Juan 13:31 - Tagbanwa

³¹ Pagkagaring ni Judas ngayti, miyampang siꞌ si Jesus. Maat ya, “Naꞌbut na nga matanyag nay kabantugan ku, aku nga Taga Langit nga Ipiyanganak it Taw, baw sabap it aken, matanyag gasiꞌ i kabantugan it Ampuꞌang Diyus.

Juan 13:31 Iomraidhean Croise

Mateo 8:20

Katubag si Jesus, maat ya, “Unu, matuud yan? Magayen demdemen mu nga may mga luꞌguꞌ it mga bunglun baw mga manu-manuk, may mga pugad nirat kanira. Temed aku nga Taga Langit nga Ipiyanganak it Taw, egay tandaꞌ nga pagꞌistaran ku, in daꞌga maski ari na lamang.”

Lucas 12:50

Talagang dakulaꞌ nga kakuriꞌan i kaꞌilangan ku nga labayen, nga itu ngaytu, magkasusaan kuytut subraꞌ mintras ega paꞌ natuman.

Juan 11:4

Pagkatuturan duꞌut ki Jesus, maat ya, “Ega bayan kamataynen i baraꞌan it iyan nga sarut. Nagꞌabut lamang yan isaꞌun mabantug i Ampuꞌang Diyus baw sabap gasiꞌ it ikabantug it Anak it Ampuꞌang Diyus.”

Juan 12:23

Katubag si Jesus, nga maat ya, “Naꞌbut nay timpu nga makapaliꞌwan nay kabantugan it Taga Langit nga Ipiyanganak it Taw.

Juan 12:28

Pagkaꞌampang ni Jesus kayti, maat ya, “Amaꞌ, ipalteg muy kadakulat kabantugan mu.” Bawnga may nagnegan it kadakel ngayti nga gaꞌmaran nga garing duꞌut langit, nga magꞌaat, “Ipiyalteg ku na, temed ipalteg ku sit sumaꞌup i kabantugan ku.”

Juan 14:13

Baw in unuy angutun mi kat keseg it pakilagpit mit aken, talagang buwaten ku yan, isaꞌun maltegan i kabantugan it Amaꞌ kat buwaten ku nga Anak ya.

Juan 16:14

Ipalteg yay kadakulat kabantugan ku, ka purus garing situt aken i muꞌsang sugiden yat imyu, nga mga ampang baw buwat kuy ipaꞌyag ya.

Juan 7:39

Pagpapuntuꞌan it ampang ya ngayti, Espiritu Santo nga pasarum duꞌut kumpur mamayaꞌ baw sumarig nat kanya. Lamang iti nga timpu, ega paꞌ magsasarum kat bilug it mga taw. Ega paꞌ tiyaꞌeg kanyat pasarum ka ega paꞌ nakaꞌuliꞌ si Jesus duꞌut langit nga tumanggap it kabantugan nga areg it Amaꞌ ya.

Mga Binwat 2:36

Aypaꞌ kayti, ipagrapar ku nat imyu nga mga tungtung-inapuꞌ ni Israel i kamatuudan ngaytu, nga si Jesus ngaytu nga ipiyaransang mi duꞌun it krus, ipiyatindeg kanyat Ampuꞌang Diyus nga Ampuꞌan baw Manriribring Adiꞌ tami nga muꞌsa.”

Mga Binwat 3:13

Yay matuud, gunaytu it Ampuꞌang Diyus it mga kiyaꞌapuꞌ-apuꞌan ta nga si Abraham, si Isaac baw si Jacob. Ka Ampuꞌang Diyus ngaytu it mga kagiyaringanan tami, binggayan ya nat ega basta-bastang kabantugan i manigsirbi ya nga si Jesus, kanya naga nga ipiyaꞌalima mi duꞌun it gubirnadur nga si Pilato. Eeꞌ baꞌ, daꞌga basaꞌan maski napikir na ni Pilato ngayti nga ipaliꞌwan ya si Jesus, temed magpanduwa-duwa nay pandaꞌga mi?

2 Corinto 3:18

Ta, it kayti nga naꞌawaꞌ na i subuk ipiyayumyum it rupa tami, magkamuyaan ta na i kabantugan it Ampuꞌan, temed ega paꞌ subung it kabantugan ya nga maltegan kat pagdadarapaꞌen. Kabilangan it magkamuyaan kayti, subung paꞌ it magkaltegan duꞌut ega maꞌyag nga salamin. Baw paribasay subuk pirmi tami nga magkamuyaan i kabantugan ya, kat guna it Espiritu Santo nga ipiyapasarum it Ampuꞌan, magsisigi na nga magkabaꞌgu i adat tami, nga magpasbung tami nang muꞌsa it kanya kat kabantugan ya ngaytu.

Efeso 1:12

Baw itu gasiꞌ i pabetang-betang ya nga mangaꞌgenan tami kat ikabantug it kabantugan ya, kami nga uꞌnang tingled i inawar duꞌun it ki Cristo nga begayan it kagayenan ngaytu kat pagdadarapaꞌen,

Efeso 2:7

Binwat yaytu i atkaytu ka isaꞌun, garing kayti seked it kaꞌnu-kaꞌnu, ipatanyag ya i egay kasbung nga kabastantiyan it ildaw ya ngaytu nga ibinggay yat aten it begay-matag kat binwat ngaytu ni Cristo Jesus.

Efeso 3:10

Ka iyan mga magpamegbeg baw may pudir duꞌut lawang, in maltegan nira i pagꞌesa-esa it mga bangsat taw nga magsarig baw magpamayaꞌ nat ki Jesus, matanyag it kanira i kasepsep it Ampuꞌang Diyus it muꞌsang bagay baw kagayen it mga pabetang-betang ya.

Filipos 2:11

Baw kapuꞌsaan ngaytu, pamatuud sira nga si Jesu-Cristo ngaytu, Ampuꞌan talaga kanya, kat ikabantug gasiꞌ it Diyus Amaꞌ.

1 Pedro 1:21

Ta kayti, sabap it binwat ngaytu ni Cristo nga panribri, pagpakimatuudun baw pagsarigan mi nay Ampuꞌang Diyus, kanya nga minggen it kanya it paꞌuliꞌ baw minggay it kanya it ega basta-bastang kabantugan. Nakasiguru na kayti i pagsarig baw inawar mi, nga duꞌun na it Ampuꞌang Diyus.

1 Pedro 2:12

Dapat mi nga inturun i adat mi, ka magkaꞌrutan mi nga maglulubuk-lubuk kamu paꞌ it mga kabanwa mi nga egay pagkilala nira it Ampuꞌang Diyus. Ka maski pagꞌaaten nira nga magbuwat kamu it maraꞌe-raꞌet, matantuwan nira nga magayen palan i adat mi. Aypaꞌ, liꞌwan ya, bantugun niray Ampuꞌang Diyus kat aldaw nga ildawan ya sira it mabaꞌgu i nakem baw pikir nira.

1 Pedro 4:11

In beteꞌ ipiyagꞌildaw it imu nga esang manigpangadal ka, kaꞌilangan gayen-gayenen mu nga ipangadal i ampang it Ampuꞌang Diyus, ega desang panggeꞌad-geꞌad lamang. In beteꞌ inildawan ka it kakayaan nga manigtabang it beken, sarungaen mut magayen kat keseg it kakayaan ngayan nga ipagꞌildaw it Ampuꞌang Diyus it imu. Sabap muꞌsa ngaytu nga buwaten mi kat tabang ni Jesu-Cristo, ipagkabantug talagaytu it Ampuꞌang Diyus. Talagang ega basta-basta i guna baw kabantugan ya nga egay kaskedan. Kamatuudan tu.