Juan 14:10 - Tagbanwa

¹⁰ Unu, daꞌka magpamayaꞌ nga aku baw Amaꞌ ku, sang kagina-ginawaan kami? Iyan mga pagꞌampangen ku ngaytu nga ipagꞌaat kut imyu, egaytu pagsadiliyen ku na lamang, in daꞌga iyan Amaꞌ nga kasagpun kut ginawa ku, iyan i magbuwat it mga buwaten ya ngaytu.

Juan 14:10 Iomraidhean Croise

Juan 10:30

Ka aku baw Amaꞌ ku, sang kagina-ginawaan lamang.”

Juan 10:38

Temed in pagbuwaten kuy buwat ya ngaytu, maski ega pagpamayaꞌnen mi aku, kaꞌilangan nga pamayaꞌnen mi i mga pagbuwaten ku ngaytu ka sikayan mi matantuwan baw masiguru nga aku baw Amaꞌ ku, sang kagina-ginawaan kami.”

Juan 11:26

Baw in siyu nga kamatuudan i pamayaꞌ yat aken baw magpangaꞌgenan uyun it pamayaꞌ ya ngaytu, may kaꞌgenan ya talaga nga egay kaskedan. Ta unu, pagpamayaꞌnen muytu?”

Juan 12:49

Sabap egay pagꞌampangen ku nga pagsadiliyen ku lamang, in daꞌga iyan Amaꞌ nga nagtaꞌeg it aken it paꞌasitu, iyan i magꞌaat in unuy ampangen ku baw ipaꞌyag ku.

Juan 14:11

Kaꞌilangan pamayaꞌnen mi nga aku baw Amaꞌ ku, sang kagina-ginawaan kami. In beteꞌ daꞌkamu magpamayaꞌ it mga pagsugiden ku ngaytu, temed sabap it mga buwat nga pagbuwaten ku kaꞌilangan nga pamayaꞌnen mi.

Juan 14:20

Maꞌrutan mi yan it iyang aldaw nga aku baw Amaꞌ ku, sang kagina-ginawaan kami, baw aku baw kamu, ega nay beblagan tami.

Juan 14:24

Iyan egay pagmaꞌal it aken, ega yan sumunud it mga pagꞌaaten ku ngaytu. Mga nagnegan mi ngaytu nga pagꞌampangen ku, egaytu pagbuwat-buwaten ku na lamang. Ampang tu nga matuud it Amaꞌ nga nagtaꞌeg it aken it paꞌasitu.

Juan 17:8

Sabap itiyulduꞌ ku nat kanira i panulduꞌ nga ipiyakarguꞌ mut aken, baw pagpamayaꞌnen talaga nira. Talagang pagsisiguruun na nira nga aku, garing asan it imu, baw pagpamayaꞌnen nira nga ikaw i nagtaꞌeg it aken.

Juan 3:2

Kaꞌsang delem nanungbalay kanya duꞌut ki Jesus. Maat ya, “Manigtulduꞌ, magkaꞌrutan namen nga esa ka nga Manigtulduꞌ nga ipiyatindeg it Ampuꞌang Diyus, sabap egay magkabwat it mga kalililuꞌang bagay nga subuk imu nga pamagbuwaten, in daꞌga pagtabangen kanyat Ampuꞌang Diyus.”

Juan 5:17

Ta it atkayti, inaat sira ni Jesus, “Iyan Amaꞌ ku, sigi nga buwat nga pangildaw. Ta atkayan naga i aken.”

Juan 5:19

Ta it atkayti, inaat ni Jesus i mga Judio ngayti, “Kamatuudan tuy pagꞌaaten ku ngaytut imyu, nga egay magkabwat it Anak in kat sadili ya na lamang, in daꞌga iyan i pagbuwaten ya, iyan nga magkaltegan ya nga pagbuwaten it Amaꞌ. Iyan pagbuwaten it Amaꞌ ya, simpri iyan naga i buwaten ya.

Juan 7:16

Tiyubag sira ni Jesus, nga magꞌaat, “Ipagpanulduꞌ ku ngaytu, egaytu sadili ku, in daꞌga garing tu duꞌut kanya nga nagtaꞌeg it aken ita paꞌasitu.

Juan 8:28

Aypaꞌ maat siꞌ ni Jesus it kanira, “Basta makapatindeg mi na i krus nga pagraransangan it kanya nga Taga Langit nga Ipiyanganak it Taw, sikayan payan matantuwan mi nga talagang matuud i ipagsugid ku nga in siyu aku. Maꞌrutan mi nga egaytuy pagbuwaten ku nga kat sadili ku na lamang, in daꞌga pagꞌampangen ku, iyan nga ipagtulduꞌ it aken it Amaꞌ ku.

Juan 8:38

Ipagsugid ku i mga naltegan ku duꞌut Amaꞌ ku. Atkayan nagay imyu, pagbuwaten mi i in unu-unu nga nagnegan mi duꞌut amaꞌ mi.”

Juan 8:40

Ka ungaytu ga, masyaduy kuꞌimatay mit aken, it ipagsugid ku lamang i kamatuudan nga nagnegan ku duꞌut Ampuꞌang Diyus. Ega yan atkayan i ki Abraham nga buwat.

Mga Binwat 10:38

Si Jesus ngaytu nga taga Nazaret, piniliꞌ kanya baw ipiyasiguru it Ampuꞌang Diyus kat Espiritu Santo nga piyapasarum duꞌun it kanya baw kat ega basta-bastang guna nga ibinggay it kanya. Nanlepkep-lekep kanya it banwa namen, nga magbuwat it mga magagayeng buwat, baw piyagayen ya i pati mga pagpapulpugun it maraꞌe-raꞌet, kat keseg it tabang it Ampuꞌang Diyus nga duꞌun it kanya nga pirmi.

2 Corinto 5:19

Ipagpanulduꞌ namen nga, kat kamataynen ni Cristo inabriyan it Ampuꞌang Diyus i dalan it ipagkagayen it taw duꞌut kanya. Ka sabap it kamataynen ngaytu ni Cristo, mapakay na nga ipabetang it Ampuꞌang Diyus i taw nga ega nay kakasalaꞌan nira. Baw ipiyakarguꞌ ya it amen i pangadal it kamatuudan sabap it ituꞌun ngaytu.

Colosas 1:19

Sabap yay ipiyabetang-betang it Ampuꞌang Diyus nga in magꞌuꞌunu i pagkaDiyus ya, maltegan kat Anak ya nga si Jesus. Aypaꞌ atkayan naga talaga i pagkaDiyus ni Jesus ngaytu.

Colosas 2:9

Ka si Cristo ngaytu, egay piyagbelagan it pagkaDiyus ya baw pagkaDiyus it Ampuꞌang Diyus, sabap sang kagina-ginawaan sira. Lamang piyabilugan i kanya.

1 Juan 5:7

Yay matuud, tulu talagay magpamatuud kaytu pasar it ki Jesu-Cristo, in siyu talaga kanya.