Colosas 1:23

Temed gasiꞌ, kaꞌilangan nga maneꞌteꞌ kamu kat pamayaꞌ mi isaꞌun mapaꞌgen baw magꞌuꞌunay talaga, nga ega magꞌugad it maski sang dekeyeꞌ i kasiguruwan mi it tumbas nga ipagsanggup it Magayeng Baritaꞌ. Magayeng Baritaꞌ ngaytu, yanagay ipiyangadal asat imyu it tagnaꞌ, baw kayti ipiyangadal gasiꞌ kat belag-belag nga bangsa it taw situt sinirungat langit. Kat pabetang-betang it Ampuꞌan binwat ya aku, aku nga si Pablo, nga esang manigsirbi ya kat pangadal it ituꞌun ngaytu.

Colosas 1:6

Egaytu lamang asat imyu i inabutan it kamatuudan ngaytu in daꞌga maglekep naytu it banwa. Baw paꞌari-ari nga pagꞌabutun ya magbaꞌguy adat it mga magpamayaꞌ, subung nagat imyu garing it uꞌnang pagkagneg mit ildaw ngaytut Ampuꞌang Diyus baw pagkatantu mi nga kamatuudan talagaytu.

1 Timoteo 2:7

Ta, kat pagpangadal it ituꞌun ngaytu, piyaꞌapustul ya aku. Tiyaꞌeg ya aku nga manigpaꞌrut it karibriyan ngaytu duꞌun it mga taw nga ega Judio, ka ipanulduꞌ kut kanira i kamatuudan ya, isaꞌun pamayaꞌnen nira. Matuud tuy pagꞌaaten ku ngaytu. Egaytu maat ambut ku.

2 Timoteo 1:11

Ta it isaꞌun makapaꞌyag i Magayen ngaytung Baritaꞌ, esa akung binwat nga apustul baw manigpangadal.

2 Timoteo 2:2

Magayen, iyan mga nagnegan mu sinit aken kat adapan it kadakel nga magdedngeg, ipangadal mu kat mga taw nga magkasarigan, isaꞌun magkakayaan na nira nga ipangadal gasiꞌ duꞌun it beken.

Tito 1:5

Ipiyagtuduꞌ ku ikaw asan it Creta isaꞌun ipatindeg mut magayen i mga magpamayaꞌ asan, baw masunud muy taꞌeg ku nga may ipaꞌdung mu nga mga magpamaalaꞌ kat kada rugar nga may magpamayaꞌ na.

Hebreo 11:4

Ka panawun it pikir mi i mga taw it tagnaꞌ nga siyagyaan it Ampuꞌang Diyus. Alimbawa si Abel. Sabap it pamayaꞌ ni Abel ngayti it Ampuꞌang Diyus nagbuwat kanya it panalisi nga pasalamat nga ipiyabetang it Ampuꞌang Diyus nga subraꞌ pang magayen it ki Cain nga pasalamat. Aypaꞌ, ipiyamatuud it Ampuꞌang Diyus nga, si Abel ngayti, mataldeng nga taw. Kamatuudan, tiyanggap ya i kanya nga pasalamat. Kayti, maski maat naꞌlay na nga patay si Abel ngayti, dakulay ipagtulduꞌ it aten it pamayaꞌ yat Ampuꞌang Diyus.

Santiago 3:18

Baw iyan mga magkabwat it dalan nga ipagkagayen, in pagpaꞌresan nira i magayen nga pakiꞌiba-ibat masigkataw nira, kataldengan i tanaꞌan ya.

1 Pedro 3:15

In daꞌga, tingleden mi i nakem mi nga kilalaen it may galang si Cristo, nga kanya talagay Ampuꞌan mi. Kaꞌilangan alistu kamu nga pirmi nga magpaꞌyag kat maski siyu nga mingkut it imyu pasar it pagsisiguruun mi ngaytung Magayeng Baritaꞌ. Temed magꞌintur nga luway-luwayen mi i paꞌyag it kanira baw mampang it may galang.

1 Pedro 3:2

Sabap magkamuyaan niray adat mi nga nakman baw may galang.

1 Juan 4:10

Itu naytuy matuud nga pagmaꞌal, ega maat aten nga pagmaꞌal it Ampuꞌang Diyus, in daꞌga kanya ngaytung pagmaꞌal nga may raras it aten. Ka piyapaꞌasitu yat aten i Anak ya nga buwaten nga panalisi, isaꞌun mapasinsiya it aten i mga kasalaꞌan tami.

1 Juan 4:19

Yay matuud, may pagmaꞌal baw kararas tami nay aten sabap it pagmaꞌalen baw pagrarasan ta nga lagi it Ampuꞌang Diyus.