Juan 12:40 - Tagbanwa

⁴⁰ “Binleg ya i mga mata nira baw piyadsen ya i mga ulu nira isaꞌun daꞌsira makalteg u makasepsep, u makapaꞌuliꞌ sira duꞌut kanya isaꞌun nga mapagayen ya sira.”

Juan 12:40 Iomraidhean Croise

Exodo 10:1

Bawnga inaat siꞌ it AMPUꞌANG DIYUS si Moises. Maat ya, “Paꞌaduꞌun ka siꞌ it adiꞌ, ka ipasigi ku pay pagmategas ya ngayan baw kat mga katimbang ya isaꞌun matuman kuy mga kalililuꞌang bagay nga kubwaten ku duꞌun it kanira.

Exodo 11:10

Yay matuud, binwat na Moises, duwa ni Aaron, i muꞌsa ngaytung mga kalililuꞌang buwat duꞌut adapan it adiꞌ, temed ega naga nagpalugut kanya it limiꞌwan i mga Israelita duꞌun it banwa ya, sabap it piyategas na kanya it AMPUꞌANG DIYUS.

Exodo 14:8

Piyaꞌuliꞌnan siꞌ it AMPUꞌANG DIYUS i pagmategas it adiꞌ ngayti. Egay beken, inusig ya nagay mga Israelita ngayti nga duꞌun nat pagpanawan nira, nga mamagsasagyay magpanaw.

Exodo 7:13

Temed maski atkayti na, nagpategas naga i adiꞌ ngayti. Ega namayaꞌ it inaat ngayti na Moises duwa ni Aaron, subung nat inaat naga ngayti it AMPUꞌANG DIYUS.

Exodo 7:3

Temed ega payan ipalugut kamu it adiꞌ ngayan ka buwaten ku paꞌ kanya nga mategas. Yay matuud, maski dakel i buwaten ku nga kalililuꞌang bagay situt Egipto,

Exodo 9:12

Temed ta, yanayti, subung nat inaat ngayti it AMPUꞌANG DIYUS nga buwaten ya nga magmategas i adiꞌ ngayti, aypaꞌ pasigi nga pagpasngelan yay pagꞌaaten na Moises, duwa ni Aaron.

Isaias 53:5

Temed palan, nabungadan kanya ka timnanggung it kasalaꞌan tami nga mga taw. Sabap naga it aten nga karaꞌe-raꞌetan piyabastantiyan kanya it pasakit. Ta kayti, nagkagayen tami na it Ampuꞌang Diyus sabap it mga pakuriꞌ ngaytu nga tiyanggap ya, baw naꞌubaꞌubat nay mga kasalaꞌan tami sabap it ega ngaytu teꞌe-teꞌeng nga pasakit nga tiyanggap ya.

Isaias 6:10

Tulduꞌan mu sira it ipagpasugid ku isaꞌun limiꞌwan nga demsen i ulu nira, nga subung it benglen i talinga nira baw belgen i mata. Ka in daꞌga, barang mamagkalteg naga sira, mamagkagneg naga, mamagkasepsep naga, baw paꞌuliꞌ naga sira situt aken nga mapagayen ku naga sira, arit ega.”

Isaias 6:9

Maat siꞌ it AMPUꞌANG DIYUS, “Ta, in atkayan, mapanaw ka na, ka aaten mu i iting mga taw, ‘Maski manamar kamu nat pagneg, daꞌkamu makasepsep. Maski semyek kamu na nga semyek, ega makilaan mi i pagletganan mi.’

Mateo 15:14

Pataꞌnan mi lamang sira. Mga beleg sira nga manigdundun. Ta basta beleg i dumundun it beleg naga, simpri kataptap sirang duwa duꞌun it kali.”

Marcos 4:12

Atkaytuytu ka isaꞌun maski temegel sirat semyek, ega makilalaan niray pagletganan nira. Baw maski manamar nat pagneg, daꞌsira makasepsep. Ka in daꞌga atkayan, barang magsinguliꞌ sira baw pasinsiyaen it Ampuꞌang Diyus.”

Marcos 6:52

Sabap ega paꞌ pagtaꞌseben i pikir nira it kaꞌulugan it binwat ni Jesus duꞌut tinapay ngayti. Subuk ega paꞌ magkaꞌbut it pikir nira i pasar it guna ya.

Lucas 4:18

“Magsasarum situt aken i Espiritu Santo it Ampuꞌang Diyus, ka piniliꞌ baw ipiyasiguru ya aku isaꞌun makapangadal it Magayeng Baritaꞌ duꞌun it mga makukuriꞌ. Tiyaꞌeg ya aku isaꞌun ipaꞌyag ku duꞌun it mga dakepan nga maribri sira, baw iyan subuk beleg ka sakep pat kadleman, maꞌyagan naga sira. Tiyaꞌeg ya aku isaꞌun tabangen talaga i kumpur magkaꞌigpitan,

Lucas 8:10

Tiyubag sira ni Jesus, nga magꞌaat, “Talagang ipiyagꞌildaw it imyu nga maꞌrutan mi i patagu-taguꞌ nga kaꞌulugan it ipagpanulduꞌ ku pasar it kaꞌadiꞌan it Ampuꞌang Diyus. Temed iyan beken, pagꞌalimbawaen lamang, isaꞌun maski temegel sirat semyek, daꞌsira magkalteg. Baw maski manamar na sirat pagneg, ega makasepsep.”

Juan 12:39

Ta it ega ngayti kupamayaꞌ sira, aypaꞌ ka ega na nakapamayaꞌ sira, subung nagat beken ngayang inampang ni Isaias, nga magꞌaat,

Juan 9:39

Miyampang siꞌ si Jesus, maat ya, “Limnampud aku situt banwa isaꞌun ukumanan i katataawan. Iyan mga beleg, makalteg sira, baw iyan nga magkalteg na, subuk mableg sira.”

Mga Binwat 15:3

Egay beken, namagpanaw na na Pablo ngayti. Ipiyagꞌuruꞌ naga sira it beken nga mga magpamayaꞌ. Ta, kada rugar nga magkapsagan it panaw nira, nga sakep it Fenicia baw Samaria, pagtuturanan na Pablo i mga magpamayaꞌ duꞌun it in magꞌuꞌunu dakel nang taw nga ega Judio i namagpamayaꞌ it Ampuꞌan. Yaba-yabasay kagneg nga mga magpamayaꞌ, mamagkasagya sira.

Mga Binwat 28:26

‘Aaten muy ining mga taw, “Maski manamar kamu nat pagneg, talagang daꞌkamu makasepsep. Baw maski semyek kamu na nga semyek, ega makilalaan mi i pagletganan mi.”

Mga Binwat 3:19

Aypaꞌ kayti, magsinguliꞌ kamut kamatuudan baw pasakep kamu nat Ampuꞌang Diyus, isaꞌun mapasinsiya kamu nga maꞌawaꞌ i mga kasalaꞌan mi.

Roma 9:18

Aypaꞌ maꞌyag nga pagꞌildawan it Ampuꞌang Diyus i in siyuy ireg ya nga ildawan, baw pagpadsenen yay ulu it iyan ireg ya nga demsen i ulu.